مجمع الزوائد ومنبع الفوائد

عبدالواحد بنانی بیان کرتے ہیں : میں سیدنا عبداللہ بن عمر رضی اللہ عنہما کے ساتھ موجود تھا ایک شخص ان کے پاس آیا اور بولا: اے ابوعبدالرحمن ! میں نے یہ باغ خریدا ہے ، جس میں انگور ہوتے ہیں ہم ان سب کو انگور کی شکل میں فروخت نہیں کر سکتے ہیں کچھ کو نچوڑنا پڑتا ہے ، تو سیدنا عبداللہ بن عمر رضی اللہ عنہما نے فرمایا تم مجھ سے شراب کی قیمت کے بارے میں دریافت کرنا چاہ رہے ہو ؟ میں تمہیں ایک حدیث سناتا ہوں جو میں نے نبی اکرم صلی اللہ علیہ وسلم کی زبانی سنی ہے : ایک مرتبہ ہم نبی اکرم صلی اللہ علیہ وسلم کے پاس بیٹھے ہوئے تھے اسی دوران آپ نے آسمان کی طرف سر اٹھایا اور پھر اسے جھکا لیا اور زمین سے کچھ کریدنے لگے پھر آپ نے ارشاد فرمایا : بنی اسرائیل کے لئے بربادی ہے سیدنا عمر رضی اللہ عنہ نے عرض کی : یا رسول اللہ ! آپ کے اس فرمان نے ہمیں پریشان کر دیا ہے کہ بنی اسرئیل کے لئے بربادی ہے ۔ نبی اکرم صلی اللہ علیہ وسلم نے فرمایا : اس بربادی میں سے تم پر کچھ نہیں آئے گا ان لوگوں پر چربی کو حرام قرار دیا گیا تو وہ لوگ اسے پگھلا کر اسے فروخت کر دیتے تھے اور اس کی قیمت کھایا کرتے تھے اسی طرح تم لوگوں پر شراب کی قیمت حرام ہے ۔ ( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عمر رضی اللہ عنہما سے منقول حدیث کو امام ابوداؤد نے شراب کی قیمت کی ممانعت کے بارے میں نقل کیا ہے لیکن وہ روایت اس کے علاوہ ہے ۔
یہ روایت امام أحمد نے نقل کی ہے اور امام طبرانی نے معجم کبیر میں نقل کی ہے اور اس کے رجال صحیح کے رجال ہیں صرف عبدالواحد نامی راوی کا معاملہ مختلف ہے ابن حبان نے اسے ثقہ قرار دیا ہے ۔

سیدنا کیسان رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں وہ شراب کی تجارت کیا کرتے تھے ایک مرتبہ وہ شام سے آئے تو ان کے ساتھ شراب کے مشکیزے بھی تھے ، جن کی تجارت کا ارادہ تھا وہ نبی اکرم صلی اللہ علیہ وسلم کی خدمت میں حاضر ہوئے ۔ انہوں نے عرض کی : یا رسول اللہ ! میں آپ کے پاس بڑی عمدہ قسم کی شراب لے کے آیا ہوں ۔ نبی اکرم صلی اللہ علیہ وسلم نے ارشاد فرمایا : اے کیسان تمہارے بعد اسے حرام قرار دے دیا گیا ہے ۔ انہوں نے عرض کی : یا رسول اللہ ! آپ اسے فروخت کر دیں نبی اکرم صلی اللہ علیہ وسلم نے فرمایا : اسے اور اس کی قیمت ( دونوں کو ) حرام قرار دیا گیا ہے ، تو سیدنا کیسان رضی اللہ عنہ ان مشکیزوں کی طرف گئے اور پھر انہوں نے انہیں نیچے کی طرف سے پکڑ کے انہیں بہا دیا ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے اس کی سند میں ایک راوی نافع بن کیسان ہے اور وہ مستور ہے امام طبرانی کی ایک روایت میں یہ الفاظ ہیں : کیا ہم اسے یہودوں کو فروخت نہ کر دیں ؟ تو نبی اکرم صلی اللہ علیہ وسلم نے ارشاد فرمایا : اسے فروخت کرنے والا اسے پینے والے کی مانند ہے ۔

