مجمع الزوائد ومنبع الفوائد

ابن ابوملیکہ بیان کرتے ہیں : بعض اوقات سیدنا ابوبکر صدیق رضی اللہ عنہ کے ہاتھ سے لگام گر جاتی تھی ، تو وہ اپنی کلائی کے ذریعے اپنی اونٹنی کو مار کر اسے بٹھاتے تھے ، پھر وہ اس لگام کو خود اٹھاتے تھے ، لوگوں نے ان سے کہا: آپ نے ہمیں حکم دینا تھا ، ہم یہ آپ کو پکڑا دیتے ، تو انہوں نے فرمایا : میرے حبیب صلی اللہ علیہ وسلم نے مجھے یہ حکم دیا ہے کہ میں لوگوں سے کچھ نہیں مانگوں گا ۔
یہ روایت امام أحمد نے نقل کی ہے ، ابن ابوملیکہ نامی راوی نے سیدنا ابوبکر رضی اللہ عنہ کا زمانہ نہیں پایا ہے ، عبداللہ بن مومل نامی راوی کے بارے میں کلام کیا گیا ہے ، اور اس کی توثیق کی گئی ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے پانچ چیزوں کے حوالے سے مجھ سے بیعت لی تھی ، سات چیزوں کے حوالے سے مجھ سے پختہ عہد لیا تھا ، اور نو چیزوں کے حوالے سے اللہ تعالٰی کو گواہ بنایا تھا ۔ یہ کہ میں اللہ تعالی کے بارے میں کسی ملامت کرنے والے کی ملامت کی پرواہ نہیں کروں گا ۔ ابومثنی بیان کرتے ہیں : سیدنا ابوذر غفاری رضی اللہ عنہ نے یہ بات بیان کی ہے : نبی اکرم صلی اللہ علیہ وسلم نے مجھے بلایا اور ارشاد فرمایا : کیا تم بیعت کرنے میں دلچسپی رکھتے ہو ؟ تمہیں جنت ملے گی ، میں نے عرض کی : جی ہاں ! پھر میں نے ہاتھ پھیلایا ، تو نبی اکرم صلی اللہ علیہ وسلم نے مجھ پر شرط عائد کرتے ہوئے یہ بات ارشاد فرمائی کہ میں کبھی لوگوں سے کچھ نہیں مانگوں گا ، میں نے عرض کی : ٹھیک ہے ، نبی اکرم صلی اللہ علیہ وسلم نے ارشاد فرمایا : یہاں تک کہ اگر تمہاری چھڑی گر جائے گی ، تو وہ بھی نہیں مانگو گے ، بلکہ خود اتر کر اسے پکڑو گے ۔

ایک روایت میں یہ الفاظ ہیں : نبی اکرم صلی اللہ علیہ وسلم نے ارشاد فرمایا : ” چھ دن ہیں ، اے ابوذر ! سمجھ لو کہ اُس کے بعد تم سے کیا کہا: جائے گا ؟ جب ساتواں دن آیا ، تو نبی اکرم صلی اللہ علیہ وسلم نے ارشاد فرمایا : میں تمہیں اپنے معاملے کے پوشیدہ اور علانیہ ، ہر حوالے سے ، اللہ تعالیٰ کا تقویٰ اختیار کرنے کی تلقین کرتا ہوں ، جب تم کوئی برائی کرو ، تو اچھائی بھی کر لو ، اور کبھی تم کسی سے کوئی چیز نہ مانگنا ، خواہ تمہاری چھڑی گر جائے ، اور تم امانت قبضے میں نہ لینا ، اور تم دو آدمیوں کے درمیان فیصلہ نہ دینا “ ۔ یہ تمام روایات امام أحمد نے نقل کی ہیں اور اس کے رجال ثقہ ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : کون بیعت کرے گا ؟ تو نبی اکرم صلی اللہ علیہ وسلم کے غلام سیدنا ثوبان رضی اللہ عنہ نے عرض کی : ہم کس بات پر بیعت کریں ؟ کیا ہم ایک مرتبہ آپ کی بیعت کر نہیں چکے ہیں ؟ یا رسول اللہ ! نبی اکرم صلی اللہ علیہ وسلم نے ارشاد فرمایا : اس بات پر کہ تم کبھی کسی سے کچھ نہیں مانگو گے ، سیدنا ثوبان رضی اللہ عنہ نے عرض کی : یا رسول اللہ ! اس کے عوض میں آدمی کو کیا ملے گا ؟ نبی اکرم صلی اللہ علیہ وسلم نے ارشاد فرمایا : جنت ، تو سیدنا ثوبان رضی اللہ عنہ نے آپ صلی اللہ علیہ وسلم کی بیعت کر لی ۔ سیدنا ابوامامہ رضی اللہ عنہ بیان کرتے ہیں : میں نے سیدنا ثوبان رضی اللہ عنہ کو مکہ میں دیکھا کہ وہ لوگوں کے ہجوم میں موجود تھے ، ان کی چھڑی گر گئی ، وہ سوار تھے ، ان کی چھڑی کسی شخص کے کندھے پر گری تھی ، اُس شخص نے اسے لیا اور انہیں پکڑانا چاہا ، تو انہوں نے اس سے نہیں لی ، یہاں تک کہ وہ خود نیچے اترے اور انہوں نے خود وہ اُٹھائی ۔

