مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : جبرائیل نے مجھ سے کہا: آپ کے نزدیک نماز کو محبوب بنایا گیا ہے ، تو آپ اس میں سے جتنی چاہیں ، اختیار کر لیں ۔
یہ روایت امام أحمد اور امام طبرانی نے معجم کبیر میں نقل کی ہے ، اس کی سند میں ایک راوی علی بن یزید ہے ، اس کے بارے میں کلام کیا گیا ہے ، اس کے بقیہ رجال ” صحیح“ کے رجال ہیں ۔

سیدنا سفینہ رضی اللہ عنہ بیان کرتے ہیں : نبی اکرم صلی اللہ علیہ وسلم انتقال سے پہلے ( اہتمام کے ساتھ ) عبادت کرتے رہے ، اور خواتین سے لاتعلقی اختیار کی ، یہاں تک کہ آپ صلی اللہ علیہ وسلم یوں ہو جاتے ، جیسے بوسیدہ مشکیزہ ہو ( یعنی وہ کسی استعمال میں نہیں آتا ) ۔
یہ روایت امام بزار نے محمد بن عبدالرحمن بن سفینہ کی ، اپنے والد کے حوالے سے ، اپنے دادا سے نقل کردہ روایت کے طور پر نقل کی ہے ۔ میں نے کسی کو ان دونوں کا ذکر کرتے ہوئے نہیں پایا ہے ، اس کی سند میں ایک راوی محمد بن حجاج ہے ، یحیی بن معین کہتے ہیں : وہ ثقہ نہیں ہے ۔

سیدنا عبداللہ بن عباس رضی اللہ عنہما بیان کرتے ہیں : ایک دن نبی اکرم صلی اللہ علیہ وسلم تشریف فرما تھے ، لوگ آپ صلی اللہ علیہ وسلم کے اردگرد موجود تھے ، آپ صلی اللہ علیہ وسلم نے ارشاد فرمایا : ” بے شک اللہ تعالیٰ نے ہر نبی کی دلچسپی کی چیز بنائی ہے ، اور میری دلچسپی کی چیز رات کے وقت نوافل ادا کرنا ہے ، جب میں نماز ادا کرنے کے لئے کھڑا ہوؤں ، تو کوئی شخص میرے پیچھے کھڑا نہ ہو ، اور اللہ تعالیٰ نے ہر نبی کو کوئی عطیہ دیا ہے ، اور میرا عطیہ یہ خمس ہے ، جب میرا انتقال ہو جائے گا ، تو یہ میرے بعد والے حکمران کو ملے گا “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں یہ مذکور ہے : اسے اسحاق بن عبداللہ بن کیسان نے نقل کیا ہے ۔ ابوحاتم نے اسے کمزور قرار دیا ہے ، اور اس کے باپ کو یحیی بن معین نے ” ثقہ “ قرار دیا ہے ، ابوحاتم اور دیگر حضرات نے اسے ” ضعیف“ قرار دیا ہے ۔

ضرت انس رضی اللہ عنہ بیان کرتے ہیں : نبی اکرم صلی اللہ علیہ وسلم ( نوافل ادا کرتے ہوئے ) اتنا ( طویل ) قیام کرتے تھے کہ آپ صلی اللہ علیہ وسلم کے پاؤں ( راوی کو شک ہے ، شاید یہ الفاظ ہیں : ) آپ صلی اللہ علیہ وسلم کی پنڈلیاں ورم آلود ہو جاتی تھیں ، اس بارے میں آپ صلی اللہ علیہ وسلم کی خدمت میں عرض کی گئی : کیا ایسا نہیں ہے کہ اللہ تعالیٰ نے آپ کے گزشتہ اور آئندہ ذنب کی مغفرت کر دی ہے ؟ نبی اکرم صلی اللہ علیہ وسلم نے ارشاد فرمایا : ” کیا میں شکر گزار بندہ نہ بنوں ؟ “ ۔
یہ روایت امام ابویعلیٰ ، امام بزار نے اور امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم رات کے وقت ( نفل ) نماز ادا کرتے رہتے تھے ، یہاں تک کہ آپ کے پاؤں ورم آلود ہو جاتے تھے ، عرض کی گئی : یا رسول اللہ ! اللہ تعالیٰ نے آپ کے گزشتہ اور آئندہ ذنب کی مغفرت کر دی ہے ۔ نبی اکرم صلی اللہ علیہ وسلم نے ارشاد فرمایا : کیا میں شکر گزار بندہ نہ بنوں ؟ ۔
یہ روایت امام طبرانی نے معجم صغیر اور معجم کبیر میں نقل کی ہے ، اس کی سند میں ایک راوی عبدالرحمن بن عثمان ہے ، اور وہ ضعیف ہے ۔ ابن حبان نے اسے ” ثقہ “ قرار دیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم ( رات کے وقت نوافل ادا کرتے ہوئے اتنی طویل ) نماز ادا کرتے تھے کہ آپ صلی اللہ علیہ وسلم کے پاؤں ورم آلود ہو جاتے تھے ، آپ صلی اللہ علیہ وسلم کی خدمت میں عرض کی گئی : یا رسول اللہ ! آپ ایسا کرتے ہیں ؟ جب کہ اللہ تعالیٰ کی طرف سے آپ کے پاس یہ بات آ چکی ہے کہ اُس نے آپ کے گزشتہ اور آئندہ ذنب کی مغفرت کر دی ہے ؟ نبی اکرم صلی اللہ علیہ وسلم نے ارشاد فرمایا : کیا میں پروردگار کا شکر گزار بندہ نہ بنوں ؟ علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس کا کچھ حصہ روایت کیا ہے ۔
یہ روایت امام بزار نے مختلف اسانید کے ساتھ نقل کی ہے ، ان دونوں میں سے ایک کے رجال ” صحیح “ کے رجال ہیں ۔

