مجمع الزوائد ومنبع الفوائد

سیدنا ابوذر غفاری رضی اللہ عنہ بیان کرتے ہیں : میں نے عرض کی : یا رسول اللہ ! نماز کے بارے میں آپ کیا کہتے ہیں ؟ آپ نے فرمایا : یہ عمل کی تکمیل ہے میں نے عرض کی : یا رسول اللہ ! میں آپ سے صدقہ کی فضیلت کے بارے میں دریافت کرتا ہوں آپ نے ارشاد فرمایا : صدقہ پسندیدہ چیز ہے میں نے عرض کی : یا رسول اللہ ! آپ نے اس عمل کو ترک کر دیا جو میرے نزدیک سب سے زیادہ پسندیدہ اور سب سے زیادہ فضیلت والا ہے نبی اکرم صلی اللہ علیہ وسلم نے دریافت کیا : وہ کون سا ہے میں نے عرض کی : روزہ ، آپ نے فرمایا : وہ بہتر ہے ، لیکن وہ مراد نہیں ہے ۔ انہوں نے عرض کی : یا رسول اللہ ! کون سا صدقہ زیادہ فضیلت رکھتا ہے اس کے بعد راوی نے ایک کلمہ ذکر کیا تھا ۔ میں نے عرض کی : اگر میں اس کی قدرت نہ رکھوں نبی اکرم صلی اللہ علیہ وسلم نے فرمایا : تم اضافی ( چیز ) صدقہ کر دو میں نے عرض کی : اگر میں یہ بھی نہ کر سکوں نبی اکرم صلی اللہ علیہ وسلم نے ارشاد فرمایا : نصف کھجور کر دو میں نے عرض کی : اگر میں یہ بھی نہ کر سکوں نبی اکرم صلی اللہ علیہ وسلم نے فرمایا : پاکیزہ بات کہہ دو میں نے عرض کی : اگر میں یہ بھی نہ کر سکوں نبی اکرم صلی اللہ علیہ وسلم نے فرمایا : تم لوگوں کو شر سے بچا کے رکھو کیونکہ یہ بھی ایک صدقہ ہو گا جسے تم اپنی ذات پر کرو گے میں نے عرض کی : اگر میں یہ بھی نہ کر سکوں نبی اکرم صلی اللہ علیہ وسلم نے فرمایا : تم یہ چاہتے ہو کہ تم اپنے اندر کوئی بھی بھلائی نہ رہنے دو ۔
( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس روایت کا ایک حصہ نقل کیا ہے ۔
یہ روایت امام بزار نے نقل کی ہے ۔ اس کی سند میں ایک راوی عوام بن جویریہ ہے ، اور وہ ضعیف ہے ۔

سیدنا رافع بن خدیج رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” صدقہ خرابی کے ستر دروازے بند کر دیتا ہے “ ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی حماد بن شعیب ہے ، اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : کچھ لوگ سیدنا عیسیٰ بن مریم علیہا السلام کے پاس سے گزرے تو سیدنا عیسیٰ علیہ السلام نے فرمایا : ان لوگوں میں سے کوئی ایک آج مر جائے گا اگر اللہ نے چاہا وہ لوگ چلے گئے شام کو جب وہ لوگ واپس آئے ، تو ان کے ساتھ لکڑیوں کے گٹھے تھے سیدنا عیسیٰ علیہ السلام نے فرمایا : تم لوگ یہ رکھ دو پھر آپ نے اس شخص سے دریافت کیا : جس کے بارے میں یہ فرمایا تھا کہ آج یہ مر جائے گا تم اپنا گٹھا کھولو اس نے اسے کھولا تو اس میں ایک سیاہ سانپ موجود تھا سیدنا عیسیٰ علیہ السلام نے دریافت کیا : تم اس بات کا جائزہ لو کہ تم نے آج کیا عمل کیا ہے اس نے جواب دیا : میں نے کوئی عمل نہیں کیا سیدنا عیسیٰ علیہ السلام نے دریافت کیا : تم اس بات کا جائزہ لو کہ تم نے آج کیا عمل کیا ہے اس نے کہا: میں نے کوئی عمل نہیں کیا البتہ میرے پاس ایک روٹی کا ٹکڑا موجود تھا ایک مسکین میرے پاس سے گزرا اس نے مجھ سے مانگا ، تو میں نے اس کا کچھ اسے دے دیا تو سیدنا عیسیٰ علیہ السلام نے فرمایا : اس کی وجہ سے تم سے ( موت کو ) پرے کر دیا گیا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی أحمد بن ابوشیبہ ہے ، اور میں اس سے واقف نہیں ہوں ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” صبح کے وقت صدقہ کر دیا کرو کیونکہ بلا اسے پار کر کے نہیں آ سکتی ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عیسیٰ بن عبداللہ بن محمد ہے ، اور وہ ضعیف ہے ۔

سیدنا عبداللہ بن جعفر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” صدقہ پروردگار کے غضب کو بجھا دیتا ہے “ ۔
یہ روایت امام طبرانی نے معجم اوسط میں ایک طویل حدیث میں نقل کی ہے ، جو آگے چل کر مناقب سے متعلق باب میں آئے گی ، اگر اللہ نے چاہا اس روایت کی سند میں ایک راوی اصرم بن حوشب ہے ، اور وہ ضعیف ہے ۔