ایک روایت میں یہ الفاظ ہیں : سیدنا ابوامامہ رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم اپنے کچھ اصحاب کے درمیان تشریف فرما تھے ، نبی اکرم صلی اللہ علیہ وسلم نے اپنا دست مبارک بلند کیا ، اور ارشاد فرمایا : کون میری بیعت کرے گا ؟ یہ بات آپ نے تین مرتبہ ارشاد فرمائی ، تو کوئی اُٹھ کر آپ کی طرف نہیں آیا ، صرف سیدنا ثوبان رضی اللہ عنہ آئے ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق روایت ذکر کی ہے ۔ یہ دونوں روایات امام طبرانی نے معجم کبیر میں نقل کی ہیں ، اس کی سند میں ایک راوی علی بن یزید ہے ، اور وہ ضعیف ہے ۔

حضرت ابوذر غفاری رضی اللہ عنہ بیان کرتے ہیں : میرے خلیل ﷺ نے مجھے سات باتوں کی تلقین کی تھی : مساکین سے محبت رکھنا ‘ یہ کہ میں ان کے قریب رہوں ‘ یہ کہ میں اپنے سے نیچے والے فرد کی طرف دیکھوں ‘ اپنے سے اوپر والے شخص کی طرف نہ دیکھوں ‘ یہ کہ میں صلہ رحمی کروں ‘ اگرچہ رشتہ دار میرے ساتھ زیادتی کریں ، یہ کہ میں لا حول ولا قوۃ الا بااللہ کثرت سے پڑھوں ‘ یہ کہ میں حق بات کہوں خواہ وہ کڑوی ہو ‘ اور یہ کہ میں اللہ تعالیٰ کے بارے میں کسی ملامت کرنے والے کی ملامت کی پرواہ نہ کروں ‘ اور یہ کہ میں لوگوں سے کچھ نہ مانگوں ۔ یہ روایت امام طبرانی نے معجم کبیر میں نقل کی ہے ، معجم صغیر میں اس کی مانند روایت نقل کی ہے ‘ اس کے بارے میں میرا یہ خیال ہے کہ اسے امام احمد نے بھی روایت کیا ہے ‘ اس کی ایک اور سند ہے ‘ جو دوسرے مقام پر آئے گی ‘ اگر اللہ نے چاہا ‘ اس کے رجال ثقہ ہیں ‘ البتہ میں نے امام شعبی کے حضرت ابوذر غفاری رضی اللہ عنہ سے سماع سے متعلق کوئی روایت نہیں پائی ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اگر مانگنے والے کو یہ پتہ چل جائے کہ مانگنے میں اس کو کیا ملے گا ؟ تو وہ کبھی نہ مانگے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی قابوس ہے ، اس کے بارے میں کلام کیا گیا ہے ، اور اس کی توثیق کی بھی کی گئی ہے ۔

