مجمع الزوائد ومنبع الفوائد

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب ابن آدم سجدہ کرتا ہے ، تو شیطان یہ کہتا ہے ۔ ابن آدم کو سجدہ کرنے کا حکم دیا گیا تو اس نے سجدہ کر لیا اسے جنت مل جائے گی مجھے سجدہ کرنے کا حکم دیا گیا تو میں نے انکار کیا ، تو مجھے جہنم ملے گی “ ۔ راوی کہتے ہیں : یا اس کی مانند کوئی کلام ہے ۔
یہ روایت امام بزار نے نقل کی ہے ۔ اس کی سند میں ایک راوی کنانہ بن جبلہ ہے ، جسے ابوحاتم نے ” ثقہ “ قرار دیا ہے ، اور دیگر حضرات نے اسے ضعیف کہا: ہے ، اور ایک راوی سہیل بن ابوحزم ہے ، جسے یحیی بن معین نے ” ثقہ “ قرار دیا ہے ، اور ایک جماعت نے اسے ” ضعیف “ قرار دیا ہے ۔ اس روایت کے بقیہ رجال ثقہ ہیں ۔

ابواسحاق بیان کرتے ہیں : سیدنا عبداللہ بن مسعود رضی اللہ عنہ فرماتے ہیں جب شیطان ابن آدم کو سجدے کی حالت میں دیکھتا ہے ، تو چیخ کر یہ کہتا ہے : ہائے بربادی شیطان کی بربادی اللہ تعالیٰ نے ابن آدم کو سجدہ کرنے کا حکم دیا کہ اسے جنت مل جائے گی تو اس نے اطاعت کی اور اس نے مجھے سجدہ کرنے کا حکم دیا تو میں نے نافرمانی کی ، تو مجھے جہنم ملے گی ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں البتہ ابواسحاق نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے ۔