مجمع الزوائد ومنبع الفوائد

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کو ، کسی مسلمان حکمران کے پاس بلایا جائے ، اور وہ اس کے پاس نہ آئے ، تو وہ ظالم ہو گا “ ( راوی کو شک ہے شاید یہ الفاظ ہیں : ) آپ نے فرمایا : اس کا کوئی حق نہیں ہو گا “ ۔
یہ روایت امام بزار نے نقل کی ہے اس کی سند میں ایک راوی روح بن عطاء بن ابومیمونہ ہے اور وہ ضعیف ہے ، ابن عدی نے اسے ثقہ قرار دیا ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب ایک شخص ، دوسرے کے خلاف مقدمہ کرے ، اور پھر ان دونوں میں سے ایک دوسرے کو اس شخص کی طرف جانے کے لئے کہے ، جو ان دونوں کے درمیان فیصلہ کر سکتا ہو ، اور دوسرا آنے سے انکار کر دے ، تو پھر اُس کو حق نہیں ملے گا “ ۔
یہ روایت امام بزار نے نقل کی ہے ، اس کی سند میں ایک راوی یوسف بن خالد سمتی ہے اور وہ ضعیف ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہم سے فرمایا : ” جب ایک شخص کا دوسرے سے اختلاف ہو ، اور ان دونوں میں سے ایک دوسرے سے کہے : رسول کے پاس چلیں ، تاکہ وہ ان دونوں کے درمیان فیصلہ کر دیں ، تو جو شخص آنے سے انکار کرے گا ، اسے حق نہیں ملے گا “ ۔
یہ روایت امام طبرانی نے معجم کبیر میں نقل کی ہے اس کی سند میں مستور راوی ہیں ۔

ان کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کو سلطان کی طرف بلایا جائے اور وہ نہ جائے ، تو وہ ظالم ہو گا اور اس کو حق نہیں ملے گا“ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی روح بن عطاء ہے ، جسے ابن عدی نے ثقہ قرار دیا ہے اور ائمہ نے اسے ضعیف کہا: ہے ۔