مجمع الزوائد ومنبع الفوائد

سیدنا عوف بن مالک اشجعی رضی اللہ عنہ بیان کرتے ہیں : ہم لوگ سیدنا عمرو بن العاص رضی اللہ عنہ کے ساتھ ایک جنگ میں شریک ہوئے ہمارے ساتھ سیدنا عمر بن خطاب رضی اللہ عنہ اور سیدنا ابوعبیدہ بن جراح رضی اللہ عنہ تھے ہمیں شدید بھوک لاحق ہوئی میں نے کچھ لوگوں کو پایا کہ وہ یہ ارادہ کر رہے ہیں کہ وہ کسی اونٹ کو قربان کر دیں میں نے کہا: میں اس حوالے سے تم لوگوں کی مدد کروں گا اور میں اسے نحر ( قربان ) کروں گا تم اس میں سے کچھ ( گوشت ) مجھے دے دینا انہوں نے کہا: ٹھیک ہے میں نے ایسا ہی ہے اس بات کا ذکر سیدنا عمر بن خطاب رضی اللہ عنہ سے کیا گیا تو انہوں نے فرمایا تم نے اپنا اجر حاصل کرنے میں جلدی کی ہے میں اسے نہیں کھاؤں سیدنا ابوعبیدہ رضی اللہ عنہ نے بھی اس کی مانند بات کہی پھر وہ نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے مجھے ملاحظ فرمایا تو ارشاد فرمایا : کیا یہ اونٹ والا شخص ہے ؟
یہ روایت امام طبرانی نے معجم کبیر میں نقل کی ہے اس کی سند میں ایک راوی ربیعہ بن ہرم ہے میں نے کسی سے اس کے حالات بیان کرتے ہوئے نہیں پایا ہے اس روایت کے بقیہ رجال صحیح کے رجال ہیں ۔

سیدنا عوف بن مالک رضی اللہ عنہ نبی اکرم صلی اللہ علیہ وسلم کے حوالے سے اس کی مانند روایت نقل کرتے ہیں : جو آئے گی اس روایت میں یہ ہے راوی بیان کرتے ہیں : نبی اکرم صلی اللہ علیہ وسلم نے مجھے ایک جنگی مہم پر بھیجا ایک شخص نے کہا: میں آپ کے ساتھ جاؤں گا اس شرط پر کہ آپ مال غنیمت میں سے ایک حصہ مجھے دیں گے پھر اس نے کہا: اللہ کی قسم مجھے تو یہ پتہ ہی نہیں ہے کہ کیا کوئی مال غنیمت ملے گا بھی یا نہیں ملے گا ؟ بلکہ آپ ایک متعین حصہ ( یعنی معاوضہ ) میرے لئے مقرر کریں میں نے اس کے لئے تین دینار مقرر کر دیے پھر ہم نے جنگ میں حصہ لیا ہمیں مال غنیمت ملا میں نے نبی اکرم صلی اللہ علیہ وسلم سے اس بارے میں دریافت کیا ، تو نبی اکرم صلی اللہ علیہ وسلم نے ارشاد فرمایا : اسے دنیا اور آخرت میں سے صرف وہ تین دینا ملیں گے جو اس نے حاصل کر لیے ہیں ۔
یہ روایت امام طبرانی نے معجم کبیر میں نقل کی ہے ۔