مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” پانچ جانور ایسے ہیں ان میں سے ہر ایک فاسق ہے انہیں محرم شخص قتل کر سکتا ہے ، اور انہیں حرم کی حدود میں قتل کیا جا سکتا ہے چوہا ، بچھو ، سانپ ، باؤلا کتا اور کو “ ۔
یہ روایت امام أحمد نے اور امام ابویعلیٰ نے نقل کی ہے ۔ انہوں نے سانپ کی جگہ چیل کا ذکر کیا ہے ۔ امام بزار نے اور امام طبرانی نے معجم کبیر اور معجم اوسط میں اس کا کچھ حصہ نقل کیا ہے ۔ اس کی سند میں ایک راوی لیث بن ابوسلیم ہے ، اور وہ ثقہ ہے ، لیکن تدلیس کرنے والا ہے ۔

وبرہ بیان کرتے ہیں : میں نے سیدنا عبداللہ بن عمر رضی اللہ عنہما کو یہ ارشاد فرماتے ہوئے سنا : نبی اکرم صلی اللہ علیہ وسلم نے بھیڑیے کو مارنے کا حکم دیا ہے ۔
یہ روایت امام أحمد نے ایک حدیث میں نقل کی ہے ، یہ ” صحیح “ میں مذکور ہے ۔ امام طبرانی نے معجم کبیر میں اسے ” موقوف “ روایت کے طور پر نقل کیا ہے ۔ اس کی سند میں ایک راوی حجاج بن ارطاۃ ہے ، اور وہ ثقہ ہے ، لیکن تدلیس کرنے والا ہے ۔

سیدنا ابورافع رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم نماز ادا کر رہے تھے اسی دوران آپ نے کسی چیز کو مارا وہ ایک بچھو تھا جسے آپ نے مار کے قتل کر دیا تھا نبی اکرم صلی اللہ علیہ وسلم نے بچھو سانپ چوہے ، اور چیل کو مار دینے کا حکم احرام والے شخص کو دیا ہے ۔
یہ روایت امام بزار نے نقل کی ہے ۔ اس کی سند میں ایک راوی یوسف بن نافع ہے ، جس کا ذکر ابن ابوحاتم نے کیا ہے ۔ انہوں نے اس پر نہ جرح کی ہے ، اور نہ اس کی توثیق کی ہے ۔ ابن حبان نے اس کا تذکرہ کتاب ” الثقات“ میں کیا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم چھپکلی کو مار دو ! خواہ وہ خانہ کعبہ کے اندر ہو“ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عمر بن قیس کی ہے ، اور وہ ضعیف ہے ۔