مجمع الزوائد ومنبع الفوائد

سیدنا جابر بن عبداللہ رضی اللہ عنہ کے بارے میں یہ بات منقول ہے : فتنے کے زمانے میں ایک امیر مدینہ آیا اس وقت سیدنا جابر رضی اللہ عنہ کی بینائی رخصت ہو چکی تھی سیدنا جابر رضی اللہ عنہ سے کہا: گیا اگر آپ ذرا ہٹ کے چلیں تو یہ مناسب ہو گا وہ اپنے دونوں صاحبزادوں کے درمیان چلتے ہوئے جا رہے تھے انہیں پیچھے کیا گیا تو انہوں نے فرمایا : وہ شخص برباد ہو جائے جس نے اللہ کے رسول کو خوف زدہ کیا ان دو صاحبزادوں یا دونوں صاحبزادوں میں سے ایک نے کہا: ابا جان اس شخص نے اللہ کے رسول کو کیسے خوف زدہ کیا جبکہ ان کا وصال ہو چکا ہے ؟ تو سیدنا جابر رضی اللہ عنہ نے بتایا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” جو شخص اہل مدینہ کو خوف زدہ کرے گا اس نے میرے دونوں پہلوؤں کے درمیان موجود چیز ( یعنی مجھے ) خوف زدہ کیا “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اے اللہ ! جو شخص اہل مدینہ پر ظلم کرے اور انہیں خوف زدہ کرے تو اسے خوف کا شکار کر ! ایسے شخص پر اللہ تعالیٰ کی اور فرشتوں اور انسانوں سب کی لعنت ہو گی اس کی کوئی فرض یا نفل عبادت قبول نہیں ہو گی “ ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کے رجال صحیح کے رجال ہیں ۔

خالد بن خلاد بن سائب نے اپنے والد کے حوالے سے اپنے دادا کا یہ بیان نقل کیا ہے ۔ نبی اکرم صلی اللہ علیہ وسلم نے ارشاد فرمایا : ” جو شخص اہل مدینہ کو خوف زدہ کرے گا اللہ تعالیٰ قیامت کے دن اسے خوف کا شکار کرے گا اور اس پر لعنت کرے گا اور اس پر غضبناک ہو گا اور اس شخص کی کوئی فرض یا نفل عبادت قبول نہیں کرے گا “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی موسیٰ بن عبیدہ ہے اور وہ ضعیف ہے ۔

سیدنا سائب بن خلاد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اے اللہ ! جو شخص اہل مدینہ پر ظلم کرے اور انہیں خوف کا شکار کرے تو اسے خوف کا شکار کر ! ایسے شخص پر اللہ تعالی اور فرشتوں اور انسانوں سب کی لعنت ہو گی اور اس شخص کی کوئی فرض یا نفل عبادت قبول نہیں ہو گی “ ۔ ( علامہ ہیثمی فرماتے ہیں : ) میں یہ کہتا ہوں : شیخ نے کتاب ” اطراف “ میں اس روایت کی نسبت امام نسائی رحمہ اللہ کی طرف ہے میں نے سنن نسائی میں
یہ روایت نہیں دیکھی یہ ہو سکتا ہے وہ سنن نسائی کبری میں موجود ہو ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ایسا ہے ، جس سے میں واقف نہیں ہوں ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اہل مدینہ کو اذیت پہنچائے گا اللہ تعالٰی اسے اذیت کا شکار کرے گا اس پر اللہ تعالیٰ کی اور فرشتوں اور انسانوں سب کی لعنت ہو گی اللہ تعالیٰ اس کی کوئی فرض یا نفل عبادت قبول نہیں کرے گا “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عباس بن فضل انصاری ہے اور وہ ضعیف ہے ۔

سیدنا سعد بن ابی وقاص رضی اللہ عنہ روایت کرتے ہیں : نبی اکرم صلی اللہ علیہ وسلم نے فرمایا : ” اے اللہ ! تو اس شخص کے حوالے سے ان لوگوں کے لئے کفایت کر لے جو انہیں مشکل کا شکار کرتا ہے ۔ نبی اکرم صلی اللہ علیہ وسلم کی مراد اہل مدینہ تھے ( آپ نے فرمایا : ) جو بھی شخص اس ( یعنی مدینہ منورہ ) کے بارے میں برائی کا ارادہ کرے گا اللہ تعالٰی اسے ( جہنم میں ) یوں گھول دے گا جس طرح نمک پانی میں حل ہو جاتا ہے “ ۔ ( علامہ ہیثمی فرماتے ہیں : ) میں یہ کہتا ہوں : صحیح میں اس روایت کا آخری حصہ منقول ہے ۔
یہ روایت امام بزار نے نقل کی ہے اور اس کی سند حسن ہے ۔