مجمع الزوائد ومنبع الفوائد

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ نے سیدنا آدم علیہ السلام کو زمین کی طرف نازل کیا ، تو وہ ایک سو سال تک جنت کے حوالے سے روتے رہے پھر انہوں نے زمین کی وسعت کی طرف دیکھا اور بولے : اے میرے پروردگار کیا تیری زمین کو آباد کرنے والا میرے علاوہ اور کوئی نہیں ہے ، تو اللہ تعالی نے ان کی طرف وحی کی جی ہاں ! عنقریب گھر بنائے جائیں گے جن میں میرے نام کا ذکر ہو گا اور میں ان میں سے ایک گھر میں تمہیں ٹھہراؤں گا جسے میں نے اپنی عزت افزائی کے حوالے سے مخصوص کیا ہے میں نے اپنی عظمت اسے عطا کی ہے اور اسے اپنے گھر کا نام دیا ہے اور میں نے اسے اپنی عظمت سے نوازا ہے ، میں اس میں نہیں رہتا ہوں اور یہ چیز میرے لائق بھی نہیں ہے کہ میں گھروں میں رہوں اور نہ ہی یہ میری شان کے لائق ہے میں تو اپنے عرش اور اپنی کرسی پر ہوں میں نے جو چیز پیدا کی ہے اس میں سے کسی چیز کے لئے یہ مناسب نہیں ہے کہ وہ میرے قبضے سے نکل جائے یا میری قدرت سے نکل جائے اے آدم جب تک تم زندہ رہو گے تم اسے آباد کرو گے پھر تمہارے بعد ایک امت کے بعد دوسری امت مختلف زمانوں تک اسے آباد کرتی رہے گی یہاں تک کہ تمہاری اولاد میں سے ایک شخص تک بات پہنچے گی جس کا نام ابراہیم ہو گا میں اسے اس کو آباد کرنے والا اور اس کا رہائشی بناؤں گا “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی اسماعیل بن عمرو بجلی اور ایک راوی اسماعیل بن عیاش ہے ان دونوں کے بارے میں کلام کیا گیا ہے اور ان دونوں کی توثیق بھی کی گئی ہے اس روایت کے بقیہ رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : جب اللہ تعالٰی نے سیدنا آدم علیہ السلام کو جنت سے نازل کیا ، تو فرمایا : میں تمہارے ساتھ ایک گھر ( راوی کو شک ہے شاید یہ الفاظ ہیں : ) ایک ٹھکانہ نازل کر رہا ہوں جس کے ارد گرد طواف کیا جائے گا جس طرح میرے عرش کے اردگرد طواف کیا جاتا ہے اور اس کے پاس نماز ادا کی جائے گی جس طرح میرے عرش کے اردگرد نماز ادا کی جاتی ہے پھر جب طوفان کا زمانہ آیا تو اسے اٹھا لیا گیا انبیاء کرام اس کا حج کرتے رہے لیکن انہیں اس کی جگہ کا پتہ نہیں تھا پھر سیدنا ابراہیم علیہ السلام نے اسے تعمیر کیا انہوں نے پانچ پہاڑوں سے ( پتھر حاصل کر کے ) اسے تعمیر کیا ( وہ پہاڑ ) یہ ہیں حراء ، ثبیر ، لبنان ، جبل طور اور جبل خیر ( سیدنا عبداللہ بن عمرو رضی اللہ عنہ نے فرمایا ) تم سے جہاں تک ہو سکے اس گھر سے نفع حاصل کرو ۔
