مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جمعہ کے دن کلام کرے اور امام اس وقت خطبہ دے رہا ہو تو وہ اس گدھے کی مانند ہے ، جس نے بوجھ اٹھایا ہوا ہو اور جو شخص اس سے یہ کہے کہ تم خاموش رہو اس کا جمعہ نہیں ہو گا“ ۔
یہ روایت امام أحمد اور امام بزار نے اور امام طبرانی نے معجم کبیر میں نقل کی ہے ، اس کی سند میں ایک راوی مجالد بن سعید ہے ، جسے لوگوں نے ضعیف قرار دیا ہے ایک روایت کے مطابق امام نسائی رحمہ اللہ نے اسے ” ثقہ “ قرار دیا ہے ۔

سیدنا ابودرداء رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم منبر پر تشریف فرما ہو کر لوگوں کو خطبہ دے رہے تھے آپ نے ایک آیت تلاوت کی میرے پہلو میں سیدنا ابی بن کعب موجود تھے میں نے ان سے کہا: اے سیدنا ابی یہ آیت کب نازل ہوئی ہے ، تو انہوں نے میرے ساتھ کوئی بات نہیں کی پھر میں نے ان سے سوال کیا تو پھر انہوں نے میرے ساتھ کوئی بات نہیں کی یہاں تک کہ جب نبی اکرم صلی اللہ علیہ وسلم منبر سے نیچے تشریف لے آئے تو سیدنا ابی نے فرمایا : تمہارے اس جمعہ میں سے تمہارے حصے میں صرف لغو حرکت آئی ہے ، جب نبی اکرم صلی اللہ علیہ وسلم نے نماز مکمل کر لی تو میں آپ کی خدمت میں حاضر ہوا اور میں نے آپ کو بتایا میں نے عرض کی : یا رسول اللہ ! آپ نے ایک آیت تلاوت کی تھی میرے پہلو میں سیدنا ابی بن کعب موجود تھے میں نے ان سے دریافت کیا : یہ آیت کب نازل ہوئی ، تو انہوں نے میرے ساتھ کوئی بات چیت نہیں کی یہاں تک کہ جب آپ منبر سے نیچے تشریف لے آئے تو سیدنا ابی کا یہ کہنا تھا : اس جمعے میں سے میرا حصہ صرف وہ حرکت ہے ، جو میں نے لغو حرکت کی ہے ، تو نبی اکرم صلی اللہ علیہ وسلم نے ارشاد فرمایا : ابی نے ٹھیک کہا: ہے ، جب تم اپنے امام کو کلام کرتے ہوئے سنو تو تم اس کے فارغ ہونے تک خاموش رہو ۔
یہ روایت امام أحمد نے اور امام طبرانی نے معجم کبیر میں نقل کی ہے امام أحمد کے رجال کی توثیق کی گئی ہے ۔

سیدنا جابر بیان کرتے ہیں : سیدنا سعد بن ابی وقاص نے ایک شخص سے کہا: تمہارا جمعہ نہیں ہوا ۔ نبی اکرم صلی اللہ علیہ وسلم نے دریافت کیا : اے سعد وہ کیوں انہوں نے عرض کی : اس کی وجہ یہ ہے کہ اس نے آپ کے خطبے کے دوران کلام کر لیا تھا تو نبی اکرم صلی اللہ علیہ وسلم نے ارشاد فرمایا : سعد نے ٹھیک کہا: ہے
یہ روایت امام ابویعلیٰ اور امام بزار نے نقل کی ہے ، اس کی سند میں ایک راوی مجالد بن سعید ہے ، جسے لوگوں نے ضعیف قرار دیا ہے ایک روایت کے مطابق امام نسائی رحمہ اللہ نے اسے ” ثقہ “ قرار دیا ہے ۔

