مجمع الزوائد ومنبع الفوائد

سیدنا عبداللہ بن عباس رضی اللہ عنہما کے غلام کریب بیان کرتے ہیں : انہوں نے کہا: اے ابوعباس ! اس بارے میں آپ کی کیا رائے ہے کہ اگر کوئی شخص حج کے لئے آئے اور وہ قربانی کا جانور ساتھ نہ لایا ہو پھر اگر وہ بیت اللہ کا طواف کر کے عمرہ کر کے احرام کھول سکتا ہے ، اور جو حاجی اس کا طواف کر لے اور اپنے ساتھ قربانی کا جانور لایا ہو تو وہ حج اور عمرہ اکٹھا کرے گا آپ تو یہ کہتے ہیں ، لیکن لوگ تو یہ نہیں کہتے ہیں ، انہوں نے فرمایا : تمہارا ستیاناس ہو نبی اکرم صلی اللہ علیہ وسلم نکلے تھے ۔ آپ کے ساتھ ایسے اصحاب بھی تھے جو صرف حج کا تلبیہ پڑھ رہے تھے تو نبی اکرم صلی اللہ علیہ وسلم نے یہ حکم دیا کہ جس شخص کے ساتھ قربانی کا جانور نہ ہو وہ بیت اللہ کا طواف کرنے کے بعد عمرہ کر کے احرام کھول دے ان میں سے ایک شخص نے کہا: یا رسول اللہ ! کیا یہ حج ہے ؟ نبی اکرم صلی اللہ علیہ وسلم نے ارشاد فرمایا : یہ حج نہیں ہے بلکہ یہ عمرہ ہے ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم مکہ تشریف لائے آپ کے اصحاب تلبیہ پڑھ رہے تھے یہاں عفان نامی راوی نے یہ الفاظ نقل کیے ہیں : حج کا احرام باندھے ہوئے تھے ۔ نبی اکرم صلی اللہ علیہ وسلم نے ارشاد فرمایا : جو شخص چاہے وہ اسے عمرہ بنا لے البتہ جس شخص کے ساتھ قربانی کا جانور موجود ہے اس کے لئے یہ حکم نہیں ہے ۔ لوگوں نے عرض کی : یا رسول اللہ ! کیا ہم میں سے کوئی ایک شخص منیٰ کی طرف جائے ، تو اس کی شرمگاہ سے منی کے قطرے ٹپک رہے ہوں ۔ نبی اکرم صلی اللہ علیہ وسلم نے ارشاد فرمایا : جی ہاں ۔ اسی دوران ( کچھ لوگوں نے ) خوشبو بھی لگا لی ، سیدنا علی رضی اللہ عنہ یمن سے تشریف لائے تھے ۔ آپ نے دریافت کیا : تم نے کیا نیت کی ہے ؟ انہوں نے عرض کی : میں نے یہی نیت کی ہے کہ جو نبی اکرم صلی اللہ علیہ وسلم کی نیت ہے ، تو نبی اکرم صلی اللہ علیہ وسلم نے فرمایا : تم روانہ ہو جاؤ کیونکہ تم ہمارے ساتھ ہو گئے کیونکہ قربانی کا جانور ساتھ ہے ۔ حمید نامی راوی بیان کرتے ہیں : میں نے طاؤس کو یہ حدیث بیان کی ، تو انہوں نے فرمایا : لوگوں نے ایسا ہی کیا تھا عفان کہتے ہیں : یہ الفاظ ہیں : تم اسے عمرہ بنا لو ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا براء رضی اللہ عنہ بیان کرتے ہیں : نبی اکرم صلی اللہ علیہ وسلم اور آپ کے اصحاب نکلے ہم نے حج کا احرام باندھا ہوا تھا ، تو نبی اکرم صلی اللہ علیہ وسلم نے فرمایا : تم اپنے حج کو عمرہ میں تبدیل کر دو لوگوں نے عرض کی : یا رسول اللہ ! ہم نے حج کا احرام باندھا تھا ہم اسے عمرہ کیسے بنا سکتے ہیں ؟ نبی اکرم صلی اللہ علیہ وسلم نے ارشاد فرمایا : تم اس بات کا جائزہ لو ، جس کی میں تمہیں ہدایت کر رہا ہوں اور ویسا ہی کرو لوگوں نے نبی اکرم صلی اللہ علیہ وسلم کی اس بات پر عمل نہیں کیا ، تو نبی اکرم صلی اللہ علیہ وسلم غصے میں آ گئے آپ تشریف لے گئے ، یہاں تک کہ آپ غصے کے عالم میں سیدہ عائشہ رضی اللہ عنہا کے پاس تشریف لائے سیدہ عائشہ رضی اللہ عنہا کو آپ کے چہرے پر غصے کے آثار کا اندازہ ہو گیا انہوں نے عرض کی : کس نے آپ کو غضبناک کیا ہے تاکہ میں بھی اس پر غصہ کروں ؟ نبی اکرم صلی اللہ علیہ وسلم نے فرمایا : میں غصہ کیوں نہ کروں ؟ میں نے ایک حکم دیا ہے ، جس کی پیروی نہیں کی جا رہی ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدنا معقل بن یسار رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ حج کرنے گئے ہم نے سیدہ عائشہ رضی اللہ عنہا کو پایا کہ انہوں نے اپنے کپڑے الگ کر لیے ہیں ۔ نبی اکرم صلی اللہ علیہ وسلم نے ان سے دریافت کیا : تمہیں کیا ہوا ہے ؟ انہوں نے عرض کی : مجھے یہ بات بتائی گئی ہے کہ آپ نے احرام کھول دیا ہے ، اور اپنی ازواج کو بھی احرام کھولنے کا کہا: ہے نبی اکرم صلی اللہ علیہ وسلم نے فرمایا : احرام اس نے ختم کیا ہے ، جس کے ساتھ قربانی کا جانور نہیں تھا جہاں تک ہمارا تعلق ہے ، تو ہم نے احرام ختم نہیں کیا کیونکہ ہمارے ساتھ قربانی کے جانور ہیں جب تک ہم عرفات نہیں پہنچیں گے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبیداللہ بن ابوحمید ہے ، اور وہ متروک ہے ۔

