مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : ایک مرتبہ سیدنا عباس رضی اللہ عنہ اس وقت نبی اکرم صلی اللہ علیہ وسلم کے پاس آئے کہ اس گھڑی میں وہ آپ کے پاس نہیں آیا کرتے تھے ، عرض کی گئی : یا رسول اللہ ! دروازے پر آپ کے چچا موجود ہیں ، نبی اکرم صلی اللہ علیہ وسلم نے فرمایا : انہیں اندر آنے کے لئے کہو ، وہ کسی ضروری معاملے کی وجہ سے تشریف لائے ہوں گے ، جب سیدنا عباس رضی اللہ عنہ نبی اکرم صلی اللہ علیہ وسلم کے پاس آئے ، تو نبی اکرم صلی اللہ علیہ وسلم نے فرمایا : اے چچا جان ! آپ اس وقت کیوں تشریف لائے ہیں ؟ آپ پہلے تو اس گھڑی میں تشریف نہیں لایا کرتے تھے ، سیدنا عباس رضی اللہ عنہ نے کہا: اے میرے بھتیجے ! مجھے زمانہ جاہلیت اور اس کی جہالتیں یاد آ گئیں ، تو دنیا اپنی تمام تر کشادگی کے باوجود میرے لئے تنگ ہو گئی میں نے یہ سوچا کہ مجھے اس چیز سے نجات کیسے مل سکتی ہے ، تو مجھے یہ اندازہ ہو گیا کہ اس چیز سے مجھے کوئی نجات نہیں دے سکتا ، صرف اللہ تعالیٰ دے سکتا ہے ، یا پھر تم دے سکتے ہو ۔ تو نبی اکرم صلی اللہ علیہ وسلم نے ارشاد فرمایا : ہر طرح کی حمد اللہ تعالیٰ کے لئے مخصوص ہے ، جس نے آپ کے دل میں یہ بات ڈال دی ہے میری تو یہ خواہش تھی کہ جناب ابوطالب بھی اپنا حصہ حاصل کر لیتے ، لیکن اللہ تعالیٰ جو چاہتا ہے وہی کرتا ہے ، نبی اکرم صلی اللہ علیہ وسلم نے فرمایا : کیا میں آپ کو اس بارے میں بتاؤں ؟ انہوں نے کہا: جی ہاں ! نبی اکرم صلی اللہ علیہ وسلم نے ارشاد فرمایا : کیا میں آپ کو ایک عطیہ دوں ؟ انہوں نے عرض کی : جی ہاں ! نبی اکرم صلی اللہ علیہ وسلم نے فرمایا : کیا میں آپ کو کچھ دوں ؟ انہوں نے عرض کی : جی ہاں ۔ ! نبی اکرم صلی اللہ علیہ وسلم نے ارشاد فرمایا : ” جب کوئی ایسا وقت ہو ، جس میں آپ نماز ادا کر سکتے ہوں ، یعنی وہ عصر کے بعد نہ ہو یا سورج نکلنے کے بعد نہ ہو ، تو آپ اس میں اچھی طرح وضو کریں ، پھر آپ اللہ تعالیٰ کی بارگاہ میں کھڑے ہوں ، ، سورت فاتحہ پڑھیں ، پھر اگر ایک سورت چاہیں تو وہ پڑھ لیں اگر آپ چاہیں ، تو مفصل کی ابتدائی سورت پڑھ لیں ، جب آپ سورت پڑھ کر فارغ ہوں ، تو «سبحان الله والحمد لله ولا اله الا الله والله اكبر» پندرہ مرتبہ پڑھیں ، جب آپ رکوع میں جائیں ، تو دس مرتبہ پڑھیں ، جب آپ سر کو اٹھائیں ، تو دس مرتبہ پڑھیں ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد اور دیگر حضرات نے اس سیاق کے بغیر نقل کی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی نافع بن ہرمز ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے اُن سے فرمایا : اے لڑکے ! کیا میں تمہیں کچھ نہ دوں ؟ کیا میں تمہیں عطیہ نہ دوں ؟ کیا میں تمہیں تحفہ نہ دوں ؟ میں نے عرض کی : جی ہاں ! یا رسول اللہ ! میرے ماں باپ آپ پر قربان ہوں ، راوی کہتے ہیں : میں نے یہ گمان کیا کہ شاید نبی اکرم صلی اللہ علیہ وسلم مجھے مال عطا کریں گے ، آپ نے ارشاد فرمایا : چار رکعات تم نے روزانہ پڑھنی ہیں ، اگر تم اس کی استطاعت نہیں رکھتے ، تو ہفتے میں ایک مرتبہ پڑھ لینی ہیں ، اگر اس کی بھی استطاعت نہیں رکھتے ، تو پھر مہینے میں ایک مرتبہ پڑھ لینی ہیں ، اگر اس کی بھی اسطاعت نہیں رکھتے ، تو سال میں ایک مرتبہ پڑھ لینی ہیں ، اگر اس کی بھی استطاعت نہیں رکھتے ، تو کبھی بھی ایک مرتبہ پڑھ لینا ، تم تکبیر پڑھ کے ایک مرتبہ سورت فاتحہ اور ایک سورت کی تلاوت کرنا ، پھر تم سبحان الله والحمد لله ولا اله الا الله والله اکبر پندرہ مرتبہ پڑھنا ، پھر تم رکوع میں یہ کلمات دس مرتبہ پڑھنا ، پھر جب تم اُٹھو گے ، تو دس مرتبہ یہ کلمات پڑھنا ، پھر تم سجدے میں جاؤ گے ، تو یہ کلمہ دس مرتبہ پڑھنا ، پھر تم اُٹھو گے ، تو یہ کلمہ دس مرتبہ پڑھنا ، پھر تم اپنی نماز میں اسی طرح پڑھنا ، جب تم فارغ ہو جاؤ گے ، تو تشہد کے بعد سلام پھیرنے سے پہلے یہ پڑھنا : ” اے اللہ ! میں تجھ سے ہدایت والے لوگوں کی ، توفیق اور اہل یقین کے اعمال اور توبہ کرنے والوں کی خیرخواہی صبر کرنے والوں کے عزم خشیت والوں کی کوشش ، رغبت والوں کی طلب ، پرہیز گاروں کی عبادت گزاری ، اہل علم کے عرفان کا سوال کرتا ہوں ، تاکہ میں تجھ سے ڈرتا رہوں ، اے اللہ ! میں تجھ سے ایسا خوف مانگتا ہوں ، جو مجھے تیری نافرمانی سے روک دے ، یہاں تک کہ میں تیری فرمانبرداری سے متعلق ایسا عمل کروں ، جس کے ذریعے میں تیری رضامندی کا مستحق ہو جاؤں ، یہاں تک کہ میں تیری بارگاہ میں خالص توبہ کر لوں ، تیرے خوف کی وجہ سے ہو ، اور تیری محبت کی وجہ سے ، میں خیرخواہی کو تیرے لئے خالص کر لوں ، یہاں تک کہ تمام امور میں تجھ پر توکل کروں ، تیرے بارے میں اچھا گمان رکھتے ہوئے ، تو ہر عیب سے پاک ہے ، اے جہنم کو پیدا کرنے والے ! “ ( اس کے بعد نبی اکرم صلی اللہ علیہ وسلم نے فرمایا : ) اے ابن عباس ! جب تم ایسا کر لو گے ، تو اللہ تعالیٰ تمہارے تمام چھوٹے بڑے ، پرانے نئے پوشیدہ اعلانیہ ، جان بوجھ کر اور غلطی سے کیے گئے ، ( تمام ) گناہوں کی مغفرت کر دے گا ۔
یہ روایت امام طبرانی نے معجم اوسط میں نقل کی ہے ۔

سیدنا عبداللہ بن عباس رضی اللہ عنہما کے حوالے سے انہوں نے
یہ روایت ابوجوزاء کے حوالے سے نقل کی ہے ، وہ بیان کرتے ہیں : سیدنا عبداللہ بن عباس رضی اللہ عنہما نے مجھ سے فرمایا : اے ابوجوزاء ! کیا میں تمہیں کچھ نہ دوں ؟ کیا میں تمہیں کوئی تحفہ نہ دوں ؟ کیا میں تمہیں کوئی عطیہ نہ دوں ؟ میں نے جواب دیا : جی ہاں ! تو انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص چار رکعات ادا کرتا ہے ۔ ۔ ۔ ۔ ۔ ۔ ۔ ۔ ۔ “ اس کے بعد راوی نے حسب سابق حدیث ذکر کی ہے ، جو اس سے زیادہ مختصر ہے ، اور اس میں یہ الفاظ ہیں : ” جو شخص انہیں ادا کر لے گا ، اُس کے ہر چھوٹے بڑے ، پرانے نئے گناہ کی مغفرت ہو جائے گی ، خواہ وہ پہلے ہو چکا ہو ، یا آگے چل کے ہو “۔
پہلی روایت میں ایک راوی عبدالقدوس بن حبیب ہے ، اور وہ متروک ہے ، جبکہ دوسری روایت میں یحیی بن عقبہ بن ابوعیزار ہے ، اور وہ ضعیف ہے ۔