مجمع الزوائد ومنبع الفوائد

نبی اکرم صلی اللہ علیہ وسلم کے غلام سیدنا ابوعسیب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : جبرائیل میرے پاس بخار اور طاعون لے کے آئے ، تو میں نے بخار کو مدینہ کے لئے روک لیا اور طاعون کو شام کی طرف بھیجوا دیا ، طاعون میری امت کے لئے شہادت ہو گا ، اور ان کے لئے رحمت ہو گا ، اور کافروں کے لئے عذاب ہو گا ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ امام أحمد کے رجال ثقہ ہیں ۔

سیدنا ابوبکر صدیق رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ غار میں موجود تھا آپ نے دعا کی : اے اللہ ! طعن اور طاعون ، میں نے عرض کی : یا رسول اللہ ! یہ تو مجھے تو پتہ ہے کہ آپ نے اپنی امت کے بارے میں دعا مانگی ہے طعن ( ہتھیار کے ذریعے زخمی ہونے ) کا تو ہمیں پتہ ہے طاعون کیا ہے ؟ نبی اکرم صلی اللہ علیہ وسلم نے ارشاد فرمایا : یہ پیپ والے پھوڑے کی طرح کا ہوتا ہے ، اگر تمہاری زندگی طویل ہوئی ، تو تم عنقریب اسے دیکھ لو گے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی جعفر بن زبیر حنفی ہے ، اور وہ ضعیف ہے ۔

ابوقلابہ بیان کرتے ہیں : شام میں طاعون کی وباء پھیل گئی تو سیدنا عمرو بن العاص رضی اللہ عنہ نے فرمایا : یہ بیماری ہے ، جو واقع ہو گئی ہے ، تو تم اس کو چھوڑ کر مختلف گھاٹیوں اور وادیوں میں بکھر جاؤ ، سیدنا معاذ رضی اللہ عنہ کو اس بات کی اطلاع ملی ، تو انہوں نے سیدنا عمرو بن العاص رضی اللہ عنہ کے قول کی تصدیق نہیں کی اور یہ فرمایا : جی نہیں بلکہ یہ شہادت ہے ، اور رحمت ہے ، اور تمہارے نبی کی دعا ہے اے اللہ ! تو معاذ اور اس کے گھر والوں کو اپنی رحمت میں سے ان کا حصہ نصیب فرما ۔ ابوقلابہ کہتے ہیں : شہادت کا مجھے پتہ تھا ، رحمت ہونے کا مجھے پتہ تھا ، لیکن مجھے یہ نہیں معلوم تھا کہ تم لوگوں کے نبی کی دعا سے مراد کیا ہے ؟ یہاں تک کہ مجھے یہ بات بیان کی گئی کہ ایک مرتبہ نبی اکرم صلی اللہ علیہ وسلم رات کے وقت نماز ادا کر رہے تھے ۔ آپ نے دعا کے دوران ارشاد فرمایا : یا یہاں بخار ہو ، یا طاعون ہو ایسا آپ نے تین مرتبہ کہا: جب صبح ہوئی تو آپ کے گھر والوں میں سے کسی نے آپ سے کہا: یا رسول اللہ ! میں نے گزشتہ رات آپ کو ایک دعا کرتے ہوئے سنا تھا نبی اکرم صلی اللہ علیہ وسلم نے دریافت کیا : کیا تم نے اس کو سنا تھا انہوں نے جواب دیا : جی ہاں ۔ نبی اکرم صلی اللہ علیہ وسلم نے ارشاد فرمایا : میں نے اپنے پروردگار سے یہ دعا مانگی تھی کہ وہ میری امت کو قحط سالی کے ذریعے ہلاکت کا شکار نہ کرے تو پروردگار نے یہ چیز مجھے عطا کر دی میں نے اللہ تعالیٰ سے یہ دعا مانگی کہ وہ ان لوگوں پر ایسا دشمن مسلط نہ کرے جو ان کے علاوہ ہو ، اور میں نے اس سے یہ دعا مانگی تھی کہ وہ انہیں مختلف گروہوں میں تقسیم نہ کرے کہ وہ ایک دوسرے کو نقصان پہنچاتے پھریں تو پروردگار نے اسے قبول نہیں کیا ( راوی کو شک ہے شاید یہ الفاظ ہیں : ) مجھے روک دیا گیا تو میں نے عرض کی : پھر یا تو بخار ہو ، یا طاعون ہو ، یا تو بخار ہو ، یا طاعون ہو یعنی تین مرتبہ ایسے کہا: ۔
یہ روایت امام أحمد نے نقل کی ہے ۔ ابوقلابہ نامی راوی نے سیدنا معاذ بن جبل رضی اللہ عنہ کا زمانہ نہیں پایا ہے ۔

ابومنیب احدب بیان کرتے ہیں : سیدنا معاذ رضی اللہ عنہ نے شام میں خطبہ دیتے ہوئے طاعون کا ذکر کیا ، اور ارشاد فرمایا : یہ تمہارے پروردگار کی رحمت ہے ، اور تمہارے نبی کی دعا ہے ، اور تم سے پہلے کے نیک لوگوں کے انتقال کا طریقہ ہے اے اللہ ! معاذ کے گھر والوں کو اس رحمت میں سے ان کا حصہ نصیب فرما پھر سیدنا معاذ رضی اللہ عنہ اپنی جگہ سے نیچے اتر آئے آپ سیدنا عبدالرحمن بن معاذ رضی اللہ عنہ کے پاس تشریف لے گئے تو سیدنا عبدالرحمن رضی اللہ عنہ نے کہا: ” یہ چیز حق ہے ، اور تمہارے پروردگار کی طرف سے ہے ، تو تم شک کا شکار ہونے والوں میں سے ہرگز نہ ہو جانا “ ۔ تو سیدنا معاذ رضی اللہ عنہ نے کہا: ( یعنی یہ آیت پڑھی ) ” عنقریب تم مجھے صبر کرنے والوں میں پاؤ گے ، اگر اللہ نے چاہا “ ۔
یہ روایت امام أحمد نے نقل کی ہے ، اور امام طبرانی نے اس کا کچھ حصہ معجم کبیر میں نقل کیا ہے ۔ امام أحمد کے رجال ثقہ ہیں اور ان کی سند میں متصل ہے ۔

سیدنا معاذ بن جبل رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عنقریب تم لوگ شام کی سرزمین کی طرف ہجرت کر جاؤ گے وہ تمہارے لئے فتح کر دی جائے گی وہاں پھوڑئے ، یا حزة ( وہ درد جو دل یا جگر میں محسوس ہو ) کی مانند ایک بیماری ہو گی ، جو آدمی کے پیٹ کے نیچے والے حصے کو ( یا خون کی رگوں کو ) گرفت میں لے گی ، اللہ تعالیٰ اس کے ذریعے لوگوں کو شہادت نصیب کرے گا ، اور اس کے ذریعے ان کے اعمال کا تزکیہ کرے گا ( اس کے بعد سیدنا معاذ رضی اللہ عنہ نے دعا کی : ) ” اے اللہ ! اگر تو یہ بات جانتا ہے کہ معاذ بن جبل رضی اللہ عنہ نے اللہ کے رسول کی زبانی یہ بات سنی ہے ، تو تو اس کو ( یعنی سیدنا معاذ کو ) اور اس کے اہل خانہ کو اس میں سے حظ وافر عطا فرما “ ۔ راوی کہتے ہیں : تو ان لوگوں کو طاعون نے اپنی لپیٹ میں لے لیا اور ان میں سے کوئی بھی باقی نہیں بچا ان کی شہادت کی انگلی میں اس کا پھوڑا نمودار ہوا تھا ، تو وہ یہ کہتے تھے کہ مجھے یہ بات پسند نہیں ہے کہ اس کے عوض میں مجھے سرخ اونٹ مل جائیں “ ۔