سیدنا رافع بن مکیث رضی اللہ عنہ جو ان افراد میں سے ایک ہیں جنہیں حدیبیہ میں شرکت کا شرف حاصل ہے وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اپنے زیر ملکیت لوگوں کے ساتھ اچھا سلوک کرنا بڑھوتری کا باعث ہے برے اخلاق نحوست کا باعث ہیں اور نیکی عمر میں اضافہ کرتی ہے ، اور صدقہ بری موت سے بچاتا ہے “ ۔ ( علامہ ہیثمی فرماتے ہیں : میں یہ کہتا ہوں : امام ابوداؤد نے اس میں سے یہ الفاظ نقل کیے ہیں : ” زیر ملکیت کے ساتھ اچھا سلوک بڑھوتری کا باعث ہے ، اور برے اخلاق نحوست کا باعث ہیں “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا عمرو بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مسلمان کا صدقہ کرنا عمر میں اضافہ کرتا ہے ، اور بری موت کو روکتا ہے اس کے ذریعے اللہ تعالیٰ تکبر ، غربت اور فخر کو ختم کر دیتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی کثیر بن عبداللہ مزی ہے ، اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” نیکی کا سب سے بہتر دروازہ صدقہ کرنا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ایسا ہے ، جس سے میں واقف نہیں ہوں ۔

سیدنا عبداللہ بن عباس رضی اللہ عنہما ” مرفوع“ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا : ” صدقہ مال میں کوئی کمی نہیں کرتا اور جب بھی بندہ اپنا ہاتھ صدقہ دینے کے لئے بڑھاتا ہے ، تو وہ صدقہ مانگنے والے کے ہاتھ میں گرنے سے پہلے اللہ تعالیٰ کے دست قدرت میں ڈال دیا جاتا ہے ، اور جو بندہ خوشحال ہونے کے باوجود مانگنے کا دروازہ کھولتا ہے اللہ تعالی اس پر غربت کا دروازہ کھول دیتا ہے “ ۔

سیدنا عقبہ بن عامر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ( قیامت کے دن ) ہر شخص اپنے صدقے کے سائے میں ہو گا ، اور اس وقت تک رہے گا جب تک لوگوں کے درمیان فیصلہ نہیں ہو جاتا “ ۔

ایک روایت میں یہ الفاظ ہیں : ایک صحابی نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن مؤمن کا سایہ اس کا صدقہ ہو گا “ ۔ راوی کہتے ہیں : یزید نامی راوی روزانہ صدقہ کیا کرتے تھے خواہ وہ کوئی روٹی کا ٹکڑا ہو خواہ وہ پیاز ہو ، یا کوئی اور چیز ہو ۔ یہ تمام روایات امام أحمد نے نقل کی ہیں اور امام ابویعلیٰ نے اور امام طبرانی نے معجم کبیر میں ان میں سے کچھ نقل کی ہیں امام أحمد کے رجال ثقہ ہیں ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” صدقہ اپنے اہل ( یعنی صدقہ کرنے والے ) کی قبر کی تپش کو بجھا دیتا ہے ، اور قیامت کے دن مؤمن اپنے صدقے کے سائے میں ہو گا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا ابوبرزہ اسلمی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بندہ ایک ٹکڑا صدقہ کرتا ہے ، جو اللہ تعالیٰ کی بارگاہ میں بڑھتا رہتا ہے یہاں تک کہ اُحد پہاڑ کی مانند ہو جاتا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سوار بن مصعب ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ صدقہ قبول کرتا ہے ، اور اسے تم میں سے کسی ایک کے لئے یوں بڑھاتا ہے ، جس طرح کوئی ایک شخص اپنے جانور کے بچے کو یا جانور کے اس بچے کو جس کا دودھ چھڑایا گیا ہو پالتا پوستا ہے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح“ کے رجال ہیں ۔ سیدہ عائشہ رضی اللہ عنہا کے حوالے سے ایک اور حدیث بھی منقول ہے ، جو اس کے بعد آئے گی ۔

سیدہ میمونہ بنت سعد رضی اللہ عنہا بیان کرتی ہیں : انہوں نے عرض کی : یا رسول اللہ ! آپ ہمیں صدقہ کرنے کے بارے میں حکم بیان کیجئے نبی اکرم صلی اللہ علیہ وسلم نے ارشاد فرمایا : ” یہ جہنم سے رکاوٹ ہے اس شخص کے لئے جو اللہ تعالی کی رضا کے حصول کے لئے اس کے بارے میں ثواب کی امید رکھتا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ایسا ہے ، جس سے میں واقف نہیں ہوں ۔

سیدنا عبداللہ بن مسعود رضی اللہ عنہ فرماتے ہیں : صدقہ سائل کے ہاتھ میں جانے سے پہلے اللہ تعالیٰ کے ہاتھ میں جاتا ہے پھر سیدنا عبداللہ رضی اللہ عنہ نے یہ آیت تلاوت کی : ” وہی وہ ذات ہے ، جو اپنے بندوں سے توبہ کو قبول کرتی ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبداللہ بن قتادہ محاربی ہے کسی نے اسے ” ضعیف “ قرار نہیں دیا اس کے رجال ثقہ ہیں ۔