مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : پہلے ہم پر رات کی ( نفل ) نماز لازم قرار دی گئی تھی ( ارشاد باری تعالیٰ ہے : ) ” اے چادر اوڑھنے والے ! تم رات کے وقت قیام کرو ، صرف تھوڑے حصے میں نہ کرو “ ۔ تو ہم قیام کیا کرتے تھے ، یہاں تک کہ ہمارے پاؤں پھول جاتے تھے ، تو اللہ تعالیٰ نے رخصت کا حکم نازل کرتے ہوئے ( ارشاد فرمایا : ) ” وہ یہ جانتا ہے کہ تم میں سے کچھ لوگ بیمار ہوں گے “ ۔ ۔ ۔ ۔ ۔ ۔ ۔ ۔ ۔ ۔ ۔ یہ سورت کے آخر تک ہے ۔
یہ روایت امام بزار نے نقل کی ہے ، اس کی سند میں ایک راوی علی بن زید ہے ، اس کے بارے میں کلام کیا گیا ہے ، اور اس کی توثیق کی گئی ہے ۔

سیدنا عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” رات کی نماز کو ، دن کی نماز پر وہی فضیلت حاصل ہے ، جو پوشیدہ طور پر صدقہ کرنے کو ، اعلانیہ طور پر صدقہ کرنے پر فضیلت حاصل ہے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا ابوامامہ باہلی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم پر رات کے وقت قیام کرنا ( یعنی نوافل ادا کرنا ) لازم ہے ، کیونکہ یہ تم سے پہلے نیک لوگوں کا معمول ہے ، اور تمہارے پروردگار کی بارگاہ میں قربت کے حصول کا باعث ہے ، یہ گناہوں کو ختم کرنے والا ہے ، اور گناہوں سے روکنے والا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عبداللہ بن صالح ہے ، جو لیث کا کاتب ہے ، عبدالملک بن شعیب بن لیث کہتے ہیں : یہ ” ثقہ “ اور مامون ہے ، ائمہ کی ایک جماعت نے اس راوی کو ضعیف قرار دیا ہے ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم پر رات کے وقت نوافل ادا کرنا لازم ہے ، کیونکہ یہ تم سے پہلے کے نیک لوگوں کا معمول ہے ، اور اللہ تعالیٰ کی بارگاہ میں تمہارے قربت کے حصول کا باعث ہے ، برائیوں کو ختم کرنے والا ہے ، گناہوں سے روکنے والا ہے ، اور جسم سے بیماری کو دور کرنے والا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالرحمن بن سلیمان بن ابوالجون ہے ، جسے دحیم ، ابن حبان اور ابن عدی نے ” ثقہ “ قرار دیا ہے ، امام ابوداؤد اور ابوحاتم نے اسے ضعیف قرار دیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کو جب کسی شخص کا طور طریقہ پسند آتا تھا ، تو آپ اُسے نماز پڑھنے کا حکم دیتے تھے ۔
یہ روایت امام بزار نے نقل کی ہے ، اس کی سند میں ایک راوی یحیی بن عثمان قرشی بصری ہے ، میں اس سے واقف نہیں ہوں ، اس نے سیدنا انس رضی اللہ عنہ سے روایت نقل کی ہے ، اس روایت کے بقیہ رجال ” صحیح “ کے رجال ہیں ۔ میں یہ کہتا ہوں : ابن حبان نے یحیی بن عثمان قرشی کا ذکر کتاب ” الثقات “ میں کیا ہے ، لیکن انہوں نے اس کا ذکر تیسرے طبقے میں کیا ہے ۔

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں یہ حکم دیا تھا کہ ہم رات کے وقت ( نفل ) نماز ادا کریں ، خواہ وہ تھوڑی ہو یا زیادہ ہو ، اور ہم اس کے آخر میں وتر ادا کریں ۔