سیدنا سہل بن حنیف رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ہمراہ حج کرنے کے لئے روانہ ہوئے ۔ ہم نے حج کا احرام باندھا ، جب ہم مکہ آئے ، تو نبی اکرم صلی اللہ علیہ وسلم نے ہمیں یہ حکم دیا کہ ہم اسے عمرہ بنا لیں ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

عروہ بن زبیر بیان کرتے ہیں : وہ سیدنا عبداللہ بن عباس رضی اللہ عنہما کی خدمت میں حاضر ہوئے انہوں نے کہا: اے سیدنا ابن عباس ! آپ کتنے عرصے سے لوگوں کو غلط فہمی کا شکار کر رہے ہیں ؟ سیدنا عبداللہ بن عباس رضی اللہ عنہما نے فرمایا : اے عریہ ! کیا ہوا ہے ؟ انہوں نے کہا: ایک شخص حج اور عمرے کا احرام باندھ کر نکلتا ہے ، جب وہ طواف کر لیتا ہے ، تو آپ کا یہ کہنا ہے کہ وہ احرام کھول سکتا ہے ، حالانکہ سیدنا ابوبکر رضی اللہ عنہ اور سیدنا عمر رضی اللہ عنہ اس چیز سے منع کیا کرتے تھے سیدنا عبداللہ بن عباس رضی اللہ عنہ نے فرمایا : تمہارا ستیاناس ہو ۔ تمہارے نزدیک یہ دونوں قابل ترجیح ہیں ، یا وہ چیز قابل ترجیح ہے جو اللہ کی کتاب میں ہو ، یا جسے اللہ کے رسول نے اپنے اصحاب کے بارے میں اور اپنی امت کے بارے میں سنت کے طور پر مقرر کیا ہو ؟ عروہ نے کہا: یہ دونوں حضرات اللہ کی کتاب کا زیادہ علم رکھتے تھے ، اور نبی اکرم صلی اللہ علیہ وسلم کی سنت کا بھی مجھ سے اور آپ سے زیادہ علم رکھتے تھے ۔ ابن ابوملیکہ کہتے ہیں : تو یوں عروہ نے ان سے اختلاف کیا ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عبداللہ بن ہلال مزنی رضی اللہ عنہ جو نبی اکرم صلی اللہ علیہ وسلم کے صحابی ہیں ، وہ بیان کرتے ہیں : ” ہمارے بعد کسی کے لئے یہ حق نہیں ہے کہ وہ حج کا احرام باندھے اور عمرہ کے ذریعے اپنے احرام کو فسخ کر دے “ ۔
یہ روایت امام طبرانی نے معجم کبیر میں نقل کی ہے ، اور امام بزار نے بھی نقل کی ہے ، تاہم انہوں نے یہ کہا: ہے : عبداللہ بن عبد مزنی سے
یہ روایت منقول ہے ۔ اس روایت کی سند میں ایک راوی کثیر بن عبداللہ مزنی ہے ، اور وہ متروک ہے ۔