یہ روایت امام أحمد نے نقل کی ہے ۔ اسماعیل بن عبیداللہ نامی راوی نے سیدنا معاذ رضی اللہ عنہ کا زمانہ نہیں پایا ہے ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میری امت طعن ( زخمی ہونے ) اور طاعون کے ذریعے فنا ہو گی عرض کی گئی : یا رسول اللہ ! طعن کا تو ہمیں پتہ ہے طاعون کیا چیز ہے ؟ نبی اکرم صلی اللہ علیہ وسلم نے ارشاد فرمایا : یہ تمہارے دشمن جنوں کا وار ہے ، اور ( ان دونوں صورتوں میں سے ) ہر صورت میں شہادت نصیب ہو گی “ ۔
یہ روایت امام أحمد نے مختلف اسانید کے ساتھ نقل کی ہے ۔ اس کے بعض رجال ” صیح “ کے رجال ہیں
یہ روایت امام ابویعلیٰ امام بزار نے اور امام طبرانی نے تینوں کتابوں میں نقل کی ہے ۔

سیدنا ابوبردہ بن قیس رضی اللہ عنہ جو سیدنا ابوموسیٰ اشعری رضی اللہ عنہ کے بھائی ہیں وہ بیان کرتے ہیں : نبی اکرم صلی اللہ علیہ وسلم نے فرمایا : ( یعنی آپ نے یہ دعا کی : ) ” اے اللہ ! تو میری امت کو اپنی راہ میں طعن اور طاعون کے ذریعے قتل ہونے کی صورت میں فنا کرنا“ ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ امام أحمد کے رجال ثقہ ہیں ۔

عبدالرحمن بن غنم بیان کرتے ہیں : جب شام میں طاعون پھیل گیا تو سیدنا عمرو بن العاص رضی اللہ عنہ نے خطبہ دیتے ہوئے یہ ارشاد فرمایا : یہ طاعون ، گندگی ( یعنی بیماری ) ہے ، تو تم اسے چھوڑ کر مختلف علاقوں اور مختلف وادیوں میں بکھر جاؤ اس بات کی اطلاع سیدنا شرحبیل بن حسنہ کو ملی تو وہ غصے میں آ گئے ، تو وہ اپنے کپڑے کو کھینچتے ہوئے اور اپنے ہاتھ میں جوتے کو لٹکا کر آئے اور یہ بات بیان کی : میں اللہ کے رسول کے ساتھ رہا ہوں عمرو اپنے اہل خانہ کے گدھے سے زیادہ گمراہ ہے بلکہ یہ ( طاعون ) تمہارے پروردگار کی طرف سے رحمت ہے ، اور تمہارے نبی کی دعا ہے ، اور تم سے پہلے کے نیک لوگوں کی موت ( کی وجہ ) ہے ۔
یہ روایت امام أحمد نے نقل کی ہے ۔

امام أحمد نے ایک روایت ابومنیب کے حوالے سے نقل کی ہے : یہ سیدنا عمرو بن العاص رضی اللہ عنہ نے ایک اور طاعون کے درمیان لوگوں کو خطبہ دیتے ہوئے یہ ارشاد فرمایا : یہ سبیل کی مانند زجر ( بیماری ) ہے ، جسے یہ چبھتا ہے اسے خراب کر جاتا ہے ، اور آگ کی مانند ہے ، جسے وہ چبھتا ہے ، تو اسے خراب کر جاتا ہے ، اور جو ٹھہر جاتا ہے ، یہ اسے جلا دیتی ہے ، اور اذیت پہنچاتی ہے “ ۔