یہ روایت امام بزار اور امام طبرانی نے معجم اوسط اور معجم کبیر میں ، امام ابویعلیٰ اور امام بزار نے بھی نقل کی ہے ، ایک روایت میں یہ الفاظ ہیں : ” نبی اکرم صلی اللہ علیہ وسلم ہمیں یہ حکم دیتے تھے کہ ہم روزانہ رات کے وقت فرض نماز کے بعد ( نفل ) نماز ادا کریں “ ۔ ۔ ۔ ۔ ۔ ۔ ۔ ۔ ۔ ۔ اس کے بعد حسب سابق حدیث ہے اور اس کی سند میں ” ضعف“ ہے ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم رات کی ( نفل ) نماز کو ہرگز ترک نہ کرنا ، خواہ وہ اتنی دیر کے لئے ہو ، جتنی دیر میں بکری کا دودھ دوہا جاتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی بقیہ بن ولید ہے ، جس کے بارے میں بہت زیادہ کلام کیا گیا ہے ۔

سیدنا جندب بن سفیان رضی اللہ عنہ بیان کرتے ہیں : نبی اکرم صلی اللہ علیہ وسلم کو رات کے وقت تہجد ادا کرنا پسند تھا ۔
یہ روایت امام طبرانی نے معجم اوسط اور معجم کبیر میں نقل کی ہے ، اس کی سند میں ایک راوی ابوبلال اشعری ہے ، جسے امام دارقطنی رحمہ اللہ نے ضعیف قرار دیا ہے ۔

سیدنا ایاس بن معاویہ مزنی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” رات کے وقت ( نفل ) نماز ادا کرنا ضروری ہے ، خواہ وہ بکری کا دودھ دوہنے کے عرصے جتنی ہو ، اور عشاء کی نماز کے بعد جو بھی ( نفل ) نماز ادا کی جائے گی ، وہ رات کی نماز شمار ہو گی “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن اسحاق ہے ، اور وہ تدلیس کرنے والا ہے ، اس روایت کے بقیہ رجال ” ثقہ “ ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک مرتبہ میں رات کو نوافل ادا کرنے سے متعلق بات چیت کر رہا تھا ، تو کسی نے یہ بتایا : نبی اکرم صلی اللہ علیہ وسلم نے ارشاد فرمایا ہے : ” اس کا ( یعنی رات کا ) نصف حصہ ، یا ایک تہائی حصہ ، یا ایک چوتھائی حصہ ، یا اونٹنی کے دودھ دوہنے کے وقت جتنے وقت ، یا بکری کا دودھ دوہنے کے وقت جتنے وقت ( کے لئے نفل ادا کرنے چاہئیں ) “ ۔
یہ روایت امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے رات کے نفل نماز ادا کرنے کا حکم دیا تھا ، اور اس کی ترغیب دی تھی ، یہاں تک کہ آپ نے یہ ارشاد فرمایا : تم پر رات کی ( نفل ) نماز ادا کرنا لازم ہے ، خواہ وہ ایک ہی رکعت کیوں نہ ہو ، ایک مرتبہ نبی اکرم صلی اللہ علیہ وسلم تشریف لائے ، ایک شخص نماز کھڑی ہو جانے کے بعد نوافل ادا کر رہا تھا ، تو نبی اکرم صلی اللہ علیہ وسلم نے یہ بھی ارشاد فرمایا : کیا تم لوگ باز آنے والے ہو ؟ کیا دو نمازیں ایک ساتھ ادا کی جائیں گی ؟
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی حسین بن عبداللہ ہے ، اور وہ ” ضعیف“ ہے ۔

سیدنا عبیدہ ملیکی رضی اللہ عنہ نے نبی اکرم صلی اللہ علیہ وسلم کا یہ فرمان نقل کیا ہے : ” اے اہل قرآن ! تم قرآن کو تکیہ نہ بناؤ ، رات اور دن کے مختلف اوقات میں اس کی یوں تلاوت کرو ، جو تلاوت کرنے کا حق ہے ، اور اس میں جو کچھ ذکر ہوا ہے ، اس کو یاد کرو ( یا اس سے نصیحت حاصل کرو ) تاکہ تم کامیاب ہو جاؤ اور اس کے ثواب میں جلدی نہ کرنا ، اس کا ثواب ملتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابوبکر بن ابومریم ہے ، اور وہ ” ضعیف “ ہے ۔

