مجمع الزوائد ومنبع الفوائد

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے رات کے وقت اپنے پہلو کے نیچے ایک کھجور پائی اور اسے کھا لیا ، پھر اس کے بعد آپ پوری رات سو نہیں سکے ، آپ کی زوجہ محترمہ نے عرض کی : یا رسول اللہ ! کیا آپ گزشتہ رات جاگتے رہے ہیں ؟ نبی اکرم صلی اللہ علیہ وسلم نے فرمایا : میں نے اپنے پہلو کے نیچے ایک کھجور پائی تھی تو اُسے کھا لیا تھا ، ہمارے پاس صدقہ کی کھجوریں بھی موجود تھیں ، تو مجھے یہ اندیشہ ہوا کہ کہیں وہ اُن میں سے نہ ہو ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔

سیدنا ابوعمیر رضی اللہ عنہ ، یا شاید سیدنا ابوعمیرہ رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے پاس بیٹھے ہوئے تھے اسی دوران ایک شخص تھال لے کر آیا ، جس میں کھجوریں موجود تھیں ، نبی اکرم صلی اللہ علیہ وسلم نے دریافت کیا : یہ کیا ہے ؟ ہدیہ ہے ، یا صدقہ ہے ؟ اس نے عرض کی : صدقہ ہے ، راوی کہتے ہیں : تو نبی اکرم صلی اللہ علیہ وسلم نے وہ چیز لوگوں کی طرف بڑھا دی ، اس وقت سیدنا امام حسن رضی اللہ عنہ ( جو اس وقت بچے تھے ) جو اپنے ہاتھوں کے بل چل رہے تھے ، انہوں نے ایک کھجور لی ، اور اپنے منہ میں ڈال لی ، ) تو نبی اکرم صلی اللہ علیہ وسلم نے اپنی انگلی بچے کے منہ میں ڈالی اور کھجور نکالی ، اور اسے ایک طرف رکھ دیا ، پھر آپ نے ارشاد فرمایا : بے شک ہم ، یعنی آل محمد ، ہمارے لئے صدقہ حلال نہیں ہے ۔
یہ روایت امام أحمد اور امام طبرانی نے معجم میں نقل کی ہے ، تاہم امام أحمد نے راوی کا نام سیدنا اسید بن مالک رضی اللہ عنہ نے بیان کیا ہے ، جبکہ امام طبرانی نے ان کا نام رشید بن مالک بیان کیا ہے ، اس کی سند میں ایک راوی حفصہ بنت طلق ہیں ، معرف بن واصل کے علاوہ اور کسی نے اس خاتون سے روایت نقل نہیں کی ہے ، اور نہ کسی نے اس خاتون کی توثیق کی ہے ۔

عطاء بن سائب بیان کرتے ہیں : سیدہ ام کلثوم بنت علی رضی اللہ عنہ نے مجھے یہ بات بیان کی ، عطاء کہتے ہیں : میں ان کے پاس صدقے کی چیز لے کے آیا ، تو اس خاتون نے کہا: ہم اپنے نوجوانوں کو اس سے بچنے کی تلقین کرتے ہیں ، کیونکہ نبی اکرم صلی اللہ علیہ وسلم کے غلام سیدنا میمون رضی اللہ عنہ ( راوی کو شک ہے ، شاید یہ الفاظ ہیں : ) سیدنا مہران رضی اللہ عنہ نے مجھے یہ بات بتائی ہے : ان کا گزر نبی اکرم صلی اللہ علیہ وسلم کے پاس سے ہوا ، تو نبی اکرم صلی اللہ علیہ وسلم نے اُن سے فرمایا : اے میمون ! ( راوی کو شک ہے ، شاید یہ الفاظ ہیں : ) اے مہران ! ہم ایسا گھرانہ ہیں ، کہ ہمیں صدقہ استعمال کرنے سے منع کیا گیا ہے ، اور ہمارے غلام بھی ہمارا حصہ ہیں ، تو تم صدقہ نہ کھانا“ ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ امام طبرانی کی ایک روایت میں یہ الفاظ ہیں : نبی اکرم صلی اللہ علیہ وسلم کے غلام نے ، مجھے یہ بات بیان کی ، جن کا نام سیدنا طہمان رضی اللہ عنہ ( راوی کو شک ہے ، شاید یہ الفاظ ہیں : ) سیدنا ذکوان رضی اللہ عنہ تھا ۔ انہوں نے ایک روایت میں یہ الفاظ نقل کیے ہیں : اُن کا نام سیدنا کیسان رضی اللہ عنہ یا سیدنا ہرمز رضی اللہ عنہ تھا ۔ سیدہ ام کلثوم رضی اللہ عنہ نامی خاتون کے بارے میں ، عطاء بن سائب کے علاوہ میں نے کسی شخص کو نہیں دیکھا ، جس نے اُن سے روایت نقل کی ہو ، اور عطاء کے بارے میں کلام کیا گیا ہے ۔

