مجمع الزوائد ومنبع الفوائد

سیدنا عامر بن ربیعہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک عمرہ دوسرے عمرے تک درمیان میں کیے جانے والے گناہوں اور خطاؤں کا کفارہ بن جاتا ہے اور مبرور حج کی جزا صرف جنت ہے “ ۔
یہ روایت امام أحمد نے نقل کی ہے اس کی سند میں ایک راوی عاصم بن عبیداللہ ہے اور وہ ضعیف ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے تین عمرے کیے تھے یہ سب ذی القعدہ کے مہینے میں کیے تھے اور آپ حجر اسود کا استلام کرنے تک مسلسل تلبیہ پڑھتے رہے تھے ۔
یہ روایت امام أحمد نے نقل کی ہے اس کی سند میں ایک راوی حجاج بن ارطاۃ ہے اور اس کے بارے میں کلام کیا گیا ہے ویسے اس کی توثیق کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم نے عمرہ کے دوران مرظہران کے مقام پر پڑاؤ کیا ، تو نبی اکرم صلی اللہ علیہ وسلم کے اصحاب کو یہ بات پتہ چلی کہ قریش یہ کہتے ہیں : یہ لوگ کمزوری کے باعث اٹھ ہی نہیں سکیں گے آپ کے اصحاب نے عرض کی : اگر ہم اپنی سواری کے جانوروں کو قربان کریں اور ان کا گوشت کھائیں اور ان کا شوربہ پی لیں ، تو اگلے دن جب ہم ان لوگوں کے سامنے آئیں گے تو ہمارے جسم چست ہوں گے نبی اکرم صلی اللہ علیہ وسلم نے ارشاد فرمایا : تم ایسا نہ کرو بلکہ اپنا زادراہ میرے سامنے اکٹھا کرو ان لوگوں نے نبی اکرم صلی اللہ علیہ وسلم کے سامنے اسے اکٹھا کیا انہوں نے ایک دستر خوان بچھا دیا اور کھانا کھایا اور واپس چلے گئے اور ان میں سے ہر ایک شخص نے اپنے تھیلے کو بھی بھر لیا پھر نبی اکرم صلی اللہ علیہ وسلم ( مکہ مکرمہ ) تشریف لائے یہاں تک کہ آپ مسجد میں داخل ہوئے قریش حطیم والی طرف بیٹھے ہوئے تھے نبی اکرم صلی اللہ علیہ وسلم نے اپنی چادر کو اضطباع کے طور پر لپیٹا پھر آپ نے ارشاد فرمایا : یہ لوگ تمہارے اندر کمزوری نہ دیکھیں پھر آپ نے رکن کا استلام کیا پھر آپ داخل ہوئے یہاں تک کہ جب آپ رکن یمانی کے پیچھے چھپ گئے تو آپ عام رفتار سے چل کے گئے قریش نے کہا: یہ چلنے پر راضی نہیں ہیں ۔ یہ تو ہرنوں کی طرح دوڑ رہے ہیں نبی اکرم صلی اللہ علیہ وسلم نے تین چکروں میں ایسا کیا ، تو یہ چیز سنت بن گئی ۔ ابوطفیل نامی راوی بیان کرتے ہیں : سیدنا عبداللہ بن عباس رضی اللہ عنہما نے مجھے یہ بات بتائی ہے حجتہ الوداع کے موقع پر نبی اکرم صلی اللہ علیہ وسلم نے ایسا کیا تھا ۔
یہ روایت امام أحمد نے نقل کی ہے اور یہ روایت ” صحیح “ میں اختصار کے ساتھ منقول ہے امام أحمد کے رجال صحیح کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے تین عمرے کیے تھے یہ سب ذی القعدہ کے مہینے میں کیے تھے ان میں سے ایک حدیبیہ کے زمانے میں کیا تھا دوسرا قریش کے ساتھ صلح کے موقع پر کیا تھا اور تیسرا طائف سے آپ کی واپسی پر ہوا تھا جو غزوہ حنین کے موقع پر آپ نے جعرانہ سے کیا تھا ۔
یہ روایت امام بزار نے اور امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم نے حج سے پہلے ذی قعدہ کے مہینے میں تین عمرے کیے تھے ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں البتہ سعید بن مسیب کے سیدنا عمر رضی اللہ عنہ سے سماع کرنے کے بارے میں اختلاف کیا گیا ہے ۔

سیدنا عبداللہ بن عمر رضی اللہ عنہما بیان کرتے ہیں : سیدنا عمر رضی اللہ عنہ نے نبی اکرم صلی اللہ علیہ وسلم سے عمرہ کرنے کی اجازت مانگی نبی اکرم صلی اللہ علیہ وسلم نے انہیں اجازت دے دی اور ارشاد فرمایا : اے میرے بھائی اپنی نیک دعاؤں میں ہمیں بھی شریک رکھنا ۔
یہ روایت امام أحمد نے نقل کی ہے اس کی سند میں ایک راوی عاصم بن عبیداللہ ہے اور وہ ضعیف ہے -

سیدنا براء رضی اللہ عنہ بیان کرتے ہیں : نبی اکرم صلی اللہ علیہ وسلم نے حج کرنے سے پہلے عمرہ کیا تھا ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا ابوبکرۃ رضی اللہ عنہ بیان کرتے ہیں : نبی اکرم صلی اللہ علیہ وسلم عمرہ کرنے کے لئے روانہ ہوئے میں آپ کے ساتھ تھا آپ نے تلبیہ پڑھنا اس وقت تک ” موقوف “ نہیں کیا جب تک حجر اسود کا استلام نہیں کر لیا ۔
یہ روایت امام بزار نے نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