مجمع الزوائد ومنبع الفوائد

نافع بیان کرتے ہیں : سیدنا عبداللہ بن عمر رضی اللہ عنہما جب حرم کے قریب پہنچ جاتے تھے تو تلبیہ پڑھنے سے رک جاتے تھے پھر جب وہ ذی طوئی کے مقام پر پہنچ جاتے تھے تو وہاں رات بسر کرتے تھے یہاں تک کہ صبح ہو جاتی تھی تو وہ صبح کی نماز پڑھنے کے بعد غسل کرتے تھے اور یہ بات بیان کرتے تھے نبی اکرم صلی اللہ علیہ وسلم نے ایسا ہی کیا ہے پھر وہ چاشت کے وقت مکہ میں داخل ہو کے بیت اللہ آتے تھے حجر اسود کا استلام کرتے تھے اور یہ کہتے تھے : اللہ تعالیٰ کے اسم سے برکت حاصل کرتے ہوئے اللہ تعالی سب سے بڑا ہے پھر وہ طواف کے تین چکروں میں رمل کرتے تھے وہ دونوں رکنوں کے درمیان عام رفتار سے پیدل چلتے تھے جب وہ حجر اسود کے پاس آتے تھے تو استلام کرتے تھے اور تکبیر کہتے تھے اور طواف کے چار چکر وہ عام رفتار سے چل کر پورے کرتے تھے پھر وہ مقام ابراہیم کے پاس آ کر دو رکعت ادا کرتے تھے پھر واپس حجر اسود کے پاس جا کر اس کا استلام کرتے تھے پھر بڑے دروازے کی طرف سے صفا کی طرف چلے جاتے تھے وہ اس پر کھڑے ہو کر سات مرتبہ تکبیر کہتے تھے پھر یہ پڑھتے تھے : ” اللہ تعالی کے علاوہ اور کوئی معبود نہیں ہے وہی ایک معبود ہے اس کا کوئی شریک نہیں ہے بادشاہی اس کے لئے مخصوص ہے حمد اسی کے لئے مخصوص ہے اور وہ ہر چیز پر قدرت رکھتا ہے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اس سے زیادہ اختصار کے ساتھ منقول ہے ۔
یہ روایت امام أحمد نے نقل کی ہے اور اس کے رجال صحیح کے جال ہیں ۔

سیدنا ابوطفیل رضی اللہ عنہ بیان کرتے ہیں : نبی اکرم صلی اللہ علیہ وسلم نے حجر اسود سے حجر اسود تک رمل کیا ہے ۔
یہ روایت امام أحمد نے اور امام ابویعلیٰ نے نقل کی ہے اس کی سند میں ایک راوی عبیداللہ بن ابوزیاد قداح ہے ، جسے امام أحمد اور امام نسائی رحمہ اللہ نے ثقہ قرار دیا ہے یحیی بن معین اور دیگر حضرات نے اسے ضعیف کہا: ہے ۔

سیدنا عبداللہ بن عباس رضی اللہ عنہما بیان کرتے ہیں : حج کے سال نبی اکرم صلی اللہ علیہ وسلم سے رمل کے بارے میں سوال کیا گیا تو آپ نے ارشاد فرمایا : ” اللہ تعالیٰ نے تم پر دوڑنا لازم قرار دیا ہے ، تو تم لوگ دوڑو “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی مفضل بن صدقہ ہے اور وہ ضعیف ہے ۔