ابوحوراء بیان کرتے ہیں : ہم لوگ سیدنا امام حسن بن علی رضی اللہ عنہ کے پاس موجود تھے ، ان سے دریافت کیا گیا : آپ کو نبی اکرم صلی اللہ علیہ وسلم کے بارے میں ، یا نبی اکرم صلی اللہ علیہ وسلم کے حوالے سے کیا چیز یاد ہے ؟ تو انہوں نے بتایا : میں ایک مرتبہ نبی اکرم صلی اللہ علیہ وسلم کے ساتھ چلتا ہوا جا رہا تھا ، آپ کا گزر صدقہ کی کھجوروں کے ڈھیر کے پاس سے ہوا ، تو میں نے ایک کھجور لی ، اور اپنے منہ میں ڈال لی ، تو نبی اکرم صلی اللہ علیہ وسلم نے اسے لعاب سمیت لے لیا ، حاضرین میں سے کسی نے عرض کی : اگر آپ یہ رہنے دیتے ، تو کوئی حرج بھی نہیں تھا ، نبی اکرم صلی اللہ علیہ وسلم نے ارشاد فرمایا : بے شک ، ہم یعنی آل محمد ، ہمارے لئے صدقہ حلال نہیں ہے ۔ سیدنا امام حسن رضی اللہ عنہ نے بتایا : مجھے نبی اکرم صلی اللہ علیہ وسلم کے حوالے سے پانچ نمازوں کا حکم بھی یاد ہے ۔
یہ روایت امام أحمد ، امام ابویعلیٰ اور امام طبرانی نے معجم کبیر میں نقل کی ہے ، امام أحمد کے رجال ثقہ ہیں ۔

ربیعہ بن شیبان ابوحوراء بیان کرتے ہیں : میں نے سیدنا امام حسین بن علی رضی اللہ عنہ سے دریافت کیا : آپ کو نبی اکرم صلی اللہ علیہ وسلم کے حوالے سے کیا یاد ہے ؟ انہوں نے جواب دیا : میں بالا خانہ پر چڑھا ، میں نے وہاں سے کھجور لی اور اسے اپنے منہ میں ڈال کر چبانے لگا ، تو نبی اکرم صلی اللہ علیہ وسلم نے فرمایا : اسے نکالو ! ہمارے لئے صدقہ حلال نہیں ہے ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا سلمان رضی اللہ عنہ بیان کرتے ہیں : نبی اکرم صلی اللہ علیہ وسلم ہدیہ قبول کر لیتے تھے ، آپ صلی اللہ علیہ وسلم صدقہ قبول نہیں کرتے تھے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا سلمان فارسی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں کھانا لے کے آیا ، میں ایک غلام تھا ، میں نے عرض کی : یہ صدقہ ہے ، تو نبی اکرم صلی اللہ علیہ وسلم نے اپنے اصحاب کو حکم دیا ، تو انہوں نے اسے کھا لیا ، نبی اکرم صلی اللہ علیہ وسلم نے اسے نہیں کھایا ، پھر میں کھانا لے کے آیا ، میں نے عرض کی : یہ ہدیہ ہے ، میں اسے آپ کو ہدیہ کے طور پر پیش کر رہا ہوں ، تاکہ اس کے ذریعے آپ کی عزت افزائی کروں ، کیونکہ میں نے آپ کو دیکھا ہے ، آپ صدقہ نہیں کھاتے ہیں ، تو نبی اکرم صلی اللہ علیہ وسلم نے اپنے اصحاب کو حکم دیا کہ وہ اُسے کھائیں اور اُن کے ساتھ آپ نے خود بھی اس کو کھایا ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی ابن اسحاق ہے ، وہ ثقہ ہے ، لیکن تدلیس کرنے والا ہے ، اس روایت کے بقیہ رجال ” صحیح “ کے رجال ہیں ۔