سیدہ ام سنان اسلمیہ رضی اللہ عنہ ، جو بیعت کرنے والی خواتین میں سے ایک ہیں ، وہ بیان کرتی ہیں : میں نبی اکرم صلی اللہ علیہ وسلم کی خدمت میں حاضر ہوئی ، میں نے عرض کی : یا رسول اللہ ! میں شرمندگی کے عالم میں آپ کے پاس آئی ہوں اور میں آپ کے پاس اُس وقت آئی ہوں ، جب ضرورت کی وجہ سے میں مجبور ہو گئی ہوں ، تو نبی اکرم صلی اللہ علیہ وسلم نے ارشاد فرمایا : ” اگر تم بے نیازی اختیار کرتیں ، تو یہ تمہارے حق میں زیادہ بہتر ہوتا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن عمر بن صالح ہے ، اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” لوگوں سے بے نیاز رہو ! خواہ وہ ایک مسواک کے حوالے سے ہی کیوں نہ ہو “ ۔
یہ روایت امام بزار نے اور امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” تم میں سے کوئی ایک شخص رسی لے ( کر لکڑیاں اکٹھی کر کے انہیں فروخت کر کے ) ، خود بھی اُسے کھائے اور صدقہ بھی کرے ، یہ اُس کے لئے اس سے زیادہ بہتر ہے ، کہ وہ لوگوں سے مانگے ، اور وہ اُسے دیں یا نہ دیں “ ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : دو آدمی ، نبی اکرم صلی اللہ علیہ وسلم کی خدمت میں حاضر ہوئے ، انہوں نے آپ سے کچھ مانگا ، نبی اکرم صلی اللہ علیہ وسلم نے ارشاد فرمایا : تم دونوں ان گھاٹیوں میں جاؤ اور وہاں سے کچھ لکڑیاں اکھٹی کر کے انہیں فروخت کرو ، وہ دونوں چلے گئے انہوں نے لکڑیاں اکھٹی کیں ، پھر وہ آئے اور انہوں نے انہیں فروخت کر دیا ، انہیں اناج حاصل ہوا ، پھر وہ دونوں گئے ، انہوں نے پھر لکڑیاں اکٹھی کیں ، پھر وہ آئے ، وہ مسلسل ایسا کرتے رہے ، یہاں تک کہ انہوں نے دو کپڑے بھی خرید لئے ، پھر انہوں نے دو گدھے بھی خرید لئے اُن دونوں نے کہا: اللہ کے رسول صلی اللہ علیہ وسلم کے حکم میں ، اللہ تعالیٰ نے ہمارے لئے برکت رکھ دی ہے ۔
یہ روایت امام بزار نے نقل کی ہے ۔ اس کی سند میں ایک راوی بشر بن حرب ہے ، اس کے بارے میں کلام کیا گیا ہے ، اور اس کی توثیق بھی کی گئی ہے ۔

ابوسلمہ بن عبدالرحمن ، اپنے والد کا یہ بیان نقل کرتے ہیں : نبی اکرم صلی اللہ علیہ وسلم نے میرے ساتھ وعدہ کیا ہوا تھا ، جب قریظہ فتح ہوا ، تو میں آپ صلی اللہ علیہ وسلم کی خدمت میں حاضر ہوا ، تاکہ آپ نے میرے ساتھ جو وعدہ کیا تھا ، آپ صلی اللہ علیہ وسلم وہ پورا کر دیں ، تو میں نے آپ صلی اللہ علیہ وسلم کو یہ ارشاد فرماتے ہوئے سنا : ” جو شخص بے نیازی اختیار کرتا ہے ، اللہ تعالی اسے بے نیاز رکھتا ہے ، جو شخص قناعت حاصل کرنا چاہتا ہے ، اللہ تعالی اسے قناعت عطا کر دیتا ہے “ ۔ راوی کہتے ہیں : تو میں نے دل میں سوچا کہ یہ تو ضروری ہے کہ میں اب آپ صلی اللہ علیہ وسلم سے کچھ نہ مانگوں ۔
یہ روایت امام بزار نے نقل کی ہے ، ابوسلمہ نامی راوی کے بارے میں یہ بات بیان کی گئی ہے : انہوں نے اپنے والد سے سماع نہیں کیا ہے ۔

