مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ ایک جنازے میں شریک ہوئے ، جب آپ اس کو دفن کر کے فارغ ہوئے اور لوگ واپس چلے گئے ، تو نبی اکرم صلی اللہ علیہ وسلم نے ارشاد فرمایا : یہ ( مردہ ) اس وقت تم لوگوں کے جوتوں کی آہٹ بھی سن رہا ہو گا منکر اور نکیر اس کے پاس آئیں گے ، ان کی آنکھیں پیتل کی ہنڈیوں کی مانند ہوں گی ، اور ان دونوں کے دانت یوں نکلے ہوئے ہوں گے جس طرح گائے کے سینگ ہوتے ہیں اور ان دونوں کی آواز بجلی کی آواز کی مانند ہو گی ، وہ دونوں فرشتے اسے بٹھا کر اس سے سوال کریں گے کہ وہ کس کی عبادت کرتا تھا اور اس کا نبی کون تھا اگر وہ ایسا شخص ہو جو اللہ کی عبادت کرتا تھا ، تو یہ کہے گا میں اللہ تعالیٰ کی عبادت کیا کرتا تھا اور میرے نبی سیدنا محمد صلی اللہ علیہ وسلم ہیں جو ہمارے پاس واضح نشانیاں لے کے آئے تھے ہم ان پر ایمان لائے اور ہم نے ان کی پیروی کی اللہ تعالیٰ کے اس فرمان سے یہی مراد ہے : ” اللہ تعالیٰ ایمان والوں کو ثابت قول پر ثابت قدم رکھے گا دنیا میں بھی اور آخرت میں بھی “ ۔ تو اس مردے سے یہ کہا: جائے گا تم یقین پر زندہ رہے اسی پر تم مرے اور اسی پر تمہیں زندہ کیا جائے گا پھر اس مردے کے لئے جنت کی طرف دروازہ کھول دیا جائے گا ، اور اس کی قبر کو اس کے لئے کشادہ کر دیا جائے گا اور اگر مردہ اہل شک میں سے ہو تو وہ یہ کہے گا مجھے نہیں معلوم میں نے لوگوں کو ایک بات کہتے ہوئے سنا تو میں نے بھی وہ بات کہہ دی تو اس سے یہ کہا: جائے گا تم شک پر زندہ رہے اسی پر تم مرے اور اسی پر تمہیں دوبارہ زندہ کیا جائے گا پھر اس کے لئے جہنم کی طرف دروازہ کھول دیا جائے اور اس پر بچھوؤں اور سانپوں کو مسلط کر دیا جائے گا ، اگر ان میں سے کوئی ایک دنیا پر پھونک مار دے تو وہاں کبھی کوئی چیز نہ آگے جہاں اس نے پھونک ماری ہو وہ اسے نوچیں گے زمین کو حکم ہو گا وہ اسے بھینچ لے گی یہاں تک کہ اس کی پسلیاں ایک دوسرے میں پیوست ہو جائیں گی ۔
یہ روایت امام طبرانی نے معجم اوسط میں نقل کی ہے ۔ وہ بیان کرتے ہیں : ابن لہیعہ اسے نقل کرنے میں منفرد ہے ۔ ( علامہ ہیثمی فرماتے ہیں : ) میں یہ کہتا ہوں ، اس کے بارے میں کلام کیا گیا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب میت کو دفن کیا جاتا ہے ، تو وہ لوگوں کے جوتوں کی آہٹ بھی سنتی ہے ، جب وہ لوگ اسے چھوڑ کر واپس جاتے ہیں “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدنا عبداللہ رضی اللہ عنہ نے فرمایا : جب میں تم لوگوں کو کوئی حدیث بیان کروں تو میں اس کی تصدیق کے بارے میں ( قرآن کی آیت ) تمہیں بتاؤں گا جب مؤمن مر جاتا ہے ، تو وہ اپنی قبر میں بیٹھ جاتا ہے ، اور اس سے دریافت کیا جاتا ہے : تمہارا پروردگار کون ہے تمہارا دین کیا ہے ؟ تمہارے نبی کون ہیں تو اللہ تعالیٰ اسے ثابت قدم رکھتا ہے وہ عرض کرتا ہے میرا پروردگار اللہ تعالیٰ ہے میرا دین اسلام ہے میرے نبی سیدنا محمد صلی اللہ علیہ وسلم ہیں تو اس کے لئے اس کی قبر کو کشادہ کر دیا جاتا ہے ، اور اس کے لئے قبر میں کشادگی رکھی جاتی ہے پھر سیدنا عبداللہ رضی اللہ عنہ نے یہ آیت تلاوت کی : ” اللہ تعالیٰ ایمان والوں کو ثابت قول پر ثابت قدم رکھے گا دنیاوی زندگی میں بھی اور آخرت میں بھی اور اللہ تعالیٰ ظالموں کو گمراہ کر دے گا“ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میت لوگوں کے جوتوں کی آہٹ بھی سنتی ہے ، جب وہ لوگ اسے چھوڑ کر واپس جا رہے ہوتے ہیں “ ۔
یہ روایت امام بزار نے نقل کی ہے ، اور اس کی سند حسن ہے ۔

سیدنا عبداللہ بن عباس رضی اللہ عنہما بیان کرتے ہیں : قبر میں جو دو فرشتے آتے ہیں ان کے نام منکر اور نکیر ہیں ہاروت اور ماروت جب آسمان میں ہوتے تھے تو ان کا نام عزر اور عزیز تھا ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