سیدنا سلمان فارسی رضی اللہ عنہ کے بارے میں یہ بات منقول ہے : وہ نبی اکرم صلی اللہ علیہ وسلم کی خدمت میں ایک دسترخوان لے کے آئے جس میں کھجوریں موجود تھیں ، نبی اکرم صلی اللہ علیہ وسلم نے دریافت کیا : یہ کیا ہے ؟ انہوں نے عرض کی : یہ آپ کے لئے اور آپ کے اصحاب کے لئے صدقہ ہے ، نبی اکرم صلی اللہ علیہ وسلم نے ارشاد فرمایا : اے سلمان ! ہم صدقہ نہیں کھاتے ہیں ، پھر سیدنا سلمان رضی اللہ عنہ اسے لے گئے ، اگلے دن سیدنا سلمان رضی اللہ عنہ نبی اکرم صلی اللہ علیہ وسلم کے پاس ایک دسترخوان لے کر آئے ، جس پر کھجوریں موجود تھیں ، آپ صلی اللہ علیہ وسلم نے دریافت کیا : یہ دسترخوان کس چیز کا ہے ؟ انہوں نے عرض کی : ہدیہ ہے ، نبی اکرم صلی اللہ علیہ وسلم نے اپنے اصحاب سے فرمایا : تم لوگ قریب ہو جاؤ اور کھاؤ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ، جب آپ کے اہل خانہ کے علاوہ کسی اور کی طرف سے کھانا آتا تھا ، تو آپ اس کے بارے میں دریافت کرتے تھے ، اگر عرض کی جاتی تھی : ہدیہ ہے ، تو آپ اسے کھا لیتے تھے ، اور اگر یہ گزارش کی جاتی تھی کہ یہ صدقہ ہے ، تو آپ ( صحابہ کرام ) یہ فرماتے تھے : تم کھا لو ! آپ صلی اللہ علیہ وسلم خود ( اس کو ) نہیں کھاتے تھے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا ارقم بن ابوارقم رضی اللہ عنہ کو صدقہ وصول کرنے کے لئے بھیجا ، اُن کا گزر سیدنا ابورافع رضی اللہ عنہ کے پاس سے ہوا تو سیدنا ابورافع رضی اللہ عنہ کو بھی انہوں نے اپنے ساتھ لے لیا ، پھر وہ نبی اکرم صلی اللہ علیہ وسلم کی بارگاہ میں حاضر ہوئے اور آپ کے سامنے یہ بات ذکر کی ، تو نبی اکرم صلی اللہ علیہ وسلم نے ارشاد فرمایا : ” اے ابورافع ! محمد ( صلی اللہ علیہ وسلم ) کے لئے اور آل محمد کے لئے صدقہ حرام ہے ، اور قوم کا غلام ، قوم کا فرد ہوتا ہے ( راوی کو شک ہے شاید یہ الفاظ ہیں : ) اُن میں سے ایک ہوتا ہے “ ۔
یہ روایت ابویعلیٰ نے ، اور امام طبرانی نے معجم کبیر میں نقل کی ہے ، اس کی سند میں ایک راوی محمد بن ابولیلی ہے ، اور اس کے بارے میں کلام کیا گیا ہے ۔

