مجمع الزوائد ومنبع الفوائد

سیدنا ابوامامہ رضی اللہ عنہ بیان کرتے ہیں : جب نبی اکرم صلی اللہ علیہ وسلم کی صاحبزادی سیدہ ام کلثوم رضی اللہ عنہ کو قبر میں اتارا جانے لگا ، تو نبی اکرم صلی اللہ علیہ وسلم نے یہ آیت تلاوت کی : ” اسی سے ہم نے تمہیں پیدا کیا ہے ، اور اسی میں ہم تمہیں لوٹا دیں گے اور اسی میں سے ہم تمہیں دوبارہ نکالیں گے “ راوی بیان کرتے ہیں : پھر آپ نے کچھ کہا: جو مجھے سمجھ نہیں آئی پھر آپ نے یہ پڑھا : ” اللہ تعالیٰ کے نام سے برکت حاصل کرتے ہوئے اللہ کی راہ میں اور اللہ کے رسول کے دین پر ( میں اسے سپرد خاک کرتا ہوں ) “ ۔ جب آپ نے ان کی لحد بنا دی تو آپ نے ان کی طرف چھوٹے پتھر بڑھانے شروع کیے اور آپ نے فرمایا : ان کے ذریعے اینٹوں کے درمیان خالی جگہ کو پر کر دو ! پھر آپ نے ارشاد فرمایا : یہ کوئی چیز نہیں ہے ، لیکن اس کے ذریعے زندہ شخص کو اطمینان ملتا ہے ۔
یہ روایت امام أحمد نے نقل کی ہے ، اور اس کی سند ضعیف ہے ۔

ابن سیرین بیان کرتے ہیں : سیدنا انس بن مالک رضی اللہ عنہ انصار سے تعلق رکھنے والے ایک شخص کے جنازے میں شریک ہوئے لوگوں نے بلند آواز میں استغفار پڑھنا شروع کیا ، تو سیدنا انس رضی اللہ عنہ نے اس کا انکار نہیں کیا ان لوگوں نے اسے قبر کے پائنتی کی طرف سے داخل کیا تھا ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ بیان کرتے ہیں : میں نے سیدنا علی بن ابوطالب رضی اللہ عنہ سے سوال کیا میں نے کہا: اے ابوالحسن ! ان دونوں میں سے کون سی صورت زیادہ فضیلت رکھتی ہے ، جنازے کے پیچھے چلنا یا اس کے آگے چلنا سیدنا علی رضی اللہ عنہ نے فرمایا : اے ابوسعید ! کیا تم جیسا شخص اس بارے میں دریافت کرے گا میں نے کہا: اس بارے میں صرف میرے جیسا شخص ہی دریافت کر سکتا ہے کیونکہ میں نے سیدنا ابوبکر رضی اللہ عنہ اور سیدنا عمر رضی اللہ عنہ کو جنازے کے آگے چلتے ہوئے دیکھا ہے ۔ سیدنا علی رضی اللہ عنہ نے ارشاد فرمایا : اللہ تعالیٰ ان دونوں حضرات پر رحم کرے اور ان دونوں کی مغفرت کرے ان دونوں حضرات نے بھی اسی طرح سنا جس طرح ہم لوگوں نے سنا ، لیکن یہ حضرات سہولت پسند تھے ، اور سہولت کو پسند کرتے تھے اے ابوسعید جب تم اپنے مسلمان بھائی ( کے جنازے ) کے پیچھے چلو تو خاموش رہو ، اور غور و فکر کرتے رہو کہ آخر کار تم نے بھی اس کی مانند ہو جاتا ہے ، تمہارا بھائی دنیا کا کتنا خواہشمند تھا ، وہ اس سے ایسی حالت میں گیا ہے کہ وہ غمگین ہے ، اور اس سے چیزیں سلب کر لی گئی ہیں اس کے پاس زاد سفر کے طور پر صرف نیک عمل ہے ، پھر جب تم قبر کے پاس پہنچ جاؤ لوگ بیٹھ جائیں تو تم نہ بیٹھنا بلکہ تم قبر کے کنارے پر کھڑے ہو جانا جب اسے قبر میں اتارا جائے تو تم یہ پڑھنا : ” اللہ کے نام سے برکت حاصل کرتے ہوئے اللہ کی راہ میں اور اللہ کے رسول کے دین پر ( میں اسے سپرد خاک کرتا ہوں ) “ ۔ اے اللہ ! یہ تیرا بندہ ہے ، جو تیرا مہمان بن گیا ہے ، اور تو سب سے بہترین میزبان ہے اس نے دنیا پس پشت ڈال دی ہے اس نے جو بھلائی آگے بھیجی تھی اسے اس کی جگہ بنا دے جسے یہ پیچھے چھوڑ کر گیا ہے کیونکہ تو نے ہی یہ بات ارشاد فرمائی ہے ” جو کچھ اللہ تعالیٰ کے پاس ہے وہ نیک لوگوں کے لئے زیادہ بہتر ہے “ ۔ ( سیدنا علی رضی اللہ عنہ نے فرمایا : ) پھر تم اس پر تین مرتبہ مٹی ڈال دینا ۔
یہ روایت امام بزار نے نقل کی ہے ۔ اس کی سند میں ایک راوی عبداللہ بن ایوب ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب تم میں سے کوئی ایک شخص انتقال کر جائے تو تم اسے روک کے نہ رکھنا تم اسے اس کی قبر کی طرف جلدی لے جانا اس کے سرہانے سورت فاتحہ اور پائنتی سورت بقرہ کی اختتامی آیات کی تلاوت کرنا“ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی یحیی بن عبداللہ بابلتی ہے ، اور وہ ضعیف ہے ۔

