مجمع الزوائد ومنبع الفوائد

ابوحرہ رقاشی ، اپنے چچا کا یہ بیان نقل کرتے ہیں : میں نے حجتہ الوداع کے موقع پر ایام تشریق کے درمیانی دن میں ، نبی اکرم صلی اللہ علیہ وسلم کی اونٹنی کی لگام کو پکڑا ہوا تھا ، آپ نے جو بات ارشاد فرمائی ، اس میں یہ بات بھی تھی : آپ نے فرمایا : ” اے لوگو ! ہر سود کالعدم قرار دیا جاتا ہے ، اور وہ سب سے پہلا سود جسے کالعدم قرار دیا جاتا ہے وہ سیدنا عباس بن عبدالمطلب رضی اللہ عنہ کا وصول کیا جانے والا سود ہے ، ( سودی معاملات میں ) تمہارے اصل اموال تمہیں مل جائیں گے ، نہ تم ظلم کرو اور نہ تم پر ظلم کیا جائے “ ۔
یہ روایت امام ابویعلیٰ نے نقل کی ہے اس کی سند میں ایک راوی علی بن زید ہے اور وہ ضعیف ہے ویسے اس کی توثیق کی گئی ہے ابوحرہ نامی راوی کو امام ابوداؤد نے ثقہ قرار دیا ہے اور یحیی بن معین نے انہیں ضعیف کہا: ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سود کے ستر دروازے ہیں اور شرک بھی اس کی مانند ہے ( یعنی اُس کے بھی ستر دروازے ہیں ) “ ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔
یہ روایت امام ابن ماجہ نے اختصار کے ساتھ نقل کی ہے کہ ” شرک بھی اس کی مانند ہے “ ۔

سیدنا عبداللہ بن حنظلہ رضی اللہ عنہ ، جنہیں فرشتوں نے غسل دیا تھا ، وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” سود کا ایک درہم ، جسے کوئی شخص جانتے بوجھتے ہوئے کھا لیتا ہے ، وہ چھتیس مرتبہ زنا کرنے سے زیادہ ( بڑا گناہ ) ہے “ ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ، امام أحمد کے رجال صحیح کے رجال ہیں ۔

سیدنا عبداللہ بن سلام رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” وہ ایک درہم ، جسے آدمی سود کے حوالے سے حاصل کرتا ہے ، وہ اللہ تعالیٰ کی بارگاہ میں تینتیس مرتبہ زنا کرنے سے زیادہ بڑا ( گناہ ) ہے ، جو زنا اُس نے زمانہ اسلام میں کیے ہوں“ ۔
یہ روایت امام طبرانی نے معجم کبیر میں نقل کی ہے عطاء خراسانی نے سیدنا عبداللہ بن سلام رضی اللہ عنہ سے سماع نہیں کیا ہے ۔