سیدنا عبداللہ بن عباس رضی اللہ عنہما بیان کرتے ہیں : بنوہاشم سے تعلق رکھنے والے کچھ نوجوان ، نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! آپ ہمیں زکوۃ وصول کرنے کا اہلکار مقرر کریں ، تاکہ ہم اس کے حوالے سے وہ چیز حاصل کر لیں جو لوگ حاصل کرتے ہیں ، ہم بھی اُسی طرح ادائیگی کریں گے ، جس طرح لوگ ادائیگی کرتے ہیں ، تو نبی اکرم صلی اللہ علیہ وسلم نے ارشاد فرمایا : ” بے شک ہم آل محمد ، ہمارے لئے صدقہ حلال نہیں ہے ، یہ لوگوں کا میل ہے ، لیکن تمہارے بارے میں میرا یہ گمان نہیں ہے کہ جب میں جنت کی کنڈی کو پکڑوں گا ، تو کسی کو تم پر ترجیح دوں گا“ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبداللہ بن جعفر ہے ، جو علی بن مدینی کا والد ہے ، اور وہ ضعیف ہے ۔

اُن کے حوالے سے یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ہمارے لئے اور ہمارے غلاموں کے لئے صدقہ حلال نہیں ہے ۔
یہ روایت امام طبرانی نے منجم اوسط میں نقل کی ہے ۔ اس کی سند میں ایک راوی اسماعیل بن عیاش ہے ، اور اس کے بارے میں کلام کیا گیا ہے ۔

ان کے حوالے سے یہ بات منقول ہے : وہ بیان کرتے ہیں : نوفل بن حارث نے ، اپنے دو صاحبزادوں کو نبی اکرم صلی اللہ علیہ وسلم کی خدمت میں بھیجا اور ان سے کہا: تم دونوں اپنے چچازاد کے پاس جاؤ ! ہو سکتا ہے کہ نبی اکرم صلی اللہ علیہ وسلم تمہیں زکوۃ وصول کرنے کے لئے اہلکار مقرر کر دیں گے ، اس طرح تم ایسی کمائی حاصل کر لو گے جس کے ذریعے تم شادی کر لو گے ، ان دونوں کی ملاقات سیدنا علی رضی اللہ عنہ سے ہوئی انہوں نے دریافت کیا : تم کیا چاہتے ہو ؟ ان دونوں نے اپنی ضرورت کے بارے میں بتایا ، تو سیدنا علی رضی اللہ عنہ نے ان دونوں سے فرمایا : تم لوگ واپس چلے جاؤ ! وہ دونوں واپس چلے گئے ، جب شام ہوئی ، تو نوفل بن حارث نے ان دونوں کو ہدایت کی کہ وہ نبی اکرم صلی اللہ علیہ وسلم کے پاس چلے جائیں ، جب وہ دونوں دروازے پر آئے ، تو انہوں نے اندر آنے کی اجازت مانگی ، نبی اکرم صلی اللہ علیہ وسلم نے سیدہ عائشہ رضی اللہ عنہا سے فرمایا : تم پردہ کر لو ! میرے دو چچازاد اندر آنے لگے ہیں ، پھر ان دونوں صاحبان نے نبی اکرم صلی اللہ علیہ وسلم کے ساتھ اپنے کام کے سلسلے میں بات چیت کی ، تو نبی اکرم صلی اللہ علیہ وسلم نے ارشاد فرمایا : ” اے اہل بیت ! تمہارے لئے صدقہ میں سے کوئی بھی چیز جائز نہیں ہے ، جو لوگوں کے ہاتھوں کا میل ہوتی ہے ، تمہارے لئے خمس کا پانچواں حصہ ہے ، وہ تمہیں بے نیاز کر دے گا ( راوی کو شک ہے ، شاید یہ الفاظ ہیں : ) وہ تمہارے لئے کفایت کر جائے گا“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حسین بن قیس ہے ، جس کا لقب حنش ہے ، اس کے بارے میں بہت زیادہ کلام کیا گیا ہے ، ابومحصن نے اُسے ” ثقہ “ قرار دیا ہے ۔