مجمع الزوائد ومنبع الفوائد

سیدنا عبداللہ بن عمرو رضی اللہ عنہ کے بارے میں منقول ہے : انہوں نے زمین کے بارے میں اپنے منشی کو خط میں لکھا کہ تم نے اپنے اضافی پانی کے بارے میں کسی کو روکنا نہیں ہے ، کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اضافی پانی کو روک دے ، تاکہ اس کے ذریعے اضافی گھاس پھوس نہ ہو ، تو اللہ تعالی قیامت کے دن اس شخص سے اپنے فضل کو روک لے گا “ ۔

ایک روایت میں یہ الفاظ ہیں : ” جو شخص اضافی پانی کو روک لے ، یا اضافی گھاس پھوس کو روک لے ۔ ۔ ۔ ۔ ۔ ۔ ۔ “
یہ روایت امام أحمد نے نقل کی ہے ، اس کی سند میں ایک راوی محمد بن راشد خزاعی ہے اور وہ ثقہ ہے ، بعض حضرات نے اسے ضعیف قرار دیا ہے ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اضافی پانی سے نہ روکو ، اور گھاس سے نہ روکو ، ورنہ پانی کم ہو جائے گا اور بال بچے بھوکے ہو جائیں گے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : مسعودی بیان کرتے ہیں : میرے خیال میں انہوں نے ” مرفوع “ حدیث کے طور پر یہ بات نقل کی ہے ۔ نبی اکرم صلی اللہ علیہ وسلم نے ارشاد فرمایا ہے : ” جب تم اس سے بے نیاز ہو جاؤ تو اضافی پانی یا اضافی چراگاہ ( یعنی گھاس پھوس ) سے منع نہ کرو “ ۔ ( علامہ ہیثمی فرماتے ہیں : ) میں یہ کہتا ہوں : میں نے روایت کی ان الفاظ کی وجہ سے اسے یہاں نقل کیا ہے : ” اس کے بعد کہ آدمی اس سے بے نیاز ہو جائے “ ۔
یہ روایت امام أحمد نے نقل کی ہے ۔

سیدنا سعد بن ابی وقاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اضافی پانی کو روک لے گا قیامت کے دن اللہ تعالیٰ اپنا فضل اس سے روک لے گا“ ۔
یہ روایت امام ابویعلیٰ نے نقل کی ہے اور اس کی سند میں ایسا راوی ہے ، جس کا نام بیان نہیں کیا گیا ہے ۔

سیدنا انس رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” دو چیزیں ایسی جنہیں روکنا حلال نہیں ہے پانی اور آگ “ ۔
یہ روایت امام بزار نے اور امام طبرانی نے معجم صغیر میں نقل کی ہے اس کی سند میں ایک راوی حسن بن ابوجعفر ہے اور وہ ضعیف ہے اس کی کمزور توثیق کی گئی ہے ۔

سیدنا عبداللہ بن سرجس رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا میں آپ کی قمیص اور آپ کی جلد کے درمیان داخل ہوا میں نے مہر نبوت کا بوسہ لیا میں نے عرض کی : وہ کیا چیز ہے ، جسے روکنا حلال نہیں ہے ؟ نبی اکرم صلی اللہ علیہ وسلم نے فرمایا : نمک میں نے عرض کی : پھر کون سی چیز ہے ؟ آپ نے فرمایا : پانی اور آگ ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کی سند میں ایک راوی یحیی بن سعید عطار ہے ، جو متروک ہے ۔

سیدنا واثلہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ کے بندوں کو اضافی پانی سے ( اضافی ) گھاس سے اور ( اضافی ) آگ سے نہ روکو ! کیونکہ اللہ تعالیٰ نے انہیں قوت رکھنے والے لوگوں کے لئے ضرورت کی چیز اور کمزوروں کے لئے قوت کا باعث بنایا ہے “ ۔
یہ روایت امام طبرانی نے معجم کبیر میں ایسی سند کے ساتھ نقل کی ہے ، جس کے بارے میں ابن حبان نے کہا: ہے کہ اس سند کے ساتھ جو روایت نقل کی جائے گی وہ جھوٹی ہو گی ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” راستے کو نہیں کاٹا جائے گا ( یعنی ڈاکہ نہیں ڈالا جائے گا ) اور اضافی پانی سے نہیں روکا جائے گا اور مسافر کو عاریت کے طور پر ڈول رسی اور حوض سے نہیں روکا جائے گا اگر اس کے پاس سامان موجود نہ ہو ، تو تم ویسے اس کی مدد کر دو ، اور اس کو چرخی کے پاس جانے دیا جائے گا ، تاکہ وہ پانی پی لے اور کنویں کے ارد گرد کی جگہ سے نہیں روکا جائے گا جو پچیس ذراع تک ہو گی کہ جانور پانی پینے کے بعد وہاں بیٹھ سکیں“ ۔
یہ روایت امام طبرانی نے معجم کبیر میں نقل کی ہے اور اس کی سند میں مستور راوی ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کے پاس اس کا چچا زاد آئے اور اس سے اضافی چیز مانگے اور وہ شخص اسے نہ دے تو اللہ تعالی قیامت کے دن اس سے اپنا فضل روک لے گا اور جو شخص اضافی پانی روک لیتا ہے تاکہ اس کے ذریعے اضافی گھاس کو روک دے تو قیامت کے دن اللہ تعالی اس سے اپنا فضل روک لے گا “ ۔
یہ روایت امام طبرانی نے معجم صغیر اور معجم اوسط میں نقل کی ہے امام أحمد نے اس میں سے صرف اضافی پانی کی ممانعت والا حصہ نقل کیا ہے امام أحمد کے رجال ثقہ ہیں ان میں سے بعض کے بارے میں ایسا کلام کیا گیا ہے ، جو نقصان دہ نہیں ہے امام طبرانی کی سند میں ایک راوی محمد بن حسن فردوسی ہے ، جسے ازدی نے اس حدیث کے حوالے سے ضعیف قرار دیا ہے اور فرمایا : یہ محفوظ نہیں ہے ۔