سیدنا سہل بن حنیف رضی اللہ عنہ بیان کرتے ہیں : جب نبی اکرم صلی اللہ علیہ وسلم نے عمرہ کیا ، تو آپ راستے میں تھے آپ نے ارشاد فرمایا : اگر ہم کسی موٹے تازے اونٹ کو دیکھیں گے تو اسے ذبح کر لیں گے اور اسے کھا لیں گے تاکہ لوگ ہماری قوت کو دیکھ لیں سیدنا عمر بن خطاب رضی اللہ عنہ نے عرض کی : یا رسول اللہ ! آپ لوگوں کے پاس موجود زادراہ منگوائیں اور پھر اس کے بارے میں دعا کریں تو اللہ تعالیٰ اس میں برکت رکھ دے گا نبی اکرم صلی اللہ علیہ وسلم نے ایسا ہی کیا پھر نبی اکرم صلی اللہ علیہ وسلم نے ارشاد فرمایا : تم لوگ ( مکہ ) آؤ تو پہلے تین چکروں میں رمل کرنا تاکہ تم اپنی قوت کو دکھا دو اس دن نبی اکرم صلی اللہ علیہ وسلم نے ارشاد فرمایا : ” لوگوں کو یہ خوشخبری دے دو کہ جو شخص «لا اله الا الله» پڑھ لے گا اس کے لئے جنت واجب ہو جائے گی “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی رشدین بن سعد ہے اور اس کے بارے میں کلام کیا گیا ہے ویسے اس کی توثیق کی گئی ہے ۔

ہلال بن زید بیان کرتے ہیں : میں نے سیدنا انس بن مالک رضی اللہ عنہ کو بیت اللہ کے گرد تین چکروں میں دوڑتے ہوئے دیکھا ہے وہ حج اور عمرہ میں رکن یمانی سے لے کے رکن اسود تک کے درمیان کے حصے میں عام رفتار سے چلتے تھے ۔ انہوں نے سیدنا انس بن مالک رضی اللہ عنہ کو یہ بیان کرتے ہوئے سنا میں نے نبی اکرم صلی اللہ علیہ وسلم کو اسی طرح کرتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ہلال بن زید بن بولا: ہے اور وہ ضعیف ہے ۔

سیدنا علی رضی اللہ عنہ کے بارے میں یہ بات منقول ہے جب انہوں نے حجر اسود کا استلام کیا ، تو یہ کہا: ” اے اللہ ! تجھ پر ایمان رکھتے ہوئے تیری کتاب کی تصدیق کرتے ہوئے اور تیرے نبی کی سنت کی پیروی کرتے ہوئے ( میں ایسا کر رہا ہوں ) “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حارث ہے اور وہ ضعیف ہے ویسے اس کی توثیق کی گئی ہے ۔

نافع بیان کرتے ہیں : سیدنا عبداللہ بن عمر رضی اللہ عنہما جب حجر اسود کا استلام کرتے تھے تو یہ پڑھا کرتے تھے : ” اے اللہ ! میں تجھ پر ایمان رکھتے ہوئے تیری کتاب کی تصدیق کرتے ہوئے تیرے نبی کی سنت کی پیروی کرتے ہوئے ( اس کو بوسہ دے رہا ہوں ) “ اس کے بعد وہ نبی اکرم صلی اللہ علیہ وسلم پر درود بھیجتے تھے ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا یعلی بن امیہ رضی اللہ عنہ بیان کرتے ہیں : میں نے سیدنا عمر بن خطاب رضی اللہ عنہ کے ساتھ طواف کیا جب میں اس رکن کے پاس موجود تھا جو حجر اسود والی طرف میں دروازے کے پاس ہے ، تو میں نے ان کا ہاتھ پکڑا تاکہ وہ استلام کریں ، تو انہوں نے فرمایا : کیا تم نے نبی اکرم صلی اللہ علیہ وسلم کے ساتھ طواف نہیں کیا ہے میں نے جواب دیا : جی ہاں ! تو انہوں نے فرمایا کیا تم نے نبی اکرم صلی اللہ علیہ وسلم کو اس کا استلام کرتے ہوئے دیکھا ہے ؟ میں نے کہا: : جی نہیں ! انہوں نے کہا: پھر تم اس سے گزر جاؤ کیونکہ تمہارے لئے نبی اکرم صلی اللہ علیہ وسلم کی طریقے میں بہترین نمونہ ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔ انہوں نے اسے ایک اور سند کے ساتھ نقل کیا ہے ، جس میں ایک شخص ایسا ہے ، جس کا نام بیان نہیں کیا گیا ہے
یہ روایت امام طبرانی نے معجم اوسط میں نقل کی ہے ۔