سیدنا براء بن عازب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سود کے بہتر دروازے ہیں ، جن میں سے سب سے کم تر یہ ہے کہ کوئی شخص اپنی ماں کے ساتھ صحبت کر لے ، اور سب سے بڑا سود یہ ہے کہ آدمی اپنے بھائی کی عزت پر حملہ آور ہو “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عمر بن راشد ہے ، جسے عجلی نے ثقہ قرار دیا ہے اور جمہور ائمہ نے اسے ضعیف کہا: ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی ظالم کی ، باطل چیز کے حوالے سے مدد کرتا ہے ، تاکہ اس کے ذریعے حق کو پرے کر دے ، تو ایسا شخص اللہ کے ذمہ اور اللہ کے رسول کے ذمہ سے لاتعلق ہو جاتا ہے ، اور جو شخص سود کا ایک درہم کھاتا ہے ، تو یہ تینتیس مرتبہ زنا کرنے کی مانند ہے ، اور جس شخص کے گوشت کی نشوونما حرام پر ہوئی ہو ، تو آگ اُس کی زیادہ حق دار ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی سعید بن رحمہ ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس رات مجھے معراج کروائی گئی ، میں نے دیکھا کہ جب ہم ساتویں آسمان پر پہنچے ، تو میں نے اوپر دیکھا ( یہاں ایک راوی نے یہ الفاظ نقل کیے ہیں : میں نے اپنے اوپر دیکھا ) تو وہاں کڑک تھی ، بجلی تھی ، چمکتی ہوئی بجلیاں تھیں ، نبی اکرم صلی اللہ علیہ وسلم فرماتے ہیں : میں کچھ لوگوں کے پاس آیا ، جن کے پیٹ گھروں کی مانند تھے ، جن میں سانپ موجود تھے ، باہر سے اُن کے پیٹ دکھائی دے رہے تھے میں نے دریافت کیا : جبرائیل یہ کون لوگ ہیں ؟ انہوں نے بتایا : یہ سود کھانے والے ہیں “ ۔ ( علامہ ہیثمی فرماتے ہیں : ) میں یہ کہتا ہوں : امام أحمد نے عجائب مخلوقات کے بارے ایک طویل حدیث کے ضمن میں نقل کی ہے
یہ روایت امام ابن ماجہ نے اختصار کے ساتھ نقل کی ہے ، اس کی سند میں ایک راوی علی بن زید ہے اور اس کے بارے میں کلام کیا گیا ہے ، اس پر ضعیف ہونا غالب ہے ۔

کعب احبار بیان کرتے ہیں : میں تینتیس مرتبہ زنا کر لوں ، یہ میرے نزدیک اس سے زیادہ پسندیدہ ہو گا کہ میں ایک درہم سود کا کھا لوں جس کے بارے میں اللہ تعالیٰ یہ جانتا ہو کہ جب میں نے اسے کھایا ہے ، تو اسے سود کے طور پر کھایا ہے ۔
یہ روایت امام أحمد نے حنظلہ بن راہب کے حوالے سے کعب احبار سے نقل کی ہے حسینی نے یہ بات ذکر کی ہے : حنظلہ نامی یہ صاحب وہی ہیں ، جنہیں فرشتوں نے غسل دیا تھا ، اگر ایسا ہی ہو وہ تو غزوہ احد کے موقع پر شہید ہو گئے تھے ، تو وہ کعب احبار سے کیسے روایت حاصل کر سکتے ہیں ؟ اور اگر یہ ان کے علاوہ کوئی اور ہیں ، تو پھر میں اس سے واقف نہیں ہوں ، بظاہر یہ لگتا ہے کہ یہ ان کے صاحبزادے عبداللہ بن حنظلہ ہیں ، اور اصل میں عبداللہ کا نام ساقط ہو گیا ہے ، باقی اللہ بہتر جانتا ہے ، اس روایت کے سیدنا حنظلہ رضی اللہ عنہ تک تمام رجال صحیح کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : سود کھانے والا ، اسے کھلانے والا ، اس کو لکھنے والا اس کے دونوں گواہ ، جب وہ لوگ اس کے بارے میں جانتے ہوں ، اور حسن کی خاطر جسم گودنے والی عورت اور گدوانے والی عورت ، اور صدقہ نہ دینے والا شخص ، اور ہجرت کے بعد مرتد ہو کر دیہاتی زندگی اختیار کرنے والا فرد ( ان سب پر ) سیدنا محمد صلی اللہ علیہ وسلم کی زبانی لعنت کی گئی ہے یا یہ سیدنا محمد صلی اللہ علیہ وسلم کی زبانی ملعون قرار پائے ہیں ) ۔ ( علامہ ہیثمی فرماتے ہیں : ) میں یہ کہتا ہوں : صحیح اور دیگر کتابوں میں اس کا کچھ حصہ منقول ہے ۔
یہ روایت امام أحمد نے امام ابویعلیٰ نے اور امام طبرانی نے معجم کبیر میں نقل کی ہے اس کی سند میں ایک راوی حارث اعور ہے اور وہ ضعیف ہے ویسے اس کی توثیق کی گئی ہے ۔