سیدنا عبدالرحمن بن غنم رضی اللہ عنہ بیان کرتے ہیں : داری نبی اکرم صلی اللہ علیہ وسلم کی خدمت میں ہر سال ایک شراب کا ایک مشکیزہ تحفے میں پیش کیا کرتا تھا جب وہ سال آیا جب اسے حرام قرار دے دیا گیا تو وہ صاحب مشکیزہ لے کے آئے جب نبی اکرم صلی اللہ علیہ وسلم نے اس کی طرف دیکھا تو آپ ہنس پڑے اور آپ نے فرمایا : کیا تمہیں پتہ ہے کہ تمہارے بعد اسے حرام قرار دے دیا گیا ہے ؟ انہوں نے عرض کی : یا رسول اللہ ! کیا میں اسے فروخت نہ کر دوں اور اس کی قیمت کے ذریعے نفع حاصل کر لوں گا ؟ نبی اکرم صلی اللہ علیہ وسلم نے ارشاد فرمایا : اللہ تعالی نے یہودیوں پر لعنت کی ہے اللہ تعالیٰ نے یہودیوں پر لعنت کی ہے اللہ تعالی نے یہودیوں پر لعنت کی ہے کہ وہ اس چیز کی طرف گئے کہ جب ان پر بکریوں اور گائے کی چربی کو حرام قرار دیا گیا تو انہوں نے اس کو پگھلا لیا اور پھر اس کو اس جیسا بنا کے اسے فروخت کرنے لگے اور اس کی قیمت کھانے لگے ، شراب حرام ہے اور اس کی قیمت بھی حرام ہے شراب حرام ہے اور اس کی قیمت بھی حرام ہے شراب حرام ہے اور اس کی قیمت بھی حرام ہے شراب حرام ہے اور اس کی قیمت بھی حرام ہے ۔
یہ روایت امام أحمد نے اسی طرح سیدنا عبدالرحمن بن غنم رضی اللہ عنہ کے حوالے سے نقل کی ہے کہ داری کا یہ معاملہ پیش آیا تھا اس کی سند میں ایک راوی شہر ہے اس کی نقل کردہ حدیث حسن ہے اور اس راوی کے بارے میں کلام پایا جاتا ہے ۔

یہ روایت امام طبرانی نے معجم کبیر میں سیدنا عبدالرحمن بن غنم رضی اللہ عنہ کے حوالے سے سیدنا تمیم داری رضی اللہ عنہ سے نقل کی ہے کہ وہ تحفے کے طور پر پیش کیا کرتے تھے ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث اختصار کے طور پر نقل کیا ہے تاہم انہوں نے یہ الفاظ نقل کیے ہیں : ” بے شک اسے فروخت کرنا اور اس کی قیمت بھی حرام ہے “ ۔ اس روایت کی سند متصل اور حسن ہے ۔

سیدنا جابر رضی اللہ عنہ بیان کرتے ہیں : ایک شخص خیبر سے مدینہ منورہ شراب لاد کر لایا کرتا تھا اسے مسلمانوں کو فروخت کیا کرتا تھا اس کے عوض میں مال حاصل کرتا تھا ایک مرتبہ وہ شراب لے کے مدینہ منورہ آیا مسلمانوں میں سے ایک شخص کی اس سے ملاقات ہوئی تو اس نے کہا: اے فلاں ! شراب کو تو حرام قرار دے دیا گیا ہے ، تو وہ شخص جہاں موجود تھا اس نے وہاں ایک ٹیلے کے اوپر شراب رکھی اس پر چادر ڈال دی پھر وہ نبی اکرم صلی اللہ علیہ وسلم کی خدمت میں حاضر ہوا اور اس نے عرض کی : یا رسول اللہ مجھے یہ بات پتہ چلا ہے کہ شراب کو حرام قرار دے دیا گیا ہے ؟ نبی اکرم صلی اللہ علیہ وسلم نے فرمایا : جی ہاں ! اس نے عرض کی : کیا مجھے اس بات کا حق حاصل ہے کہ میں نے جس سے اسے خریدا ہے اسے میں واپس کر دوں ؟ نبی اکرم صلی اللہ علیہ وسلم نے ارشاد فرمایا : اسے واپس کرنا ٹھیک نہیں ہے اس نے عرض کی : کیا مجھے اس بات کا حق حاصل ہے کہ میں کسی ایسے شخص کو اسے تحفے کے طور پر دے دوں جو اس کے بدلے میں مجھے کچھ دیدے ؟ نبی اکرم صلی اللہ علیہ وسلم نے ارشاد فرمایا : جی نہیں ! اس نے عرض کی : اس میں کچھ یتیموں کا مال بھی ہے ، جو میرے زیر پرورش ہیں نبی اکرم صلی اللہ علیہ وسلم نے فرمایا : جب بحرین کا مال ہمارے پاس آئے گا تو تم ہمارے پاس آ جانا تمہارے زیر پرورش یتیم بچوں کے مال کا معاوضہ ہم تمہیں دے دیں گے پھر نبی اکرم صلی اللہ علیہ وسلم نے اعلان کروایا اے اہل مدینہ راوی کہتے ہیں : ایک صاحب نے عرض کی : یا رسول اللہ ! یہ برتن بھی ہیں جن سے ہم نفع حاصل کرتے ہیں نبی اکرم صلی اللہ علیہ وسلم نے فرمایا تم ان کی بندش کھول دو یہاں تک کہ شراب بہہ جائے اور شیبی حصے میں چلی جائے ۔
یہ روایت امام ابویعلیٰ نے نقل کی ہے اور امام طبرانی نے معجم اوسط میں اس روایت کے ایک حصے کا مفہوم نقل کیا ہے اور ان تمام کی سند میں ایک راوی یعقوب قمی اور ایک عیسیٰ بن جاریہ ہے اور ان دونوں کے بارے میں کلام کیا گیا ہے ویسے ان دونوں کی توثیق کی گئی ہے ۔