سیدنا علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص خوشحال ہونے کے باوجود کچھ مانگتا ہے ، تو وہ اس کے ذریعے جہنم کے انگاروں میں اضافہ کرتا ہے “ لوگوں نے عرض کی : خوشحال ہونے سے مراد کیا ہے ؟ آپ نے فرمایا : رات کا کھانا موجود ہونا “ ۔
یہ روایت عبداللہ بن أحمد نے نقل کی ہے ، امام طبرانی نے معجم اوسط میں نقل کی ہے ، ان دونوں کی سند میں یہ بات مذکور ہے : اسے حسن بن ذکوان نے حبیب بن ابوثابت سے نقل کیا ہے ، حسن نامی راوی کے حوالے سے اگرچہ امام بخاری رحمہ اللہ نے روایت نقل کیا ہے ، لیکن ایک سے زیادہ افراد نے اسے ” ضعیف “ قرار دیا ہے ، اور اس نے حبیب سے سماع بھی نہیں کیا ہے ان دونوں کے درمیان ایک راوی عمرو بن خالد واسطی ہے ، جیسا کہ ابن عدی نے یہ بات کتاب ” الکامل “ میں ابن صاعد کے حوالے سے نقل کی ہے ۔ عمرو بن خالد نامی راوی کو امام أحمد ، یحیی بن معین اور امام دارقطنی رحمہ اللہ نے جھوٹا قرار دیا ہے ۔

سیدنا ابوسعید خدری رضی اللہ عنہ بیان کرتے ہیں : سیدنا عمر رضی اللہ عنہ نے عرض کی : یا رسول اللہ ! میں نے فلاں شخص کو اور فلاں شخص کو سنا کہ وہ تعریف کر رہے تھے ، اور یہ ذکر کر رہے تھے کہ آپ نے ان لوگوں کو دو دینار عطا کیے ہیں ، راوی بیان کرتے ہیں : نبی اکرم صلی اللہ علیہ وسلم نے ارشاد فرمایا : اللہ کی قسم ! لیکن فلاں شخص کا معاملہ تو اس طرح نہیں ہے ، میں نے اُسے دس سے لے کر ، ایک سو کے درمیان ( دینار ) دیے ہیں ، وہ ایسا کیوں کہہ رہا ہے ؟ اللہ کی قسم ! تم میں سے کوئی ایک شخص مانگ کر میرے پاس سے کوئی چیز لے لیتا ہے ، جسے وہ اپنی بغل کے نیچے دبا لیتا ہے ، راوی کہتے ہیں : اس سے مراد یہ ہے کہ اُسے بغل کے نیچے دبا لیتا ہے ، نبی اکرم صلی اللہ علیہ وسلم کی مراد یہ تھی کہ وہ چیز اُس کے لئے آگ ہوتی ہے ، سیدنا عمر رضی اللہ عنہ نے عرض کی : یا رسول اللہ ! پھر آپ وہ چیز انہیں دیتے کیوں ہیں ؟ نبی اکرم صلی اللہ علیہ وسلم نے ارشاد فرمایا : میں کیا کروں ؟ وہ لوگ اس پر اصرار کرتے ہیں اور اللہ تعالی نے میرے لئے بخل سے انکار کیا ہے ۔ ایک روایت میں یہ الفاظ ہیں : ” میں نے اُسے دس سے لے کر ایک سو کے درمیان ( راوی کو شک ہے ، شاید یہ الفاظ ہیں : ) دو سو کے درمیان ( دینار عطا کیے ہیں ) “ ۔
یہ روایت امام أحمد اور امام ابویعلیٰ نے نقل کی ہے ، امام بزار نے اس کی مانند روایت نقل کی ہے ، امام أحمد کے رجال ” مسیح “ کے رجال ہیں ۔

سیدنا عمر رضی اللہ عنہ بیان کرتے ہیں : دو آدمی ، نبی اکرم صلی اللہ علیہ وسلم کی خدمت میں حاضر ہوئے ، انہوں نے نبی اکرم صلی اللہ علیہ وسلم سے کوئی چیز مانگی نبی اکرم صلی اللہ علیہ وسلم نے دو دینار کے ذریعے ان کی مدد کی ، پھر وہ دونوں نکلے ، تو وہ دونوں تعریف کر رہے تھے ، میں نبی اکرم صلی اللہ علیہ وسلم کی خدمت میں حاضر ہوا ، میں نے عرض کی : میں نے فلاں اور فلاں کو دیکھا ، وہ دونوں آپ کے پاس سے نکلے اور وہ دونوں تعریف کر رہے تھے ۔ نبی اکرم صلی اللہ علیہ وسلم نے فرمایا : ؛ لیکن فلاں کو تو یہ بات نہیں کہنی چاہیئے ، اُسے تو میں نے دس سے لے کر ایک سو کے درمیان کی رقم عطا کی ہے وہ ایسا کیوں کہہ رہا تھا ؟ تم میں سے کوئی ایک شخص میرے پاس سے کوئی چیز لے کر بغل میں دبا کے نکلتا ہے ، اور وہ چیز اس کے لئے آگ ہوتی ہے ، میں نے عرض کی : یا رسول اللہ ! پھر آپ اسے کیوں دے دیتے ہیں ؟ جبکہ آپ یہ بات جانتے ہیں ، وہ چیز اس کے لئے آگ ہوتی ہے ، نبی اکرم صلی اللہ علیہ وسلم نے فرمایا : پھر میں کیا کروں ؟ وہ میرے پاس آ کر مجھ سے مانگتے ہیں اور اللہ تعالیٰ میرے لئے بخل سے انکار کرتا ہے ( یعنی اسے میری طرف سے بخل منظور نہیں ہے ) ۔
( علامہ ہیثمی فرماتے ہیں : ) میں یہ کہتا ہوں : ” صحیح“ میں اس کا کچھ حصہ منقول ہے ۔
یہ روایت امام ابویعلیٰ نے معجم کبیر میں نقل کی ہے ، اور اس کے رجال ثقہ ہیں ۔