سیدنا عمرو بن العاص رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ” جب بھی کسی قوم میں سود پھیل جاتا ہے ، تو انہیں قحط سالی اپنی گرفت میں لے لیتی ہے اور جب بھی کسی قوم کے درمیان رشوت پھیل جاتی ہے ، تو رعب کے ذریعے ان لوگوں کی گرفت ہوتی ہے “ ۔
یہ روایت امام أحمد نے نقل کی ہے اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کے حوالے سے ایک حدیث ذکر کرتے ہیں جس میں یہ الفاظ ہیں : ” جس بھی قوم کے درمیان زنا اور سود ظاہر ہوتے ہیں وہ لوگ اپنے لئے اللہ تعالیٰ کے عقاب کو حلال کر لیتے ہیں“ ۔
یہ روایت امام ابویعلیٰ نے نقل کی ہے اور اس کی سند عمدہ ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت سے پہلے زنا ، سود اور شراب ظاہر ہو جائیں گے ( یعنی پھیل جائیں گے ) “ ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جب کسی بستی میں زنا اور سود ظاہر ہو جائیں ( یعنی پھیل جائیں ) تو وہ لوگ اپنے لئے اللہ کی تحریر ( یعنی عذاب ) کو حلال کر دیتے ہیں “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت اصل میں اسی طرح سیدنا عبداللہ بن عباس رضی اللہ عنہما کے حوالے سے سیدنا اسامہ بن زید رضی اللہ عنہ کے حالات میں منقول ہے ، شاید اصل میں ( سیدنا اسامہ بن زید رضی اللہ عنہ ) کا نام ساقط ہو گیا ہے باقی اللہ بہتر جانتا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ہاشم بن مرزوق ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : کسی بھی بستی کے رہنے والے اس وقت تک ہلاکت کا شکار نہیں ہوتے جب تک ان کے درمیان سود اور زنا نہیں پھیل جاتے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی یحیی بن أحمد کوفی احول ہے اور وہ ضعیف ہے ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم نے سود کھانے والے اور اسے کھلانے والے پر لعنت کی ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابراہیم بن اسماعیل بن یحیی بن سلمہ بن کہیل ہے اور وہ ضعیف ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے سود کھانے والے اسے کھلانے والے اسے تحریر کرنے والے اور اس کے گواہ پر لعنت کی ہے ، جبکہ وہ علم رکھتے ہوں ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد اور دیگر حضرات نے نقل کی ہے تاہم انہوں نے یہ الفاظ نقل نہیں کیے ہیں : ” وہ علم رکھتے ہوں“ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عیسیٰ بن ابوعیسی حناط ہے اور وہ متروک ہے ۔

قاسم بن عبدالواحد وزان بیان کرتے ہیں : میں نے سیدنا عبداللہ بن ابواوفی کو بازار میں سونے چاندی کا لین دین کرنے والوں کے درمیان دیکھا ، وہ فرما رہے تھے : اے سونا چاندی کا لین دین کرنے والے لوگو ! تم یہ اطلاع حاصل کرو ان لوگوں نے کہا: اے ابومحمد ! اللہ تعالیٰ آپ کو جنت کی خوشخبری سنائے اس چیز کی وجہ سے ، جس کی آپ ہمیں اطلاع دینے لگے ہیں ، تو سیدنا عبداللہ بن ابواوفی رضی اللہ عنہ نے فرمایا : نبی اکرم صلی اللہ علیہ وسلم نے ارشاد فرمایا ہے : ” تم لوگ ( یعنی جو سود کا کام کرتے ہیں ) جہنم کی اطلاع حاصل کرو “ ۔
یہ روایت امام طبرانی نے معجم کبیر میں نقل کی ہے اور قاسم نامی راوی کے بارے میں امام ذہبی نے یہ فرمایا ہے میرا یہ خیال ہے کہ فضل بن حسین جحدری اس سے روایت نقل کرنے میں منفرد ہے ۔ ( علامہ ہیثمی فرماتے ہیں : ) میں یہ کہتا ہوں : کسی نے اسے ضعیف قرار نہیں دیا ہے ۔