ایک روایت میں یہ بات منقول ہے : یزید حمیر نے سیدنا شرحبیل بن حسنہ رضی اللہ عنہ کے حوالے سے اس کی مانند روایت نقل کی ہے ، تاہم اس میں یہ الفاظ ہیں : سیدنا عمرو رضی اللہ عنہ کو اس بات کی اطلاع ملی تو انہوں نے فرمایا : انہوں نے ٹھیک کہا: ہے ۔ یہ تمام روایات امام أحمد نے نقل کی ہیں ۔ امام طبرانی نے معجم کبیر میں ان میں سے بعض روایات نقل کی ہیں ۔ امام أحمد کی اسانید حسن اور صحیح ہیں ۔

عبدالرحمن بن غنم نے حارث بن عمیرہ کے حوالے سے یہ روایت نقل کی ہے ۔ وہ سیدنا معاذ رضی اللہ عنہ کے ساتھ یمن سے آئے اور ان کے محلے اور ان کے گھر میں ان کے ساتھ ٹھہرے رہے ان لوگوں کو طاعون لاحق ہو گیا سیدنا معاذ رضی اللہ عنہ سیدنا ابوعبیدہ بن جراح رضی اللہ عنہ سیدنا شرحبیل بن حسنہ رضی اللہ عنہ اور سیدنا ابومالک رضی اللہ عنہ ایک ہی دن میں طاعون کا شکار ہوئے جب سیدنا عمرو بن العاص رضی اللہ عنہ کو طاعون کا اندازہ ہوا تو انہوں نے راہ فرار اختیار کی اور وہ بہت زیادہ خوف زدہ ہو گئے انہوں نے ارشاد فرمایا : مختلف گھاٹیوں میں بکھر جاؤ کیونکہ اللہ تعالیٰ کا حکم تم پر نازل ہونے لگا ہے میرا خیال ہے یہ عذاب ( یا گندگی ) اور طاعون ہے ، تو سیدنا شرحبیل بن حسنہ رضی اللہ عنہ نے ان سے کہا: تم غلط کہہ رہے ہو ، ہم اللہ کے رسول کے ساتھ رہے ہیں تم اپنے گھر والوں کے گدھے سے زیادہ گمراہ ہو ، تو سیدنا عمرو نے کہا: آپ ٹھیک کہہ رہے ہو ۔ سیدنا معاذ بن جبل رضی اللہ عنہ نے سیدنا عمرو رضی اللہ عنہ سے کہا: تم غلط کہہ رہے ہو یہ نہ تو طاعون ہے ، اور نہ ہی عذاب ہے ، بلکہ یہ تمہارے پروردگار کی رحمت اور تمہارے نبی کی دعا اور نیک لوگوں کی موت کی صورت ہے اے اللہ ! تو معاذ کے گھر والوں کو اس رحمت میں سے زیادہ حصہ عطا فرما ۔ راوی کہتے ہیں : شام ہونے تک سیدنا معاذ رضی اللہ عنہ کے صاحبزادے عبدالرحمن بھی طاعون کا شکار ہو گئے وہ صاحبزادے سیدنا معاذ رضی اللہ عنہ کو ساری مخلوق میں سب سے زیادہ محبوب تھے ، اور سیدنا معاذ رضی اللہ عنہ انہی کی نسبت سے کنیت اختیار کرتے تھے سیدنا معاذ رضی اللہ عنہ مسجد سے واپس تشریف لائے تو انہیں پریشانی کے عالم میں پایا سیدنا معاذ رضی اللہ عنہ نے فرمایا : اے عبدالرحمن ! تمہارا کیا حال ہے ؟ ان صاحبزادے کے حق میں سیدنا معاذ رضی اللہ عنہ کی دعا مستجاب ہو گئی تھی ان صاحبزادے نے کہا: اے ابا جان یہ آپ کے پروردگار کی طرف سے آنے والا حق ہے آپ نے شک کا شکار ہونے والوں میں سے ہرگز نہیں ہونا تو سیدنا معاذ رضی اللہ عنہ نے کہا: اگر اللہ نے چاہا تو ہم صبر کرنے والوں میں سے ہوں گے وہ صاحبزادے اسی رات انتقال کر گئے تو اگلے دن سیدنا معاذ رضی اللہ عنہ نے انہیں دفن