مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” صرف جمعہ کے دن روزہ نہ رکھو “ ۔
یہ روایت امام أحمد نے نقل کی ہے ۔ اس کی سند میں ایک راوی حسین بن عبداللہ ہے ، جسے یحیی بن معین نے ” ثقہ “ قرار دیا ہے ، اور ائمہ نے اسے ضعیف کہا: ہے ۔

سیدنا بشیر بن خصاصیہ رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم سے عرض کی : میں جمعہ کے دن روزہ رکھ لیا کروں اور میں اس دن کسی سے کلام نہیں کروں گا نبی اکرم صلی اللہ علیہ وسلم نے ارشاد فرمایا : تم جمعہ کے دن روزہ نہ رکھو یہ دنوں میں سے ایک دن ہے جہاں تک اس بات کا تعلق ہے کہ تم کسی سے کلام نہیں کرو گے ( یعنی چپ کے روزے کا تعلق ہے ) تو مجھے اپنی زندگی کی قسم ہے اگر تم کلام کر کے کسی کو نیکی کے بارے میں حکم دو یا برائی سے منع کرو تو یہ اس سے زیادہ بہتر ہے کہ تم خاموش رہو ۔
یہ روایت امام طبرانی نے اسی طرح نقل کی ہے ۔ امام أحمد نے اسے سیدنا بشیر رضی اللہ عنہ کی اہلیہ لیلی کے حوالے سے نقل کیا ہے کہ سیدنا بشیر رضی اللہ عنہ نے نبی اکرم صلی اللہ علیہ وسلم سے سوال کیا تھا ایک قول کے مطابق وہ خاتون صحابیہ ہیں اس روایت کے رجال ثقہ ہیں ۔

سیدنا جابر بن عبداللہ انصاری رضی اللہ عنہما بیان کرتے ہیں : ہم لوگ جمعہ کے دن نبی اکرم صلی اللہ علیہ وسلم کی خدمت میں حاضر ہوئے آپ کے پاس کھانا موجود تھا جس میں سے آپ کھا رہے تھے ۔ آپ نے ارشاد فرمایا : تم لوگ آگے ہو جاؤ اور اس کھانے میں سے کھاؤ ہم نے عرض کی : یا رسول اللہ ! ہم نے روزہ رکھا ہوا ہے نبی اکرم صلی اللہ علیہ وسلم نے دریافت کیا : تم نے گزشتہ کل روزہ رکھا تھا ہم نے عرض کی : جی نہیں نبی اکرم صلی اللہ علیہ وسلم نے ارشاد فرمایا : کیا تم یہ ارادہ رکھتے ہو کہ آئندہ کل روزہ رکھو گے ہم نے عرض کی : جی نہیں نبی اکرم صلی اللہ علیہ وسلم نے ارشاد فرمایا : پھر آگے ہو کے کھاؤ کیونکہ صرف جمعہ کے دن روزہ نہیں رکھا جاتا ہے ، اسے عید بنا لیا جائے ۔ ( علامہ ہیثمی فرماتے ہیں : ) میں یہ کہتا ہوں : سیدنا جابر رضی اللہ عنہ کے حوالے سے ” صحیح “ میں ایک حدیث اختصار کے ساتھ منقول ہے ۔
یہ روایت امام طبرانی نے معجم صغیر اور معجم اوسط میں ان الفاظ کے اضافے کے ساتھ نقل کی ہے : ” اسے عید بنا لیا جائے “ ۔ اس روایت کی سند میں ایک راوی عبداللہ بن سعید بن ابوسعید مقبری ہے ، اور وہ متروک ہے ۔

سیدنا عامر بن لدین اشعری رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک جمعہ کے دن تمہاری عید ہے ، تو تم اس دن روزہ نہ رکھو البتہ اگر تم اس سے ایک دن پہلے یا ایک دن بعد بھی روزہ رکھو تو حکم مختلف ہے “ ۔
یہ روایت امام بزار نے نقل کی ہے ، اور اس کی سند حسن ہے ۔

ابن سیرین بیان کرتے ہیں : سیدنا ابودردار رضی اللہ عنہ شب جمعہ میں رات بھر عبادت کرتے تھے ، اور جمعہ کے دن روزہ رکھا کرتے تھے سیدنا سلمان رضی اللہ عنہ ان کے ہاں آئے نبی اکرم صلی اللہ علیہ وسلم نے ان دونوں کے درمیان بھائی چارہ قائم کیا ہوا تھا سیدنا سلمان رضی اللہ عنہ ان کے ہاں سو گئے سیدنا ابودرداء نے رات کے وقت اٹھ کر نوافل ادا کرنے کا ارادہ کیا ، تو سیدنا سلمان رضی اللہ عنہ اٹھ کر ان کی طرف بڑھے اور انہیں ایسا نہیں کرنے دیا یہاں تک کہ وہ سو گئے اگلے دن انہیں روزہ بھی نہیں رکھنے دیا سیدنا ابودرداء رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے اور آپ کو اس بارے میں بتایا تو نبی اکرم صلی اللہ علیہ وسلم نے ارشاد فرمایا : اے عویمر ! سلمان تم سے زیادہ علم رکھتا ہے تم جمعہ کی شب کو نماز ادا کرنے کے لئے اور اس کے دن کو روزہ رکھنے کے لئے مخصوص نہ کرو ۔
یہ روایت امام طبرانی نے معجم کبیر میں نقل کی ہے ۔
یہ روایت ” مرسل “ ہے ، اور اس کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو کبھی بھی جمعہ کے دن روزہ رکھتے ہوئے نہیں دیکھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی لیث بن ابوسلیم ہے ، اور وہ ثقہ ہے ، لیکن وہ تدلیس کرنے والا ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو کبھی بھی جمعہ کے دن روزہ نہ رکھتے ہوئے ، نہیں دیکھا ہے ۔
یہ روایت امام ابویعلیٰ اور امام بزار نے نقل کی ہے ۔ اس کی سند میں ایک راوی حسن بن ابوجعفر ہے ، اور وہ ضعیف ہے ۔ ابن عدی کہتے ہیں : اس کے حوالے سے صالح احادیث منقول ہیں ۔

سیدنا عبداللہ بن عباس رضی اللہ عنہما بیان کرتے ہیں : انہوں نے نبی اکرم صلی اللہ علیہ وسلم کو کبھی بھی جمعہ کے دن روزہ نہ رکھتے ہوئے نہیں دیکھا ۔
یہ روایت امام بزار نے نقل کی ہے ۔ اس کی سند میں ایک راوی لیث بن ابوسلیم ہے ، اور وہ ثقہ ہے ، لیکن وہ تدلیس کرنے والا ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص جمعہ کی نماز ادا کرے اس ( جمعہ کے ) دن روزہ رکھے بیمار کی عیادت کرے جنازے میں شریک ہو نکاح میں شریک ہو اس کے لئے جنت واجب ہو جاتی ہے “ ۔
یہ روایت امام طبرانی نے معجم کبیر میں نقل کی ہے ، اور معجم اوسط میں اس کی مانند نقل کی ہے ۔ اس کی سند میں ایک راوی محمد بن حفص اوصابی ہے ، اور وہ ضعیف ہے ۔