سیدنا جابر بیان کرتے ہیں : سیدنا عبداللہ بن مسعود رضی اللہ عنہ مسجد میں داخل ہوئے نبی اکرم صلی اللہ علیہ وسلم اس وقت خطبہ دے رہے تھے وہ سیدنا ابی بن کعب کے پہلو میں بیٹھ گئے اور ان سے کسی چیز کے بارے میں دریافت کیا ، یا ان سے کسی چیز کے بارے میں کلام کیا تو سیدنا ابی نے انہیں جواب نہیں دیا تو سیدنا عبداللہ بن مسعود رضی اللہ عنہ نے یہ گمان کیا کہ شاید وہ ناراض ہیں جب نبی اکرم صلی اللہ علیہ وسلم نے نماز مکمل کر لی تو سیدنا عبداللہ بن مسعود رضی اللہ عنہ نے فرمایا : اے سیدنا ابی آپ نے مجھے جواب کیوں نہیں دیا تو انہوں نے فرمایا : اس کی وجہ یہ ہے تم ہمارے ساتھ جمعہ میں شریک نہیں ہوئے سیدنا عبداللہ رضی اللہ عنہ نے دریافت کیا : وہ کیوں ؟ سیدنا ابی نے فرمایا : کیونکہ تم نے اس وقت کلام کیا تھا جب نبی اکرم صلی اللہ علیہ وسلم خطبہ دے رہے تھے ۔ سیدنا عبداللہ بن مسعود رضی اللہ عنہ اٹھے اور نبی اکرم صلی اللہ علیہ وسلم کی خدمت میں حاضر ہوئے اور آپ کے سامنے یہ بات ذکر کی تو نبی اکرم صلی اللہ علیہ وسلم نے ارشاد فرمایا : ابی نے ٹھیک کہا: ہے تم ابی کی اطاعت کرو ۔
یہ روایت امام ابویعلیٰ نے اور امام طبرانی نے معجم اوسط میں اس کی مانند نقل کی ہے معجم کبیر میں اسے اختصار کے ساتھ نقل کیا ہے امام ابویعلیٰ کے رجال ” ثقہ “ ہیں ۔

سیدنا ابوہریرہ رضی اللہ عنہ بیان کرتے ہیں : جمعہ کے دن نبی اکرم صلی اللہ علیہ وسلم نے ہمیں خطبہ دیتے ہوئے ایک سورت کا ذکر کیا ، تو سیدنا ابوذر غفاری نے سیدنا ابی سے کہا: یہ سورت کب نازل ہوئی ہے ، تو سیدنا ابی نے ان سے منہ پھیر لیا جب نماز ختم ہوئی ، تو سیدنا ابی نے کہا: تمہاری اس نماز میں سے تمہارا حصہ صرف تمہاری لغو حرکت ہے سیدنا ابوذر غفاری نے نبی اکرم صلی اللہ علیہ وسلم سے اس بارے میں دریافت کیا : تو آپ نے ارشاد فرمایا : اس نے ٹھیک کہا: ہے
یہ روایت امام بزار نے نقل کی ہے ، اس کی سند میں ایک راوی محمد بن عمرو ہے امام ترمذی نے اس کی نقل کردہ حدیث کو حسن قرار دیا ہے ، اس راوی کے بارے میں اختلاف پایا جاتا ہے ۔

سیدنا سمرہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم جمعہ کے لئے آؤ تو امام کے قریب رہو اور غور سے خطبہ سنو اور لغو حرکت نہ کرو “ ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا ایک حصہ روایت کیا ہے
یہ روایت امام بزار نے نقل کیا ہے ، اس کی سند میں ایک راوی حکم بن عبدالملک ہے ، اور وہ ” ضعیف“ ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم جمعہ کے دن خطبہ دیتے ہوئے ہمیں وعظ و نصیحت کر رہے تھے پھر آپ نے ایک سورت تلاوت کی سیدنا ابودرداء نے سیدنا ابی بن کعب رضی اللہ عنہ کو ٹہوکا دیا اور دریافت کیا : یہ سورت کب نازل ہوئی ہے یہ تو میں نے صرف اب سنی ہے ، تو سیدنا ابی نے انہیں اشارہ کیا کہ تم خاموش رہو جب لوگوں نے نماز ختم کر لی تو سیدنا ابی نے کہا: تمہاری اس نماز میں سے تمہارا حصہ صرف تمہاری لغو حرکت ہے سیدنا ابودرداء نے نبی اکرم صلی اللہ علیہ وسلم کو سیدنا ابی کی بات کے بارے میں بتایا تو نبی اکرم صلی اللہ علیہ وسلم نے فرمایا : ابی نے ٹھیک کہا: ہے ۔