جعفر بن عبداللہ بن حکم نے ، اپنے والد کے حوالے سے ، مزینہ قبیلے سے تعلق رکھنے والے ایک شخص ( یعنی صحابی ) کے بارے میں یہ ذکر کیا ہے کہ اُس کی والدہ نے اُس سے کہا: کیا ہم چلیں اور نبی اکرم صلی اللہ علیہ وسلم سے کچھ مانگیں نہیں ؟ جس طرح لوگ آپ سے مانگتے ہیں ، راوی کہتے ہیں : میں روانہ ہوا ، تاکہ کچھ مانگوں ، تو میں نے آپ کو کھڑے ہو کر خطبہ ارشاد فرماتے ہوئے پایا ، آپ یہ ارشاد فرما رہے تھے : ” جو شخص مانگنے سے بچتا ہے ، اللہ تعالیٰ اسے بچا کے رکھتا ہے ، جو شخص بے نیازی اختیار کرتا ہے ، اللہ تعالی اسے بے نیازی عطا کرتا ہے ، جس شخص کے پاس پانچ اوقیہ کے برابر رقم موجود ہو ، تو وہ لپٹ کر مانگنے والا شمار ہوتا ہے “ ۔ راوی کہتے ہیں : میں نے سوچا اس خاتون ( یعنی میری والدہ ) کے پاس ، جو اونٹنی ہے ، وہ تو پانچ اوقیہ سے زیادہ بہتر ہے ، اور فلاں خاتون کے پاس جو اونٹنی ہے ، وہ بھی پانچ اوقیہ سے زیادہ بہتر ہے ، تو میں واپس آ گیا اور میں نے آپ صلی اللہ علیہ وسلم سے کچھ نہیں مانگا ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کوئی شخص اپنی ذات کے حوالے سے مانگنے کا دروازہ کھولتا ہے ، تو اللہ تعالی اس پر غربت کا دروازہ کھول دیتا ہے “ ۔
یہ روایت امام ابویعلیٰ نے محمد بن عبدالرحمن کے حوالے سے ، سہیل اور العلاء سے نقل کی ہے ، اور میں اُس سے واقعہ نہیں ہوں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم تک ” مرفوع “ حدیث کے طور پر یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا : ” مانگتے ہوئے آہ وزاری نہ کرو ! کیونکہ جو شخص اس طرح ہم سے کوئی چیز نکلواتا ہے ، اس کے لئے اُس چیز میں برکت نہیں رکھی جائے گی “ ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدنا سہل بن حنظلیہ انصاری رضی اللہ عنہ ، جو نبی اکرم صلی اللہ علیہ وسلم کے صحابی ہیں ، وہ بیان کرتے ہیں : عیینہ اور اقرع نے نبی اکرم صلی اللہ علیہ وسلم سے کوئی چیز مانگی ، نبی اکرم صلی اللہ علیہ وسلم نے سیدنا معاویہ رضی اللہ عنہ کو حکم دیا کہ وہ ان دونوں کے لئے کوئی تحریر لکھ دیں ، اور اس پر اللہ کے رسول نے مہر لگوا دی ، پھر نبی اکرم صلی اللہ علیہ وسلم نے انہیں حکم دیا کہ وہ تحریر اُن دونوں کے حوالے کر دیں ، راوی بیان کرتے ہیں : جہاں تک عینیہ کا تعلق تھا ، تو اس نے دریافت کیا : اس میں کیا ہے ؟ تو نبی اکرم صلی اللہ علیہ وسلم نے فرمایا : اس میں وہ چیز ہے ، جس کے بارے میں ، میں نے حکم دیا ہے ، تو اس نے اس تحریر کو قبول کیا ، اور اسے اپنے عمامے میں باندھ لیا ، وہ اُن دونوں افراد میں زیادہ بردبار تھا ، جہاں تک کہ اقرع کا تعلق ہے ، تو اس نے کہا: کیا میں ایسا صحیفہ اٹھا کے لے کر جاؤں ؟ جس کے بارے میں مجھے پتہ ہی نہیں ہے کہ اس میں کیا ہے ؟ یہ تو متلمس کے صحیفے کی مانند ہو جائے گا ، سیدنا معاویہ رضی اللہ عنہ نے نبی اکرم صلی اللہ علیہ وسلم کو ان دونوں کے قول کے بارے میں بتایا ، نبی اکرم صلی اللہ علیہ وسلم کسی کام کے سلسلے میں گزرے ، آپ ایک اونٹ کے پاس سے گزرے ، جو مسجد کے دروازے پر بیٹھا ہوا تھا ، یہ دن کے ابتدائی حصے کی بات ہے ، جب آپ دن کے آخری حصے میں اُس کے پاس سے گزرے ، تو آپ نے دریافت کیا : اس اونٹ والا شخص کہاں ہے ؟ اُسے تلاش کیا گیا ، لیکن وہ نہیں ملا ، تو نبی اکرم صلی اللہ علیہ وسلم نے ارشاد فرمایا : ان جانوروں کے بارے میں ، اللہ تعالیٰ سے ڈرو ! تم ان پر اس وقت سواری کرو جب یہ صحیح ہوں ، اور اس وقت سواری کرو ، جب یہ موٹے تازے ہوں ، نبی اکرم صلی اللہ علیہ وسلم نے ناراضگی کا اظہار کرتے ہوئے فرمایا : جو شخص کچھ مانگے اور اس کے پاس ایسی چیز موجود ہو ، جو اسے ( مانگنے سے ) بے نیاز کر سکتی ہو ، تو وہ جہنم کے انگارے زیادہ کرنے والا ہو گا ، لوگوں نے عرض کی : یا رسول اللہ ! کیا چیز اسے ( مانگنے سے ) بے نیاز کر سکتی ہے ؟ آپ صلی اللہ علیہ وسلم نے ارشاد فرمایا : اس کا صبح یا شام کا کھانا ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے مختصر طور پر نقل کی ہے ۔ انہوں نے یہ بات ذکر کی ہے کہ جس شخص نے یہ کہا: تھا : کیا میں ایک ایسا صحیفہ اٹھاؤں ، جو متلمس کے صحیفے کی مانند ہے ، وہ کہنے والا شخص عیینہ تھا ، یعنی یہ چیز اس روایت کے برعکس ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