یہ روایت امام طبرانی نے معجم کبیر میں ” موقوف “ روایت کے طور پر نقل کی ہے اور اس کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : جب اللہ تعالیٰ نے سیدنا آدم علیہ السلام کو ہند کی سرزمین پر اتارا تو ان کے ہمراہ جنت کے پودے بھی تھے ۔ انہوں نے وہاں وہ پودے لگائے ان کا سر آسمان میں تھا اور پاؤں زمین میں تھے وہ فرشتوں کا کلام سنا کرتے تھے اکیلے ہونا ان کو گراں گزرتا تھا ، انہیں بے چینی محسوس ہوتی ، ان کا قد ستر گز تھا ، تو اللہ تعالیٰ نے یہ چیز نازل کی کہ میں تم پر ایک گھر کو نازل کروں گا جس کے ارد گرد طواف کیا جائے گا جس طرح فرشتے میرے عرش کے اردگرد طواف کرتے ہیں اور اس کے پاس نماز ادا کی جائے گی جس طرح فرشتے میرے عرش کے ارد گرد نماز ادا کرتے ہیں تو سیدنا آدم علیہ السلام بیت اللہ کی طرف روانہ ہوئے ان کا ایک قدم اتنی دور پڑتا تھا جتنی بستی ہوتی ہے اور ان کے دو قدموں کے درمیان ویرانہ عبور ہو جاتا تھا یہاں تک کہ وہ مکہ آ گئے وہ صفا کے دروازے کی طرف سے داخل ہوئے ۔ انہوں نے بیت اللہ کا طواف کیا اس کے پاس نماز ادا کی پھر وہ وہاں سے شام تشریف لے گئے اور وہیں ان کا انتقال ہوا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی نہاس بن قہم ہے اور وہ متروک ہے ۔

سیدنا عبداللہ بن عمرو بن العاص رضی اللہ عنہ بیان کرتے ہیں : بیت اللہ کو زمین سے دو ہزار سال پہلے رکھا گیا تھا بیت اللہ سفید جگہ پر تھا ، یہاں تک کہ عرش پانی پر تھا اور زمین اس کے نیچے یوں تھی جیسے وہ باریک سا بادل ہو ، پھر اسی ( بیت اللہ ) سے اس ( زمین ) کو پھیلایا گیا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : حرم کو زمین سے دو ہزار سال پہلے رکھا گیا اور اس کے نیچے سے زمین کو پھیلایا گیا ۔ مجاہد بیان کرتے ہیں : اللہ تعالیٰ نے ارشاد فرمایا ہے : ” تو کچھ لوگوں کے دلوں کو یوں بنا دے کہ وہ اس کی طرف آئیں “ ۔ مجاہد فرماتے ہیں : اگر اللہ تعالیٰ نے یہ فرمایا ہوتا : ” لوگوں کے دلوں کو “ تو پھر اہل فارس اور رومیوں نے بھی اس کے اردگرد ہجوم کر لینا تھا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا ابوطفیل رضی اللہ عنہ بیان کرتے ہیں : زمانہ جاہلیت میں خانہ کعبہ چٹانوں پر بنا ہوا تھا ، اور اتنا اونچا تھا ، کہ بکری کا بچہ اس پر چڑھ سکتا ہے ، اس کی چھت نہیں تھی اس پر کپڑے ڈالے جاتے تھے اور پھر لٹکا دیے جاتے تھے اس کے کونے پر حجر اسود رکھا ہوا تھا اور وہ حلقے کی طرح دو کونوں والا تھا روم کی سرزمین سے ایک کشتی آ رہی تھی جب وہ جدہ کے قریب پہنچی تو وہ کشتی ٹوٹ گئی قریش نکلے تاکہ اس کی لکڑی کو حاصل کر لیں انہیں اس کے پاس ایک رومی