سیدنا عوف بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم ایسے گناہوں سے بچنے کی کوشش کرو ! جن کی مغفرت نہیں ہوتی ہے ، مال غنیمت میں خیانت کرنا ، جو شخص کسی چیز میں خیانت کرے گا ، وہ قیامت کے دن اس چیز کو لے کر آئے گا اور سود کھانا ، جو شخص سود کھائے گا جب وہ قیامت کے دن آئے گا تو وہ مجنون ہو گا ، اور مخبوط الحواس ہو گا ، پھر آپ نے یہ آیت تلاوت کی : ” وہ لوگ جو سود کھاتے ہیں ، وہ یوں کھڑے ہوں گے ، جس طرح وہ شخص کھڑا ہوتا ہے ، جسے شیطان نے چھو کر مخبوط الحواس کر دیا ہو “ ۔
یہ روایت امام طبرانی نے نقل کی ہے اس کی سند میں ایک راوی حسین بن عبدالاول ہے اور وہ ضعیف ہے ۔

سیدنا عبداللہ بن عباس رضی اللہ عنہما اللہ تعالی کے اس فرمان کے بارے میں بیان کرتے ہیں : ( ارشاد باری تعالیٰ ہے : ) ” وہ لوگ جو سود کھاتے ہیں ، وہ یوں کھڑے ہوں گے ، جیسے وہ شخص کھڑا ہوتا ہے ، جسے شیطان نے چھو کر مخبوط الحواس کر دیا ہو “ سیدنا عبداللہ بن عباس رضی اللہ عنہما فرماتے ہیں : قیامت کے دن وہ لوگ اس صورت کے حال کے حوالے سے پہچانے جائیں گے کہ وہ صرف وہ یوں کھڑے ہوں گے ، جس طرح مجنوں شخص کھڑا ہوتا ہے ، جس کی گردن مسلی گئی ہو ۔ ( ارشاد باری تعالی ہے : ) ” اس کی وجہ یہ ہے کہ ان لوگوں نے یہ کہا: کہ بیع بھی سود کی مانند ہے “ حالانکہ ان لوگوں نے اللہ تعالیٰ کی طرف جھوٹی بات منسوب کی ہے ۔ اللہ تعالیٰ نے بیع کو حلال قرار دیا ہے ، اور سود کو حرام قرار دیا ہے ، تو جس شخص کے پاس اس کے پروردگار کی طرف سے نصیحت آ جائے ، اور وہ باز آ جائے ۔ ۔ ۔ ۔ ۔ ۔ ۔ ۔ ۔ “ یہ آیت یہاں تک ہے : ” اور جو شخص دوبارہ ایسا کرے “ یعنی سود کھائے ” تو یہی لوگ جہنمی ہیں اور وہ لوگ اس میں ہمیشہ رہیں گے “ ۔ ارشاد باری تعالی ہے : ” اے ایمان والو ! اللہ تعالیٰ سے ڈرو اور سود میں سے جو باقی رہ گیا ہے ، اسے ترک کر دو ، اگر تم ایمان رکھنے والے ہو اور اگر تم ایسا نہیں کرتے ، تو اللہ اور اس کے رسول کے ساتھ جنگ کے لئے تیار ہو جاؤ ۔ ۔ ۔ ۔ ۔ ۔ ۔ ۔ ۔ “ یہ آیت کے آخر تک ہے ۔ راوی بیان کرتے ہیں : ہم تک یہ اطلاع پہنچی ہے ، باقی اللہ بہتر جانتا ہے ، کہ یہ آیت بنو عمرو بن عمیر بن عوف کے بارے میں نازل ہوئی تھی ، جن کا تعلق ثقیف قبیلے سے تھا اور بنومغیرہ کے بارے میں نازل ہوئی تھی ، بنومغیرہ کے لوگ ثقیف قبیلے کے لوگوں کو سود دیا کرتے تھے ، جب اللہ تعالیٰ نے اپنے رسول کو مکہ پر غلبہ عطا کر دیا ، تو اس دن نبی اکرم صلی اللہ علیہ وسلم نے ہر قسم کے سود کو کالعدم قرار دے دیا ، طائف کے رہنے والے لوگوں نے اس بات پر صلح کی کہ اُن کے سود انہیں ملیں گے اور جس سود کی ادائیگی ان کی ذمہ ہے ، وہ کالعدم قرار پائے گا نبی اکرم ملا ہم نے ان کے صحیفے کے آخر میں یہ بات لکھوادی کہ انہیں ہر وہ حق حاصل ہوگا جو مسلمانوں کو ملتا ہے اور ان پر ہر وہ چیز لاگو ہو گی جو مسلمانوں پر لاگو ہوتی ہے ، یہ کہ وہ لوگ سود نہیں کھائیں گے اور اسے نہیں کھلائیں گے بنو عمرو بن عمیر اور بنو مغیرہ سیدنا عتاب بن اسید رضی اللہ عنہ کے پاس آئے جو مکہ کے گورنر تھے ، بنو مغیرہ نے کہا: سود کے حوالے سے ہم سب سے زیادہ بد نصیب لوگ ہیں ، نبی اکرم صلی اللہ علیہ وسلم نے ہمارے علاوہ دوسروں کا سود معاف کر دیا ہے ، بنو عمرو بن عمیر نے کہا: ہمارے ساتھ تو اس بات پر مصالحت ہوئی تھی کہ ہمیں ہمارا سود ملے گا ، سیدنا عتاب بن اسید صلی اللہ علیہ وسلم نے اس بارے میں نبی اکرم صلی اللہ علیہ وسلم کو خط لکھا ، تو اللہ تعالیٰ نے یہ آیت نازل کی : ” اگر تم ایسا نہیں کرتے ہو ، تو اللہ اور اس کے رسول کے ساتھ جنگ کے لئے تیار ہو جاؤ“ ۔ تو بنوعمرو کو اس بات کا پتہ چل گیا کہ اس طرح تو وہ لوگ اللہ اور اس کے رسول کے ساتھ جنگ کرنے والوں کے مترادف ہو جائیں گے ، اس کی وجہ اللہ تعالیٰ کا یہ فرمان ہے : اگر تم توبہ کر لیتے ہو ، تو تمہیں تمہارے اصل مال تمہیں مل جائیں گے اور تم ظلم نہ کرو “ ۔ یعنی تم زیادہ وصولی نہ کرو ” اور تم پر ظلم نہ کیا جائے “ کہ تمہیں اصل رقم بھی نہ ملے ۔ ” اور اگر وہ شخص تنگدست ہو “ اور اگر تم اسے چھوڑ دیتے ہو ،  تو یہ تمہارے لئے یہ زیادہ بہتر ہو گا ، اگر تم علم رکھتے ہو ۔ ” تو پھر مہلت دی جائے گی ، سہولت میسر ہونے تک کی ، اور اگر تم صدقہ کر دو ، تو یہ تمہارے لئے زیادہ بہتر ہے اگر تم علم رکھتے ہو ، اور تم اس دن سے ڈرو کہ جس دن میں تمہیں اللہ تعالیٰ کی طرف واپس لوٹا دیا جائے گا اور پھر ہر شخص کو اس کا پورا اجر دیا جائے گا جو اس نے کمایا تھا اور ان لوگوں کے ساتھ کوئی ظلم نہیں ہو گا “ ۔ لوگوں نے یہ بات ذکر کی ہے کہ یہ آیت نازل ہوئی تھی اور سورۂ نساء کے ساتھ یہ آخری آیت ، یہ دونوں قرآن میں سب سے آخر میں نازل ہوئی ہیں ۔
یہ روایت امام ابویعلیٰ نے نقل کی ہے اس کی سند میں ایک راوی محمد بن سائب کلبی ہے اور وہ کذاب ہے ۔