مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم وتر میں ، پہلی رکعت میں سورت الاعلی کی ، دوسری رکعت میں سورت الکافرون اور تیسری رکعت میں سورت اخلاص کی تلاوت کیا کرتے تھے ۔
یہ روایت امام ابویعلیٰ اور امام بزار اور امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عبدالملک بن ولید بن معدان ہے ، جسے یحییٰ بن معین نے ” ثقہ “ قرار دیا ہے ، امام بخاری رحمہ اللہ اور ایک جماعت نے اسے ضعیف قرار دیا ہے ۔

سیدنا نعمان بن بشیر رضی اللہ عنہ بیان کرتے ہیں : میں نے عرض کی : یا رسول اللہ ! آپ وتر میں کیا تلاوت کرتے ہیں ؟ نبی اکرم صلی اللہ علیہ وسلم نے ارشاد فرمایا : سورت الاعلیٰ ، سورت الکافرون ، اور سورت الاخلاص ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی سری بن اسماعیل ہے ، اور وہ انتہائی ” ضعیف “ ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ وتر کی پہلی رکعت میں سورت الاعلی ، دوسری رکعت میں سورت الکافرون ، اور تیسری رکعت میں سورت اخلاص اور معوذتین کی تلاوت کرتے تھے ۔
یہ روایت امام طبرانی نے معجم اوسط میں مقدام بن داؤد کے حوالے سے نقل کی ہے ، اور وہ ” ضعیف “ ہے ۔

سیدنا عبداللہ بن عمر رضی اللہ عنہما نے نبی اکرم صلی اللہ علیہ وسلم کے بارے میں یہ بات نقل کی ہے : آپ وتر میں سورت الاعلی ، سورت الکافرون اور سورت اخلاص کی تلاوت کرتے تھے ۔
یہ روایت امام بزار نے ، اور امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی سعید بن سنان ہے ، اور وہ ” ضعیف “ ہے ۔

سیدنا عمران بن حصین رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : آپ وتر میں سورت الاعلی ، سورت الکافرون اور سورت اخلاص کی تلاوت کرتے تھے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام نسائی رحمہ اللہ نے بھی نقل کی ہے ، تاہم انہوں نے سورت الکافرون اور سورت اخلاص کا ذکر نہیں کیا ہے
یہ روایت امام طبرانی نے معجم کبیر میں نقل کی ہے ، اس کی سند میں ایک راوی حجاج بن ارطاۃ ہے ، جس کے بارے میں کلام کیا گیا ہے ۔

عبدالرحمن بن سبرہ ، یعنی ابوخیثمہ بیان کرتے ہیں : اُن کے والد نے نبی اکرم صلی اللہ علیہ وسلم سے دریافت کیا : وتر میں کیا پڑھا جائے ؟ نبی اکرم صلی اللہ علیہ وسلم نے ارشاد فرمایا : پہلی رکعت میں سورت الاعلیٰ ، دوسری رکعت میں سورت الکافرون ، اور تیسری رکعت میں سورت اخلاص ( تلاوت کی جائے ) ۔ ایک روایت میں یہ الفاظ ہیں : وہ بیان کرتے ہیں : میں اور میرے والد ، نبی اکرم صلی اللہ علیہ وسلم کی خدمت میں حاضر ہوئے ۔ ۔ ۔ ۔ ۔ ۔ ۔ ۔ ۔ ۔ اس کے بعد حسب سابق حدیث ہے ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی اسماعیل بن رزین ہے ۔ ابن حبان نے اس کا تذکرہ کتاب ” الثقات “ میں کیا ہے ، ازدی بیان کرتے ہیں : محدثین نے اس کے بارے میں کلام کیا ہے ۔