سیدنا سہل بن سعد رضی اللہ عنہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کی خدمت میں حاضر ہوئے اور بولے : اے سیدنا محمد ( صلی اللہ علیہ وسلم ) ! جب تک آپ چاہیں زندہ رہیں ، لیکن ( ایک دن ) آپ نے مر جانا ہے ، آپ جو چاہیں عمل کریں اس کی جزا ملے گی ، آپ جس چیز سے چاہیں محبت رکھیں ، لیکن آپ کو اس سے جدا ہونا ہو گا ، اور آپ یہ بات جان لیں ! کہ مؤمن کا شرف رات کے وقت نوافل ادا کرنے میں ہے ، اور اس کی عزت لوگوں سے بے نیازی اختیار کرنے میں ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی زافر بن سلیمان ہے ، جسے امام أحمد یحیی بن معین اور امام ابوداؤد نے ” ثقہ “ قرار دیا ہے ۔ ابن عدی اور ابن حبان نے اس کے بارے میں ایسا کلام کیا ہے ، جو نقصان دہ نہیں ہے ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تم میں سے جو شخص رات کے وقت ( نفل ) نماز ادا کرتا ہے ، اسے بلند آواز میں قرأت کرنی چاہیے ، کیونکہ فرشتے اس کی نماز کی اقتداء میں نماز ادا کرتے ہیں اور اس کی قرأت کو سنتے ہیں ، جنات سے تعلق رکھنے والے مؤمنین ، جو ہوا میں رہتے ہیں ، اور اس کی رہائش گاہ میں اس کے ساتھ پڑوس میں رہتے ہیں ، وہ بھی اس کی اقتداء میں نماز ادا کرتے ہیں اور اس کی تلاوت کو سنتے ہیں اور ایسا شخص بلند آواز میں قرأت کر کے اپنے گھر سے اور اپنے آس پاس کے گھروں سے فاسق جنوں اور سرکش شیاطین کو دور کر دیتا ہے ، وہ گھر جس میں قرآن کی تلاوت کی جاتی ہے ، اس پر نور کا بنا ہوا خیمہ موجود ہوتا ہے ، جس کے ذریعے آسمان والے یوں رہنمائی حاصل کرتے ہیں ، جس طرح سمندر میں اور بے آب و گیاہ جگہ پر چمکدار ستارے کے ذریعے رہنمائی کی جاتی ہے ، جب قرآن کا عالم فوت ہو جاتا ہے ، تو وہ خیمہ اٹھا لیا جاتا ہے ، فرشتے آسمان سے دیکھتے ہیں انہیں وہ نور نظر نہیں آتا پھر فرشتے ایک آسمان سے دوسرے آسمان تک اس شخص ( کی روح ) سے ملاقات کرتے ہیں اور فرشتے دیگر تمام ارواح میں سے اس کی روح پر رحمت نازل کرتے ہیں ، پھر اس کے ساتھ رہنے والے محافظ فرشتے اس کے سامنے آتے ہیں اور پھر فرشتے اس دن تک اس کے لئے دعائے مغفرت کرتے رہتے ہیں ، جب تک اسے دوبارہ زندہ نہیں کیا جائے گا ، جو بھی شخص اللہ تعالیٰ کی کتاب کا علم حاصل کرتا ہے ، پھر رات کی کسی ایک گھڑی میں ( نفل ) نماز ادا کرتا ہے ، تو گزرنے والی رات آگے آنے والی رات کو اُس شخص کے حوالے سے تلقین کرتی ہے کہ اس مخصوص گھڑی میں اس شخص کو بیدار کر دے ، اور وہ رات اس کے لئے ہلکی رہے ۔ جب وہ شخص فوت ہو جاتا ہے ، اور اس کے اہل خانہ اس کی تجہیز و تکفین کی تیاری کر رہے ہوتے ہیں ، تو قرآن ایک خوبصورت شکل و صورت میں آتا ہے ، اس کے سرہانے کھڑا ہو جاتا ہے ، یہاں تکہ اس کے کفن کے اندر آ جاتا ہے ، اس کے سینے پر کفن سے پہلے قرآن ہوتا ہے ، جب اس شخص کو قبر میں رکھا جاتا ہے ، اور اس پر مٹی ڈال دی جاتی ہے ، اور اس کے ساتھی اسے چھوڑ کر چلے جاتے ہیں تو منکر اور نکیر اس کے پاس آتے ہیں وہ اس کی قبر میں اس شخص کو بٹھاتے ہیں ، یہاں تک کہ قرآن آ جاتا ہے ، اور اس شخص اور دونوں کے فرشتوں کے درمیان آ جاتا ہے ، وہ دونوں فرشتے قرآن سے کہتے ہیں : تم ہٹ جاؤ ! تاکہ ہم اس سے سوال کریں ، قرآن کہتا ہے : جی نہیں ! رب کعبہ کی قسم ! یہ میرا ساتھی اور میرا دوست ہے ، میں اسے کسی بھی حالت میں رسوائی کا شکار نہیں کروں گا ، اگر تم دونوں کو کسی چیز کا حکم دیا گیا ہے ، تو تمہیں جو حکم دیا گیا ہے ، تم اس پر عمل کرو مجھے اپنی جگہ پر رہنے دو ، میں اس شخص سے اس وقت تک جدا نہیں ہوں گا جب تک میں اسے جنت میں داخل نہیں کروا دیتا ، پھر قرآن اپنے ساتھی کی طرف دیکھتا ہے ، اور یہ کہتا ہے : میں وہ قرآن ہوں جسے تم بلند آواز میں پڑھا کرتے تھے ، اور پست آواز میں پڑھا کرتے تھے ، اور تم مجھ سے محبت رکھتے تھے ، تو میں تمہارا حبیب ہوں ، جس شخص سے میں محبت رکھتا ہوں ، اللہ تعالی بھی اس سے محبت رکھتا ہے منکر اور نکیر کے سوال کے بعد تم پر کوئی پریشانی اور غم نہیں ہو گا ، منکر اور نکیر اس شخص سے سوال کرنے کے بعد اوپر چلے جاتے ہیں اور پھر ( قبر میں ) وہ شخص اور قرآن باقی رہ جاتے ہیں ، قرآن کہتا ہے : میں تمہارے لئے نرم بچھونا بچھواؤں گا ، اور تمہارے لئے عمدہ لباس فراہم کروں گا ، کیونکہ تم رات کے وقت جاگتے رہتے تھے ، اور دن میں مشقت کا شکار رہتے تھے ، نبی اکرم صلی اللہ علیہ وسلم فرماتے ہیں : پھر قرآن آسمان کی طرف اس سے زیادہ تیزی سے جاتا ہے جتنی دیر میں پلک جھپکتی ہے وہ اللہ تعالیٰ سے مانگتا ہے ، اللہ تعالی یہ چیزیں اسے عطا کرتا ہے ، پھر ایک ہزار ، ہزار ( یعنی دس لاکھ ) فرشتے جن کا تعلق چھٹے آسمان کے مقرب فرشتوں سے ہوتا ہے ، وہ اس کے ساتھ نازل ہوتے ہیں ، قرآن آتا ہے ، اس شخص کو سلام کرتا ہے ، اور دریافت کرتا ہے : کیا تمہیں وحشت محسوس ہوئی ؟ تم سے جدا ہونے کے بعد میں نے صرف اللہ تعالیٰ سے کلام کیا ، یہاں تک کہ اللہ تعالیٰ نے تمہارے لئے بچھونا ، اوڑھنے کی چیز اور کنجی عطا کر دی ، وہ میں تمہارے پاس لے آیا ہوں ، اب تم اُٹھو ! تاکہ فرشتے تمہارا بچھونا بچھا دیں ، نبی اکرم صلی اللہ علیہ وسلم فرماتے ہیں : فرشتے اسے نرمی سے اٹھاتے ہیں پھر اس شخص کی قبر کو چار سو سال کی مسافت جتنا کشادہ کر دیا جاتا ہے ، پھر اس شخص کے لئے بچھونا بچھایا جاتا ہے ، جو سبز ریشم کے استر والا ہوتا ہے ، اور اس کے اندر مشک اذفر بھری ہوئی ہوتی ہے ، اس کے پاؤں کے پاس اور سرہانے کے پاس سبز سندس اور استبرق کے تکیے رکھے جاتے ہیں ، اس کے لئے جنت کے نور سے روشن دو چراغ جلائے جاتے ہیں ، ایک اس کے سرہانے کے پاس ہوتا ہے ، اور ایک پائینتی کی طرف ہوتا ہے ، وہ ( چراغ ) قیامت کے دن تک روشنی کرتے رہیں گے ، پھر فرشتے اس شخص کو دائیں پہلو کے بل لٹا دیتے ہیں ، اس کا رخ قبلہ کی طرف ہوتا ہے ، پھر جنت کی یاسمین لائی جاتی ہے ، فرشتے اس شخص کو چھوڑ کر اوپر چلے جاتے ہیں ، اور وہ شخص اور قرآن باقی رہ جاتے ہیں ، قرآن یاسمین کو لے کر اس شخص کی ناک پر رکھتا ہے ، تو وہ شخص دوبارہ زندہ کیے جانے تک اسے سونگھتا رہے گا ، پھر قرآن اس کے اہل خانہ کی طرف جاتا ہے ، اور روزانہ انہیں خبر دیتا ہے وہ اس شخص کا یوں خیال رکھتا ہے ، جس طرح کوئی شفیق باپ ، اپنی اولاد کی بھلائی کے ہمراہ دیکھ بھال کرتا ہے ، اگر اس شخص کی اولاد میں سے کسی نے قرآن کا علم حاصل کیا ہو ، تو قرآن اس شخص کو اس حوالے سے مبارک باد دیتا ہے ، اور اگر اس کے پسماندگان میں کوئی خرابی آ گئی ہو ، تو قرآن اُن لوگوں کے لئے بہتری اور ٹھیک ہونے کی دعا کرتا ہے “ یا جس طرح بھی انہوں نے ذکر کیا ۔
یہ روایت امام بزار نے نقل کی ہے ، وہ بیان کرتے ہیں : خالد بن معدان نے سیدنا معاذ رضی اللہ عنہ سے سماع نہیں کیا ہے ، اور اس کا مطلب یہ ہے کہ قرآن کا ثواب آتا ہے ، جس طرح نبی اکرم صلی اللہ علیہ وسلم نے ارشاد فرمایا ہے : ” ایک لقمہ قیامت کے دن اُحد پہاڑ کی مانند ہو کر آئے گا “ ۔ اس سے مراد یہ ہے کہ اُس کا ثواب آئے گا ۔
( علامہ ہیثمی فرماتے ہیں : ) میں یہ کہتا ہوں : اس کی سند میں ایسا راوی ہے کہ میں نے کسی کو اس کے حالات بیان کرتے ہوئے نہیں پایا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ ایسے شخص کو رسوائی کا شکار نہیں کرتا ، جو نصف رات کے وقت قیام کی حالت میں سورت البقرۃ اور سورت آل عمران کی تلاوت کرتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی لیث بن ابوسلیم ہے ، اور اس کے بارے میں کلام کیا گیا ہے ، وہ ” ثقہ “ ہے ، اور تدلیس کرنے والا ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جنت میں ایسے بالا خانے ہیں ، جن کا بیرونی حصہ اندر سے اور جن کا اندورنی حصہ باہر سے نظر آتا ہے ، سیدنا ابومالک اشعری رضی اللہ عنہ نے عرض کی : یا رسول اللہ ! وہ کس شخص کے لئے ہوں گے ؟ نبی اکرم صلی اللہ علیہ وسلم نے ارشاد فرمایا : اس شخص کے لئے جو پاکیزہ کلام کرے کھانا کھلائے اور اس وقت کھڑا ہو کر رات بسر کرے ( یعنی نوافل ادا کرے ) جب لوگ سو رہے ہوں “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند حسن ہے ، روایت کے یہ الفاظ ان کے نقل کردہ ہیں امام أحمد کی سند میں یہ الفاظ ہیں : ” سیدنا ابوموسیٰ اشعری رضی اللہ عنہ نے سوال کیا تھا “ ۔

سیدنا ابومالک اشعری رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جنت میں ایسے بالا خانے ہیں ، جن کا اندرونی حصہ باہر سے اور بیرونی حصہ اندر سے نظر آتا ہے ، اللہ تعالیٰ نے یہ ان لوگوں ( یعنی اس شخص ) کے لئے تیار کیے ہیں جو کھانا کھلاتا ہے ، نرم کلام کرتا ہے ، مسلسل روزے رکھتا ہے ، اور رات کے وقت اُس وقت نوافل ادا کرتا ہے ، جب لوگ سو رہے ہوں“ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

