مجمع الزوائد ومنبع الفوائد

سیدہ عائشہ صدیقہ رضی اللہ عنہا خبیر کے بارے میں ذکر کرتے ہوئے ، یہ بات بیان کرتی ہیں : نبی اکرم صلی اللہ علیہ وسلم نے سیدنا ابن رواحہ رضی اللہ عنہ کو یہودیوں کی طرف بھیجا ، وہ اُن کی کھجوروں کی پیداوار کا اندازہ لگاتے تھے ، یہ اس سے پہلے کی بات ہوتی تھی کہ جب کھجوریں کھائے جانے کے قابل ہو جاتیں ، اس کے بعد وہ یہودیوں کو اختیار دیتے تھے کہ اگر وہ چاہیں ، تو اس اندازے کے مطابق پیداوار وصول کریں ، یا پھر اتنی پیداوار اُن کے حوالے کر دیں ، نبی اکرم صلی اللہ علیہ وسلم نے پیداوار کا اندازہ ( پہلے ) لگانے کا حکم اس لئے دیا تھا ، تاکہ پھل کے اتارے جانے اور منتشر ہونے سے پہلے زکوۃ کو شمار کیا جا سکے ۔
( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ، جس میں زکوۃ اور دیگر چیزوں کا ذکر کیا ہے ۔
یہ روایت امام أحمد نے نقل کی ہے ، اور امام طبرانی نے معجم کبیر میں نقل کی ہے ، امام أحمد کے رجال ” صحیح “ کے رجال ہیں ، البتہ انہوں نے ایک روایت میں یہ کہا: ہے : یہ ابن جریج کے حوالے سے ابن شہاب سے منقول ہے ، اور ایک روایت میں یہ کہا: ہے : ابن جریج کہتے ہیں : مجھے ابن شہاب کے حوالے سے یہ بات بیان کی گئی ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا عبداللہ رواحہ رضی اللہ عنہ کو خیبر کی طرف بھیجا ، تاکہ ان کی پیدوار کا اندازہ لگائیں ، پھر انہوں نے ان لوگوں کو اختیار دیا کہ یا تو وہ اُس کے مطابق وصولی کر لیں ، یا اتنی ادائیگی کر دیں ، تو ان لوگوں نے کہا: یہ وہ حق ہے ، جس کی وجہ سے آسمان اور زمین قائم ہیں ۔
یہ روایت امام أحمد نے نقل کی ہے ، اس کی سند میں ایک راوی عمری ہے ، اور اس کے بارے میں کلام کیا گیا ہے ۔

سیدنا عبداللہ بن ابوبکر بن محمد بن عمرو بن حزم رضی اللہ عنہ بیان کرتے ہیں : سیدنا ابن رواحہ رضی اللہ عنہ نے اہل خبیر کے لئے ایک سال پیداوار کا اندازہ لگایا تھا ، وہ جنگ موتہ میں شہید ہو گئے تھے ، پھر سیدنا جبار بن صخر بن خنساء رضی اللہ عنہ کو نبی اکرم صلی اللہ علیہ وسلم نے بھیجا تھا ، یہ سیدنا ابن رواحہ رضی اللہ عنہ ( کی شہادت ) کے بعد کی بات ہے ، انہوں نے ان لوگوں کی پیداوار کا اندازہ لگایا تھا ۔
یہ روایت امام طبرانی نے معجم کبیر میں نقل کی ہے ، یہ روایت ” مرسل “ ہے ، اور اس کی سند صحیح ہے ۔

سیدنا رافع بن خدیج رضی اللہ عنہ بیان کرتے ہیں : نبی اکرم صلی اللہ علیہ وسلم فروہ بن عمرو کو بھیجتے تھے ، جو کھجوروں کی پیداوار کا اندازہ لگاتے تھے ، جب وہ باغ میں داخل ہوتے تھے ، تو یہ حساب لگاتے تھے کہ اس میں کتنے گچھے ہیں ، پھر وہ ان کو ایک دوسرے سے ضرب دیتے تھے کہ اس کی پیدوار کتنی ہو گی ؟ اور وہ اس میں غلطی نہیں کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی اسحاق بن عبداللہ بن ابوفروہ ہے ، اور وہ ضعیف ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم انصار میں سے بنی بیاضہ سے تعلق رکھنے والے ایک شخص کو بھیجتے تھے ، جن کا نام فروہ بن عمرو تھا ، وہ اہل مدینہ کی کھجوروں ( کی پیداوار ) کا اندازہ لگاتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حرام بن عثمان ہے ، اور وہ متروک ہے ۔

سیدنا سہل بن ابوحثمہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اُن کے والد سیدنا ابوحثمہ رضی اللہ عنہ کو کھجوروں کی پیداوار کا اندازہ لگانے کے لئے بھیجا ، ایک شخص نبی اکرم صلی اللہ علیہ وسلم کے پاس آیا ، اُس نے عرض کی : یا رسول اللہ ! سیدنا ابوحثمہ ، رضی اللہ عنہ نے ہم پر زیادہ ادائیگی مقرر کی ہے ، نبی اکرم صلی اللہ علیہ وسلم نے سیدنا ابوحثمہ رضی اللہ عنہ کو بلایا آپ نے فرمایا : اے ابوحثمہ ! تمہارا چچازاد یہ کہتا ہے کہ تم نے اس پر زیادہ ادائیگی مقرر کی ہے ، انہوں نے عرض کی : یا رسول اللہ ! میں نے اس کے اہل خانہ کے لئے کچھ حصہ چھوڑا ہے ، جس کو یہ مسکینوں کو کھلا سکے اور جس کو ہوا نے گرا دیا تھا ، وہ بھی چھوڑ دیا تھا ، تو نبی اکرم صلی اللہ علیہ وسلم نے فرمایا : تمہارے چچازاد نے تو تمہیں زیادہ حصہ دیا ہے ، اور انصاف سے کام لیا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن صدقہ ہے ، اور وہ ضعیف ہے ۔