مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” میری امت صرف طعن اور طاعون کے ذریعے فنا ہو گی میں نے عرض کی : یا رسول اللہ ! طعن کا تو ہمیں پتہ ہے طاعون کیا چیز ہے ؟ نبی اکرم صلی اللہ علیہ وسلم نے فرمایا : یہ اونٹ کے غدے کی مانند ایک غدہ ہے طاعون میں مقیم رہنے والا شخص شہید کی مانند ہو گا ، اور اس سے فرار اختیار کرنے والا شخص میدان جنگ سے فرار اختیار کرنے والے شخص کی مانند ہو گا “ ۔
یہ روایت امام أحمد امام ابویعلیٰ اور امام طبرانی نے معجم اوسط میں نقل کی ہے ۔

امام ابویعلیٰ نے سیدہ عائشہ رضی اللہ عنہا کے حوالے سے یہ روایت بھی نقل کی ہے : نبی اکرم صلی اللہ علیہ وسلم نے ارشاد فرمایا ہے : ” یہ ایک وار ہے ، جو میری امت کو ان کے دشمنوں جنات کی طرف سے لاحق ہو گا یہ اونٹ کے غدہ کی مانند غدہ ہے ، جو شخص اس ( طاعون زدہ علاقے ) میں ٹھہرا رہے گا وہ پہرا دینے والا شمار ہو گا ، اور جو اس میں مر جائے گا وہ شہید شمار ہو گا ، اور جو اس سے فرار اختیار کرے گا وہ میدان جنگ سے فرار اختیار کرنے والے کی مانند ہو گا“ ۔
یہ روایت امام طبرانی نے معجم اوسط میں اس کی مانند نقل کی ہے ، تاہم انہوں نے یہ الفاظ نقل کیے ہیں : ” اور اس پر صبر کرنے والا اللہ کی راہ میں جہاد کرنے والے کی مانند ہو گا“ ۔

سیدہ عائشہ رضی اللہ عنہا کے حوالے سے امام بزار نے یہ روایت نقل کی ہے ۔ ( وہ بیان کرتی ہیں : ) میں نے عرض کی : یا رسول اللہ ! طعن کا تو ہمیں پتہ ہے طاعون کیا ہے ؟ نبی اکرم صلی اللہ علیہ وسلم نے ارشاد فرمایا : یہ پھوڑے کی مانند ہو گا ، جو بغلوں میں ، اور پیٹ کے نیچے والے حصے میں نکلے گا ، اس میں ان لوگوں کے اعمال کا تزکیہ ہو گا ، اور یہ ہر مسلمان کے لئے شہادت ہو گا ۔ امام أحمد کے رجال ثقہ ہیں اور باقی اسانید حسن ہیں ۔

سیدنا جابر بن عبداللہ رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو طاعون کے بارے میں یہ ارشاد فرماتے ہوئے سنا ہے : ” اس سے فرار اختیار کرنے والا میدان جنگ سے فرار اختیار کرنے والے کی مانند ہو گا ، اور جو اس میں صبر کرے گا اسے شہید کا اجر ملے گا “ ۔
یہ روایت امام أحمد امام بزار اور امام طبرانی نے معجم اوسط میں نقل کی ہے ۔ امام أحمد کے رجال ثقہ ہیں ۔

عکرمہ بن خالد مخزومی نے اپنے والد شاید اپنے چچا کے حوالے سے اپنے دادا کے حوالے سے یہ بات نقل کی ہے : غزوہ تبوک کے موقع پر نبی اکرم صلی اللہ علیہ وسلم نے یہ ارشاد فرمایا : ” جب طاعون کسی سرزمین میں واقع ہو جائے اور تم وہاں موجود ہو تو تم وہاں سے نہ نکلو اور جب یہ کسی جگہ پر واقع ہو جائے اور تم وہاں موجود نہ ہو ، تو تم وہاں نہ جاؤ“ ۔
یہ روایت امام أحمد نے نقل کی ہے ۔