سیدنا نعمان بن بشیر رضی اللہ عنہ بیان کرتے ہیں : نبی اکرم صلی اللہ علیہ وسلم رات کے وقت نوافل ادا کرتے رہتے تھے ، یہاں تک کہ آپ کے پاؤں پھول جاتے تھے ، عرض کی گئی : یا رسول اللہ ! کیا اللہ تعالیٰ نے آپ کے گزشتہ اور آئندہ ذنب کی مغفرت نہیں کر دی ہے ؟ نبی اکرم صلی اللہ علیہ وسلم نے ارشاد فرمایا : کیا میں شکر گزار بندہ نہ بنوں ؟
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سلیمان بن حکم ہے ، اور وہ ضعیف ہے ، ابن حبان نے اس کا تذکرہ کتاب ” الثقات “ میں کیا ہے ، اور یہ بات بیان کی ہے : یہ بعض اوقات غلطی کرتا ہے ، عقیلی نے اس سے روایات نقل کی ہیں ان کا یہ کہنا ہے : یہ ثقہ ہے ۔

سیدنا ابوحجیفہ رضی اللہ عنہ بیان کرتے ہیں : نبی اکرم صلی اللہ علیہ وسلم ( رات کے وقت طویل نفل ) نماز ادا کرتے تھے ، یہاں تک کہ آپ کے پاؤں ورم آلود ہو جاتے تھے ، عرض کی گئی : یا رسول اللہ ! کیا اللہ تعالیٰ نے آپ کے گزشتہ اور آئندہ ذنب کی مغفرت نہیں کر دی ہے ؟ نبی اکرم صلی اللہ علیہ وسلم نے ارشاد فرمایا : کیا میں شکر گزار بندہ نہ بنوں ؟
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابوقتادہ حرانی ہے ، جسے امام أحمد ، یحیی بن معین نے ایک روایت کے مطابق ” ثقہ “ قرار دیا ہے ، جبکہ ایک جماعت نے اسے ضعیف کہا: ہے ۔

سیدنا ابوایوب انصاری رضی اللہ عنہ بیان کرتے ہیں : نبی اکرم صلی اللہ علیہ وسلم رات میں دو ، یا تین مرتبہ مسواک کیا کرتے تھے ، جب آپ رات کی نماز ادا کرنے کے لئے اٹھتے تھے ، تو آپ چار رکعات یوں ادا کرتے تھے کہ درمیان میں کوئی کلام نہیں کرتے تھے ، اور کسی چیز کا حکم نہیں دیتے تھے ، لیکن دو رکعات کے بعد سلام پھیر دیتے تھے ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی واصل بن سائب ہے ، اور وہ ضعیف ہے ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم رات کے وقت سولہ رکعات ادا کرتے تھے ، جو فرض نماز کے علاوہ ہوتی تھیں ۔
یہ روایت عبداللہ بن أحمد نے اپنی ” زیادات “ میں نقل کی ہے ، اور اس کے رجال ثقہ ہیں ۔

سیدنا عبداللہ بن زبیر رضی اللہ عنہما بیان کرتے ہیں : نبی اکرم صلی اللہ علیہ وسلم جب عشاء کی نماز ادا کر لیتے تھے ، تو اس کے بعد چار رکعات ادا کرتے تھے ، اور ایک وتر ادا کرتے تھے ، یہ آپ رات کی نماز کے بعد ادا کرتے تھے ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ ، اس کی سند میں ایک راوی نافع بن ثابت ہے ( نافع کا والد ثابت ) سیدنا عبداللہ بن زبیر رضی اللہ عنہما ان کا بیٹا ہے ، ابن حبان نے اس کا تذکرہ کتاب ” الثقات“ میں کیا ہے ، نافع نے اپنے دادا سیدنا عبداللہ بن زبیر رضی اللہ عنہما سے سماع نہیں کیا ہے ، اور نہ ہی ان کا زمانہ پایا ہے ، اس نے اپنے والد ثابت کے حوالے سے روایت نقل کی ہے ۔

سیدنا صفوان بن معطل سلمی رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ سفر کر رہا تھا ، میں نے آپ کی رات کی نفل نماز کا جائزہ لیا ، آپ نے عشاء کی نماز ادا کی ، پھر آپ سو گئے جب نصف رات ہوئی ، تو آپ بیدار ہوئے آپ نے سورہ آل عمران کی دس آیات کی تلاوت کی ، پھر آپ نے مسواک کی ، پھر وضو کیا ، پھر آپ نے کھڑے ہو کر دو رکعات ادا کی ، جس کے بارے میں مجھے اندازہ نہیں ہو سکا کہ آپ کے قیام ، رکوع اور سجود میں سے کون سا زیادہ طویل ہے ؟ پھر آپ نے نماز ختم کی ، پھر آپ سو گئے ، پھر آپ نے دوبارہ ایسا ہی کیا ، آپ مسلسل ایسا ہی کرتے رہے ، جس طرح آپ نے پہلی مرتبہ کیا تھا ، یہاں تک کہ آپ نے گیارہ رکعت ادا کر لیں ۔
یہ روایت عبداللہ بن أحمد نے اور امام طبرانی نے کبیر میں نقل کی ہے ۔ اس کی سند میں ایک راوی عبداللہ بن جعفر ہے ، جو علی بن مدینی کا والد ہے ، اور وہ ضعیف ہے ۔