عبدالرحمن بن العلاء بن لجلاج بیان کرتے ہیں : میرے والد نے مجھ سے کہا: اے میرے بیٹے جب میں مر جاؤں تو تم میرے لئے لحد تیار کرنا اور جب تم مجھے لحد میں رکھو تو یہ پڑھنا : ” اللہ تعالیٰ کے نام سے برکت حاصل کرتے ہوئے اللہ کے رسول کے دین پر ( میں اسے سپردخاک کرتا ہوں ) “ پھر تم میرے اوپر مٹی ڈال دینا پھر تم میرے سرہانے سورت بقرہ کی ابتدائی اور آخری آیات تلاوت کرنا کیونکہ میں نے نبی اکرم صلی اللہ علیہ وسلم کو یہ پڑھتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا واثلہ رضی اللہ عنہ بیان کرتے ہیں : جب میت کو قبر میں رکھا جاتا ، تو نبی اکرم صلی اللہ علیہ وسلم یہ پڑھتے تھے : اللہ تعالیٰ کے نام سے برکت حاصل کرتے ہوئے اور اللہ تعالیٰ کے رسول کی سنت کے مطابق پھر آپ اس کی گدی کے نیچے ایک ڈھیلا رکھتے تھے دونوں کندھوں کے درمیان ایک ڈھیلا رکھتے تھے دونوں گھٹنوں کے درمیان ایک ڈھیلا رکھتے تھے ، اور اس کے پیچھے ایک اور رکھتے تھے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی بسطام بن عبدالوہاب ہے ، اور وہ مجہول ہے ۔

سیدنا حکم بن حارث سلمی رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کے ساتھ تین غزوات میں شرکت کی ہے راوی بیان کرتے ہیں : انہوں نے ہم سے کہا: جب تم لوگ مجھے دفن کر دو گے تو میری قبر پر پانی چھڑکنا اور میری قبر کے پاس کھڑے ہو جانا اور قبلہ کی طرف رخ کر کے میرے لئے دعا کرنا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عطیہ الدعاء ہے میں اس سے واقف نہیں ہوں ۔

قتادہ بیان کرتے ہیں : سیدنا انس رضی اللہ عنہ نے اپنے ایک صاحبزادے کو دفن کیا ، اور یہ دعا کی : ” اے اللہ ! تو اس کے پہلو سے زمین کو دور کر دینا اور اس کی روح کے لئے آسمان کے دروازے کھول دینا اور اسے اس کے گھر کی جگہ بہتر گھر بدلے میں عطا کر دینا “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