مجمع الزوائد ومنبع الفوائد

سیدنا حسیل بن خارجہ اشجعی رضی اللہ عنہ بیان کرتے ہیں : میں ایک سامان فروخت کرنے کے سلسلے میں ، مدینہ منورہ آیا مجھے نبی اکرم صلی اللہ علیہ وسلم کے پاس لایا گیا تھا نبی اکرم صلی اللہ علیہ وسلم نے ارشاد فرمایا : ” میں تمہیں کھجور کے بیس صاع دوں گا اگر تم میرے ساتھیوں کی رہنمائی خیبر کے راستے کی طرف کر دیتے ہو راوی کہتے ہیں : میں نے ایسا ہی کیا جب نبی اکرم صلی اللہ علیہ وسلم خیبر تشریف لائے اور آپ نے اسے فتح کر لیا تو میں آیا تو آپ نے مجھے بیس صاع دیے پھر میں نے اسلام قبول کر لیا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ایسا ہے ، جس سے میں واقف نہیں ہوں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” ابلیس کے کچھ سرکش شیاطین ہوتے ہیں ابلیس ان سے کہتا ہے : تم پر لازم ہے کہ حاجی اور مجاہد کے پاس جاؤ اور انہیں راستے سے بھٹکا دو “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی نافع بن ہرمز ابوہرمز ہے ، اور وہ ضعیف ہے ۔

ابوعمران بیان کرتے ہیں : میں نے سیدنا جندب بن عبداللہ رضی اللہ عنہ سے دریافت کیا : کیا آپ لوگ عجمی لوگوں کو پکڑ لیتے تھے انہوں نے فرمایا : ہم انہیں ایک بستی سے دوسری بستی تک پکڑتے تھے تاکہ وہ راستے کے بارے میں ہماری رہنمائی کر دیں پھر ہم انہیں چھوڑ دیتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