سیدنا یعلی رضی اللہ عنہ بیان کرتے ہیں : میں نے سیدنا عثمان غنی رضی اللہ عنہ کے ساتھ طواف کیا ہم نے رکن یمانی کا استلام کیا سیدنا یعلی رضی اللہ عنہ بیان کرتے ہیں : میں ان افراد میں سے تھا جو بیت اللہ کی طرف تھے جب ہم رکن مغربی کے پاس پہنچے جو حجر اسود کے ساتھ آتا ہے ، تو میں نے ان کا ہاتھ پکڑ لیا تاکہ وہ استلام کریں ۔ انہوں نے دریافت کیا : کیا ہوا ہے ؟ میں نے کہا: : کیا آپ استلام نہیں کریں گے ؟ انہوں نے دریافت کیا : کیا تم نے اللہ کے رسول کے ساتھ طواف نہیں کیا میں نے کہا: جی ہاں ! انہوں نے فرمایا : کیا تم نے نبی اکرم صلی اللہ علیہ وسلم کو ان دو مغربی رکنوں کا استلام کرتے ہوئے دیکھا ہے ؟ میں نے جواب دیا : جی نہیں ! انہوں نے فرمایا : کیا تمہارے لئے نبی اکرم صلی اللہ علیہ وسلم کے طریقے میں بہترین نمونہ نہیں ہے ؟ میں نے جواب دیا : جی ہاں ! تو انہوں نے فرمایا پھر تم اس سے آگے گزر جاؤ ۔
یہ روایت امام أحمد اور امام ابویعلیٰ نے نقل کی ہے امام ابویعلیٰ نے اس روایت کو دو اسناد کے ساتھ نقل کیا ہے جن میں سے ایک کے رجال صحیح کے رجال ہیں امام أحمد کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا ابوطفیل رضی اللہ عنہ بیان کرتے ہیں : سیدنا معاویہ رضی اللہ عنہ اور سیدنا عبداللہ بن عباس رضی اللہ عنہما آئے سیدنا عبداللہ بن عباس رضی اللہ عنہما نے ( خانہ کعبہ کے ) تمام ارکان کا استلام کیا ، تو سیدنا معاویہ رضی اللہ عنہ نے ان سے کہا: نبی اکرم صلی اللہ علیہ وسلم نے دو یمانی رکنوں کا استلام کیا تھا تو سیدنا عبداللہ بن عباس رضی اللہ عنہما نے فرمایا اس کے ارکان میں سے کسی کو چھوڑا نہیں جائے گا ۔ شعبہ نامی راوی کہتے ہیں : لوگوں نے اس روایت میں اختلاف کیا ہے بعض راویوں نے یہ کہا: ہے کہ سیدنا معاویہ رضی اللہ عنہ نے یہ کہا: تھا کہ بیت اللہ کے کسی حصے کو چھوڑا نہیں جائے گا تاہم انہوں نے یہ بات قتادہ کے حوالے سے یاد رکھی ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