ان صاحب کے حوالے سے ایک روایت میں یہ الفاظ ہیں : ” جب یہ کسی ایسی جگہ پر ہو کہ تم لوگ وہاں موجود نہ ہو ، تو تم اس جگہ کے قریب نہ جاؤ“ ۔
امام أحمد کی سند حسن ہے ۔ امام طبرانی نے معجم کبیر میں اس کو اسی طرح روایت کیا ہے ۔

سیدنا زید بن ثابت رضی اللہ عنہ بیان کرتے ہیں : نبی اکرم صلی اللہ علیہ وسلم کے سامنے طاعون کا ذکر کیا گیا تو آپ نے ارشاد فرمایا : یہ ایک تکلیف ہے ، جو تم سے پہلے لوگوں کو لاحق ہوئی تھی جب تم اس کے بارے میں سنو کہ یہ کسی شہر میں آ گئی ہے ، تو تم وہاں نہ جاؤ اور جب یہ اس شہر میں آ جائے جہاں تم موجود ہو تو تم اس سے فرار اختیار کرتے ہوئے وہاں سے نہ نکلو ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

یعلی بن شداد بن اوس بیان کرتے ہیں : سیدنا معاویہ رضی اللہ عنہ نے اپنے خطبے میں طاعون کا ذکر کیا ، تو سیدنا عبادہ رضی اللہ عنہ نے فرمایا : تمہاری والدہ ہند تم سے زیادہ علم رکھتی ہیں سیدنا معاویہ رضی اللہ عنہ نے اپنا خطبہ مکمل کیا ، پھر انہوں نے نماز پڑھائی پھر انہوں نے سیدنا عبادہ رضی اللہ عنہ کو بلوایا تو انصار سے تعلق رکھنے والے کچھ افراد سیدنا عبادہ رضی اللہ عنہ کے ساتھ گئے سیدنا معاویہ رضی اللہ عنہ نے انہیں بٹھایا سیدنا عبادہ رضی اللہ عنہ اندر آئے تو سیدنا معاویہ رضی اللہ عنہ نے ان سے کہا: کیا آپ اللہ تعالیٰ ڈرتے نہیں ہیں اور اپنے امام سے حیاء نہیں کرتے ہیں تو سیدنا عبادہ نے ان سے کہا: کیا تم یہ بات نہیں جانتے ہو کہ میں نے اللہ کے رسول کے دست اقدس پر اس بات کی بیعت کی تھی کہ میں اللہ تعالیٰ کی ذات کے بارے میں کسی ملامت کرنے والے کی ملامت سے خوف زدہ نہیں ہوں گا پھر سیدنا معاویہ رضی اللہ عنہ عصر کے وقت تشریف لائے انہوں نے نماز پڑھائی پھر انہوں نے پلنگ کے پائے کو پکڑا اور یہ ارشاد فرمایا : اے لوگو ! میں نے منبر پر تمہارے سامنے ایک بات ذکر کی تھی پھر میں گھر گیا تو اصل بات وہ ہے ، جو سیدنا عبادہ رضی اللہ عنہ نے مجھے بیان کی ، تو تم ان سے استفادہ کرو کیونکہ وہ مجھ سے زیادہ علم رکھتے ہیں ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عیسیٰ بن سنان ہے ، جسے ابن حبان اور دیگر حضرات نے ” ثقہ “ قرار دیا ہے یحیی بن معین اور دیگر حضرات نے اسے ” ضعیف“ قرار دیا ہے ۔