سیدہ عائشہ صدیقہ رضی اللہ عنہا کے بارے میں یہ بات منقول ہے : اُن کے سامنے یہ بات ذکر کی گئی : کچھ لوگ ایک رات میں پورا قرآن ایک مرتبہ یا دو مرتبہ پڑھ لیتے ہیں ، تو سیدہ عائشہ رضی اللہ عنہا نے فرمایا : اُن لوگوں نے تلاوت کی بھی ہے ، اور نہیں بھی کی ہے ، میں نبی اکرم صلی اللہ علیہ وسلم کے ساتھ ساری رات نوافل ادا کرتی رہتی تھی ، تو نبی اکرم صلی اللہ علیہ وسلم ان میں سورہ بقرہ اور سورہ آل عمران اور سورۂ نساء کی تلاوت کرتے تھے ، اور آپ صلی اللہ علیہ وسلم جب بھی کسی ایسی آیت کو پڑھتے تھے ، جس میں خوف دلانے کا ذکر ہوتا تھا ، تو اللہ تعالیٰ سے دعا کرتے تھے ، اور اس چیز کے حوالے سے پناہ مانگتے تھے ، اور جب بھی کوئی آیت پڑھتے تھے ، جس میں کوئی خوشخبری ہوتی تھی ، تو آپ اللہ تعالیٰ سے دعا مانگتے تھے ، اور اس کی طرف سے رغبت کا اظہار کرتے تھے ۔
یہ روایت امام أحمد نے نقل کی ہے ۔ انہوں نے اس روایت میں یہ الفاظ نقل کیے ہیں : ” ان دونوں میں سے ایک ، قرآن کو دو مرتبہ یا تین مرتبہ پڑھ لیتا ہے “ ۔
یہ روایت امام ابویعلیٰ نے بھی نقل کی ہے ، اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم مسلسل ( نفلی ) روزے رکھتے رہتے تھے ، یہاں تک کہ ہم یہ سوچتے تھے کہ اب آپ کوئی نفلی روزہ ترک نہیں کریں گے اور آپ کبھی نفلی روزہ ترک کر دیتے تھے ، یہاں تک کہ ہم یہ سوچتے تھے کہ اب آپ نفلی روزہ نہیں رکھیں گے ، آپ صلی اللہ علیہ وسلم پوری رات میں سورہ بنی اسرائیل اور سورت زمر کی تلاوت کرتے تھے ۔ علامہ ہیثمی فرماتے ہیں : میں یہ کہتا ہوں :
یہ روایت ” صحیح “ میں منقول ہے ، تاہم اس میں یہ الفاظ نہیں ہیں : ” آپ صلی اللہ علیہ وسلم سورت بنی اسرئیل اور سورت زمر کی تلاوت کرتے تھے “ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا جابر بن عبداللہ رضی اللہ عنہما بیان کرتے ہیں : حدیبیہ کے موقع پر ہم آ رہے تھے ، یہاں تک کہ ہم نے ” سقیا“ کے مقام پر پڑاؤ کیا ، تو سیدنا معاذ بن جبل رضی اللہ عنہ نے کہا: کون ہمارے مشکیزوں میں پانی لا کر دے گا ؟ تو میں انصار کے کچھ نوجوانوں کے ساتھ نکلا ، یہاں تک کہ ہم اس پانی کے پاس آ گئے جو ” اثایہ “ کے مقام پر ہے ، اس کے اور بستی کے درمیان تیرہ میل کا فاصلہ تھا ، ہم نے اپنے مشکیزوں میں پانی ڈال دیا ، یہاں تک کہ جب شام ہو گئی ، تو اسی دوران ایک شخص اپنے اونٹ کو حوض پر آنے سے روک رہا تھا ، اس نے کہا: ہم آ گئے ہیں ، تو وہ نبی اکرم صلی اللہ علیہ وسلم تھے ، آپ تشریف لائے ، میں نے آپ کی اونٹنی کی لگام کو پکڑا ، اور اُسے بٹھایا ، نبی اکرم صلی اللہ علیہ وسلم نے کھڑے ہو کر عشاء کی نماز ادا کی ، سیدنا جابر رضی اللہ عنہ نے یہ بیان کیا ہے : وہ نبی اکرم صلی اللہ علیہ وسلم کے پہلو میں کھڑے ہو گئے ، اُس کے بعد نبی اکرم صلی اللہ علیہ وسلم نے تیرہ رکعات ادا کیں ۔
علامہ ہیثمی فرماتے ہیں : میں یہ کہتا ہوں : یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے امام ابویعلیٰ نے اور امام بزار نے اختصار کے ساتھ نقل کی ہے ، اس کی سند میں ایک راوی شرحبیل بن سعد ہے ، اسے ابن حبان نے ” ثقہ “ قرار دیا ہے ، اور ایک جماعت نے اسے ” ضعیف “ قرار دیا ہے ۔

سیدہ عائشہ صدیقہ رضی اللہ عنہا بیان کرتی ہیں : ” میں نے نبی اکرم صلی اللہ علیہ وسلم کو رات کی نفل نماز میں ایک رکعت میں یہ پڑھتے ہوئے سنا «لا اله الا انت» “ ۔
یہ روایت امام أحمد نے نقل کی ہے ۔