کر دیا پھر سیدنا معاذ بن جبل رضی اللہ عنہ نے حارث بن عمیرہ کو سیدنا ابوعبیدہ بن جراح رضی اللہ عنہ کے پاس بھیجا تاکہ ان سے دریافت کریں کہ ان کا کیا حال ہے ، تو سیدنا ابوعبیدہ رضی اللہ عنہ نے حارث کو دکھایا کہ ان کی ہتھیلی میں طاعون کا نشان موجود ہے ، تو حارث بن عمیرہ سیدنا ابوعبیدہ رضی اللہ عنہ کے حوالے سے رونے لگے جب انہوں نے یہ دیکھا تو وہ ان کے پاس سے اٹھ کر آ گئے سیدنا ابوعبیدہ رضی اللہ عنہ نے اللہ کے نام کی قسم اٹھائی کہ انہیں یہ بات پسند نہیں ہے کہ اس زخم کی جگہ انہیں سرخ اونٹ مل جائیں ۔ راوی بیان کرتے ہیں : حارث بن عمیرہ سیدنا معاذ رضی اللہ عنہ کے پاس واپس آئے ، تو انہوں نے سیدنا معاذ رضی اللہ عنہ کو پایا کہ ان پر بے ہوشی طاری ہو چکی تھی حارث رونے لگے جب سیدنا معاذ رضی اللہ عنہ کو ہوش آیا تو انہوں نے کہا: اے ابن حمیر یہ ! تم مجھ پر کیوں رو رہے ہو ؟ میں تم سے اللہ کی پناہ مانگتا ہوں حارث نے کہا: اللہ کی قسم میں آپ پر نہیں رو رہا سیدنا معاذ رضی اللہ عنہ نے دریافت کیا : پھر تم کس بات پر رو رہے ہو ؟ حارث نے کہا: میں اس بات پر رو رہا ہوں کہ صبح و شام کا آپ کا تعلق مجھ سے چھوٹ جائے گا سیدنا معاذ رضی اللہ عنہ نے فرمایا : تم مجھے بٹھاؤ حارث نے انہیں بٹھا دیا تو سیدنا معاذ رضی اللہ عنہ نے فرمایا : میری بات سنو میں تمہیں ایک وصیت کرنے لگا ہوں تم اس وجہ سے رو رہے ہو کہ صبح و شام کا ساتھ چھوٹ جائے گا علم کی جگہ مصحف کے دوالواح کے درمیان ہے ( یعنی قرآن مجید ہے ) اگر تم اس کی تفسیر میں تھک جاتے ہو ، تو میرے بعد علم کو تین آدمیوں کے پاس تلاش کرنا عویمر ابودرداء یا سلمان فارسی کے پاس ، یا ابن ام عبد کے پاس اور میں تمہیں عالم کی لغزش اور منافق کے ساتھ بحث کرنے سے بچنے کی تلقین کرتا ہوں پھر سیدنا معاذ رضی اللہ عنہ پر نزع کا عالم شدید ہو گیا جو موت کی نزع کا عالم تھا انہیں جب بھی نزع کی تکلیف لاحق ہوتی تھی اور جب بھی بے ہوشی میں افاقہ ہوتا تھا ، تو وہ اپنی پلک اٹھا کر یہ کہتے تھے یہ تیری طرف سے آنے والا دباؤ ہے ، جو مجھے لاحق ہوا ہے ، اور تیری عزت کی قسم ہے ، تو یہ بات جانتا ہے کہ میں تجھ سے محبت رکھتا ہوں ۔ جب سیدنا معاذ رضی اللہ عنہ کا انتقال ہو گیا تو حارث وہاں سے روانہ ہوئے اور حمص میں سیدنا ابودرداء رضی اللہ عنہ کے پاس آ گئے جتنا اللہ کو منظور تھا وہ اتنا عرصہ ان کے پاس ٹھہرے رہے پھر حارث نے کہا: میرے بھائی سیدنا معاذ رضی اللہ عنہ نے مجھے آپ کے بارے میں سیدنا سلمان فارسی رضی اللہ عنہ کے بارے میں اور سیدنا ابن اُتم عبد ( یعنی سیدنا عبداللہ بن مسعود رضی اللہ عنہ ) کے بارے میں وصیت کی تھی اب میں یہ سمجھتا ہوں کہ مجھے عراق جانا چاہے پھر وہ کوفہ آ گئے اور سیدنا ابن ام عبد رضی اللہ عنہ کی محفل میں صبح و شام حاضر ہونے لگے ایک مرتبہ وہ اسی محفل میں موجود تھے تو سیدنا عبداللہ بن مسعود رضی اللہ عنہ نے دریافت کیا : تم کون ہو ؟ انہوں نے بتایا : شام سے تعلق رکھنے والا ایک فرد ہوں سیدنا عبداللہ بن مسعود رضی اللہ عنہ نے فرمایا : اہل شام اچھا گروہ ہے اگر ان میں ایک خامی نہ ہو حارث نے دریافت کیا : وہ ایک چیز کیا ہے ؟ سیدنا عبداللہ نے فرمایا : یہ نہ ہو کہ وہ لوگ اپنے بارے میں اس بات کی گواہی دیتے ہیں کہ وہ جنتی ہیں تو حارث نے دو یا شاید تین مرتبہ انا للہ وانا الیہ راجعون کہا: اور پھر یہ کہا: سیدنا معاذ رضی اللہ عنہ نے مجھ سے جو بات کہی تھی وہ ٹھیک کہی تھی سیدنا عبداللہ بن مسعود رضی اللہ عنہ نے فرمایا : اے میرے بھتیجے ! انہوں نے تم سے کیا کہا: تھا ؟ حارث نے بتایا انہوں نے مجھے عالم کی لغزش سے بچنے کی تلقین کی تھی اور اے سیدنا ابن مسعود اللہ کی قسم ! آپ دو قسم کے افراد میں سے کوئی ایک ہیں ، یا تو آدمی یہ ہوتا ہے کہ وہ ایسے یقین پر صبح کرتا ہے کہ وہ اس بات کی گواہی دیتا ہے کہ اللہ تعالیٰ کے علاوہ اور کوئی معبود نہیں ہے ، تو ایسی صورت میں آپ جنتی ہوں گے یا پھر آدمی شک کا شکار ہوتا ہے ، تو آپ کو یہ پتہ نہیں چلے گا کہ آپ کا ٹھکانہ کیا ہو گا ، تو سیدنا عبداللہ بن مسعود رضی اللہ عنہ نے فرمایا : میرے بھائی نے ٹھیک کہا: تھا یہ لغزش تھی تماس کے حوالے سے میرا مواخذہ نہ کرو پھر سیدنا عبداللہ بن مسعود رضی اللہ عنہ نے حارث کا ہاتھ پکڑا اور انہیں ساتھ لے کر اپنے گھر چلے گئے پھر جتنا اللہ کو منظور تھا حارث وہاں ٹھہرے رہے پھر حارث نے کہا: میرے لئے یہ ضروری ہے کہ میں ابوعبداللہ سلمان فارسی سے مدائن میں جا کے مل لوں ۔ پھر حارث وہاں سے روانہ ہوئے یہاں تک کہ مدائن میں سیدنا سلمان فارسی رضی اللہ عنہ کے پاس آئے جب انہوں نے سیدنا سلمان فارسی رضی اللہ عنہ کو سلام کیا ، تو سیدنا سلمان رضی اللہ عنہ نے فرمایا : تم اپنی جگہ رہو میں نکل کر تمہارے پاس آتا ہوں حارث نے کہا: اللہ کی قسم ! اے ابوعبداللہ آپ کے بارے میں میری یہ رائے نہیں تھی کہ آپ مجھے پہچانتے ہوں گے سیدنا سلمان فارسی رضی اللہ عنہ نے فرمایا : جی ہاں ۔ لیکن میری روح نے تمہاری روح کو پہچان لیا تھا اس سے پہلے کہ میں تمہیں پہچانوں ، روحیں ( عالم ارواح میں ) گروہوں کی شکل میں رہتی تھیں وہاں جو ایک دوسرے سے متعارف تھیں ( دنیا میں ) وہ ایک دوسرے سے مانوس ہوتی ہیں اور وہاں جو ایک دوسرے سے نا آشنا تھیں وہ دنیا میں لاتعلق رہتی ہیں پھر جتنا اللہ کو منظور تھا حارث ان کے ہاں ٹھہرے رہے پھر وہ شام واپس چلے گئے ۔ تو یہ وہ لوگ تھے جو اللہ تعالیٰ کی خاطر ایک دوسرے کو پہچانتے تھے ، اور اللہ تعالیٰ کی خاطر ایک دوسرے ملا کرتے تھے ۔