شہر بن حوشب اشعری ، اپنی قوم سے تعلق رکھنے والے اپنے ایک شخص رابہ کے حوالے سے یہ بات نقل کرتے ہیں : وہ اپنے والد کے بعد اپنی والدہ کی دیکھ بھال کیا کرتے تھے ان کے والد عمواس کے طاعون میں موجود رہے تھے وہ بیان کرتے ہیں : جب تکلیف پھیل گئی تو سیدنا ابوعبیدہ بن جراح رضی اللہ عنہ لوگوں کے درمیان خطبہ دینے کے لئے کھڑے ہوئے انہوں نے ارشاد فرمایا : اے لوگو بے شک یہ تکلیف تمہارے پروردگار کی رحمت ہے تمہارے نبی کی دعا ہے ، اور تم سے پہلے لوگوں کی موت کی وجہ ہے سیدنا ابوعبیدہ رضی اللہ عنہ نے اللہ تعالیٰ سے یہ دعا کی کہ وہ اس تکلیف میں سے ان کا حصہ انہیں عطا کرے راوی کہتے ہیں : تو انہیں طاعون ہو گیا اور ان کا بھی انتقال ہو گیا اللہ تعالیٰ ان پر رحمت کرے اس کے بعد سیدنا معاذ بن جبل لوگوں کے امیر بنے اس کے بعد انہوں نے لوگوں کو خطبہ دیتے ہوئے یہ ارشاد فرمایا : اے لوگو یہ تکلیف تمہارے پروردگار کی رحمت ہے تمہارے نبی کی دعا ہے ، اور تم سے پہلے کے نیک لوگوں کی موت کا ذریعہ ہے سیدنا معاذ رضی اللہ عنہ نے اللہ تعالیٰ سے یہ دعا کی کہ وہ سیدنا معاذ رضی اللہ عنہ کے گھر والوں کو اس تکلیف میں سے ان کا حصہ عطا کرے راوی بیان کرتے ہیں : تو سیدنا معاذ رضی اللہ عنہ کے صاحبزادے عبدالرحمن طاعون کا شکار ہو کر انتقال کر گئے پھر سیدنا معاذ رضی اللہ عنہ کھڑے ہوئے انہوں نے اپنے پروردگار سے اپنی ذات کے لئے دعا مانگی تو ان کی ہتھیلی میں طاعون ( کا نشان ) نمودار ہوا راوی کہتے ہیں : میں نے انہیں دیکھا کہ وہ اس نشان کو دیکھتے تھے ، اور پھر اپنی ہتھیلی کی پشت کو بوسہ دیا کرتے تھے ، اور یہ فرماتے تھے کہ مجھے یہ بات پسند نہیں ہے کہ تمہارے بدلے میں مجھے دنیا میں سے کچھ بھی مل جائے جب ان کا انتقال ہو گیا تو سیدنا عمرو بن العاص رضی اللہ عنہ کو لوگوں کا امیر مقرر کیا گیا وہ ہمارے درمیان خطبہ دینے کے لئے کھڑے ہوئے انہوں نے ارشاد فرمایا : اے لوگو یہ تکلیف جب واقع ہوتی ہے ، تو یہ یوں پھیلتی ہے ، جس طرح آگ پھیل جاتی ہے ، تو تم لوگ اس کو چھوڑ کر مختلف پہاڑوں میں پھیل جاؤ تو سیدنا ابووائلہ ہذلی نے کہا: آپ غلط کہہ رہے ہیں اللہ کی قسم ! میں اللہ کے رسول کے ساتھ رہا ہوں اور آپ اس گدھے سے بھی زیادہ برے ہیں تو سیدنا عمرو بن العاص رضی اللہ عنہ نے کہا: اللہ کی قسم تم جو کہہ رہے ہو میں تمہیں اس کا جواب نہیں دوں گا اللہ کی قسم ہم اس جگہ پر نہیں ٹھہریں گے پھر سیدنا عمرو رضی اللہ عنہ وہاں سے چلے گئے ان کے ساتھ کچھ لوگ بھی چلے گئے وہ لوگ اس جگہ کو چھوڑ کر ادھر ادھر بکھر گئے تو اللہ تعالیٰ نے ان لوگوں کو طاعون سے محفوظ رکھا راوی بیان کرتے ہیں : جب سیدنا عمر بن خطاب رضی اللہ عنہ کو اس بات کی اطلاع ملی جو سیدنا عمرو رضی اللہ عنہ کا موقف تھا ، تو اللہ کی قسم انہوں نے اس کو ناپسندیدہ قرار نہیں دیا ۔
یہ روایت امام أحمد نے نقل کی ہے ۔ شہر نامی راوی کے بارے میں کلام کیا گیا ہے ، اور اس کے استاد کا نام بیان نہیں کیا گیا ہے ۔

