مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : اللہ تعالیٰ نے اپنے رسول کو خیبر مال فئے کے طور پر دیا ، تو نبی اکرم صلی اللہ علیہ وسلم نے ان لوگوں کو وہاں رہنے دیا ، آپ نے وہاں کی زمین ( کی پیداوار ) کو ان لوگوں کے اور اپنے درمیان دو حصوں میں تقسیم کر دیا ، آپ نے سیدنا عبداللہ بن رواحہ رضی اللہ عنہ کو بھیجا انہوں نے پیدوار کا اندازہ لگایا ، پھر یہ ارشاد فرمایا : اے یہودیوں کے گروہ ! تم میرے نزدیک مخلوق میں سب سے زیادہ ناپسندیدہ ہو ، تم نے اللہ تعالیٰ کے انبیاء کو قتل کیا ، تم نے اللہ تعالیٰ کی طرف جھوٹی بات منسوب کی ، لیکن تمہارے ساتھ میرا بغض مجھے اس بات پر مجبور نہیں کرتا کہ میں تمہارے ساتھ زیادتی کروں ، میں نے یہ اندازہ لگایا ہے کہ کھجور کے بیس ہزار وسق ہوں گے ، اگر تم چاہو ، تو اس حساب سے تم لے لو اور اگر تم نہیں مانتے ، تو پھر میں لے لیتا ہوں ، انہوں نے کہا: اسی ( حق اور انصاف ) کی وجہ سے آسمان اور زمین قائم ہیں ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا عبداللہ بن رواحہ رضی اللہ عنہ کو خیبر کی طرف بھیجا ، انہوں نے ان لوگوں کے لئے پیدوار کا اندازہ لگایا اور پھر انہیں یہ اختیار دیا کہ وہ اس حساب کے مطابق یا وصولی کر لیں ، یا ادائیگی کر دیں ، تو ان لوگوں نے کہا: اسی ( انصاف کی ) وجہ سے آسمان اور زمین قائم ہیں ۔
یہ روایت امام أحمد نے نقل کی ہے اس کی سند میں ایک راوی عمری ہے اس کی نقل کردہ حدیث حسن ہے اور اس کے بارے میں کلام کیا گیا ہے اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : جب اللہ کے رسول نے خیبر کو فتح کر لیا تو آپ نے یہودوں کے ساتھ یہ طے کیا کہ یہودی نصف پھل مسلمانوں کو ادا کریں گے ، اور زمین کی دیکھ بھال ( یعنی کام کاج ) وہ کریں گے اور یہ کہ میں تمہیں اس وقت تک یہاں رہنے دوں گا ، جب تک اللہ تعالیٰ تمہیں یہاں رہنے دے گا ، نبی اکرم صلی اللہ علیہ وسلم نے سیدنا عبداللہ بن رواحہ رضی اللہ عنہ کو بھیجا ، انہوں نے وہاں کی پیدوار کا اندازہ لگایا اور پھر ان لوگوں کو یہ اختیار دیا کہ وہ اس کے مطابق یا تو حاصل کر لیں ، یا اتنا حصہ ترک کر دیں ، یہودی ، نبی اکرم صلی اللہ علیہ وسلم کی خدمت میں حاضر ہوئے ، انہوں نے آپ کے سامنے یہ شکایت کی کہ انہوں نے زیادہ اندازہ لگایا ہے ، نبی اکرم صلی اللہ علیہ وسلم نے سیدنا عبداللہ بن رواحہ رضی اللہ عنہ کو بلوایا اور ان کے سامنے یہ بات ذکر کی جو ان لوگوں نے کہا: تھا ، تو سیدنا عبداللہ رضی اللہ عنہ نے عرض کی : وہ چیز میرے پاس ہے ، یا رسول اللہ ! اگر یہ چاہیں تو یہ اس کے مطابق وصول کر لیں اور اگر چاہیں تو اسے چھوڑ دیں ، اس کو ہم لے لیتے ہیں تو یہودی راضی ہو گئے ، انہوں نے کہا: اسی وجہ سے آسمان اور زمین قائم ہیں ۔ ( راوی بیان کرتے ہیں : ) پھر نبی اکرم صلی اللہ علیہ وسلم نے اپنی بیماری کے دوران ، جس میں آپ صلی اللہ علیہ وسلم کا وصال ہوا ، یہ ارشاد فرمایا : ” جزیرہ نما عرب میں دو دین اکٹھے نہیں رہیں گے “ ۔ جب سیدنا عمر رضی اللہ عنہ کو اس بات کی اطلاع ملی ، تو انہوں نے خیبر کے یہودیوں کو پیغام بھیجا اور فرمایا : اللہ کے رسول نے تمہیں ان زمینوں پر اس وقت تک رہنے دیا تھا اور تمہارے لئے یہ شرط عائد کی تھی کہ وہ تمہیں اس وقت تک رہنے دیں گے ، جب تک اللہ تعالیٰ تمہیں رہنے دے گا ، تو اب اللہ تعالیٰ نے تمہیں جلاوطن کرنے کی اجازت دے دی ہے ، تو سیدنا عمر رضی اللہ عنہ نے ہر یہودی اور ہر عیسائی کو حجاز کی سرزمین سے جلاوطن کر دیا ، اور پھر وہاں کی سرزمین اہل مدینہ کے درمیان تقسیم کر دی ۔
یہ روایت امام بزار نے نقل کی ہے اس کی سند میں ایک راوی صالح بن ابوخضر ہے اور وہ صالح ہے اور وہ ضعیف ہے ، ویسے اس کی توثیق کی گئی ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے نصف ( راوی کو شک ہے ، شاید یہ الفاظ ہیں : ) ایک چوتھائی پیدوار کے عوض میں خیبر ( یہودیوں کو ) دیا تھا ۔
یہ روایت امام بزار نے نقل کی ہے اس کی سند میں ایک راوی خزرج بن خطاب ہے ، جسے ازدی نے ضعیف قرار دیا ہے ۔

عروہ بیان کرتے ہیں : جب نبی اکرم صلی اللہ علیہ وسلم نے خیبر فتح کیا ، تو آپ نے سیدنا عبداللہ بن رواحہ رضی اللہ عنہ کو بھیجا ، تاکہ وہ یہودیوں کے ساتھ حصے طے کر لیں ، جب سیدنا عبداللہ رضی اللہ عنہ ان لوگوں کے پاس آئے ، تو انہوں نے سیدنا عبداللہ رضی اللہ عنہ کو اناج تحفے کے طور پر دیا ، تو سیدنا عبداللہ رضی اللہ عنہ نے ان سے کوئی بھی چیز لینے کو ناپسندیدہ قرار دیا اور یہ فرمایا : اللہ کے رسول نے مجھے اپنے اور تمہارے درمیان عدل کے مطابق فیصلہ کرنے والے کے طور پر بھیجا ہے ، تو تمہارے ہدیہ میں مجھے کوئی دلچپسی نہیں ہے ، پھر انہوں نے ان کی کھجوروں کا اندازہ لگایا جب ان کا اندازہ مکمل ہو گیا تو سیدنا عبداللہ رضی اللہ عنہ نے انہیں اختیار دیا اور فرمایا : اگر تم چاہو ، تو میں تمہیں تمہارا حصہ ادا کر دیتا ہوں ، تم اس پر قائم رہو ، اگر تم چاہو ، تو تم ہمیں ہمارا حصہ ادا کر دو اور تم اس پر قائم رہو ، تو انہوں نے اس بات کو اختیار کیا کہ وہ حصہ ادا کر دیں گے اور اس پر قائم رہیں گے ، ان لوگوں نے کہا: اے ابن رواحہ ! یہ جو آپ نے ہمیں پیشکش کی ہے اور جس کے مطابق آپ عمل کر رہے ہیں ، اسی کی وجہ سے آسمان اور زمین قائم ہیں ، یہ دونوں حق کی وجہ سے قائم ہیں ۔ ( راوی بیان کرتے ہیں : ) خیبر کے حصے ہر اس شخص کو ملے تھے ، جو حدیبیہ میں شریک ہوا تھا ، اس میں کوئی ایسا شخص شریک نہیں ہوا تھا ، جو حدیبیہ میں شریک نہ ہوا ہو ، اور اُن لوگوں کے علاوہ کوئی اور اس میں شریک نہیں ہوا تھا ، نبی اکرم صلی اللہ علیہ وسلم نے خیبر میں موجودگی کے زمانے میں کسی بھی شخص کو اس بات کی اجازت نہیں دی تھی کہ وہ حدیبیہ کی طرف نکلنے سے پیچھے رہے ۔