شخص ملا قریش نے وہ لکڑی حاصل کی وہ لکڑی اس شخص کو دی وہ کشتی حبشہ کی طرف جا رہی تھی اور کشتی میں موجود رومی شخص بڑھئی تھا جب قریش واپس آئے تو وہ اپنے ساتھ رومی کو بھی لے آئے قریش نے کہا: ہم اس لکڑی کے ذریعے جو اس کشتی میں تھی اس کے ذریعے اپنے پروردگار کا گھر بنائیں گے جب انہوں نے خانہ کعب کو منہدم کرنے کا ارادہ کیا ، تو خانہ کعبہ کی دیوار پر کمزور چیز کی مانند ایک سانپ موجود تھا جس کی پشت سیاہ تھی اور پیٹ سفید تھا ، جب بھی کوئی شخص منہدم کرنے کے لئے بیت اللہ کے قریب ہونا چاہتا یا اس کے پتھر کو اتارنا چاہتا تو وہ ساپ منہ کھول کر اس کی طرف بڑھ جاتا تھا قریش مقام ابراہیم کے پاس اکٹھے ہوئے ۔ انہوں نے اللہ تعالی کی بارگاہ میں گریہ وزاری کی اور عرض کی اے ہمارے پروردگار ہمارا مقصد صرف تیرے گھر کی عزت کرنا اور اس کی آرائش و زیبائش کرنا ہے اگر تو اس سے راضی ہے ، تو پھر جو تجھے اچھا لگے وہ کر لے پھر انہوں نے آسمان میں ایک آواز سنی تو وہاں ایک سیاہ رنگ کی پشت والا اور سفید پیٹ والا پرندہ موجود تھا جس کے دو پاؤں تھے وہ انسان سے بڑا تھا اس نے اپنے پنجے سانپ کے سر میں گاڑے اور اس کو لے کے چلا گیا اس سانپ کی دم فلاں فلاں چیز سے زیادہ بڑی تھی وہ اجناد کی طرف چلا گیا قریش نے خانہ کعبہ کو منہدم کر دیا اور پھر وادی کے پتھروں کے ذریعے اس کی تعمیر کرنا شروع کی قریش اپنی گردنوں پر وہ پتھر اٹھا کے لاتے تھے ۔ انہوں نے اسے بیس گز بلند کیا نبی اکرم صلی اللہ علیہ وسلم بھی اجناد سے پتھر اٹھا کے لایا کرتے تھے آپ نے چادر اوڑھی ہوئی تھی وہ چادر چھوٹی تھی آپ نے وہ چادر کندھے پر رکھنا چاہی تو چادر چھوٹی ہونے کی وجہ سے آپ کی شرمگاہ ظاہر ہو گئی تو پکار کر کہا: گیا : اے محمد ! اپنی شرمگاہ کو ڈھانپ لو اس کے بعد نبی اکرم صلی اللہ علیہ وسلم کو کبھی بھی برہنہ نہیں دیکھا گیا خانہ کعبہ کی اس تعمیر اور نبی اکرم صلی اللہ علیہ وسلم پر وحی نازل ہونے کے درمیان پانچ سال کا فرق ہے اور نبی اکرم صلی اللہ علیہ وسلم کے مکہ سے نکلنے اور اس تعمیر کے درمیان پندرہ سال کا فرق ہے ۔
یہ روایت امام طبرانی نے معجم کبیر میں طویل روایت کے طور پر نقل کی ہے امام أحمد نے اس کا ایک حصہ نقل کیا ہے ان دونوں کے رجال صحیح کے رجال ہیں ۔

ایک روایت میں یہ الفاظ ہیں : اس روی شخص کا نام بلعوم تھا اور اس روایت میں یہ الفاظ ہیں : پکار کر کہا: گیا : اے محمد ! اپنی شرمگاہ کو ڈھانپ لو یہ نبی اکرم صلی اللہ علیہ وسلم کو پہلی مرتبہ ندا کی گئی تھی باقی اللہ بہتر جانتا ہے ابوطفیل بیان کرتے ہیں : قریش نے کچھ لکڑی کو استعمال کیا تھا ۔

