مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” عطیہ دیتے ہوئے ، اپنی اولاد میں برابری رکھو ، اگر میں نے کسی کو فضیلت ( یعنی ترجیح ) دینی ہوتی ، تو میں خواتین کو فضیلت ( یعنی ترجیح ) دیتا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبداللہ بن صالح ہے ، جو لیث کا کاتب ہے ، عبدالملک بن شعیب کہتے ہیں : یہ ثقہ اور مامون ہے ۔ انہوں نے اس کی شان کو بلند قرار دیا ہے ، امام أحمد اور دیگر حضرات نے اسے ضعیف کہا: ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر کوئی شخص اپنے بیٹے کو کوئی عطیہ دے ، اور بیٹا اس چیز کو الگ کر لے ، پھر اگر باپ محتاج ہو جائے ، تو اس چیز کے بارے میں بیٹا زیادہ حق دار ہو گا ، لیکن اگر بیٹے نے اسے الگ نہیں کیا تھا ، تو پھر باپ اس کا زیادہ حق دار ہو گا “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی رشدین بن کریب ہے اور وہ ضعیف ہے ۔

سیدنا یعلی بن مرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص سے فرمایا : تم یہ اونٹ مجھے ہبہ کر دو ، یا یہ مجھے فروخت کر دو ! اس نے عرض کی : یا رسول اللہ ! یہ آپ کا ہوا ، تو نبی اکرم صلی اللہ علیہ وسلم نے اس پر صدقہ کا مخصوص نشان لگوا کر پھر اسے بھجوا دیا ۔
یہ روایت امام طبرانی نے معجم کبیر میں اسی طرح کسی اضافے کے بغیر نقل کی ہے ۔
یہ روایت امام أحمد نے ایک طویل حدیث کے ضمن میں نقل کی ہے ، جس کے مختلف طرق نبوت کی علامات سے متعلق باب میں آگے آئیں گے ۔ یہ دونوں روایات عبدالرحمن بن عبدالعزیز سے منقول ہیں ، اور یہ وہ شخص نہیں ہے ، جس کے حوالے سے امام مسلم نے اسی طرح سیدنا یعلی رضی اللہ عنہ سے روایت نقل کی ہے ، وہ شخص زہری کے حوالے سے روایت نقل کرتا ہے ، حسینی کے علاوہ میں نے کسی کو اس کے حالات بیان کرتے ہوئے نہیں پایا ہے ، انہوں نے اس کے حالات میں ان لوگوں کا ذکر کیا ہے ، جس سے اس نے روایت نقل کی ہے اور جنہوں نے اس سے سماع کیا ہے اس روایت کے بقیہ رجال صحیح کے رجال ہیں ۔