جسره بنت دجاجہ بیان کرتی ہیں : وہ عمرہ کرنے کے لئے گئیں ، وہ ” ربذہ “ پہنچیں ، تو میں نے سیدنا ابوذر غفاری رضی اللہ عنہ کو یہ بیان کرتے ہوئے سنا : ایک رات نبی اکرم صلی اللہ علیہ وسلم کھڑے ہوئے ، آپ نے لوگوں کو نماز پڑھانا شروع کی ، آپ کے اصحاب آپ کے پیچھے نماز ادا کرتے رہے ، جب نبی اکرم صلی اللہ علیہ وسلم نے ان لوگوں کے قیام اور ان کے پیچھے موجود ہونے کو ملاحظہ فرمایا ، تو آپ اپنے گھر تشریف لے گئے پھر جب آپ نے یہ دیکھا کہ لوگ اس جگہ سے چلے گئے ہیں ، تو آپ واپس اپنی جگہ پر آ گئے آپ نے نماز ادا کی ، میں آپ کے پیچھے کھڑا ہو کر نماز ادا کرنے لگا ، تو آپ نے اپنے دائیں دست مبارک کے ذریعے میری طرف اشارہ کیا ، تو میں آپ کے دائیں طرف آ کے کھڑا ہو گیا ، پھر عبداللہ بن مسعود آئے اور وہ میرے اور نبی اکرم صلی اللہ علیہ وسلم کے پیچھے کھڑے ہو گئے ، نبی اکرم صلی اللہ علیہ وسلم نے انہیں اشارہ کیا کہ بائیں طرف آ جاؤ ! تو وہ نبی اکرم صلی اللہ علیہ وسلم کے بائیں طرف کھڑے ہو گئے ، تو ہم تینوں نے اس طرح کھڑے ہو کر نماز ادا کی کہ ہم میں سے ہر ایک انفرادی طور پر نماز ادا کر رہا تھا اور اس نے قرآن کا جو حصہ پڑھنا تھا وہ پڑھ رہا تھا ، نبی اکرم صلی اللہ علیہ وسلم قرآن کی ایک آیت پڑھتے رہے ، اور اسے دُہراتے رہے ، جب آپ نے صبح کی نماز ادا کر لی ، تو میں نے سیدنا عبداللہ بن مسعود رضی اللہ عنہ کو اشارہ کیا کہ وہ نبی اکرم صلی اللہ علیہ وسلم سے اس بارے میں دریافت کریں کہ نبی اکرم صلی اللہ علیہ وسلم نے گزشتہ رات جو کیا تھا ، اُس کا مقصد کیا تھا ؟ سیدنا عبداللہ بن مسعود رضی اللہ عنہ نے کہا: میں نبی اکرم صلی اللہ علیہ وسلم سے کسی چیز کے بارے میں نہیں پوچھوں گا ، جب تک آپ خود بیان نہیں کر دیتے ، تو میں نے کہا: میرے ماں باپ آپ پر قربان ہوں ، آپ قرآن کی ایک آیت تلاوت کرتے رہے ، حالانکہ آپ کو اور بھی قرآن آتا ہے ؟ اگر ہم میں سے کوئی ایک شخص ایسا کرتا ، تو ہم اس پر ناراضگی کا اظہار کرتے ، نبی اکرم صلی اللہ علیہ وسلم نے ارشاد فرمایا : میں اپنی امت کے لئے دعا کرتا رہا ، سیدنا ابوذر غفاری رضی اللہ عنہ نے دریافت کیا : پھر آپ کو کیا جواب ملا ؟ ( یہاں ایک لفظ کے بارے میں راوی کو شک ہے ) تو نبی اکرم صلی اللہ علیہ وسلم نے ارشاد فرمایا : مجھے جو جواب ملا ، اگر لوگ اس پر مطلع ہو جائیں تو بہت سے لوگ نماز ہی ترک کر دیں ، سیدنا ابوذر غفاری رضی اللہ عنہ نے کہا: کیا میں لوگوں کو یہ خوشخبری نہ سناؤں ؟ نبی اکرم صلی اللہ علیہ وسلم نے فرمایا : ٹھیک ہے ، وہ ابھی تھوڑی ہی دور گئے تھے ، اتنی دور کہ جتنا پتھر پھینکیں ، تو پتھر جاتا ہے ، اسی دوران سیدنا عمر رضی اللہ عنہ نے کہا: یا رسول اللہ ! آپ اسے لوگوں کی طرف بھیج رہے ہیں ، وہ لوگ عبادت کو چھوڑ کر اسی پر اکتفاء کر لیں گے ، انہوں نے سیدنا ابوذر غفاری رضی اللہ عنہ کو بلند آواز میں پکارا کہ تم واپس آ جاؤ ! وہ واپس آ گئے ، وہ یہ آیت تھی ( جس کی نبی اکرم صلی اللہ علیہ وسلم تلاوت کر رہے تھے : ) ” اگر تو انہیں عذاب دے ، تو یہ تیرے بندے ہیں اور اگر تو ان کی مغفرت کر دے ، تو بے شک تو غلبے والا ، حکمت والا ہے “ ۔
( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس روایت کا کچھ حصہ نقل کیا ہے : نبی اکرم صلی اللہ علیہ وسلم صبح ہونے تک ایک ہی آیت بار بار پڑھتے رہے ۔
یہ روایت امام أحمد اور امام بزار نے نقل کی ہے ، اور اس کے رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم صبح ہونے تک ایک ہی آیت بار ، بار پڑھتے رہے ۔
یہ روایت امام أحمد نے نقل کی ہے ، اس کی سند میں ایک راوی اسماعیل بن سلم ناجی ہے ، میں نے کسی کو اس کے حالات بیان کرتے ہوئے نہیں پایا ہے ۔