یہ روایت امام طبرانی نے معجم کبیر میں اسی طرح ” مرسل “ روایت کے طور پر نقل کی ہے اس کی سند میں ایک راوی ابن لہیعہ ہے اور وہ حسن الحدیث ہے ، اس روایت کے بقیہ رجال صحیح کے رجال ہیں ۔

ابن شہاب ، فتح خیبر کے بارے میں یہ بات بیان کرتے ہیں : نبی اکرم صلی اللہ علیہ وسلم نے سیدنا عبداللہ بن رواحہ رضی اللہ عنہ کو بھیجا ، تاکہ وہاں کے پھل یہودیوں کے درمیان تقسیم کر دیں ، جب سیدنا عبداللہ رضی اللہ عنہ ان لوگوں کے پاس آئے ، تو ان لوگوں نے سیدنا عبداللہ رضی اللہ عنہ کو اناج تحفے کے طور پر دیا اور ان کے ساتھ بات چیت کرنے لگے ، انہوں نے خواتین کے کچھ زیور بھی انہیں دینا چاہے ، ان لوگوں نے کہا: یہ آپ کے لئے ہیں اور آپ ہمارے ساتھ تخفیف کر دیں اور درگزر سے کام لیں ، سیدنا ابن رواحہ رضی اللہ عنہ نے فرمایا : اے یہودیوں کے گروہ ! اللہ کی قسم ! تم لوگ میرے نزدیک سب لوگوں سے زیادہ ناپسندیدہ ہو ، اللہ کے رسول نے مجھے تمہارے اور اپنے درمیان انصاف کے مطابق فیصلہ کرنے والے کے طور پر بھیجا ہے ، مجھے تمہاری دنیا کے ساتھ کوئی دلچپسی نہیں ہے اور میں تمہارے ساتھ کوئی زیادتی بھی نہیں کروں گا ، تم نے مجھے حرام کی پیشکش کی ہے ، میں اسے نہیں کھاؤں گا ، پھر انہوں نے کھجوروں کی پیدوار کا اندازہ لگایا ، جب وہ پیدوار کا اندازہ لگا کر فارغ ہوئے تو انہوں نے ان لوگوں کو اختیار دیا اور فرمایا : اگر تم چاہو ، تو میں تمہارے لئے تمہارے حصے کا ضامن بن جاتا ہوں اور اگر تم چاہو ، تو تم ہمارے لئے ہمارے حصے کے ضامن بن جاؤ اور باقی تم خود سنبھال لو ، تو ان لوگوں نے اس بات کو اختیار کیا کہ وہ لوگ ضامن بن جاتے ہیں اور اس کی دیکھ بھال کرتے رہیں گے ، ان لوگوں نے کہا: اے ابن رواحہ ! یہ جو آپ لوگ عمل کرتے ہیں ، اسی کی وجہ سے آسمان اور زمین قائم ہیں اور یہ دونوں حق کی وجہ سے قائم ہیں ۔
یہ روایت امام طبرانی نے معجم کبیر میں ” مرسل “ روایت کے طور پر نقل کی ہے اور اس کے رجال صحیح کے رجال ہیں ۔

