مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ تعالیٰ کی بارگاہ میں حاضری کو پسند کرتا ہے ، تو اللہ تعالیٰ بھی اس کی حاضری کو پسند کرتا ہے ، اور جو شخص اللہ تعالیٰ کی بارگاہ میں حاضری کو ناپسند کرتا ہے اللہ تعالیٰ بھی اس کی حاضری کو ناپسند کرتا ہے میں نے عرض کی : یا رسول اللہ ! ہم سب موت کو ناپسند کرتے ہیں ۔ نبی اکرم صلی اللہ علیہ وسلم نے ارشاد فرمایا : اس سے مراد موت کو ناپسند کرنا نہیں ہے بلکہ جب مؤمن کا آخری وقت قریب آتا ہے ، تو اللہ تعالیٰ کی طرف سے خوشخبری سنانے والا اس کے پاس آتا ہے اس وقت مؤمن کے نزدیک کوئی بھی چیز اس سے زیادہ محبوب نہیں ہوتی کہ وہ اللہ تعالیٰ کی بارگاہ میں حاضر ہو جائے تو وہ اللہ تعالیٰ کی بارگاہ میں حاضری کو پسند کرتا ہے ، اور فاجر اور کافر شخص کا جب آخری وقت قریب آتا ہے ، تو اس کے پاس وہ صورت آتی ہے ، جس برائی کی طرف اس نے جانا ہے ( راوی کو شک ہے شاید یہ الفاظ ہیں : ) جس برائی کا اس نے سامنا کرنا ہے ، تو وہ اللہ تعالیٰ کی بارگاہ میں حاضری کو ناپسند کرتا ہے ، تو اللہ تعالیٰ بھی اس کی حاضری کو ناپسند کرتا ہے “ ۔
یہ روایت امام أحمد امام ابویعلیٰ اور امام بزار نے نقل کی ہے ۔ امام أحمد کے رجال ” صحیح “ کے رجال ہیں ۔

عطاء بن سائب بیان کرتے ہیں : جب پہلی مرتبہ مجھے عبدالرحمن بن ابولیلیٰ کی شناخت حاصل ہوئی تو اس کی یوں صورت حال ہوئی کہ میں نے ایک بزرگ کو دیکھا جن کے سر کے بال سفید تھے ، اور وہ ایک گدھے پر سوار تھے ، اور وہ ایک جنازے میں جا رہے تھے میں نے انہیں یہ بیان کرتے ہوئے سنا فلاں بن فلاں نے مجھے یہ حدیث بیان کی ہے کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ تعالیٰ کی بارگاہ میں حاضری کو پسند کرتا ہے اللہ تعالیٰ بھی اس کی حاضری کو پسند کرتا ہے ، اور جو شخص اللہ تعالی کی بارگاہ میں حاضری کو ناپسند کرتا ہے اللہ تعالیٰ بھی اس کی حاضری کو ناپسند کرتا ہے “ ۔ رادی بیان کرتے ہیں : لوگ رونے لگے تو انہوں نے فرمایا : تم کیوں رو رہے ہو ؟ لوگوں نے عرض کی : ہم موت کو ناپسند کرتے ہیں ۔ نبی اکرم صلی اللہ علیہ وسلم نے فرمایا : اس سے مراد یہ نہیں ہے ، بلکہ جب آدمی کا آخری وقت قریب آتا ہے ، تو اگر وہ مقرب لوگوں میں سے ہوتا ہے ، تو اس کے لئے سرور آرام اور جنت نعیم ( کی خوشخبری ہوتی ہے ) اور جب کسی شخص کو اس کے حوالے سے خوشخبری دی جاتی ہے ، تو وہ اللہ تعالیٰ کی بارگاہ میں حاضری کو پسند کرتا ہے ، اور اللہ تعالیٰ اس کی حاضری کو زیادہ پسند کرتا ہے ، اور اگر وہ شخص جھٹلانے والے گمراہ لوگوں میں سے ہو ، تو اس کی تواضع کھولتے ہوئے پانی سے کی جائے گی اور اس کو جہنم میں داخل کر دیا جائے گا ، جب اسے اس بات کی اطلاع دی جاتی ہے ، تو وہ اللہ تعالیٰ کی بارگاہ میں حاضری کو ناپسند کرتا ہے ، اور اللہ تعالی اس کی حاضری کو زیادہ ناپسند کرتا ہے “ ۔
یہ روایت امام احد نے نقل کی ہے ۔ عطاء بن سائب کے بارے میں کلام کیا گیا ہے ۔

سیدنا معاویہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ تعالیٰ کی بارگاہ میں حاضری کو پسند کرتا ہے ، تو اللہ تعالیٰ بھی اس کی حاضری کو پسند کرتا ہے ، اور جو شخص اللہ تعالیٰ کی بارگاہ میں حاضری کو ناپسند کرتا ہے ، تو اللہ تعالیٰ بھی اس کی حاضری کو ناپسند کرتا ہے “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا عبداللہ بن مسعود رضی اللہ عنہ فرماتے ہیں : جو شخص اللہ تعالیٰ کی بارگاہ میں حاضری کو پسند کرتا ہے اللہ تعالیٰ اس کی حاضری کو پسند کرتا ہے ، اور جو شخص اللہ تعالیٰ کی بارگاہ میں حاضری کو ناپسند کرتا ہے ، تو اللہ تعالیٰ بھی اس کی حاضری کو ناپسند کرتا ہے ، اور موت اللہ تعالیٰ کی بارگاہ میں حاضری سے پہلے ہو گی ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اگر تم چاہو تو میں تمہیں بتاتا ہوں کہ قیامت کے دن اللہ تعالیٰ اہل ایمان سے سب سے پہلے کیا ارشاد فرمائے گا ؟ اور اہل ایمان اللہ تعالیٰ کی بارگاہ میں سب سے پہلے کیا عرض کریں گے ؟ ہم نے عرض کی : ٹھیک ہے یا رسول اللہ ! نبی اکرم صلی اللہ علیہ وسلم نے ارشاد فرمایا : اللہ تعالیٰ اہل ایمان سے فرمائے گا : کیا تم لوگ میری بارگاہ میں حاضری کو پسند کرتے تھے تو وہ عرض کریں گے : جی ہاں ۔ اے ہمارے پروردگار ! اللہ تعالیٰ دریافت کرے گا : وہ کیوں ؟ وہ عرض کریں گے : ہمیں تیرے معاف کرنے اور مغفرت کرنے کی امید تھی تو پروردگار فرمائے گا : تمہارے لئے میری مغفرت واجب ہو گئی ہے “ ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی عبیداللہ بن زحر ہے ، اور وہ ضعیف ہے ۔

سیدنا محمود بن لبید رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : دو چیزیں ہیں جنہیں انسان ناپسند کرتا ہے موت حالانکہ موت اہل ایمان کے لئے فتنے سے زیادہ بہتر ہے ! اور آدمی مال کے کم ہونے کو ناپسند کرتا ہے ، حالانکہ مال کم ہونے کی صورت میں حساب بھی تھوڑا دینا ہو گا “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