ابومعانق اشعری ، نبی اکرم صلی اللہ علیہ وسلم کا یہ فرمان نقل کرتے ہیں : ” جنت میں ایسے بالا خانے ہیں ، جن کا بیرونی حصہ اندر سے ، اور اندرونی حصہ باہر سے نظر آتا ہے ، اللہ تعالیٰ نے یہ اس شخص کے لئے تیار کیے ہیں ، جو کھانا کھلاتا ہے ہمیشہ روزے رکھتا ہے ، اور رات کو اس وقت نماز ادا کرتا ہے ، جب لوگ سو رہے ہوں “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ، البتہ ” ابومعانق “ کو صحابی ہونے کا شرف حاصل نہیں ہے ۔ ابن حبان نے اس کا تذکرہ ” ثقہ “ تابعین میں کیا ہے ، امام دارقطنی رحمہ اللہ سے ان کے بارے میں دریافت کیا گیا : تو انہوں نے فرمایا : یہ مجہول ہے ، اور کوئی چیز نہیں ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص کھانے پینے کے حوالے سے ہلکا ہو کر نماز ادا کرتے ہوئے رات گزارتا ہے ، صبح ہونے تک حورعین اس کے اردگرد چکر لگاتی رہتی ہیں “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی اصرم بن حوشب ہے ، اور وہ متروک ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین لوگ ایسے ہیں ، جن سے اللہ تعالیٰ محبت رکھتا ہے ، انہیں دیکھ کے مسکرا دیتا ہے ، اور انہیں دیکھ کے خوش ہوتا ہے ، وہ شخص جو اللہ تعالیٰ کی خاطر اپنی ذات کے ساتھ جنگ میں حصہ لیتا ہے ، یا شہید ہو جاتا ہے ، یا پھر اللہ تعالیٰ اُس کی مدد کرتا ہے ، اور اس کی کفایت کر دیتا ہے ، تو اللہ تعالیٰ یہ فرماتا ہے : میرے اس بندے کا جائزہ لو ! اس نے میری خاطر کیسے اپنی ذات کے حوالے سے صبر سے کام لیا ہے ، اور وہ شخص جس کی خوبصورت بیوی ہو اور نرم اور عمدہ بچھونا ہو اور وہ رات کے وقت کھڑا ہو کر ( نوافل ادا کرے ) تو اللہ فرماتا ہے : اس نے اپنی خواہش کو ترک دیا ہے ، اور میرا ذکر کر رہا ہے ، اگر یہ چاہتا تو یہ سو جاتا اور وہ شخص جو سفر کر رہا ہو ، اس کے ساتھی اور بھی سوار ہوں ، وہ لوگ سو جائیں ، اور وہ شخص سحری کے وقت تنگی یا آسانی ہر حالت میں نوافل ادا کرتا رہے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ ” مرفوع “ حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) ” تین لوگ ایسے ہیں ، جن سے اللہ تعالیٰ محبت رکھتا ہے ، ایک وہ شخص جو رات کے وقت کھڑا ہو کر اللہ تعالیٰ کی کتاب کی تلاوت کرتا ہے ایک وہ شخص جو یوں صدقہ کرتا ہے کہ اسے بائیں ہاتھ سے بھی پوشیدہ رکھتا ہے ، اور ایک وہ شخص جو کسی مہم میں ہو ، اس کے ساتھی پسپا ہو جائیں ، اور وہ دشمن کے سامنے چلا جائے “ ۔
( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا صرف وہ حصہ نقل کیا ہے ، جو جنگی مہم کے بارے میں ہے ۔