عبداللہ بن عبید بن عمیر ، خیبر کے یہودیوں کے ساتھ نبی اکرم صلی اللہ علیہ وسلم کے معاہدے کے بارے میں بیان کرتے ہوئے ، یہ بیان کرتے ہیں : آپ نے ارشاد فرمایا : کھجوروں کی پیدوار کا نصف ہمیں ملے گا اور نصف تمہیں ملے گا اور کام کاج ہماری جگہ تم نے کرنا ہے ، یہاں تک کہ جب وہاں کا پھل تیار ہو گیا ، تو وہ لوگ نبی اکرم صلی اللہ علیہ وسلم کی خدمت میں حاضر ہوئے ۔ انہوں نے نبی اکرم صلی اللہ علیہ وسلم کی خدمت میں گزارش کی کہ ہماری کھجوریں تیار ہو چکی ہیں ، آپ کسی اندازہ لگانے والے کو بھیجیں ، جو ہمارے اور آپ کے درمیان ( پیدوار ) کا اندازہ لگا لے ، تو نبی اکرم صلی اللہ علیہ وسلم نے سیدنا عبداللہ بن رواحہ رضی اللہ عنہ کو بھیجا ، جب انہوں نے وہاں کے کھجوروں کے درختوں کا چکر لگایا اور ان کا جائزہ لیا تو بولے : اللہ کی قسم ! میرے علم کے مطابق ، اللہ کی مخلوق میں سے تم سے زیادہ اللہ تعالی کی طرف جھوٹی بات منسوب کرنے والا اور اللہ کے رسول کا دشمن ، اور کوئی نہیں ہے ، اور اللہ کی قسم ! اللہ تعالیٰ نے کوئی ایسی مخلوق پیدا نہیں کی ہے ، جو میرے نزدیک تم سے زیادہ ناپسندیدہ ہو ، اللہ کی قسم ! لیکن اس بات نے بھی مجھے اس بات پر مجبور نہیں کیا کہ میں تمہارے ساتھ ذرے کے وزن جتنی زیادتی کروں ، اور میں اس بارے میں علم رکھتا ہوؤں ، راوی کہتے ہیں : پھر انہوں نے تمام پیداوار کا اندازہ لگایا ، جو ان کے اور یہودیوں کے حصے میں آنی تھی ، تو وہ اسی ہزار وسق بنتے تھے ، یہودیوں نے کہا: آپ نے ہمارے ساتھ زیادتی کی ہے ، سیدنا ابن رواحہ رضی اللہ عنہ نے کہا: اگر تم چاہو ، تو ہمیں چالیس ہزار وسق دے دو ، ہم پھل تمہارے حوالے کر دیں گے اور اگر تم چاہو ، تو ہم تمہیں چالیس ہزار وسق دے دیتے ہیں ، اور تم ہم سے الگ ہو جانا ، ان لوگوں نے ایک دوسرے کی طرف دیکھا اور پھر بولے : اسی کی وجہ سے آسمان اور زمین قائم ہیں ، اسی کی وجہ سے یہ لوگ تم لوگوں پر غالب آئے ہیں ۔
یہ روایت امام طبرانی نے معجم کبیر میں ” مرسل “ روایت کے طور پر نقل کی ہے اور اس کے رجال صحیح کے رجال ہیں ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے عرینہ کی بستیوں کی طرف بھیجا ، آپ نے مجھے یہ ہدایت کی کہ میں زمین کا حصہ وصول کر لوں ۔
یہ روایت امام أحمد نے نقل کی ہے اور امام طبرانی نے معجم کبیر میں نقل کی ہے ، وہ بیان کرتے ہیں ، اشجعی فرماتے ہیں : اس سے مراد ، پیدوار کا ایک تہائی ، یا ایک چوتھائی حصہ ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی جابر جعفی ہے اور وہ ضعیف ہے ، شعبہ اور سفیان نے اسے ثقہ قرار دیا ہے ۔

سیدنا رافع بن خدیج رضی اللہ عنہ بیان کرتے ہیں : نبی اکرم صلی اللہ علیہ وسلم نے محاقلہ اور مزابنہ سے منع کیا ہے ، آپ صلی اللہ علیہ وسلم نے ارشاد فرمایا ہے : ” تین صورتوں میں کھیتی باڑی کی جا سکتی ہے ، آدمی کی اپنی زمین ہو ، وہ اس میں کھیتی باڑی کرے ، آدمی کو زمین عطیہ کے طور پر دی گئی ہو ، تو وہ کھیتی باڑی کر لے گا ، آدمی نے زمین سونے یا چاندی کے عوض میں کرائے پر حاصل کی ہو “ ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اس سیاق کے بغیر مذکور ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے زمین کے کرائے کو حرام قرار نہیں دیا ہے ، بلکہ آپ نے عمدہ اخلاق کو اختیار کرنے کا حکم دیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عمر بن وجیہ ہے ، میں نے کسی کو اس کے حالات بیان کرتے ہوئے نہیں پایا ہے ۔