عبداللہ بن عبید بن عمیر بیان کرتے ہیں : انہوں نے اپنے والد کو سیدنا عبداللہ بن عمر رضی اللہ عنہما سے یہ کہتے ہوئے سنا : کیا وجہ ہے ؟ کہ میں نے آپ کو دیکھا ہے کہ آپ صرف ان دو ارکان یعنی حجر اسود اور رکن یمانی کا استلام کرتے ہیں ؟ تو سیدنا عبداللہ بن عمر رضی اللہ عنہما نے فرمایا میں ایسا کرتا ہوں تو اس کی وجہ یہ ہے کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ان دونوں کا استلام گناہوں کو ختم کر دیتا ہے “ ۔ انہوں نے یہ بات بیان کی کہ میں نے نبی اکرم صلی اللہ علیہ وسلم کو یہ بھی ارشاد فرماتے ہوئے سنا ہے : ” جو شخص گنتی کر کے سات چکر لگاتا ہے اور پھر دو رکعت ادا کرتا ہے ، تو یہ اس کے لئے غلام آزاد کرنے کی مانند ہے “ ۔ انہوں نے بتایا کہ میں نے نبی اکرم صلی اللہ علیہ وسلم کو یہ بھی ارشاد فرماتے ہوئے سنا ہے ، جو شخص ایک قدم اٹھاتا ہے اور ایک قدم رکھتا ہے ، تو اس کے عوض میں اسے دس نیکیاں ملتی ہیں اور اس کے دس گناہ ختم ہوتے ہیں اور اس کے دس درجات بلند ہوتے ہیں ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے ۔
یہ روایت امام أحمد نے نقل کی ہے اس کی سند میں ایک راوی عطاء بن سائب ہے اور وہ ثقہ ہے لیکن وہ اختلاط کا شکار ہو گیا تھا ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم نے ان سے فرمایا : اے عمر ! تم ایک طاقتور شخص ہو تم حجر اسود کے پاس اگر ہجوم میں داخل ہو گے تو کمزور شخص کو اذیت پہنچاؤ گے اگر تمہیں جگہ خالی ملے تو تم اس کا استلام کر لینا ورنہ اس کی طرف رُخ کر کے «لا اله الا الله» پڑھ لینا اور تکبیر کہہ لینا ۔
یہ روایت امام أحمد نے نقل کی ہے اس کی سند میں ایک راوی ایسا ہے ، جس کا نام بیان نہیں کیا گیا ہے ۔

ابویعفور عبدی بیان کرتے ہیں : مکہ سے حج کر کے واپس آنے والے افراد میں سے ایک شخص کو میں نے یہ بیان کرتے ہوئے سنا : سیدنا عمر رضی اللہ عنہ رکن کے پاس ہجوم میں شامل تھے ۔
انہوں نے اس کی مانند روایت ” مرسل “ روایت کے طور پر نقل کی ہے کیونکہ یہ صاحب ابویعفور صغیر ہیں ۔ انہوں نے صحابہ کرام کا زمانہ نہیں پایا ہے باقی اللہ بہتر جانتا ہے ۔

سیدنا عامر بن ربیعہ رضی اللہ عنہ بیان کرتے ہیں : نبی اکرم صلی اللہ علیہ وسلم ارکان میں سے صرف رکن یمانی اور حجر اسود کا استلام کرتے تھے ۔
یہ روایت امام بزار نے نقل کی ہے اس کی سند میں ایک راوی عاصم بن عبیداللہ ہے اور وہ ضعیف ہے ۔

سیدنا عبدالرحمن بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دو رکنوں کا استلام کرتے ہوئے تم نے کیا کیا ؟ میں نے جواب دیا میں نے دونوں طرح سے کیا ان کا استلام کیا بھی اور ترک بھی کر دیا تو نبی اکرم صلی اللہ علیہ وسلم نے فرمایا : تم نے ٹھیک کیا “ ۔
یہ روایت امام بزار نے اور امام طبرانی نے معجم صغیر میں متصل سند کے ساتھ نقل کی ہے اسے امام بزار نے اور امام طبرانی نے معجم کبیر میں ” مرسل “ روایت کے طور پر بھی نقل کیا ہے ” مرسل “ کے رجال صحیح کے رجال ہیں ” مرفوع “ روایت میں امام بزار کے استاد أحمد بن محمد بن سعید انماطی ہیں میں نے کسی کو ان کے حالات بیان کرتے ہوئے نہیں پایا ہے اس کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے سیدنا عمر بن خطاب رضی اللہ عنہ کو دیکھا انہوں نے حجر اسود کا بوسہ لیا اور اس پر ماتھا لگایا پھر وہ دوبارہ آئے تو انہوں نے اسے بوسہ دیا اور اس پر ماتھا لگایا پھر یہ بات بیان کی میں نے نبی اکرم صلی اللہ علیہ وسلم کو ایسا کرتے ہوئے دیکھا ہے ۔
یہ روایت امام ابویعلیٰ نے دو اسناد کے ساتھ نقل کی ہے جن میں ایک راوی جعفر بن محمد مخزومی ہے وہ ثقہ ہے اس کے بارے میں کلام کیا گیا ہے اس روایت کے بقیہ رجال صحیح کے رجال ہیں امام بزار نے
یہ روایت عمدہ سند کے ساتھ نقل کی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم رکن یمانی کو بوسہ دیتے تھے اور اپنا رخسار اس پر رکھ دیتے تھے ۔
یہ روایت امام ابویعلیٰ نے نقل کی ہے اس کی سند میں ایک راوی عبداللہ بن مسلم بن ہرمز ہے اور وہ ضعیف ہے ۔

