مجمع الزوائد ومنبع الفوائد

سیدنا انس بن مالک رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ خیبر گئے ، ہم میں سے ایک شخص ایک کھنڈر میں قضائے حاجت کے لئے گیا ، اس نے طہارت حاصل کرنے کے لئے ایک اینٹ لی ، تو اس کے نیچے سے سونا نکل آیا اس نے وہ لیا اور اُسے لے کر نبی اکرم صلی اللہ علیہ وسلم کے پاس آیا ، اور آپ کو اس بارے میں بتایا ، تو آپ نے فرمایا : اس کا وزن کرو ، اس نے اس کا وزن کیا ، تو وہ دو سو درہم کی قیمت کا تھا ، نبی اکرم صلی اللہ علیہ وسلم نے ارشاد فرمایا : یہ دفینہ ہے ، اور اس میں خمس کی ادائیگی لازم ہو گی ۔
یہ روایت امام أحمد اور امام بزار نے نقل کی ہے ، اس کی سند میں ایک راوی عبدالرحمن بن زید بن اسلم ہے ، اور اس کے بارے میں کلام کیا گیا ہے ۔ ابن عدی نے اسے ” ثقہ “ قرار دیا ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جانور کا مارنا رئیگاں جاتا ہے ، کنویں ( میں گر کے مرنا ) رائیگاں جاتا ہے ، معدن ( میں گر کے مرنا ) رائیگاں جاتا ہے ، اور دفینہ میں خمس کی ادائیگی لازم ہو گی “ ۔ امام شیعی فرماتے ہیں : ” رکاز “ عادی خزانے ( یعنی دفینے ) کو کہتے ہیں
یہ روایت امام أحمد نے ، اور امام بزار نے ، اور امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جانور کا مارنا رائیگاں جائے گا ، معدن میں گر کے مرنا رائیگاں جائے گا ، جانور کے مارنے سے مرنا رائیگاں جائے گا ، اور دفینہ میں خمس کی ادائیگی لازم ہو گی “ ۔
یہ روایت امام طبرانی نے معجم کبیر میں نقل کی ہے ، معجم اوسط میں اس کا کچھ حصہ ہے ، اس کی سند میں ایک راوی عبداللہ بن بزیع ہے ، اور وہ ضعیف ہے ۔

سیدنا ابوثعلبہ خشنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دفینہ میں ، خمس کی ادائیگی لازم ہو گی “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یزید بن سنان ہے ، اور اس کے بارے میں کلام کیا گیا ہے ، اس کی توثیق بھی کی گئی ہے ۔

سیدنا زید بن ارقم رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ کو یمن کا گورنر بنا کر بھیجا ان کے پاس رکاز ( یعنی دفینہ ) لایا گیا انہوں نے اس میں سے خمس لے لیا اور باقی بچ جانے والا حصہ متعلقہ فرد کو دے دیا ، جب نبی اکرم صلی اللہ علیہ وسلم کو اس بات کا پتہ چلا تو آپ کو یہ بات پسند آئی ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” رکاز “ سے مراد وہ سونا ہے ، جو زمین سے اگتا ہے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی عبداللہ بن سعید بن ابوسعید ہے ، اور وہ ضعیف ہے ۔

ان کے حوالے سے یہ بات منقول ہے : وہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بنوسیم کی زمین میں معدنیات ظاہر ہونگی ، جن کا نام فرعون یا فرعان ہو گا ، ( اور یہ دونوں الفاظ ابوجہم کی زبان کے مطابق تقریباً برابر ہیں ) بدترین لوگ نکل کر اس کی طرف جائیں گے ، ( راوی کو شک ہے ، یا شاید یہ الفاظ ہیں : ) بدترین افراد کا حشر اس کی طرف کیا جائے گا “ ۔
یہ روایت امام ابویعلیٰ نے نقل کی ہے ، اور اس کے رجال ثقہ ہیں ۔

سراء بنت نبھان غنویہ بیان کرتی ہیں : ایک قبیلہ ( کے افراد ) کلاب کے محلے میں زمین کی کھدائی کر رہے تھے ، انہیں خزانہ ملا ، تو کلاب والوں نے کہا: یہ ہماری جگہ ہے ، قبیلے والوں نے کہا: اسے ہم نے کھودا ہے ، اُن لوگوں نے اپنا یہ مقدمہ نبی اکرم صلی اللہ علیہ وسلم کے سامنے پیش کیا ، تو نبی اکرم صلی اللہ علیہ وسلم نے قبیلے والوں کے حق میں فیصلہ دیا ، اور ان سے خمس وصول کیا ، ( راوی خاتون بیان کرتی ہیں : ) ان میں سے جو چیز ہمارے حصے میں آئی اس سے ہم نے ایک سو جانور خریدے ، ہم اُسے لے کے قبیلے میں آئے ، زکوۃ وصول کرنے والے نے ہم پر زکوۃ لازم کرنا چاہی ، تو ہم نے انکار کیا ، ہم نبی اکرم صلی اللہ علیہ وسلم کی خدمت میں حاضر ہوئے ، نبی اکرم صلی اللہ علیہ وسلم نے ارشاد فرمایا : اگر تم نے اس رقم کو کسی اور مقصد میں استعمال کیا ہے ، تو پھر تم پر اس سال کو ادائیگی لازم نہیں ہو گی ، نبی اکرم صلی اللہ علیہ وسلم نے یہ بات ارشاد فرمائی : ” زکوۃ وصول کرنے والا ، جب کسی قوم کے پاس سے واپس جائے ، اور وہ ان سے راضی ہو ، تو اللہ تعالیٰ بھی ان لوگوں سے راضی ہوتا ہے ، اور جب وہ زکوۃ وصول کرنے والا اُن لوگوں کے پاس سے ایسی حالت میں واپس جائے کہ وہ ان پر ناراض ہو ، تو اللہ تعالیٰ بھی ان ( لوگوں ) پر ناراض ہوتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی أحمد بن حارث عنسانی ہے ، اور وہ ضعیف ہے ۔

حسن بصری یہ بیان کرتے ہیں : مجھ تک یہ روایت پہنچی ہے : نبی اکرم صلی اللہ علیہ وسلم نے ارشاد فرمایا ہے : ” معدن میں گر کے مرنا رائیگاں جائے گا ، جانور سے گر کے مرنا رائیگاں جائے گا ، کنویں میں گر کے مرنا رائیگاں جائے گا ، اور دفینہ میں خمس کی ادائیگی لازم ہو گی “ ۔
یہ روایت امام أحمد نے ” مرسل “ روایت کے طور نقل کی ہے ، اور اس کی سند صحیح ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کے پاس سونے کا ایک ٹکڑا لایا گیا یہ وہ پہلا صدقہ تھا ، جو ہمارے معدن سے آپ کی خدمت میں لایا گیا تھا ، آپ نے ارشاد فرمایا : ” غقریب معدن ظاہر ہوں گے ، اور عنقریب اُن میں مخلوق کے بدترین لوگ ہوں گے “ ۔
یہ روایت امام طبرانی نے معجم صغیر اور معجم اوسط میں نقل کی ہے ، اور اس کے رجال ” صحیح “ کے رجال ہیں ۔