مجمع الزوائد ومنبع الفوائد

سیدنا عمرو بن العاص رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے پیغام بھیج کر ارشاد فرمایا : اپنا لباس پہن کر اور ہتھیار پہن کر پھر میرے پاس آ جاؤ راوی بیان کرتے ہیں : میں آپ کی خدمت میں حاضر ہوا آپ اس وقت وضو کر رہے تھے آپ نے بغور میرا جائزہ لیا اور پھر سر کو جھکا لیا پھر آپ نے ارشاد فرمایا : میں تمہیں ایک مہم پر بھیجنا چاہتا ہوں اللہ تعالی تمہیں سلامت رکھے گا اور تمہیں غنیمت عطا کرے گا اور میں تمہارے لئے مال کے حوالے سے نیک رغبت کا اظہار کرتا ہوں میں نے عرض کی : یا رسول اللہ ! میں نے مال کی خاطر اسلام قبول نہیں کیا ہے میں نے اسلام میں رغبت رکھتے ہوئے اور اللہ کے رسول کے ساتھ کی خاطر اسلام قبول کیا ہے ۔ نبی اکرم صلی اللہ علیہ وسلم نے ارشاد فرمایا : اے عمرو نیک ( یعنی حلال ) مال کا نیک شخص کے پاس ہونا اچھی بات ہے ۔
یہ روایت امام أحمد نے نقل کی ہے وہ فرماتے ہیں : نسخہ میں یہ لفظ ایسی طرح ” نعما “ ہے ، جس میں ن پر زبر ہے اور ع پر زیر ہے ابوعبیدہ کہتے ہیں : اس میں ن اور ع دونوں پر زیر پڑھی جائے گی ۔
یہ روایت امام طبرانی نے معجم کبیر اور معجم اوسط میں نقل کی ہے تا ہم انہوں نے اس میں یہ الفاظ نقل کیے ہیں : ” میں نے اسلام میں رغبت رکھتے ہوئے اور اللہ کے رسول کے ساتھ میں رغبت رکھتے ہوئے اسلام قبول کیا ہے ، تو نبی اکرم صلی اللہ علیہ وسلم نے ارشاد فرمایا : ٹھیک ہے نیک ( یعنی حلال ) مال کا نیک آدمی کے پاس ہونا اچھی بات ہے “ ۔
یہ روایت امام ابویعلیٰ نے اس کی مانند نقل کی ہے امام أحمد اور امام ابویعلیٰ کے رجال صحیح کے رجال ہیں ۔

حبیب بن عبید بیان کرتے ہیں : سیدنا مقدام بن معدیکرب رضی اللہ عنہ کی ایک کنیز تھی جو دودھ فروخت کرتی تھی اور قیمت سیدنا مقدام رضی اللہ عنہ خود وصول کرتے تھے ان سے اس بارے میں کہا: گیا : سبحان اللہ ! دودھ وہ فروخت کرتی ہے اور قیمت آپ رکھ رہے ہیں تو انہوں نے فرمایا : جی ہاں ! اس میں کوئی حرج نہیں ہے میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” لوگوں پر ایسا زمانہ ضرور آئے گا کہ اس میں صرف دینار اور درہم فائدہ دیں گے “ ۔
یہ روایت امام أحمد نے اسی طرح نقل کی ہے ۔

سیدنا مقدام رضی اللہ عنہ کے حوالے سے امام طبرانی نے معجم کبیر ، معجم صغیر اور معجم اوسط میں
یہ روایت نقل کی ہے : نبی اکرم صلی اللہ علیہ وسلم نے ارشاد فرمایا : ” لوگوں پر ایسا زمانہ آئے گا کہ جس شخص کے پاس زرد چیز یا سفید چیز ( یعنی سونا یا چاندی ) نہیں ہوں گے وہ آرام سے نہیں رہ پائے گا “ ۔

معجم کبیر میں حبیب بن عبید کے حوالے سے یہ بات منقول ہے وہ بیان کرتے ہیں : میں نے سیدنا مقدام بن معدیکرب رضی اللہ عنہ کو بازار میں دیکھا ان کی کنیز دودھ فروخت کر رہی تھی اور وہ بیٹھے ہوئے درہم وصول کر رہے تھے ان سے اس بارے میں بات کی گئی تو انہوں نے بتایا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” آخری زمانہ جب آئے گا تو اس میں لوگوں کے لئے دراہم اور دینار ضروری ہوں گے جن کے ذریعے آدمی اپنے دین اور اپنی دنیا کو قائم رکھے گا“ ۔ اس روایت کے تمام تر طرق کا مدار ابوبکر بن ابومریم نامی راوی پر ہے اور وہ اختلاط کا شکار ہو گیا تھا ۔

سیدنا جبریر رضی اللہ عنہ بیان کرتے ہیں : جب نبی اکرم صلی اللہ علیہ وسلم نے مجھے دیکھا کہ میں کوئی چیز اپنے پاس نہیں رکھتا ہوں اور اسے خرچ کر دیتا ہوں تو آپ نے ارشاد فرمایا : ” اے جریر ! تم پر کوئی حرج نہیں ہو گا اگر تم اپنا مال اپنے پاس رکھو کیونکہ اس معاملے کی مخصوص مدت ہے ( یعنی زندگی طویل بھی ہو سکتی ہے ) ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عمرو بن عبدالغفار فقیمی ہے اور وہ متروک ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دینار اور درہم ، زمین میں اللہ کی مہریں ہیں جو شخص اپنے آقا کی مہر لے کے آتا ہے اس کی حاجت پوری ہو جاتی ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی أحمد بن محمد بن مالک بن انس ہے اور وہ ضعیف ہے ۔