مجمع الزوائد ومنبع الفوائد

سیدنا عبداللہ بن عمر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” پانچ سے کم اونٹوں میں ، پانچ اوقیہ سے کم ( چاندی میں ) اور پانچ وسق سے کم ( اناج میں ) زکوۃ لازم نہیں ہوتی ہے “ ۔
یہ روایت امام أحمد ، امام بزار اور امام طبرانی نے معجم اوسط میں نقل کی ہے ۔ اس کی سند میں ایک راوی لیث بن ابوسلیم ہے ، وہ ثقہ ہے ، لیکن وہ تدلیس کرنے والا ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پانچ اوقیہ سے کم ( چاندی ) میں زکوۃ لازم نہیں ہوتی ، پانچ اونٹوں سے کم میں زکوۃ لازم نہیں ہوتی ، اور پانچ وسق سے کم ( اناج ) میں زکوۃ لازم نہیں ہوتی ہے “ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : اللہ کے رسول صلی اللہ علیہ وسلم کی طرف سے خواتین کے مہر کے بارے میں یہ سنت جاری ہے کہ وہ بارہ اوقیہ ہو گا ، ایک اوقیہ چالیس درہم کا ہوتا ہے ، تو یہ چار سو اسی درہم ہو جائیں گے ۔ اللہ کے رسول صلی اللہ علیہ وسلم کی طرف سے غسل جنابت میں یہ سنت جاری ہوئی ہے کہ وہ ایک صاع پانی کے ذریعے کیا جائے گا ، اور وضو ، دو رطل پانی کے ذریعے کیا جائے گا ، ایک صاع میں آٹھ رطل ہوتے ہیں ۔ زمین سے جو بھی پیداوار ہوتی ہے ، جیسے گندم ، جو ، کشمش اور کھجور ، اُس کے بارے میں یہ سنت جاری ہوئی ہے کہ جب وہ پانچ وسق تک پہنچ جائے ( تو زکوۃ لازم ہو گی ) اور ایک وسق ساٹھ صاع کا ہوتا ہے ، تو یہ تین سو صاع ہو جائیں گے ، یہ اس صاع کے مطابق ہو گا ، جس کے مطابق سنت جاری ہوئی ہے ۔ اور نبی اکرم صلی اللہ علیہ وسلم کی طرف سے یہ سنت جاری ہوئی ہے : پانچ وسق سے کم ( اناج ) میں زکوۃ واجب نہیں ہو گی ، ایک وسق ساٹھ صاع کا ہوتا ہے ، اس صاع کے حساب سے ہو گا ، تو اس اعتبار سے یہ تین سو صاع ہو جائیں گے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صالح بن موسیٰ طلحی ہے ، اور وہ ضعیف ہے ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے بنو اسلم سے تعلق رکھنے والے ایک شخص کو زکوۃ وصول کرنے کے لئے بھیجا ، تو نبی اکرم صلی اللہ علیہ وسلم نے ارشاد فرمایا : ” پانچ وسق سے کم ( اناج میں ) زکوۃ لازم نہیں ہو گی ، پانچ اونٹوں سے کم میں زکوۃ لازم نہیں ہو گی ، اور پانچ اوقیہ سے کم ( چاندی ) میں زکوۃ لازم نہیں ہو گی “ ۔
یہ روایت امام طبرانی نے معجم کبیر میں نقل کی ہے ۔