مطرف بن عبدالله بن شخیر ، ایک صحابی کے حوالے سے یہ بات نقل کرتے ہیں : وہ کوفہ کے امیر تھے ، انہوں نے خطبہ دیتے ہوئے یہ بات ارشاد فرمائی : ” یہ مال دینا بھی فتنہ ہے ، اور اسے روک کے رکھنا بھی فتنہ ہے ، یہی وجہ ہے کہ نبی اکرم صلی اللہ علیہ وسلم جب اس کے ساتھ مصروف ہوتے تھے ( یعنی اس کو تقسیم کرنا شروع کرتے تھے ) تو اس سے فارغ ہو کر ہی منبر سے نیچے آتے تھے “ ۔
یہ روایت امام أحمد نے نقل کی ہے ، اس کے رجال ” صحیح “ کے رجال ہیں ۔

سیدنا ثوبان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کچھ مانگتا ہے ، حالانکہ وہ مانگنے سے بے نیاز ہو ، تو یہ چیز قیامت کے دن اُس کے چہرے پر ” کچھ “ ہو گی “ ۔
یہ روایت امام أحمد نے ، امام بزار نے اور امام طبرانی نے معجم کبیر میں نقل کی ہے ، امام أحمد کے رجال ” صحیح “ کے رجال ہیں ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خوشحال شخص کا مانگنا ، قیامت کے دن اُس کے چہرے پر بے عزتی کا نشان ہو گا“ ۔
یہ روایت امام أحمد اور امام بزار نے نقل کی ہے ، انہوں نے یہ الفاظ زائد نقل کیے ہیں : ” خوشحال شخص کا مانگنا آگ ہے ، اگر اسے تھوڑا دیا جائے تو تھوڑی آگ ہو گی ، اور اگر زیادہ دیا جائے ، تو زیادہ آگ ہو گی “ ۔
یہ روایت امام طبرانی نے معجم کبیر اور معجم اوسط میں نقل کی ہے ، امام أحمد کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مانگنا ، اپنے مانگنے والے شخص کے لئے ، قیامت کے دن چہرے پر داغ ہو گا ، اب جو شخص چاہے ، وہ اپنے چہرے پر داغ کو باقی رکھے اور سب سے آسان مانگنا ، رشتے دار سے مانگنا ہے کہ آدمی اپنی حاجت کے سلسلے میں اس سے کچھ مانگ لے ، اور سب سے بہتر مانگنا ، وہ مانگنا ہے ( کہ جب آدمی دوسرے سے مانگے ، تو دینے والا اس کو دینے کے بعد ) خوشحال رہے ، اور تم اپنے زیر کفالت پر خرچ کرنے کا آغاز کرو “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کچھ مانگتا ہے ، حالانکہ وہ مانگنے سے بے نیاز ہو ، تو قیامت کے دن جب اُسے اٹھایا جائے گا ، تو یہ چیز اس کے چہرے پر داغ ہو گی “ ۔
یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا حبشی بن جنادہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص غربت نہ ہونے کے باوجود مانگتا ہے ، تو وہ گویا انگارے کھاتا ہے “ ۔

ایک اور روایت میں یہ الفاظ ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جو شخص کسی مصیبت کے لاحق ہوئے بغیر لوگوں سے مانگتا ہے ، تو وہ گویا انگارہ چباتا ہے “ ۔ یہ دونوں روایات امام طبرانی نے معجم کبیر میں نقل کی ہیں ، پہلی روایت کے رجال ” صحیح “ کے رجال ہیں ، دوسری روایت میں ایک راوی جابر جعفی ہے ، جس کے بارے میں کلام کیا گیا ہے ، ثوری اور شعبہ نے اسے ” ثقہ “ قرار دیا ہے ۔

سیدنا مسعود بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بندہ مسلسل مانگتا رہتا ہے ، حالانکہ وہ خوش حال ہوتا ہے ، یہاں تک کہ اُس کا چہرہ بوسیدہ ( یا خراب ) ہو جاتا ہے ، اور اللہ تعالیٰ کی بارگاہ میں اُس کا کوئی چہرہ نہیں ہو گا “ ۔
یہ روایت امام بزار نے اور امام طبرانی نے معجم کبیر میں نقل کی ہے ، اس کی سند میں ایک راوی محمد بن ابولیلی ہے ، اور اس کے بارے میں کلام کیا گیا ہے ۔

سیدنا سمرہ بن جندب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کسی خوشحال شخص کے لئے مانگنا جائز نہیں ہے ، البتہ وہ کسی رشتہ دار سے یا حاکم وقت سے مانگ سکتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن خراش ہے ، جسے ابن حبان نے ” ثقہ “ قرار دیا ہے ، اور ایک جماعت نے اُسے ” ضعیف“ قرار دیا ہے ، اُن صحابی کے حوالے سے امام ابوداؤد امام ترمذی اور امام نسائی رحمہ اللہ نے ایک روایت نقل کی ہے ، جو زید بن عقبہ نے اُن سے نقل کی ہے ۔ ( اُس کے الفاظ یہ ہیں : ) ” مانگنا ایک خراش ہے ، جو آدمی اپنے چہرے پر ڈال لیتا ہے ، البتہ اگر آدمی حاکم وقت سے مانگے ، یا کسی ایسی صورت حال میں مانگے ، جس میں مانگے بغیر چارہ نہ ہو ، تو معاملہ مختلف ہے “ ۔