سیدنا جابر رضی اللہ عنہ بیان کرتے ہیں : ثقیف قبیلے سے تعلق رکھنے والے ایک شخص نے نبی اکرم صلی اللہ علیہ وسلم کو شراب کا ایک مشکیزہ تحفے کے طور پر پیش کیا یہ شراب کی حرمت نازل ہونے کے بعد کی بات ہے ۔ نبی اکرم صلی اللہ علیہ وسلم کے حکم کے تحت اسے چیر دیا گیا اس شخص نے عرض کی : اگر آپ اس کے بارے میں حکم دیتے تو اسے فروخت کر دیا جاتا نبی اکرم صلی اللہ علیہ وسلم نے ارشاد فرمایا : ” جس ذات نے اس کے پینے کو حرام قرار دیا ہے اس نے اس کو فروخت کرنے کو بھی حرام قرار دیا ہے “ ۔
یہ روایت امام طبرانی نے معجم اوسط میں مقدام بن داؤد کے حوالے سے نقل کی ہے اور وہ ضعیف ہے ۔

یحیی بن عباد بیان کرتے ہیں : نبی اکرم صلی اللہ علیہ وسلم کو شراب کا مشکیزہ پیش کیا گیا یہ اس کی حرمت کا حکم نازل ہونے کے بعد کی بات ہے جب اسے نبی اکرم صلی اللہ علیہ وسلم کے پاس لایا گیا تو آپ نے ارشاد فرمایا : شراب کو حرام قرار دے دیا گیا ہے ان لوگوں میں سے کسی نے عرض کی : اگر یہ لوگ اسے فروخت کر دیں اور اس کی قیمت غریب مسلمانوں کو دے دیں ( تو یہ ٹھیک رہے گا ؟ ) نبی اکرم صلی اللہ علیہ وسلم نے حکم دیا تو اسے مدینہ منورہ کے نشیبی علاقے میں بہا دیا گیا آپ نے ارشاد فرمایا : ” اللہ تعالیٰ یہودیوں پر لعنت کرے ان پر چربی کو حرام قرار دیا گیا تو انہوں نے اسے فروخت کر کے اس کی قیمت کو کھانا شروع کر دیا “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی اشعث بن سوار ہے اور وہ ثقہ ہے اور اس کے بارے میں کلام کیا گیا ہے ۔

عامر بن ربیعہ اپنے والد کے حوالے سے یہ بات نقل کرتے ہیں : ثقیف قبیلے سے تعلق رکھنے والے ایک صاحب ، جن کی کنیت ابوتمام تھی ۔ انہوں نے نبی اکرم صلی اللہ علیہ وسلم کو شراب کا مشکیزہ تحفے کے طور پر پیش کیا ، تو نبی اکرم صلی اللہ علیہ وسلم نے ارشاد فرمایا : اے ابوتمام ! اسے حرام قرار دے دیا گیا ہے ۔ انہوں نے آپ کی خدمت میں عرض کی : یا رسول اللہ ! کیا میں اس کی قیمت استعمال کر سکتا ہوں ؟ نبی اکرم صلی اللہ علیہ وسلم نے ارشاد فرمایا : بیشک جس نے اس کے پینے کو حرام قرار دیا ہے اس نے اس کی قیمت کو بھی حرام قرار دیا ہے ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : ” نبی اکرم صلی اللہ علیہ وسلم نے شراب پینے والے پر اسے پلانے والے پر اسے نچوڑنے والے پر اسے نچڑوانے والے پر اسے لاد کر لے جانے والے پر اور جس کی طرف وہ لاد کر لے جائی جا رہی ہو اس پر اور جو اس کو فروخت کرے اور جو اسے خریدے اور جو اس کی قیمت کو کھائے ( ان سب پر لعنت کی ہے “ ۔
یہ روایت امام بزار نے اور امام طبرانی نے معجم کبیر میں نقل کی ہے اس کی سند میں ایک راوی عیسیٰ بن ابوعیسی حناط ہے اور وہ ضعیف ہے ۔