سیدنا ابوہریرہ رضی اللہ عنہ بیان کرتے ہیں : جب میں جدا ہوا ، تو میں نے نبی اکرم صلی اللہ علیہ وسلم کو پایا ، کہ آپ صلی اللہ علیہ وسلم نے سورت بقرہ کو دو رکعات میں تقسیم کر کے پڑھا تھا ۔
یہ روایت امام أحمد نے نقل کی ہے ، اس کی سند میں ایک راوی لیث بن ابوسلیم ہے ، وہ ثقہ ہے ، لیکن تدلیس کرنے والا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم سورت بقرہ کو دو رکعات میں تقسیم کرتے تھے ۔
یہ روایت امام ابویعلیٰ نے نقل کی ہے ، اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے کوئی چیز ( یعنی تکلیف ) پائی ، جب صبح ہوئی ، تو عرض کی گئی : یا رسول اللہ ! آپ پر طبیعت کی خرابی کے آثار دکھائی دے رہے ہیں ، نبی اکرم صلی اللہ علیہ وسلم نے ارشاد فرمایا : اس کی وجہ یہ ہے کہ گزشتہ رات میں نے سات طویل سورتوں کی تلاوت کی تھی ۔
یہ روایت امام ابویعلیٰ نے نقل کی ہے ، اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : ایک رات نبی اکرم صلی اللہ علیہ وسلم اپنے حجرے میں نماز ادا کر رہے تھے ، آپ کے اصحاب میں سے کچھ لوگ آئے ، اور آپ کی پیروی میں نماز ادا کرنے لگے ، راوی بیان کرتے ہیں : پھر نبی اکرم صلی اللہ علیہ وسلم گھر تشریف لے گئے ، پھر آپ صلی اللہ علیہ وسلم تشریف لائے ، ایسا کئی مرتبہ ہوا ، ہر مرتبہ آپ نماز ادا کرتے تھے ، جب صبح ہوئی ، تو لوگوں نے عرض کی : یا رسول اللہ ! ہم نے آپ صلی اللہ علیہ وسلم کی اقتداء میں نماز ادا کی تھی ، ہماری یہ خواہش تھی کہ آپ صلی اللہ علیہ وسلم اپنی نماز کو طول دیتے ، نبی اکرم صلی اللہ علیہ وسلم نے ارشاد فرمایا : تمہاری موجودگی کے بارے میں مجھے پتہ تھا ، لیکن میں نے جان بوجھ کے ایسا کیا ہے ( یعنی تمہیں نماز نہیں پڑھائی ) ۔
یہ روایت امام ابویعلیٰ اور امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم رات میں ، دو یا تین مرتبہ مسواک کرتے تھے ، جب آپ سو جاتے تھے ، اور پھر بیدار ہوتے تھے ، تو آپ مسواک کرتے تھے ، وضو کرتے تھے ، دو رکعات یا ایک رکعت ادا کرتے تھے ۔
یہ روایت امام بزار نے نقل کی ہے ، اس کی سند میں ایک راوی ابوبکر مدینی ہے ، جسے ابن حبان نے ” ثقہ “ قرار دیا ہے ، یحیی بن معین اور ایک جماعت نے اسے ضعیف کہا: ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم روزانہ رات کے وقت سورت آل عمران کی آخری دس آیات کی تلاوت کیا کرتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مظاہر بن اسلم ہے ، جسے ابن حبان نے ” ثقہ “ قرار دیا ہے ، یحیی بن معین اور ایک جماعت نے اسے ضعیف کہا: ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم عشاء کی نماز ادا کر لیتے تھے ، پھر آپ مسجد میں چھ رکعات ادا کرتے تھے جو گھر واپس آنے سے پہلے ادا کرتے تھے ، آپ ہر دو رکعات کے بعد سلام پھیر دیتے تھے ، اور تین وتر ادا کرتے تھے ، وتر کی پہلی دو رکعات کے بعد آپ تشہد میں بیٹھتے تھے ، پھر جب سلام پھیرنا ہوتا تھا ، تب بھی آپ تشہد میں بیٹھتے تھے ، آپ وتر میں معوذات کی تلاوت کرتے تھے ، جب آپ گھر تشریف لاتے تھے ، تو دو رکعات ادا کرتے تھے پھر سو جاتے تھے پھر جب بیدار ہوتے تھے ، تو یہ پڑھتے تھے : ” ہر طرح کی حمد ، اللہ تعالیٰ کے لئے مخصوص ہے ، جس نے مجھے عافیت میں نیند عطا کی اور عافیت میں بیدار کیا “ پھر آپ صلی اللہ علیہ وسلم اپنا سر آسمان کی طرف اٹھا کر غور و فکر کرتے تھے ، پھر یہ پڑھتے تھے : ” اے ہمارے پروردگار ! تو نے اسے فضول میں پیدا نہیں کیا ہے ، تو ہر عیب سے پاک ہے ، تو ہمیں جہنم کے عذاب سے بچا لے “ ۔ آپ صلی اللہ علیہ وسلم یہ آیات تلاوت کرتے تھے ، یہاں تک کہ یہ پڑھتے تھے : ” بے شک تو وعدے کی خلاف ورزی نہیں کرتا ہے “ ۔ پھر آپ وضو کرتے تھے ، پھر کھڑے ہو کر دو رکعات ادا کرتے تھے ، جن میں آپ طویل قرأت ، رکوع اور سجود کرتے تھے ، آپ ان رکعات میں بکثرت دعا کرتے تھے ، یہاں تک کہ میں سو جاتی تھی ، پھر بیدار ہو جاتی تھی ، پھر نبی اکرم صلی اللہ علیہ وسلم نماز ختم کر کے لیٹ جاتے تھے ، اور سو جاتے تھے ، پھر آپ اٹھتے تھے ، پھر آپ اُسی طرح دعا پڑھا کرتے تھے ، جس طرح پہلی دفعہ میں پڑھتے تھے ، پھر آپ کھڑے ہو کر دو رکعات ادا کرتے تھے ، جو پہلی والی دو رکعات سے زیادہ طویل ہوتی تھیں ، اور آپ ان میں زیادہ گریہ وزاری اور زیادہ استغفار کیا کرتے تھے ، یہاں تک کہ میں یہ سوچتی کہ کیا آپ اس نماز کو ختم کریں گے ؟ ایسا رات کے آخر تک ہوتا رہتا تھا ، پھر آپ نماز ختم کرتے تھے ، اور تھوڑی دیر کے لئے سو جاتے تھے ، تو میں یہ سمجھتی کہ آپ سوئے بھی ہیں ، یا نہیں سوئے ؟ یہاں تک کہ مؤذن آپ کی خدمت میں حاضر ہو جاتا تھا ، آپ پھر اُسی کی مانند کلمات پڑھتے تھے ، جو پہلی مرتبہ میں پڑھے تھے ، پھر آپ بیٹھ کے مسواک منگواتے تھے ، مسواک کرتے تھے ، وضو کرتے تھے ، پھر دو مختصر رکعت ادا کرتے تھے ( جو فجر کی دو سنتیں ہوتی تھیں ) پھر آپ صلی اللہ علیہ وسلم نماز کے لئے تشریف لے جاتے تھے ، تو آپ کی نماز تیرہ رکعات ہوتی تھیں ۔ ( علامہ ہیثمی فرماتے ہیں : ) میں یہ کہتا ہوں : سیدہ عائشہ رضی اللہ عنہا کے حوالے سے ” صحیح “ میں احادیث منقول ہیں ، جو اس روایت کے علاوہ ہیں ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے ، اور اُس کے بارے میں کلام کیا گیا ہے ۔

