مجمع الزوائد ومنبع الفوائد

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : اے ابورافع ! تم ہر کتے کو مار دو ۔ راوی کہتے ہیں : میں نے انصار کی کچھ خواتین کو بقیع کے پاس پایا ، ان کا ایک کتا تھا ان خواتین نے کہا: اے ابورافع! نبی اکرم صلی اللہ علیہ وسلم نے ہمیں (ہمارے گھروں کو) بے نیاز فرما دیا ہے (یا سامان کی کفایت کی ہے) اور یہ کتا ہمارے لیے رکاوٹ بنتا ہے ، اللہ کی قسم ! کوئی بھی شخص ہمارے پاس نہیں آ سکتا اس کے آنے سے پہلے ہم میں سے کوئی ایک عورت اٹھ کر چلی جاتی ہے اور اس کتے کے اور آنے والے کے درمیان حائل ہو جاتی ہے تم اس بات کا تذکرہ نبی اکرم صلی اللہ علیہ وسلم کے سامنے کرو۔ سیدنا ابورافع رضی اللہ عنہ نے نبی اکرم صلی اللہ علیہ وسلم کے سامنے اس بات کا تذکرہ کیا ، تو نبی اکرم صلی اللہ علیہ وسلم نے ارشاد فرمایا : اے ابورافع ! تم اسے قتل کر دو کیونکہ اللہ تعالیٰ ان ( خواتین ) کی حفاظت کرے گا ۔

ایک روایت میں یہ الفاظ ہیں : نبی اکرم صلی اللہ علیہ وسلم نے مجھے یہ حکم دیا کہ میں کتوں کو مار دوں میں نکلا اور کتوں کو مارنے لگا میں نے جو بھی کتا دیکھا اسے قتل کر دیا ایک کتا ایک گھر کے گرد چکر لگا رہا تھا میں اسے قتل کرنے لگا تو اس گھر کے اندر سے کسی انسان نے مجھے پکار کر کہا: اے اللہ کے بندے ! تم کیا کرنا چاہتے ہو ؟ میں نے جواب دیا میں اس کتے کو مارنا چاہتا ہوں اس عورت نے کہا: میں ایک بوڑھی عورت ہوں ، یہ کتا مجھ سے درندوں کو دور رکھتا ہے اور آنے والے کے بارے میں ( بھونک کر ) مجھے بتا دیتا ہے ، پھر سیدنا ابورافع رضی اللہ عنہ نبی اکرم صلی اللہ علیہ وسلم کے پاس گئے ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ روایت امام بزار اور امام أحمد نے مختلف اسانید کے ساتھ نقل کی ہے جن میں سے بعض کے رجال صحیح کے رجال ہیں یہ روایت امام طبرانی نے معجم کبیر میں بھی نقل کی ہے ۔

سیدنا ابورافع رضی اللہ عنہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کی خدمت میں اندر آنے کے لئے اجازت مانگی نبی اکرم صلی اللہ علیہ وسلم نے انہیں اجازت دے دی انہیں اندر آنے میں تاخیر ہوئی تو نبی اکرم صلی اللہ علیہ وسلم نے اپنی چادر لی اور اٹھ کر ان کی طرف چلے گئے وہ دروازے پر کھڑے ہوئے تھے نبی اکرم صلی اللہ علیہ وسلم نے ارشاد فرمایا : ہم نے تمہیں اجازت دے دی تھی ۔ انہوں نے عرض کی : جی ہاں ! یا رسول اللہ ! لیکن ہم کسی ایسے گھر میں داخل نہیں ہوتے ہیں جس میں کتا یا تصویر موجود ہو ( راوی بیان کرتے ہیں : ) تو انہوں نے نبی اکرم صلی اللہ علیہ وسلم کے گھر میں ایک کتے کے پلے کو پایا ۔ سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یہ حکم دیا کہ مجھے جو بھی کتا ملے میں اسے قتل کر دوں ایک عورت جو آبادی سے ہٹ کے رہتی تھی اس کا ایک کتا تھا جو اس کی حفاظت کے لئے بھونکا کرتا تھا مجھے اس عورت پر رحم آیا میں نے اس کتے کو چھوڑ دیا میں آیا تو نبی اکرم صلی اللہ علیہ وسلم نے مجھے حکم دیا میں کتے کی طرف واپس گیا اور میں نے اسے مار دیا لوگوں نے عرض کی : یا رسول اللہ ! آپ نے جو اس مخصوص قسم کے جانور کو مارنے سے منع کیا ہے اس میں سے ہمارے لئے کون سا حلال ہے ؟ تو اللہ تعالی نے یہ آیت نازل کی : ” لوگ تم سے پوچھتے ہیں کہ ان کے لئے کیا چیز حلال قرار دی گئی ہے ؟ تم یہ فرما دو ! تمہارے لئے پاکیزہ چیزیں حلال قرار دی گئی ہیں “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

