مجمع الزوائد ومنبع الفوائد

سیدنا عمر بن خطاب رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : جب یہ آیت نازل ہوئی : ” کون شخص اللہ تعالیٰ کو قرض حسنہ دے گا“ ۔ تو سیدنا ابن دحداح رضی اللہ عنہ نے عرض کی : ہمارے پروردگار نے ہمارے اموال میں سے قرض طلب کیا ہے یا رسول اللہ ! نبی اکرم صلی اللہ علیہ وسلم نے فرمایا : جی ہاں ۔ انہوں نے عرض کی : پھر میرے دو باغ ہیں ان میں سے ایک بالائی حصہ میں ہے ، اور دوسرا زیریں حصے میں ہے ، اور ان میں سے جو زیادہ بہتر ہے وہ میں اپنے پروردگار کو قرض کے طور پر دے دیتا ہوں نبی اکرم صلی اللہ علیہ وسلم نے ارشاد فرمایا : یہ تمہارے آس پاس موجود یتیم بچوں کے لئے ہو گا پھر نبی اکرم صلی اللہ علیہ وسلم نے ارشاد فرمایا : ” ابن دحداح کے جنت میں کتنے ہی گچھے لٹک رہے ہیں“ ۔

یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسماعیل بن قیس ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ بیان کرتے ہیں : جب یہ آیت نازل ہوئی : ” کون شخص اللہ تعالیٰ کو قرض حسنہ دے گا“ ۔ تو سیدنا ابودحداح رضی اللہ عنہ نے عرض کی : یا رسول اللہ ! اللہ تعالیٰ ہم سے قرض چاہتا ہے نبی اکرم صلی اللہ علیہ وسلم نے ارشاد فرمایا : جی ہاں ۔ اے ابودحداح ! انہوں نے عرض کی : پھر میں اپنے پروردگار کو اپنا باغ قرض کے طور پر دیتا ہوں وہ باغ جس میں چھ سو کھجور کے درخت ہیں پھر وہ چلتے ہوئے اپنے باغ میں آئے وہاں اُم دحداح اپنے گھر والوں میں موجود تھیں انہوں نے اسی خاتون کو پکار کر کہا: اے ام دحداح انہوں نے جواب دیا : میں حاضر ہوں ۔ سیدنا ابوداحداح نے کہا: تم نکل آؤ کیونکہ میں نے یہ باغ اپنے پروردگار کو قرض کے طور پر دے دیا ہے ، جس میں چھ سو کھجوروں کے درخت ہیں ۔
یہ روایت امام بزار نے نقل کی ہے ۔ اس کی سند میں ایک راوی حمید بن عطاء اعرج ہے ، اور وہ ضعیف ہے ۔ ( علامہ ہیثمی فرماتے ہیں : ) میں یہ کہتا ہوں ، اس نوعیت کی دیگر احادیث مناقب سے متعلق باب میں آگے آئیں گی ، اگر اللہ نے چاہا ۔