سعد بن طارق اپنے والد کا یہ بیان نقل کرتے ہیں : میں نے نبی اکرم صلی اللہ علیہ وسلم کو بیت اللہ کا طواف کرتے ہوئے دیکھا جب حجر اسود کے پاس لوگوں کا ہجوم ہوتا تھا تو آپ اپنے دست مبارک میں موجود چھڑی کے ذریعے اس کا استلام کر لیتے تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن عبدالرحمن بن قدامہ ہے امام بخاری رحمہ اللہ فرماتے ہیں : اس میں غور و فکر کی گنجائش ہے اس روایت کے بقیہ رجال ثقہ ہیں ۔

زید بن جبیر بیان کرتے ہیں : ایک شخص نے سیدنا عبداللہ بن عمر رضی اللہ عنہما کے سامنے حجر اسود کا ذکر کرتے ہوئے یہ بات بیان کی کہ اگر اس پر ہاتھ پھیرنے کے حوالے سے میرے اور اس کے درمیان رکاوٹ آ جاتی ہے اور ہم اس پر ہاتھ نہیں پھیر پاتے ہیں ( تو اس کا کیا حکم ہو گا ؟ ) سیدنا عبداللہ بن عمر رضی اللہ عنہما نے فرمایا اگر ہم اس پر ہاتھ پھیرنے کی استطاعت نہ رکھتے ہوں تو ہم چھڑی کے ذریعے اس کی طرف اشارہ کر دیتے ہیں ۔
یہ روایت امام طبرانی نے معجم کبیر میں مختلف اسانید کے ساتھ نقل کی ہے اس کے بعض رجال ثقہ ہیں ۔

سیدنا عبداللہ بن عمرو رضی اللہ عنہ فرماتے ہیں : اس گھر کا طواف کرو حجر اسود کا استلام کرو کیونکہ یہ دو پتھر تھے ، جنہیں جنت سے نازل کیا گیا ان میں سے ایک کو اٹھا لیا گیا اور عنقریب دوسرے کو بھی اٹھا لیا جائے گا اگر اس طرح نہ ہوا جس طرح میں نے کہا: ہے تو جو شخص میری قبر کے پاس سے گزرے گا تو وہ یہ کہے : یہ عبداللہ بن عمرو رضی اللہ عنہ کذاب کی قبر ہے ۔

ایک روایت میں یہ الفاظ ہیں : سیدنا عبداللہ بن عمرو رضی اللہ عنہ فرماتے ہیں : سیدنا جبرائیل علیہ السلام جنت سے اس پتھر کو لے کے نازل ہوئے تھے تم اس سے نفع حاصل کر لو کیونکہ تم لوگ اس وقت تک بھلائی پر گامزن رہو گے جب تک یہ تمہارے درمیان موجود رہے گا عنقریب ایسا وقت آئے گا یہ وہاں واپس چلا جائے گا جہاں سے یہ آیا تھا ۔ یہ تمام روایات امام طبرانی نے معجم کبیر میں نقل کی ہیں اور ان کے رجال صحیح کے رجال ہیں ۔