سیده ام درداء رضی اللہ عنہ سیدنا ابودرداء رضی اللہ عنہ کے حوالے سے یہ بات نقل کرتی ہیں : میں نے ان سے کہا: کیا وجہ ہے کہ آپ اس طرح نہیں طلب کرتے ہیں ، جس طرح فلاں اور فلاں طلب کر لیتے ہیں ؟ تو انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تمہارے آگے ایک دشوار گزار گھاٹی ہے ، بوجھل لوگ اسے پار نہیں کر سکیں گے “ ۔ ( سیدنا ابودرداء رضی اللہ عنہ نے فرمایا : ) تو مجھے یہ بات پسند ہے کہ اُس گھاٹی کے لئے ، میں ہلکا پھلکا رہوں ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا حکیم بن حزام رضی اللہ عنہ بیان کرتے ہیں : بحرین سے کچھ مال آیا ، نبی اکرم صلی اللہ علیہ وسلم نے سیدنا عباس رضی اللہ عنہ کو بلوایا اور انہیں کچھ مال دیا ، پھر آپ نے دریافت کیا : کیا میں آپ کو مزید دوں ؟ انہوں نے جواب دیا : جی ہاں ! نبی اکرم صلی اللہ علیہ وسلم نے انہیں مزید دیا ، پھر آپ نے دریافت کیا : کیا میں آپ کو مزید دوں ؟ انہوں نے جواب دیا : جی ہاں ! نبی اکرم صلی اللہ علیہ وسلم نے انہیں اور دیا ، نبی اکرم صلی اللہ علیہ وسلم نے دریافت کیا : کیا میں آپ کو مزید دوں ؟ انہوں نے جواب دیا : جی ہاں ! نبی اکرم صلی اللہ علیہ وسلم نے فرمایا : اپنے بعد والے کے لئے بھی باقی رہنے دیں ، پھر نبی اکرم صلی اللہ علیہ وسلم نے مجھے بلوایا اور مجھے دیا ، تو میں نے عرض کی : یا رسول اللہ ! کیا یہ میرے حق میں بہتر ہے ، یا برا ہے ؟ تو نبی اکرم صلی اللہ علیہ وسلم نے فرمایا : جی نہیں ! بلکہ یہ تمہارے حق میں برا ہے ۔ تو نبی اکرم صلی اللہ علیہ وسلم نے جو مجھے دیا تھا ، وہ میں نے آپ کو واپس کر دیا ، پھر میں نے عرض کی : اس ذات کی قسم ! جس کے دست قدرت میں میری جان ہے ، آپ صلی اللہ علیہ وسلم کے بعد میں کبھی کسی سے کوئی عطیہ قبول نہیں کروں گا ۔ محمد بن سیرین بیان کرتے ہیں : سیدنا حکیم رضی اللہ عنہ نے یہ بات بیان کی : میں نے عرض کی : یا رسول اللہ ! آپ اللہ تعالیٰ سے دعا کیجئے کہ وہ مجھے برکت نصیب کرے ، تو نبی اکرم صلی اللہ علیہ وسلم نے دعا کی : ” اے اللہ ! تو اس کے ہاتھ کے سودے میں ، اس کے لئے برکت رکھ دے “ ۔
( علامہ ہیثمی فرماتے ہیں : ) میں یہ کہتا ہوں : سیدنا حکیم رضی اللہ عنہ سے منقول حدیث جو ” صحیح “ میں منقول ہے ، وہ اس کے علاوہ ہے ۔
یہ روایت امام طبرانی نے معجم کبیر میں نقل کی ہے ۔

امام طبرانی نے ، سیدنا حکیم رضی اللہ عنہ کے حوالے سے ایک روایت بھی نقل کی ہے ، جس میں یہ الفاظ ہیں : ” غزوہ حنین کے موقع پر انہوں نے دو گھوڑے پیش کیے ، وہ دونوں مارے گئے ، وہ نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! میرے دو گھوڑے مارے گئے ہیں ، تو آپ مجھے اس کا عوض دیں ، تو نبی اکرم صلی اللہ علیہ وسلم نے انہیں ایک گھوڑا عطا کیا ، اور انہیں مزید بھی عطا کیا ( یا انہوں نے مزید طلب کیا ) “ ۔ پہلی روایت میں اسماعیل بن مسلم مکی ہے ، اس کے بارے میں بہت زیادہ کلام کیا گیا ہے اس کے بارے میں یہ کہا: گیا ہے : یہ صدوق ہے ، لیکن وہم کا شکار ہوتا ہے ۔