سیدنا حذیفہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، آپ نماز ادا کر رہے تھے ، میں نے آپ کے پیچھے کھڑے ہو کر آپ کی اقتداء میں نماز ادا کرنا شروع کی ، آپ کو اس بات کا پتہ نہیں چلا ، آپ نے سورت بقرہ پڑھنا شروع کر دی ، میں نے یہ گمان کیا کہ آپ تھوڑی دیر بعد رکوع میں چلے جائیں گے ، لیکن آپ صلی اللہ علیہ وسلم مسلسل تلاوت کرتے رہے ، یہاں سنان نامی راوی نے یہ بات بیان کی ہے : میرے علم کے مطابق روایت میں یہ الفاظ بھی ہیں : انہوں نے یہ بیان کیا : نبی اکرم صلی اللہ علیہ وسلم نے چار رکعات ادا کیں ، اور آپ کا رکوع بھی ، قیام کی طرح ( طویل ) تھا ، راوی بیان کرتے ہیں : میں نے نبی اکرم صلی اللہ علیہ وسلم کے سامنے یہ بات ذکر کی ، تو آپ صلی اللہ علیہ وسلم نے ارشاد فرمایا : تم نے مجھے بتایا کیوں نہیں ؟ سیدنا حذیفہ رضی اللہ عنہ نے عرض کی : اس ذات کی قسم ! جس نے آپ کو حق کے ہمراہ نبی بنا کر مبعوث کیا ہے ، مجھے اس وقت بھی اپنی کمر میں ( اتنے طویل قیام کی وجہ سے درد کی کیفیت ) محسوس ہو رہی ہے ، نبی اکرم صلی اللہ علیہ وسلم نے فرمایا : مجھے یہ پتہ ہوتا کہ تم میرے پیچھے کھڑے ہو ، تو میں مختصر نماز ادا کرتا ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت کا ابتدائی کچھ حصہ منقول ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سنان بن ہارون برجمی ہے ، یحیی بن معین کہتے ہیں : سنان بن ہارون ، سیف کا بھائی ہے ، اور ان دونوں میں سے سنان زیادہ بہتر حالت کا مالک ہے ، ایک مرتبہ انہوں نے یہ کہا: ہے : سنان ، سیف سے زیادہ ثقہ ہے ، یحیی بن معین کے علاوہ دیگر حضرات نے اسے ” ضعیف “ قرار دیا ہے ۔

سیدنا عبداللہ بن عباس رضی اللہ عنہما بیان کرتے ہیں : میں نے اپنی خالہ سیدہ میمونہ رضی اللہ عنہا کے ہاں رات بسر کی ، نبی اکرم صلی اللہ علیہ وسلم کھڑے ہوئے آپ صلی اللہ علیہ وسلم نے پانی طلب کیا ، وضو کیا ، پھر آپ نے یہ آیات تلاوت کیں : ” بے شک آسمانوں اور زمین کی تخلیق میں ۔ ۔ ۔ ۔ ۔ ۔ ۔ ۔ ۔ ۔ ۔ “ انہیں سورت کے آخر تک تلاوت کیا ، پھر آپ صلی اللہ علیہ وسلم نے سورت بقرہ پڑھنی شروع کی آپ صلی اللہ علیہ وسلم نے اس کے ایک ایک ، حرف کو پڑھا ، یہاں تک کہ وہ پوری سورت ختم کر دی ، پھر آپ رکوع میں چلے گئے ، پھر آپ نے سبحان ربی العظیم پڑھا ، پھر آپ سجدے میں گئے ، تو آپ نے سبحان ربی الاعلی پڑھا ، پھر آپ صلی اللہ علیہ وسلم نے اپنا سر اٹھایا ، تو دو سجدوں کے درمیان یہ پڑھا : ” اے میرے پروردگار ! تو میری مغفرت کر دے ، مجھ پر رحم کر ، مجھے رزق عطا فرما ، مجھے ہدایت پر ثابت قدم رکھ “ پھر آپ صلی اللہ علیہ وسلم کھڑے ہوئے ، آپ نے دوسری رکعت میں سورت آل عمران کی تلاوت کی ، پھر آپ رکوع میں گئے اور سجدے میں گئے اور آپ نے ایسا ہی کیا ، جس طرح آپ نے پہلی رکعت میں کیا تھا ، پھر آپ لیٹ گئے پھر آپ اٹھے اور آپ نے ویسا ہی کیا ، جس طرح آپ نے پہلی دو رکعات میں کیا تھا ، آپ نے ایک ، ایک حرف کی تلاوت کی ، یہاں تک کہ آپ نے آٹھ رکعات ادا کر لیں ، آپ ہر دو رکعات کے بعد لیٹ جاتے تھے ، پھر آپ نے تین وتر ادا کیے ، پھر فجر کی دو رکعات ( یعنی سنتیں ) ادا کیں “ ۔ ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبید بن اسحاق عطار ہے ، جسے یحیی بن معین اور دیگر حضرات نے ” ضعیف “ قرار دیا ہے ، جہاں تک ابوحاتم کا تعلق ہے ، تو وہ اس سے راضی ہیں ۔