سیدنا عباس بن عبدالمطلب رضی اللہ عنہ بیان کرتے ہیں : جب قریش خانہ کعبہ تعمیر کر رہے تھے تو ہم بیت اللہ تک پتھر منتقل کر رہے تھے قریش کے دو دو آدمی پتھر منتقل کرتے تھے اور خواتین ( گارا وغیرہ بنانے کے لیے ) پانی منتقل کرتی تھیں میں اور نبی اکرم صلی اللہ علیہ وسلم ہم اپنی گردن پر رکھ کر پتھر منتقل کر رہے تھے ہماری چادریں پتھروں کے نیچے ہوتی تھیں جب لوگ قریب آ جاتے تھے تو ہم انہیں تہبند کے طور پر باندھ لیتے تھے ایک مرتبہ میں جا رہا تھا سیدنا محمد صلی اللہ علیہ وسلم میرے آگے تھے ان کے جسم پر تہبند نہیں تھا اسی دوران سیدنا محمد صلی اللہ علیہ وسلم گر گئے میں نے پتھر ایک طرف رکھا اور دوڑتا ہوا آیا تو وہ آسمان کی طرف اوپر کی طرف دیکھ رہے تھے میں نے کہا: آپ کو کیا ہوا ہے ؟ تو وہ کھڑے ہو گئے اور انہوں نے اپنا تہبند لیا اور بولے : مجھے اس بات سے منع کیا گیا ہے کہ میں برہنہ ہو کر چلوں ( سیدنا عباس رضی اللہ عنہ بیان کرتے ہیں : ) میں لوگوں سے یہ بات چھپا کے رکھتا تھا اس اندیشے کے تحت کہ وہ یہ کہیں گے : یہ مجنوں ہے یہاں تک کہ اللہ تعالٰی نے آپ کی نبوت کو ظاہر کر دیا ۔
یہ روایت امام طبرانی نے معجم کبیر میں نقل کی ہے اور امام بزار نے اس کی مانند نقل کی ہے اس کی سند میں ایک راوی قیس بن ربیع ہے ، جسے شعبہ ، ثوری طیاسی نے ثقہ قرار دیا ہے اور ایک جماعت نے اسے ضعیف قرار دیا ہے ۔

مرثد بن شرحبیل جو اس موقع پر موجود تھے وہ بیان کرتے ہیں : سیدنا عبداللہ بن زبیر رضی اللہ عنہما نے قریش کے کچھ معززین اور اکابرین کو سیدہ عائشہ رضی اللہ عنہا کے پاس بھیجا سیدہ عائشہ رضی اللہ عنہا نے ان لوگوں کو بتایا کہ نبی اکرم صلی اللہ علیہ وسلم نے ارشاد فرمایا ہے : ” اگر تمہاری قوم زمانہ شرک کے قریب نہ ہوتی تو میں خانہ کعبہ کو سیدنا ابراہیم علیہ السلام اور سیدنا اسماعیل علیہ السلام کی بنیادوں پر تعمیر کرتا کیا تم لوگ یہ بات جانتے ہو ان لوگوں نے سیدنا ابراہیم علیہ السلام اور سیدنا اسماعیل علیہ السلام کی بنیادوں میں کمی کیوں کی تھی “ ۔ میں نے جواب دیا : جی نہیں ! نبی اکرم صلی اللہ علیہ وسلم نے فرمایا : ان کے پاس خرچ ختم ہو گیا تھا راوی بیان کرتے ہیں : اہل شام کے جلانے کی وجہ سے خانہ کعبہ کی عمارت کمزور ہو گئی تھی تو سیدنا عبداللہ بن زبیر رضی اللہ عنہما نے اسے منہدم کروا دیا میں ان دنوں مکہ میں موجود تھا انہوں نے حطیم میں بنیادوں سے ہٹایا تو اس کا حصہ ایک دوسرے کے ساتھ ملا ہوا تھا انہوں نے تیس دن تک اس جگہ کو کھلا رکھا تاکہ اس پر گواہ بنا لیں راوی کہتے ہیں : میں نے اس کو دیکھا کہ وہ اونٹ کی کوہان کی مانند پانچ پتھر تھے ایک طرح کا ایک پتھر تھا ایک طرح کا ایک پتھر تھا ایک طرح کا ایک پتھر تھا اور ایک طرح کے دو پتھر تھے ۔ راوی بیان کرتے ہیں : پھر میں نے ایک شخص کو دیکھا جس نے پتھر اکھاڑنے والی لکڑی کو داخل کیا اور رکن کی طرف سے حرکت دی ، تو دوسری طرف کا رکن ہل گیا ، تو سیدنا عبداللہ بن زبیر رضی اللہ عنہما نے ان بنیادوں پر اسے تعمیر کیا اور اس کے دو دروازے بنائے جو زمین سے ملے ہوئے تھے ایک مشرق کی سمت میں تھا اور ایک مغرب کی سمت میں تھا ۔ جب سیدنا عبداللہ بن زبیر رضی اللہ عنہما کو شہید کر دیا گیا تو حجاج نے حطیم والے حصے کو مہندم کروا دیا اور اسے پہلے کی طرح دوبارہ کر دیا عبدالملک نے اسے خط میں لکھا میری یہ خواہش تھی کہ تم ابن زبیر اور جو کچھ اس نے کیا ہے اسے ویسے ہی رہنے دیتے ۔ مرثد بیان کرتے ہیں : میں نے سیدنا عبداللہ بن عباس رضی اللہ عنہما کو یہ فرماتے ہوئے سنا ہے اگر میں اس چیز کا نگران بنتا جس کے نگران ابن زبیر بنے تھے تو میں پوری حطیم کو بیت اللہ میں داخل کر دیتا کیونکہ اگر یہ بیت اللہ کا حصہ نہ ہوتی تو اس کا طواف نہ کیا جاتا ۔
یہ روایت امام طبرانی نے معجم کبیر میں نقل کی ہے مرثد نامی اس راوی کا ذکر ابن ابوحاتم نے کیا ہے ۔ انہوں نے اس کے بارے میں کوئی جرح ذکر نہیں کی ہے اس روایت کے بقیہ رجال ثقہ ہیں ۔

عروہ بیان کرتے ہیں : جب خانہ کعبہ کو جلا دیا گیا تو وہ کمزور ہو گیا ( یعنی اس کی عمارت کمزور ہو گئی ) ، تو سیدنا عبداللہ بن زبیر رضی اللہ عنہما نے فرمایا اگر تم میں سے کسی ایک کی رہائش گاہ کی یہ حالت ہو جائے تو وہ اسے ٹھیک کیے بغیر راضی نہیں ہو گا میں نے اس بارے میں پختہ ارادہ کر لیا ہے کہ اس کو توڑ کے اس کی تعمیر نو کی جائے ۔ انہوں نے اس بارے میں لوگوں سے مشورہ بھی لیا تو سیدنا عبداللہ بن عباس رضی اللہ عنہما نے فرمایا آپ اسے ویسے ہی رہنے دیں جس حال پر نبی اکرم صلی اللہ علیہ وسلم نے اسے چھوڑا تھا تو سیدنا عبداللہ بن زبیر رضی اللہ عنہما نے کہا: خرچ کرنے کے حوالے سے آپ بخل کا شکار ہو رہے ہیں میں اپنے مال میں سے اس پر خرچ کروں گا راوی کہتے ہیں : پھر انہوں نے طے کر لیا اور اس کو توڑ دیا کچھ لوگ مکہ چھوڑ کے چلے گئے سیدنا عبداللہ بن زبیر رضی اللہ عنہما خانہ کعبہ پر چڑھے ان کے ساتھ ان کا ایک سیاہ فام حبشی غلام تھا انہوں نے اسے توڑنا شروع کیا کچھ لوگوں نے ان دونوں کی مدد کی تو سورج غروب ہونے تک انہوں نے اسے زمین کے ساتھ ملا دیا پھر انہوں نے دریافت کیا : زمانہ جاہلیت میں اس کے پتھر کہاں سے لائے گئے تھے تو انہیں یہ بات بتائی گئی کہ وہ کون سے پہاڑ سے لائے گئے تھے ۔ انہوں نے اسی پہاڑ سے وہ پتھر منگوائے پھر انہوں نے یہ بات بیان کی کہ میں گواہی دے کر یہ بات بیان کرتا ہوں کہ میں نے سیدہ عائشہ رضی اللہ عنہا کو یہ فرماتے ہوئے سنا ہے ۔ نبی اکرم صلی اللہ علیہ وسلم نے ارشاد فرمایا : ” اے عائشہ ! اگر تمہاری قوم زمانہ جاہلیت کے قریب نہ ہوتی تو میں خانہ کعبہ کو تڑوا دیتا ہے اور اسے زمین کے ساتھ ملا دیتا تمہاری قوم نے اسے بلند اس لئے کیا تھا تاکہ وہ جسے چاہیں اسے اندر جانے دیں اور میں اس کا ایک مغربی دروازہ بھی بناتا“ ۔ اس کے بعد انہوں نے ایک اور چیز بھی ذکر کی تھی جو مجھے یاد نہیں رہی اس میں یہ الفاظ ہیں : ” کوئی شخص اس دروازے سے داخل ہوتا اور اس دروازے سے نکل جاتا اور میں اسے سیدنا ابراہیم علیہ السلام کی بنیادوں کے ساتھ ملا دیتا کیونکہ تمہاری قوم نے ان بنیادوں میں کمی کر دی تھی اور حطیم والے حصے کو اس میں سے چھوڑ دیا تھا “ ۔ رادی بیان کرتے ہیں : پھر انہوں نے بنیادوں کی کھدائی کی ، یہاں تک کہ وہ سیدنا ابراہیم علیہ السلام کی بنیادوں تک پہنچ گئے ۔ انہوں نے اس کے تمام اطراف میں پتھر اکھیڑنے والی لکڑی کو داخل کیا ، تو اس کے تمام حصے ہلنے لگے ، پھر انہوں نے اس کو تعمیر کیا اور حطیم والے حصے میں اضافہ کر دیا اور اسے بھی بلند کر دیا ، تو جس دن اس کو منہدم کیا گیا تھا ، اس وقت اس کی لمبائی دس گز تھی ، جب اس میں اضافہ کیا گیا ، تو وہ کم ہو گئی ان کے بیٹے نے ان سے کہا: آپ اس میں نو گز کا اضافہ کریں اور اس میں تین ستونوں کا اضافہ کریں ۔ جب عبدالملک نے سیدنا عبداللہ بن زبیر رضی اللہ عنہما کو شہید کر دیا ، تو حجاج نے اسے خط لکھا کہ تم وہ دروازہ بند کروا دو ! جو ابن زبیر نے اضافہ کروایا تھا اور اسے ویسے ہی کر دو ، جیسے وہ پہلے تھا اور جو ابن زبیر نے حطیم کے حوالے سے اضافہ کیا تھا ، اس اضافے کو الگ کر دو تو اس نے ایسا ہی کیا ، تو اب اس کی تعمیر اس دن کی مانند ہے ، جو سیدنا عبداللہ بن زبیر رضی اللہ عنہما کی تعمیر سے پہلے تھی ، البتہ حجاج نے حطیم والے حصے کو تبدیل کر دیا تھا اور اس کا غلاف وہ ہے ، جو حجاج نے اُسے پہنایا تھا ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