عبیداللہ بن علی بیان کرتے ہیں : ان کی دادی سیدہ سلمی رضی اللہ عنہ نے انہیں یہ بات بتائی کہ نبی اکرم صلی اللہ علیہ وسلم نے سیدنا ابورافع رضی اللہ عنہ کو بنوامیہ بن یزید کی طرف بھیجا تاکہ وہ کتوں کو مار دیں آپ نے ایک اور شخص کو کتوں کو مارنے کے حکم کے ساتھ ( کسی اور طرف ) سے بھیجا ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا جابر انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نے مدینہ منورہ کے کتوں کے بارے میں یہ حکم دیا کہ انہیں قتل کر دیا جائے سیدنا عبداللہ ابن ام مکتوم رضی اللہ عنہ آئے ۔ انہوں نے عرض کی : میرا گھر دور ہے میرا ایک کتا ہے ۔ نبی اکرم صلی اللہ علیہ وسلم نے انہیں چند دن تک رخصت دی پھر آپ نے ان کے کتے کو بھی مار دینے کا حکم دیا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے تا ہم اس میں رخصت کا ذکر نہیں ہے ۔
یہ روایت امام أحمد نے امام ابویعلیٰ نے اور امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدہ عائشہ صدیقہ رضی اللہ عنہما بیان کرتی ہیں نبی اکرم صلی اللہ علیہ وسلم نے بڑی آنکھوں والے کتوں کو مارنے کا حکم دیا ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں البتہ ابراہیم نخعی اگرچہ سیدہ عائشہ رضی اللہ عنہا کی خدمت میں حاضر ہوئے ہیں لیکن ان کا سیدہ عائشہ رضی اللہ عنہا سے سماع ثابت نہیں ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اگر کتے مخصوص قسم کی ایک مخلوق نہ ہوتے تو میں ہر کالے سیاہ کتے کو مار دینے کا حکم دیتا البتہ کتوں میں سے تم بڑی آنکھوں والوں کو مار دو ! کیونکہ وہ ملعون ہیں ، اور جنات سے تعلق رکھتے ہیں “ ۔
یہ روایت امام ابویعلیٰ نے اور امام طبرانی نے معجم کبیر اور معجم اوسط میں نقل کی ہے اور اس کی سند حسن ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : تم لوگ کتوں کو مار دو اہل مدینہ نے عرض کی : یا رسول اللہ ! یہ ہمیں نفع دیتے ہیں یہ ہماری بھیڑ بکریوں میں اور ہمارے کھیتوں میں ( حفاظت کا کام کرتے ہیں ) نبی اکرم صلی اللہ علیہ وسلم نے فرمایا : تم ان میں سے اس کو مار دو جو بہیم ( جس کا رنگ مکمل کالا ہو ) ۔ بہیم کے بارے میں لوگ یہ کہتے ہیں : وہ جن ہوتا ہے ۔
یہ روایت امام بزار نے نقل کی ہے اس کے رجال صحیح کے رجال ہیں ، صرف سعید بن بحر کا معاملہ مختلف ہے ، جو امام بزار کا استاد ہے میں نے اس کے حالات بیان کرتے ہوئے کسی کو نہیں پایا ہے ۔