یہ روایت امام طبرانی نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہمارا پروردگار ، دو ایسے افراد پر خوش ہوتا ہے ، ایک وہ شخص جو اپنے بستر ، لحاف ، اپنے اہل خانہ اور اپنی محبوب چیز کو چھوڑ کر نماز کی طرف جاتا ہے ، ہمارا پروردگار فرماتا ہے : اے میرے فرشتو ! تم میرے بندے کا جائزہ لو ، جس نے اپنا بستر اپنا لحاف اپنی محبوب چیز اور اپنے اہل خانہ کو چھوڑا ، اور نماز کی طرف آ گیا ، اُس چیز کی طرف رغبت رکھتے ہوئے ، جو میرے پاس موجود ہے ، اور اس چیز سے ڈرتے ہوئے ، جو میرے پاس ہے ۔ ۔ ۔ ۔ ۔ ۔ ۔ ۔ ۔ ۔ “ اس کے بعد راوی نے حسب سابق حدیث ذکر کی ہے ، جس میں صدقہ کرنے کا ذکر اختصار کے ساتھ ہے ۔
یہ روایت امام أحمد نے اور امام ابویعلیٰ نے امام طبرانی نے معجم کبیر میں نقل کی ہے ، اور اس کی سند حسن ہے ۔

ان صحابی کے حوالے سے ، امام طبرانی نے معجم کبیر میں اس کی مانند ” موقوف “ روایت کے طور پر
یہ روایت نقل کی ہے ، تاہم اس میں یہ الفاظ ہیں : ” اور وہ شخص جو رات کو کھڑا ہوتا ہے ، اس کے بارے میں کوئی نہیں جانتا ہے ، وہ اچھی طرح وضو کرتا ہے ، سیدنا محمد صلی اللہ علیہ وسلم پر درود بھیجتا ہے ، اور اللہ تعالیٰ کی حمد بیان کرتا ہے ، اور قرآءت کرنی شروع کر دیتا ہے ، تو اللہ تعالی اس شخص پر خوش ہوتا ہے ، اور فرماتا ہے : میرے اس بندے کی طرف دیکھو ! اسے میرے علاوہ اور کوئی نہیں دیکھ رہا ہے “ ۔
اس روایت کی سند میں ایک راوی ابوعبیدہ ہے ، اور اس نے اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” خبردار ! اللہ تعالیٰ دو آدمیوں کو دیکھ کر خوش ہوتا ہے ، ایک وہ شخص جو ٹھنڈی رات میں اپنے بستر ، لحاف ، چادر کو چھوڑ کر اٹھتا ہے ، وضو کرتا ہے ، اور پھر نماز کی طرف جاتا ہے ، اللہ تعالیٰ اپنے فرشتوں سے فرماتا ہے : میرے اس بندے کو ایسا کرنے پر کس بات نے مجبور کیا ؟ وہ عرض کرتے ہیں : اے ہمارے پروردگار ! اس چیز کی امید نے جو تیرے پاس ہے ، اور اس چیز کے ڈر ، نے ، جو تیرے پاس ہے ، تو پروردگار فرماتا ہے : اس نے جو امید رکھی ہے ، وہ میں اسے عطا کرتا ہوں ، اور جس چیز سے وہ ڈرتا ہے ، اُس کے حوالے سے میں اسے امان دیتا ہوں “ ۔
یہ روایت امام طبرانی نے معجم کبیر میں نقل کی ہے ، اس کی سند حسن ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ تین آدمیوں پر خوش ہوتا ہے ، ایک وہ شخص جو نصف رات کے وقت اُٹھ کر اچھی طرح وضو کر کے نماز ادا کرتا ہے ، اور ایک وہ شخص جو سجدے کی حالت میں سو جاتا ہے ، راوی کہتے ہیں : میرا خیال ہے : روایت میں یہ الفاظ ہیں : ایک وہ شخص جو کسی جنگی مہم میں ہو اور وہ مہم پسپا ہو جائے اور وہ شخص گھوڑے پر سوار ہو ( اور دشمن کی طرف چلا جائے ) حالانکہ اگر وہ بھی جانا چاہتا تو وہ بھی ( فرار ہو کر ) جا سکتا تھا “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام بن ماجہ نے اس سیاق کے بغیر نقل کی ہے ۔
یہ روایت امام بزار نے نقل کی ہے ، اس کی سند میں ایک راوی محمد بن ابولیلی ہے ، اور اس کے حافظے کی خرابی کی وجہ سے اس کے بارے میں بہت کلام کیا گیا ہے ، اس کے جھوٹا ہونے کی وجہ سے کلام نہیں کیا گیا ( یعنی وہ جھوٹا نہیں ہے ) ۔