عکرمہ بیان کرتے ہیں : سیدنا عبداللہ بن زبیر رضی اللہ عنہما اور سیدنا عبداللہ بن عباس رضی اللہ عنہما کا گزر مسجد سے ہوا اس وقت اہل شام جبل ابوقبیس سے ان لوگوں پر منجنیق کے ذریعے پتھر پھینک رہے تھے اللہ تعالیٰ نے ان پر بجلی بھیجی جس نے ان کی منجنیق کو جلا دیا اور اس کے نیچے چالیس افراد بھی جل گئے بنوامیہ سے تعلق رکھنے والے کچھ افراد نے کہا: تم لوگ پریشان نہ ہو یہاں پر بجلی گرتی رہتی ہے پھر اللہ تعالیٰ نے ان پر ایک اور بجلی بھیجی اس نے ان کی منجنیق کو جلا دیا اور اس کے نیچے چالیس افراد کو جلا دیا راوی کہتے ہیں : ابھی وہ لوگ اسی حالت میں تھے کہ ان کے پاس یزید بن معاویہ کے مرنے کی اطلاع آ گئی تو اہل شام ادھر ادھر بکھر گئے ۔
( علامہ ہیثمی فرماتے ہیں : ) میں یہ کہتا ہوں : اس کے بعد انہوں نے وہ حدیث ذکر کی ہے ، جو آگے چل کے فتنوں سے متعلق کتاب میں آئے گی اگر اللہ نے چاہا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ہلال بن خباب ہے اور وہ ثقہ ہے اور اس کے بارے میں کلام کیا گیا ہے ۔

مجاہد نے اپنے آقا کے حوالے سے یہ بات نقل کی ہے کہ انہوں نے انہیں بتایا کہ وہ ان افراد میں شامل تھے جنہوں نے زمانہ جاہلیت میں خانہ کعبہ کی تعمیر میں حصہ لیا تھا وہ بیان کرتے ہیں : میرا ایک پتھر ہوتا تھا ، جسے میں نے اپنے ہاتھ کے ذریعے تیار کیا تھا اور میں اللہ تعالیٰ کو چھوڑ کر اس کی عبادت کرتا تھا میں تازہ دودھ لے کے آیا میں نے اپنے اوپر ایثار کر کے وہ بت کے لئے مخصوص کیا وہ دودھ میں نے اس بت کے پاس رکھ دیا ایک کتا آیا اور اسے چاٹنے لگا پھر اس نے ٹانگ اوپر کی اور بت پر پیشاب کر دیا ( پھر ہم نے خانہ کعبہ کی تعمیر شروع کی یہاں تک کہ جب ہم حجر اسود والی جگہ پر پہنچے ، تو حجر اسود کو کوئی دیکھ نہیں پا رہا تھا کیونکہ وہ ہمارے پتھروں کے درمیان یوں تھا جیسے آدمی کا سر ہوتا ہے ، ( اتنی سی جگہ خالی تھی کہ ) اس میں سے آدمی کا سر بمشکل نظر آ سکتا تھا ، قریش کے ہر ایک قبیلے کے افراد نے کہا: ہم اسے رکھیں گے دوسروں نے کہا: ہم اسے رکھیں گے پھر کسی نے کہا: کہ تم اس بارے میں اپنے درمیان کسی کو ثالث بنا لو ان لوگوں نے کہا: اس راستے سے جو شخص سب سے پہلے آئے گا ( وہ ثالث ہو گا ) تو نبی اکرم صلی اللہ علیہ وسلم تشریف لے آئے لوگوں نے کہا: امین شخص تمہارے پاس آئے ہیں ان لوگوں نے نبی اکرم صلی اللہ علیہ وسلم سے کہا: ( تو نبی اکرم صلی اللہ علیہ وسلم نے ) اس حجر اسود کو ایک کپڑے میں رکھوایا اور پھر قریش کی تمام شاخوں کو بلوا کر اس کپڑے کے کونے انہیں پکڑوا دیے اور پھر اسے اس جگہ پر خود نبی اکرم صلی اللہ علیہ وسلم نے رکھا ۔
یہ روایت امام أحمد نے نقل کی ہے اس کی سند میں ایک راوی ہلال بن خباب ہے اور وہ ثقہ ہے اس کے بارے میں کلام کیا گیا ہے اس کے بقیہ رجال صحیح کے رجال ہیں ۔