مجمع الزوائد ومنبع الفوائد

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری امت کو ایک ایسی چیز عطا کی گئی ہے ، جو اور کسی بھی امت کو عطا نہیں کی گئی وہ مصیبت کے وقت «انا لله وانا اليه راجعون» پڑھنا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی محمد بن خالد طحان ہے ، اور وہ ضعیف ہے ۔

سیدنا عبداللہ بن عباس رضی اللہ عنہ اللہ تعالیٰ کے اس فرمان کے بارے میں بیان کرتے ہیں : ( ارشاد باری تعالیٰ ہے : ) ” وہ لوگ کہ جب انہیں کوئی مصیبت لاحق ہوتی ہے ، تو وہ کہتے ہیں : بے شک ہم اللہ تعالیٰ کی ملکیت ہیں اور بے شک ہم نے اسی کی طرف لوٹ کے جانا ہے یہ وہ لوگ ہیں کہ ان پر ان کے پروردگار کی طرف سے درود اور رحمت نازل ہو گا ، اور یہی لوگ ہدایت یافتہ ہیں “ ۔ سیدنا عبداللہ بن عباس رضی اللہ عنہ فرماتے ہیں : اللہ تعالیٰ نے یہ بات بتائی ہے کہ جب مؤمن اللہ تعالیٰ کے حکم کو تسلیم کرتا ہے ، اور مصیبت کے وقت «انا لله وانا اليه راجعون» پڑھ لیتا ہے ، تو اس کے لئے بھلائی کی تین چیزیں نوٹ کی جاتی ہیں اللہ تعالیٰ کی طرف سے درود اور رحمت اور ہدایت کے راستے کا متحقق ہونا ، نبی اکرم صلی اللہ علیہ وسلم نے یہ بات ارشاد فرمائی ہے : ” جو شخص مصیبت کے وقت «انا لله وانا اليه راجعون» پڑھ لیتا ہے ، تو اللہ تعالٰی اس کی مصیبت کا بدلہ دیتا ہے ( یا اس کی وجہ سے ہونے والی خرابی کو ٹھیک کر دیتا ہے ) ، اور اس کا انجام اچھا کرتا ہے ، اور اسے اس کی جگہ ایسی چیز عطا کرتا ہے ، جس سے وہ شخص راضی ہوتا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی علی بن ابوطلحہ ہے ، اور وہ ضعیف ہے ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” موت کی پریشانی ہوتی ہے ، جب کوئی شخص اپنے بھائی کی وفات کے وقت آئے ، تو اسے یہ پڑھنا چاہیے : ” بے شک ہم اللہ تعالیٰ کے لئے مخصوص ہے بے شک ہم نے اسی طرف لوٹ کے جانا ہے ، اور بے شک ہم نے اپنے پروردگار کی طرف پلٹ کے جاتا ہے اے اللہ ! تو اس کو نیکی کرنے والوں میں نوٹ کر لے اور اس کی کتاب کو علیین میں نوٹ کر لے اور بعد والوں میں اس کی جگہ دیکھ بھال کرنے والا ہو جا اے اللہ ! تو ہمیں اس کے اجر سے محروم نہ رکھنا اور اس کے بعد ہمیں آزمائش کا شکار نہ کرنا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی قیس بن ربیع اسدی ہے ، اور اس کے بارے میں کلام کیا گیا ہے ۔

سیدنا امام حسین بن علی رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس بھی مسلمان مرد یا مسلمان عورت کو کوئی مصیبت لاحق ہو ، اور پھر وہ اس کو یاد کرے اگرچہ اس کا زمانہ قریب ہو ، اور پھر اس کے سامنے یہ بات آئے کہ وہ «انا لله وانا اليه راجعون» پڑھے تو پھر اللہ تعالیٰ اسے اس کی جگہ نئے سرے سے ثواب عطا کرتا ہے ، اور اسے وہ ثواب اس دن کے حساب سے عطا کرتا ہے ، جب اسے وہ مصیبت لاحق ہوئی تھی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ہشام بن زیاد ابومقدام ہے ، اور وہ ضعیف ہے ۔

سیدنا ابوامامہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ جا رہے تھے ۔ نبی اکرم صلی اللہ علیہ وسلم کا تسمہ ٹوٹ گیا تو آپ نے «انا لله وانا اليه راجعون» پڑھا ایک صاحب نے آپ کی خدمت میں عرض کی : یہ تسمے کے لئے ہے ، تو آپ نے ارشاد فرمایا : یہ بھی ایک مصیبت ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی علاء بن کثیر ہے ، اور وہ متروک ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم کا تسمہ ٹوٹ گیا تو آپ نے «انا لله وانا اليه راجعون» پڑھا لوگوں نے عرض کی : یا رسول اللہ ! کیا یہ بھی مصیبت ہے ؟ نبی اکرم صلی اللہ علیہ وسلم نے ارشاد فرمایا : مؤمن کو جو بھی ایسی صورت حال لاحق ہو جو اسے ناپسند ہو تو وہ مصیبت ہوتی ہے ۔
یہ روایت امام طبرانی نے ضعیف سند کے ساتھ نقل کی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کسی شخص کا تسمہ ٹوٹ جائے تو اسے «انا لله وانا اليه راجعون» پڑھنا چاہیے کیونکہ یہ بھی مصیبت ہے “ ۔
یہ روایت امام بزار نے نقل کی ہے ۔ اس کی سند میں ایک راوی بکر بن خنیس ہے ، اور وہ ضعیف ہے ۔

سیدنا شداد بن اوس رضی اللہ عنہ نے نبی اکرم صلی اللہ علیہ وسلم کے حوالے سے اس کی مانند روایت نقل کی ہے ۔
( علامہ ہیثمی فرماتے ہیں : ) میں یہ کہتا ہوں :
یہ روایت امام بزار نے سیدنا ابوہریرہ رضی اللہ عنہ کی حدیث کے بعد نقل کی ہے ۔ سیدنا شداد رضی اللہ عنہ کی روایت کی سند میں ایک راوی خارجہ بن مصعب ہے ، اور وہ متروک ہے ۔