سیدنا عبداللہ بن عباس رضی اللہ عنہا بیان کرتے ہیں : نبی اکرم صلی اللہ علیہ وسلم نے میرے والد کو ایک جوان اونٹنی تحفے میں دی ، میرے والد نے اسے کم عمر سمجھا ، انہوں نے مجھ سے فرمایا : تم اسے نبی اکرم صلی اللہ علیہ وسلم کے پاس لے جاؤ ، تم آپ صلی اللہ علیہ وسلم کی خدمت میں حاضر ہو کر یہ عرض کرنا کہ ہم کام کاج کرنے والے لوگ ہیں ، اگر آپ کے پاس اس سے زیادہ عمر والی کوئی اونٹنی ہو ، تو وہ ہمیں بھجوا دیں ، میں وہ اونٹنی لے کر نبی اکرم صلی اللہ علیہ وسلم کے پاس آیا ، آپ صلی اللہ علیہ وسلم نے ارشاد فرمایا : اے میرے چچا کے بیٹے ! تم اسے صدقہ کے اونٹوں کی طرف لے جاؤ ، میں اسے وہاں لے گیا پھر میں مسجد میں آپ کی خدمت میں حاضر ہوا ، اور میں نے آپ کی اقتداء میں عشاء کی نماز ادا کی ، آپ نے فرمایا : کیا تم آج رات اپنی خالہ کے ہاں نہیں ٹھہرو گے ؟ کیونکہ شام ہو چکی ہے ، تو اس رات میں نبی اکرم صلی اللہ علیہ وسلم کے ہاں ٹھہرنے کے لئے تیار ہو گیا ، میں سیدہ میمونہ رضی اللہ عنہا کے گھر آیا ، انہوں نے مجھے کھانا دیا اور میرے لئے ایک عبا بچھا دی ، میں نے سوچا میں اس بات کا جائزہ لوں گا کہ نبی اکرم صلی اللہ علیہ وسلم رات کے وقت کس طرح عمل کرتے ہیں ؟ نبی اکرم صلی اللہ علیہ وسلم گھر تشریف لائے ، آپ صلی اللہ علیہ وسلم نے فرمایا : اے میمونہ ! انہوں نے عرض کی : یا رسول اللہ ! میں حاضر ہوں ، نبی اکرم صلی اللہ علیہ وسلم نے فرمایا : کیا تمہارا بھانجا تمہارے پاس آ گیا تھا ؟ انہوں نے عرض کی : جی ہاں ! وہ یہاں موجود ہے ۔ نبی اکرم صلی اللہ علیہ وسلم نے فرمایا : اگر تمہارے پاس کچھ تھا ، تو تم نے اسے کھانے کے لئے دے دینا تھا ، سیدہ میمونہ رضی اللہ عنہا نے عرض کی : میں نے ایسا کر لیا ہے ، نبی اکرم صلی اللہ علیہ وسلم نے فرمایا : تم نے اس کے لئے کچھ بچھایا ہے ، سیدہ میمونہ رضی اللہ عنہا نے عرض کی : جی ہاں ! نبی اکرم صلی اللہ علیہ وسلم بچھونے سے ایک طرف ہو کر لیٹ گئے ، آپ اس پر نہیں لیٹے ، آپ اس کے ارد گرد لیٹ گئے ، اور آپ نے اپنا سر بچھونے پر رکھ دیا کچھ دیر گزری ، میں نے آپ کو سنا کہ آپ نیند کے دوران خراٹے لینے لگے ، میں نے یہ سوچا کہ اب آپ سو گئے ہیں ، اور رات کو نوافل ادا نہیں کریں گے ، پھر میرے اندازے کے مطابق جب رات کا ایک چوتھائی حصہ ، یا ایک تہائی حصہ رخصت ہو چکا تھا ، اس وقت آپ اُٹھے آپ اپنی مسواک اور وضو کے پانی کے پاس تشریف لائے ، آپ نے مسواک کرنا شروع کی ، یہاں تک کہ مسواک کے نیچے میں نے آپ کے دانتوں کی حرکت کو سنا ، آپ یہ آیات تلاوت کر رہے تھے : ” بے شک آسمانوں اور زمین کی تخلیق میں ۔ ۔ ۔ ۔ ۔ ۔ ۔ ۔ ۔ ۔ ۔ ۔ “ ۔
پھر آپ نے مسواک رکھی اور اُٹھ کر مشکیزے کی طرف گئے اور آپ نے اسے کھولا ، پہلے میں نے یہ ارادہ کیا کہ میں اُٹھ کر آپ صلی اللہ علیہ وسلم کو وضو کرواتا ہوں ، لیکن پھر مجھے یہ اندیشہ ہوا کہ کہیں آپ صلی اللہ علیہ وسلم اپنے عمل میں سے کسی چیز کو ( میری وجہ سے ) ترک نہ کر دیں ، جب آپ نے وضو کر لیا ، تو آپ نماز کی جگہ پر تشریف لائے ، آپ نے چار رکعات ادا کیں ، آپ نے ہر رکعت میں تقریبا پچاس آیات کی تلاوت کی ، آپ نے ان آیات میں طویل ، رکوع اور سجود کیا ، پھر آپ اپنی جگہ پر آ گئے ، جہاں آپ پہلے موجود تھے ، اور وہاں آپ آرام سے لیٹ گئے اور سونے کے دوران خراٹے لینے لگے ، میں نے سوچا کہ اب آپ رات کے وقت نوافل ادا نہیں کریں گے ، یہاں تک کہ صبح ہو جائے گی ، جب ایک تہائی رات ، یا اس کا نصف ، یا اُس کے آس پاس کا حصہ گزر گیا ، تو پھر آپ نے ایسا ہی کیا ، آپ اپنی نماز کی جگہ پر تشریف لائے ، آپ نے چار رکعات ادا کیں ، جو اُسی طرح تھیں پھر اپنی لیٹنے کی جگہ پر آئے اور وہاں سو گئے اور خراٹے لینے لگے ، میں نے سوچا اب آپ کو نیند آ گئی ہے ، اب آپ صبح ہونے تک نہیں اٹھیں گے ، لیکن جب رات کا چھٹا حصہ ، یا اس سے کچھ کم حصہ باقی رہ گیا تو آپ اٹھے آپ نے وضو کیا ، آپ نے مسواک کی ، پھر سورت فاتحہ پڑھی ، پھر سورت الاعلیٰ کی تلاوت کی پھر رکوع میں گئے ، سجدہ کیا ، پھر آپ کھڑے ہوئے ، سورت فاتحہ پڑھی ، پھر آپ نے سورت الکافرون پڑھی ، پھر آپ رکوع میں چلے گئے سجدہ کیا ، پھر آپ کھڑے ہوئے ، آپ نے سورت فاتحہ پڑھی اور سورت اخلاص پڑھی ، پھر آپ نے دعائے قنوت پڑھی ، پھر آپ نے رکوع کیا ، اور پھر آپ سجدے میں چلے گئے ( یعنی آپ نے وتر ادا کیے ) جب آپ فارغ ہوئے ، تو آپ تشریف فرما ہوئے ، یہاں تک کہ جب صبح صادق ہوئی ، تو آپ نے مجھے پکارا ، میں نے عرض کی : یا رسول اللہ ! میں حاضر ہوں ، نبی اکرم صلی اللہ علیہ وسلم نے فرمایا : تم اُٹھ جاؤ ! اللہ کی قسم ! تم نہیں سوؤ گے ، میں اُٹھا میں نے وضو کیا ، اور آپ کے پیچھے نماز ادا کی ، آپ نے سورت فاتحہ اور سورت اخلاص کی تلاوت کی پھر آپ رکوع میں چلے گئے اور سجدے میں گئے ، پھر آپ دوسری رکعت میں کھڑے ہوئے ، تو آپ نے سورت فاتحہ اور سورت الکافرون کی تلاوت کی ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ” صحیح “ میں اس کا کچھ حصہ منقول ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عطاء بن سالم خفاف ہے ، ابن حبان نے اسے ” ثقہ “ قرار دیا ہے ، دیگر حضرات نے یہ کہا: ہے : یہ ضعیف ہے ، یہ ایک نیک شخص تھا ، لیکن اس کی کتابیں دفن ہو گئیں تھیں ، تو اس کی نقل کردہ حدیث ” ثبت “ نہیں ہے ۔