حسن بیان کرتے ہیں : سیدنا عثمان بن ابوالعاص رضی اللہ عنہ کے غلام نے ان سے یہ درخواست کی کہ وہ اسے کچھ مال دیں ، جس کے ذریعے وہ تجارت کرے اور منافع ان دونوں کے درمیان تقسیم ہو جائے گا تو انہوں نے اس غلام کو بیس ہزار درہم دیے اس غلام نے اس کے ذریعے شراب خرید لی پھر وہ اسے لے کر ابلہ آیا سیدنا عثمان رضی اللہ عنہ نکل کر اس کی طرف گئے ۔ انہوں نے شراب کے ہر ایک مٹکے کو توڑ دیا سیدنا عثمان رضی اللہ عنہ نے بتایا کہ نبی اکرم صلی اللہ علیہ وسلم نے شراب پر اسے پینے والے پر اسے خریدنے والے پر اسے فروخت کرنے والے پر اسے نچوڑنے والے پر اسے لاد کر لے جانے والے پر لعنت کی ہے ۔
یہ روایت امام طبرانی نے معجم اوسط اور معجم کبیر میں نقل کی ہے اور انہوں نے اس میں یہ الفاظ زائد نقل کیے ہیں : ” اسے نچڑوانے والے پر جس کی طرف وہ لاد کر لے جائی جا رہی ہے اس پر اور اس کی قیمت کھانے والے پر ( لعنت کی ہے ) “ ۔ اس روایت کی سند میں ایک راوی عبداللہ بن عیسیٰ خزاز اور وہ ضعیف ہے ۔

ان کے حوالے سے یہ بات منقول ہے ۔ نبی اکرم صلی اللہ علیہ وسلم نے شراب کو منع کیا ہے اور اس کی قیمت کو حرام قرار دیا ہے ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : اللہ تعالی نے شراب پر اسے نچوڑنے والے پر اسے پلانے والے پر اسے فروخت کرنے والے پر اسے خریدنے والے پر اسے لاد کر لے جانے والے پر جس کی طرف اسے لاد کر لے جایا جا رہا ہو اس پر اور اس کی قیمت کھانے والے ( ان سب پر ) لعنت کی ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی لیث بن ابوسلیم ہے وہ ثقہ ہے لیکن وہ تدلیس کرنے والا ہے ۔ ( علامہ ہیثمی فرماتے ہیں : ) میں یہ کہتا ہوں : اس بارے میں کچھ احادیث مشروبات سے متعلق باب میں آگے آئیں گے جو اس نوعیت سے متعلق ہوں گی ۔

سیدنا عامر بن ربیعہ رضی اللہ عنہ کے بارے میں یہ منقول ہے کہ انہوں نے نبی اکرم صلی اللہ علیہ وسلم کو شراب کا مشکیزہ تحفے کے طور پر دیا تو نبی اکرم صلی اللہ علیہ وسلم نے ان سے فرمایا : اے عامر کیا تم یہ بات نہیں جانتے ہو کہ تمہارے بعد اسے حرام قرار دے دیا گیا ہے ؟ انہوں نے عرض کی : کیا میں اسے کسی یہودی کو فروخت نہ کر دوں ؟ یا رسول اللہ ! نبی اکرم صلی اللہ علیہ وسلم نے ارشاد فرمایا : اسے فروخت کرنے والا اسے پینے والے کی مانند ہے ، تو انہوں نے اسے بہا دیا ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں اس کی سند میں ایک راوی یزید بن سنان رہاوی ہے وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : جب شراب کی حرمت کا حکم نازل ہوا تو لوگوں نے عرض کی : یا رسول اللہ ! کیا ہم اس کو فروخت نہ کر دیں ؟ نبی اکرم صلی اللہ علیہ وسلم نے ارشاد فرمایا : جس نے اس کے پینے کو حرام قرار دیا ہے اس نے اس کو فروخت کرنے کو بھی حرام قرار دیا ہے ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدہ ام سلیم رضی اللہ عنہ بیان کرتی ہیں جب شراب کی حرمت کا حکم نازل ہوا تو نبی اکرم صلی اللہ علیہ وسلم نے منادی کو یہ حکم دیا کہ وہ یہ اعلان کرے خبردار ! شراب کو حرام قرار دے دیا گیا ہے ، تو اب تم اسے فروخت نہ کرو اور اسے نہ خریدو ، اور جس کے پاس اس کا کچھ بھی ہو وہ اس کو بہا دے “ ۔ ( سیدہ ام سلیم رضی اللہ عنہ بیان کرتی ہیں ) سیدنا ابوطلحہ رضی اللہ عنہ نے فرمایا : اے لڑکے ! مشکیزے کا منہ کھول دو اور اسے بہا دو ، تو لوگوں نے شراب کو بہا دیا حالانکہ ان دنوں ان کی شراب صرف ( کھجور کی دو قسموں ) بسر اور تمر سے بنائی جاتی تھی ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی ولید بن محمد موقری ہے اور وہ ضعیف ہے ۔