سیدہ عائشہ صدیقہ رضی اللہ عنہا روایت کرتی ہیں نبی اکرم صلی اللہ علیہ وسلم نے ارشاد فرمایا : ” اگر کتے مخصوص قسم کی مخلوق نہ ہوتے تو میں انہیں مار دینے کا حکم دیتا البتہ تم ان میں سے ہر کالے سیاہ کتے کو مار دو “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی لیث بن ابوسلیم ہے وہ ثقہ ہے لیکن وہ تدلیس کرنے والا ہے ۔

سیدنا اسامہ بن زید رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ پریشان تھے میں نے عرض کی : یا رسول اللہ ! آپ کو کیا ہوا ہے ؟ آپ نے فرمایا : جبرائیل نے میرے پاس آنے کا مجھ سے وعدہ کیا تھا لیکن وہ تین دن سے میرے پاس نہیں آئے وہاں ایک کتا موجود تھا سیدنا اسامہ رضی اللہ عنہ کہتے ہیں میں نے اپنے سر پر ہاتھ رکھا اور آواز نکالی نبی اکرم صلی اللہ علیہ وسلم نے دریافت کیا : کیا ہو ہے ؟ میں نے عرض کی : کتا ہے ۔ نبی اکرم صلی اللہ علیہ وسلم نے اس کے بارے میں حکم دیا تو اسے مار دیا گیا پھر سیدنا جبرائیل آپ کے پاس آئے نبی اکرم صلی اللہ علیہ وسلم نے دریافت کیا : کیا وجہ ہے کہ تم میرے پاس نہیں آئے جبکہ تم نے میرے ساتھ وعدہ کیا تھا اور تم نے کبھی وعدہ خلافی نہیں کی ، تو انہوں نے عرض کی : ہم کسی ایسے گھر میں داخل نہیں ہوتے جس میں کتا یا تصاویر موجود ہوں“ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی خالد بن یزید عمری ہے اور وہ انتہائی ضعیف ہے ۔ ( علامہ ہیثمی فرماتے ہیں : ) میں یہ کہتا ہوں : ان کے حوالے سے ایک اور سند کے ساتھ یہ روایت منقول ہے ، جسے امام أحمد نے عمدہ سند کے ساتھ نقل کیا ہے وہ روایت آگے آئے گی ۔

سیدنا ابوامامہ رضی اللہ عنہ فرماتے ہیں : فرشتے ایسے گھر میں داخل نہیں ہوتے جس میں کتا موجود ہو ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابوغالب ہے اور وہ ثقہ ہے اور اس کے بارے میں کلام کیا گیا ہے ۔

سیدنا عبداللہ بن عمرو رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” فرشتے ایسے گھر میں داخل نہیں ہوتے جس میں کتا موجود ہو “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی نضر بن عبداللہ ازدی ہے اور وہ مجہول ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کوئی ایسا کتا پالے جو شکار کرنے کے لئے یا جانوروں ( کی حفاظت ) کے لئے نہ ہو ، تو اس شخص کے اجر میں سے روزانہ ایک قیراط کم ہوتا ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی نضر بن عبداللہ ازدی ہے اور وہ مجہول ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کوئی ایسا کتا رکھے ، جو شکار کے لئے نہ ہو یا جانوروں ( کی حفاظت ) کے لئے نہ ہو ، تو اس کے عمل میں سے روزانہ ایک قیراط کم ہوتا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی بجیر بن ابوبجیر ہے مزی اس حدیث کے بعد فرماتے ہیں : انہوں نے اسے اپنی سند کے ساتھ نقل کیا ہے اور یہ حدیث حسن ہے اس روایت کے بقیہ رجال ثقہ ہیں ۔ ( علامہ ہیثمی فرماتے ہیں : ) میں یہ کہتا ہوں : سیدنا ابورافع رضی اللہ عنہ کے حوالے سے منقول حدیث پہلے گزر چکی ہے : ( لوگوں نے کہا: ) کہ اس امت میں سے ، جس کے بارے میں آپ نے قتل کرنے کا حکم دیا ہے ان میں سے ہمارے لئے کیا چیز حلال ہے ؟ تو اللہ تعالیٰ نے یہ آیت نازل کی : ” لوگ تم سے دریافت کرتے ہیں ان کے لئے کیا چیز حلال قرار دی گئی ہے “ ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص نے کتا رکھا ہوا ہو جو جانوروں ( کی حفاظت ) کے لئے نہ ہو یا شکار کا کتا نہ ہو ، تو اس شخص کے اجر میں سے دو قیراط روزانہ کم ہوتے ہیں “ ۔
یہ روایت امام ابویعلیٰ نے نقل کی ہے اس کی سند میں ایک راوی سلام بن ابوخبزہ ہے اور وہ حدیث ایجاد کرنے والا فرد ہے ۔