سیدنا عبداللہ بن عباس رضی اللہ عنہما بیان کرتے ہیں : اُن کے والد نے انہیں نبی اکرم صلی اللہ علیہ وسلم کی خدمت میں کسی کام کے سلسلے میں بھیجا ، سیدنا عبداللہ بن عباس رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو اپنے اصحاب کے ساتھ مسجد میں بیٹھا ہوا پایا ، میں آپ صلی اللہ علیہ وسلم کے ساتھ بات چیت نہیں کر سکا ، جب آپ نے مغرب کی نماز ادا کر لی ، تو آپ اُٹھے آپ صلی اللہ علیہ وسلم نے نوافل ادا کرنے شروع کیے ، یہاں تک کہ مسجد میں موجود لوگ واپس چلے گئے ، آپ بھی اپنے گھر چلے گئے ، میں آپ کے پیچھے آیا ، جب آپ نے میری آہٹ محسوس کی ، تو دریافت کیا : کون ہے ؟ تو میں نے عرض کی : ابن عباس ، نبی اکرم صلی اللہ علیہ وسلم نے دریافت کیا : اللہ کے رسول کا چچا زاد ؟ میں نے عرض کی : اللہ کے رسول کا چچا زاد ، نبی اکرم صلی اللہ علیہ وسلم نے فرمایا : اللہ کے رسول کے چچا زاد کو خوش آمدید ہے !
علامہ ہیثمی فرماتے ہیں : میں یہ کہتا ہوں : اس کے بعد راوی نے اس کی مانند حدیث ذکر کی ہے ، جو ” صحیح “ میں مذکور ہے ۔
یہ روایت امام طبرانی نے معجم اوسط میں نقل کی ہے ۔ ، اس کی سند میں ایک راوی ایسا ہے ، جس سے میں واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم رات کے وقت آٹھ رکعات ادا کرتے تھے ، جن کے رکوع اور سجدے ، اُن کی قرأت جتنے ( طویل ) ہوتے تھے ، آپ ہر دو رکعات کے بعد سلام پھیر لیتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی جنادہ بن ابومروان ہے ، جس پر ابوحاتم نے تہمت عائد کی ہے ۔

نافع بن خالد خزاعی بیان کرتے ہیں : میرے والد نے مجھے یہ بات بیان کی ہے : نبی اکرم صلی اللہ علیہ وسلم جب کسی ایسی جگہ نماز ادا کر رہے ہوتے تھے ، جہاں لوگ دیکھ رہے ہوتے تھے ، تو آپ صلی اللہ علیہ وسلم رکوع اور سجود مکمل کرتے تھے ، لیکن مختصر نماز ادا کرتے تھے ۔
یہ روایت امام طبرانی نے معجم کبیر میں نقل کی ہے ۔ نافع نامی راوی کا ذکر ابن حبان نے کتاب ” الثقات“ میں کیا ہے ، اس روایت کے بقیہ رجال ” صحیح“ کے رجال ہیں ۔

سیدنا معاویہ بن حکم رضی اللہ عنہ بیان کرتے ہیں : ۔ ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد انہوں نے مالک کی نقل کردہ روایت کی مانند روایت نقل کی ہے ، جو نبی اکرم صلی اللہ علیہ وسلم کی نماز کے بارے میں ہے کہ آپ صلی اللہ علیہ وسلم نے گیارہ رکعات ادا کی تھیں ، اور دائیں پہلو کے بل لیٹ گئے تھے ۔
یہ روایت امام طبرانی نے معجم کبیر میں نقل کی ہے ، اس کے رجال ثقہ ہیں ، کچھ رجال کے بارے میں ایسا کلام کیا گیا ہے ، جو نقصان دہ نہیں ہے ۔

سیدنا حجاج بن غزیہ رضی اللہ عنہ ، جو نبی اکرم صلی اللہ علیہ وسلم کے صحابی ہیں ، وہ فرماتے ہیں : تم لوگ یہ سمجھتے ہو کہ جب کوئی شخص رات کو نوافل ادا کرتا رہے ، اور صبح ہونے تک مسلسل نماز ادا کرتا ہے ، تو اُس نے تہجد ادا کر لی ، حالانکہ تہجد ادا کرنے والا شخص وہ ہوتا ہے ، جو کچھ دیر سونے کے بعد نماز ادا کرے ، پھر کچھ دیر سونے کے بعد نماز ادا کرے ، نبی اکرم صلی اللہ علیہ وسلم کی نماز اسی طرح ہوتی تھی ۔
یہ روایت امام طبرانی نے معجم کبیر میں نقل کی ہے ۔ یہ صحیح سند کے ساتھ منقول ہے ، اس کے رجال ” صحیح “ کے رجال ہیں ۔

سیدنا حجاج بن عمرو مازنی رضی اللہ عنہ فرماتے ہیں : تم میں سے کوئی ایک شخص یہ سمجھتا ہے کہ جو شخص صبح ہونے تک مسلسل نماز ادا کرتا رہے اس نے تہجد ادا کر لی ، حالانکہ تہجد یہ ہوتی ہے کہ سونے کے بعد نماز ادا کی جائے ، پھر سونے کے بعد نماز ادا کی جائے ، یہ نبی اکرم صلی اللہ علیہ وسلم کی نماز کا طریقہ تھا ۔
یہ روایت امام طبرانی نے معجم اوسط اور معجم کبیر میں اس کا کچھ حصہ نقل کیا ہے ، بعض روایات میں یہ الفاظ ہیں : نبی اکرم صلی اللہ علیہ وسلم سونے کے بعد ( بیدار ہو کر ) تہجد ادا کرتے تھے ، اور آپ تہجد سے پہلے مسواک کیا کرتے تھے ۔ اس روایت کا مدار عبداللہ بن صالح پر ہے ، جو لیث کا کاتب ہے ، اس کے بارے میں عبدالملک بن شعیب بن لیث نے یہ کہا: ہے : یہ ثقہ اور مامون ہے ، امام أحمد اور دیگر حضرات نے اسے ” ضعیف“ قرار دیا ہے ۔