یہ روایت امام بزار نے نقل کی ہے ۔ امام أحمد نے اس کا کچھ حصہ نقل کیا ہے بزار کی سند میں ایک راوی شہر بن حوشب ہے ، اور اس کے بارے میں کلام کیا گیا ہے ایک سے زیادہ حضرات نے اسے ” ثقہ “ قرار دیا ہے ۔ امام طبرانی نے معجم کبیر میں اس روایت کا ایک حصہ نقل کیا ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ ایک جگہ پر پڑاؤ کرو گے جس کا نام جابیہ ( راوی کو شک ہے شاید یہ الفاظ ہیں : ) جو یبیہ ہو گا وہاں تمہیں ایک بیماری لاحق ہو گی جو اونٹ کے غدہ کی مانند ہو گی اللہ تعالیٰ اس کے ذریعے تمہیں اور تمہارے بال بچوں کو شہادت نصیب کرے گا ، اور اس کی وجہ سے تمہارے اعمال کا تزکیہ کر دے گا“ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حسن بن یحیی خشنی ہے ، جسے دحیم اور دیگر حضرات نے ” ثقہ “ قرار دیا ہے ۔ امام نسائی رحمہ اللہ اور دیگر حضرات نے اسے ضعیف کہا: ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” میری امت طعن ( یعنی جنگ میں زخمی ہونے ) اور طاعون کے ذریعے فنا ہو گی“ ہم نے عرض کی : طعن کا تو ہمیں پتہ ہے طاعون کیا چیز ہے ؟ نبی اکرم صلی اللہ علیہ وسلم نے فرمایا : یہ تمہارے دشمنوں جنات کا وار ہے ، اور ( طعن اور طاعون دونوں میں سے ) ہر ایک صورت میں شہادت نصیب ہو گی “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی عبداللہ بن عصمہ نصیبی ہے ۔ ابن عدی کہتے ہیں : اس کے حوالے سے منکر روایات منقول ہیں ابن حبان نے اسے ” ثقہ “ قرار دیا ہے ۔

سیدنا عقبہ بن عبد سلمی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ( قیامت کے دن ) شہداء اور طاعون کے نتیجے میں فوت ہونے والے لوگ آئیں گے تو طاعون کا شکار افراد یہ کہیں گے کہ ہم بھی شہید ہیں تو یہ کہا: جائے گا ۔ تم اس بات کا جائزہ لو اگر تو ان کے زخم شہداء کے زخم کی مانند ہیں کہ ان میں سے مشک کی خوشبو کی طرح کا خون نکلتا ہے ، تو پھر یہ شہداء شمار ہوں گے تو وہ ( فرشتے ) ان لوگوں کو ایسا ہی پائیں گے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی اسماعیل بن عیاش ہے ، اور اس کے بارے میں کلام کیا گیا ہے اہل شام سے اس کی نقل کردہ روایت مقبول ہے ، اور یہ ان روایات میں سے ایک ہے ۔