سیدنا عابس غفاری رضی اللہ عنہ کے بارے میں یہ بات منقول ہے : وہ ان لوگوں کے ساتھ ایک بلند جگہ پر موجود تھے کچھ لوگ گزرے جو سواری پر سوار تھے انہوں نے دریافت کیا : یہ کون لوگ ہیں تو بتایا گیا کہ یہ لوگ طاعون سے بچنے کے لئے جا رہے ہیں تو سیدنا عابس غفاری رضی اللہ عنہ نے کہا: اے طاعون مجھے گرفت میں لے اے طاعون مجھے گرفت میں لے اے طاعون مجھے گرفت میں لے ان کے ایک بھتیجے نے ، جنہیں صحابی ہونے کا شرف حاصل ہے ان سے کہا: کیا آپ موت کی آرزو کر رہے ہیں ؟ جبکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم میں سے کوئی ایک موت کی آرزو نہ کرے ، کیونکہ موت مؤمن کے عمل کا اجر ہے ، اس کو ( دنیا میں ) لوٹایا نہیں جائے گا کہ اس کو ایک اور موقعہ دیا جائے “ ۔ تو سیدنا عابس غفاری رضی اللہ عنہ نے کہا: اے میرے بھتیجے ! میں کچھ چیزوں کے آنے سے پہلے ( دنیا سے ) رخصت ہو جانا چاہتا ہوں جن چیزوں کے بارے میں ، میں نے نبی اکرم صلی اللہ علیہ وسلم سے سنا ہے کہ وہ آخری زمانے میں نمودار ہوں گی ، اور نبی اکرم صلی اللہ علیہ وسلم کو اپنی امت کے بارے میں ان چیزوں سے اندیشہ تھا ( وہ چیزیں یہ ہیں ) بے وقوفوں کی حکومت شرطیں زیادہ لگانا خون کو کمتر سمجھنا رشتے داری کے حقوق پامال کرنا اور نوجوانوں کا قرآن کو مزامیر کے طور پر اختیار کرنا ، لوگ کسی ایسے شخص کو آگے نہیں کریں گے جو دین کے بارے میں زیادہ علم رکھتا ہو ، یا دین کی زیادہ سمجھ بوجھ رکھتا ہو ان لوگوں میں زیادہ سمجھ بوجھ رکھنے والا اور زیادہ علم والا موجود ہو گا ، لیکن وہ ایسے شخص کو ( امامت کے لئے ) آگے کریں گے جو قرآن گا کر سنائے گا ۔
یہ روایت امام طبرانی نے معجم کبیر میں نقل کی ہے ، اور امام أحمد نے اس کی مانند نقل کی ہے ۔

ان کے حوالے سے ایک روایت میں یہ الفاظ منقول ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : کوئی شخص موت کی آرزو نہ کرے کیونکہ اس طرح اس کی مہلت ختم ہو جائے گی“ ۔ اس کی سند میں ایک راوی لیث بن ابوسلیم ہے ، اور اس کے بارے میں کلام کیا گیا ہے ۔
( علامہ ہیثمی فرماتے ہیں : ) میں یہ کہتا ہوں ، اس کے مختلف طرق ہیں جو حکومت کرنے اور خلافت اور توبہ سے متعلق باب میں آگے آئیں گے ، اگر اللہ نے چاہا ۔