سیدنا ابودرداء رضی اللہ عنہ اور سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے منبر پر جمعہ کے دن تلاوت کی راوی بیان کرتے ہیں : اس کے بعد انہوں نے حسب سابق حدیث ذکر کی ہے ( علامہ ہیثمی فرماتے ہیں : ) میں یہ کہتا ہوں : سیدنا ابوہریرہ رضی اللہ عنہ کے حوالے سے منقول وہ حدیث جو اس سے پہلے گزر چکی ہے ، جسے امام أحمد نے روایت کیا ہے ، اور امام طبرانی نے روایت کیا ہے ، لیکن امام طبرانی نے اسے سیدنا ابودرداء کے حوالے سے نقل کیا ہے ، اور اس کے بعد سیدنا ابودرداء اور سیدنا ابوذر غفاری تک سند ذکر کی ہے ، اس کے بعد انہوں نے پوری حدیث ذکر کی ہے ، اور ان دونوں روایات کی اسناد کے رجال ” صحیح“ کے رجال ہیں اس سے پہلے جمعہ کے حقوق سے متعلق باب میں ایسی احادیث گزر چکی ہیں جو جمعہ کے لئے جلدی جانے اور خاموش رہنے کے بارے میں ہیں ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو بھی شخص جمعہ میں شریک ہو اور اس میں کوئی لغو حرکت نہ کرے جہالت کا اظہار نہ کرے اچھی طرح وضو کرے امام کے ساتھ اس میں شریک ہو ، تو یہ چیز اس کے لئے اس جمعہ اور اس کے بعد والے جمعہ تک کے درمیان کے گناہوں کا کفارہ بن جائے گی ، اور جو شخص فرض نماز ادا کرتا ہے ، تو وہ اس نماز اور اس کے بعد والی نماز کے درمیان کے گناہوں کا کفارہ بن جاتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی داؤد بن عبدالحمید ہے ، اور وہ ” ضعیف“ ہے ۔

سیدنا عبداللہ بن عباس رضی اللہ عنہما بیان کرتے ہیں چار مواقع پر کلام کو مکروہ قرار دیا گیا ہے جمعہ کے دن عیدالفطر کے دن عیدالاضحی کے دن اور نماز استسقاء میں جب امام منبر پر بیٹھ چکا ہو اور کلام شروع کر چکا ہو جب تک وہ منبر سے نیچے نہیں آتا
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحیی بن سلمہ بن کہیل ہے ، اسے امام بخاری رحمہ اللہ امام نسائی رحمہ اللہ امام ترمذی اور یحیی بن معین نے ضعیف قرار دیا ہے ۔ ابن حبان نے اسے ” ثقہ “ قرار دیا ہے ۔

ابوقیس بیان کرتے ہیں : سیدنا عبداللہ بن مسعود رضی اللہ عنہ جمعہ کے دن مسجد میں داخل ہوئے انہوں نے سفید صاف ستھرے کپڑے پہنے ہوئے تھے انہوں نے ایک جگہ کی طرف دیکھا جہاں گنجائش تھی تو وہاں بیٹھ گئے انہوں نے کسی کی گردن کو نہیں پھلانگا پھر امام آیا تو اس دوران دو آدمی بات چیت کر رہے تھے انہوں نے کنکریاں پکڑیں اور ان دونوں کو ماریں ان دونوں نے سیدنا عبداللہ تعالیٰ کی طرف دیکھا اور پھر وہ دونوں خاموش ہو گئے جب امام منبر سے نیچے آیا تو سیدنا عبداللہ رضی اللہ عنہ نے فرمایا : کیا تم دونوں یہ بات نہیں جانتے ہو کہ تم دونوں نماز کی حالت میں تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایسا راوی ہے ، جس کے حالات میں نے نہیں پائے ہیں ۔

ابراہیم نخعی بیان کرتے ہیں : ایک شخص نے سیدنا عبداللہ بن مسعود رضی اللہ عنہ سے قرآن کی کسی آیت کے بارے میں دریافت کیا : اس وقت امام جمعہ کے دن خطبہ دے رہا تھا سیدنا عبداللہ رضی اللہ عنہ نے اس کے ساتھ کوئی بات چیت نہیں کی جب نماز مکمل ہو گئی ، تو سیدنا عبداللہ رضی اللہ عنہ نے اس سے فرمایا تم نے جس چیز کے بارے میں دریافت کیا تھا جمعہ میں سے تمہارا حصہ وہی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ فرماتے ہیں : لغو حرکت ہونے کے لئے اتنا ہی کافی ہے کہ جمعہ کے دن جب امام آ چکا ہو تو تم اپنے ساتھی سے یہ کہو : کہ تم خاموش ہو جاؤ !
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