سیدہ عائشہ صدیقہ رضی اللہ عنہا بیان کرتی ہیں نبی اکرم صلی اللہ علیہ وسلم نے ارشاد فرمایا : ” کالا سیاہ کتا ، شیطان ہوتا ہے “ ۔ لیکن وہ تدلیس کرنے والا ہے امام أحمد کے بقیہ رجال صحیح کے رجال ہیں ۔

سیدنا اسامہ بن زید رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ پریشان لگ رہے تھے میں نے آپ سے دریافت کیا : آپ کو کیا ہوا ہے ؟ تو آپ نے فرمایا : جبرائیل تین دن سے میرے پاس نہیں آئے ہیں ( راوی بیان کرتے ہیں : ) ایک کتے کا پلا آپ کے گھر میں موجود تھا ، آپ کے حکم کے تحت اسے مار دیا گیا سیدنا جبرائیل آپ کے سامنے آئے تو نبی اکرم صلی اللہ علیہ وسلم ان کی طرف لپکے جب آپ نے انہیں دیکھا آپ نے دریافت کیا : تم میرے پاس کیوں نہیں آئے ۔ انہوں نے عرض کی : ہم ایسے گھر میں داخل نہیں ہوتے جس میں کتا یا تصاویر موجود ہوں ۔
یہ روایت امام أحمد نے اور امام طبرانی نے معجم کبیر میں اس کی مانند نقل کی ہے امام أحمد کے رجال صحیح کے رجال ہیں ۔ طبرانی کی نقل کردہ حدیث اس سے پہلے ضعیف سند کے ساتھ گزر چکی ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس سیدنا جبرائیل علیہ السلام نہیں آئے ( جب وہ آئے ) تو نبی اکرم صلی اللہ علیہ وسلم نے دریافت کیا : تمہیں کس چیز نے روک لیا تھا ؟ انہوں نے عرض کی : ہم کسی ایسے گھر میں داخل نہیں ہوتے جس میں کتا موجود ہو ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم انصار کے ایک محلے میں تشریف لائے ان سے پہلے والا جو محلہ تھا وہاں کے لوگوں کو یہ بات بہت گراں گزری ۔ انہوں نے عرض کی : یا رسول اللہ ! سبحان اللہ آپ ان لوگوں کے محلے میں آ گئے ہیں اور ہمارے محلے میں نہیں آئے ؟ نبی اکرم صلی اللہ علیہ وسلم نے ارشاد فرمایا اس کی وجہ یہ ہے کہ تمہارے محلے میں کتا موجود ہے لوگوں نے عرض کی : ان کے محلے میں بھی بلی موجود ہے ۔ نبی اکرم صلی اللہ علیہ وسلم نے ارشاد فرمایا : بلی درندہ ہے ۔
یہ روایت امام أحمد نے نقل کی ہے اس کی سند میں ایک راوی عیسیٰ بن مسیب ہے ، جسے ابوحاتم نے ثقہ قرار دیا ہے اور دیگر حضرات نے اسے ضعیف کہا: ہے ۔