عامر بن عبدالرحمن بن نسطاس ، خیبر فتح ہونے کے بارے میں یہ بیان کرتے ہیں : اللہ کے رسول صلی اللہ علیہ وسلم نے اسے فتح کر لیا ، وہاں کی تمام زمین ، کھیت اور کھجوروں کے باغات ، نبی اکرم صلی اللہ علیہ وسلم کی ملکیت میں آ گئے لیکن آپ کے اور آپ کے اصحاب کے پاس اتنے غلام نہیں تھے ( جو وہاں کام کاج کر سکتے ) تو نبی اکرم صلی اللہ علیہ وسلم نے یہودیوں کے ساتھ اس بات پر مصالحت کی کہ تم لوگ ہماری جگہ کام کرو گے اور کھجوروں کی نصف پیدوار تمہیں مل جائے گی ، اس شرط پر کہ میں تمہیں یہاں اس وقت تک رہنے دوں گا ، جب تک اللہ اور اس کے رسول کو منظور ہو گا ، ( پھر جب کھجوریں اتارنے کا وقت آیا ) تو آپ صلی اللہ علیہ وسلم سیدنا ابن رواحہ رضی اللہ عنہ کو بھیجا ، تاکہ وہ وہاں کی پیدوار کا اندازہ لگائیں ، جب سیدنا عبداللہ بن رواحہ رضی اللہ عنہ نے انہیں اختیار دیا ، تو یہودیوں نے کھجوروں کو اختیار کر لیا ۔ اس کے بعد نبی اکرم صلی اللہ علیہ وسلم کی صلح کے مطابق ، خیبر مسلسل یہودیوں کے پاس رہا ، یہاں تک کہ جب سیدنا عمر رضی اللہ عنہ کا زمانہ آیا تو انہوں نے انہیں وہاں سے نکالنے کا حکم دیا ، یہودیوں نے کہا: کیا نبی اکرم صلی اللہ علیہ وسلم نے ہمارے ساتھ اتنی ، اتنی پیدوار کے عوض میں مصالحت نہیں کی تھی ؟ تو سیدنا عمر رضی اللہ عنہ نے فرمایا : جی ہاں ! کی تھی لیکن اس شرط پر کی تھی کہ جب تک اللہ اور اس کے رسول کو منظور ہو گا ، اس وقت تک ہم تمہیں یہاں رہنے دیں گے ، اب مجھے یہ مناسب لگتا ہے کہ میں تمہیں نکال دوں ، تو سیدنا عمر رضی اللہ عنہ نے انہیں نکال دیا پھر انہوں نے وہاں کی زمین ان مسلمانوں کے درمیان تقسیم کر دی ، جو نبی اکرم صلی اللہ علیہ وسلم کے ساتھ اس کی فتح میں شریک ہوئے تھے سیدنا عمر رضی اللہ عنہ نے اس زمین میں سے کسی ایسے شخص کو کچھ بھی نہیں دیا ، جو خیبر کی فتح میں موجود نہیں تھا ۔ راوی کہتے ہیں : اب وہاں کے مالکان مسلمان ہیں اور وہاں کوئی یہودی نہیں ہے ، نبی اکرم صلی اللہ علیہ وسلم نے اندازہ لگانے کا حکم اس لئے دیا تھا ، تاکہ پھلوں کے کھائے جانے سے پہلے زکوۃ کا شمار ہو سکے ۔
یہ روایت امام طبرانی نے معجم کبیر میں نقل کی ہے ، عامر نامی اس راوی کے حالات بیان کرتے ہوئے میں نے کسی کو نہیں پایا ہے اس روایت کے بقیہ رجال صحیح کے رجال ہیں ۔