مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : مسجد میں کھجور کا ایک تنا موجود تھا جس کے ساتھ نبی اکرم صلی اللہ علیہ وسلم جمعہ کے دن کلام کرنے کے دوران ٹیک لگا لیا کرتے تھے یا جب بھی کوئی معاملہ پیش آتا تھا جب بھی آپ نے لوگوں کے ساتھ کوئی بات چیت کرنی ہوتی تھی اس وقت ایسا کر لیتے تھے لوگوں نے عرض کی : یا رسول اللہ ! کیا ہم آپ کے لئے ایسی چیز نہ بنا دیں کہ جو آپ کے قیام کی جگہ کفایت کر جائے آپ نے ارشاد فرمایا : اگر تم ایسا کر لو تو تم پر کوئی حرج نہیں ہو گا ، تو لوگوں نے تین سیڑھیوں کا منبر نبی اکرم صلی اللہ علیہ وسلم کے لئے تیار کروایا نبی اکرم صلی اللہ علیہ وسلم اس پر تشریف فرما ہوئے تو کھجور کا وہ تنا یوں رونے لگا جس طرح کوئی گائے ڈکراتی ہے وہ نبی اکرم صلی اللہ علیہ وسلم سے جدائی کی وجہ سے ایسا کر رہا تھا نبی اکرم صلی اللہ علیہ وسلم نے اسے لپٹا لیا اور اس پر ہاتھ پھیرا یہاں تک کہ وہ پرسکون ہو گیا ( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا کچھ حصہ نقل کیا ہے
یہ روایت امام أحمد نے ابوحباب کلبی کے حوالے سے نقل کی ہے ۔ وہ ” ثقہ “ ہے لیکن تدلیس کرنے والا ہے ، اور اس نے یہ روایت معنعن کے طور پر نقل کی ہے ۔

سیدنا أبي بن كعب رضی اللہ عنہ بیان کرتے ہیں : نبی اکرم صلی اللہ علیہ وسلم کھجور کے ایک تنے کی طرف رُخ کر کے نماز ادا کیا کرتے تھے مسجد پر چھت ڈالی گئی تھی نبی اکرم صلی اللہ علیہ وسلم کھجور کے اس تنے کے ساتھ ٹیک لگا کر خطبہ دیا کرتے تھے آپ کے اصحاب میں سے ایک صاحب نے عرض کی : یا رسول اللہ ! ہم آپ کے لئے کوئی چیز تیار کرتے ہیں جس پر آپ جمعہ کے دن کھڑے ہو جایا کریں تاکہ آپ لوگوں کو ملاحظہ فرما سکیں ( راوی کو شک ہے شاید یہ الفاظ ہیں : ) تاکہ لوگ آپ کو دیکھ سکیں اور لوگ آپ کے خطبے کو سن سکیں نبی اکرم صلی اللہ علیہ وسلم نے فرمایا : ٹھیک ہے لوگوں نے آپ کے لئے تین سیڑھیوں کا منبر بنا دیا نبی اکرم صلی اللہ علیہ وسلم اس پر کھڑے ہوئے جس طرح آپ پہلے کھڑے ہوا کرتے تھے تو کھجور کا وہ تنا آپ کے لئے رونے لگا نبی اکرم صلی اللہ علیہ وسلم نے اس سے فرمایا تم پرسکون ہو جاؤ پھر آپ نے اپنے اصحاب سے فرمایا یہ تنا میری خاطر رو رہا ہے ۔ نبی اکرم صلی اللہ علیہ وسلم نے اس سے فرمایا تم پرسکون ہو جاؤ اگر تم چاہو تو میں تمہیں جنت میں لگوا دوں گا ، اور نیک لوگ تم میں سے کھائیں گے اور اگر تم چاہو تو میں تمہیں پہلے کی طرح لکڑی بنا دیتا ہوں تو اس نے دنیا کے مقابلے میں آخرت کو اختیار کیا جب نبی اکرم صلی اللہ علیہ وسلم کا وصال ہوا تو وہ تنا سیدنا ابی کو دے دیا گیا اور وہ مسلسل ان کے پاس رہا یہاں تک کہ زمین نے اسے کھا لیا ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے اختصار کے ساتھ نقل کی ہے ، اسے عبداللہ نے مسند أحمد کی زیادات میں روایت کیا ہے ، اس کی سند میں ایک راوی ایسا ہے ، جس کا نام بیان نہیں کیا گیا اور ایک راوی عبداللہ بن محمد بن عقیل ہے ، جس کے بارے میں کلام کیا گیا ہے ، اس کی توثیق بھی کی گئی ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم ایک لکڑی کے پاس کھڑے ہو کر اس کے ساتھ ٹیک لگا کر ہر جمعہ کے دن خطبہ ارشاد فرمایا کرتے تھے یہاں تک کہ ایک صاحب آپ کی خدمت میں حاضر ہوئے انہوں نے عرض کی : اگر آپ چاہیں تو میں آپ کے لئے ایک ایسی چیز بنا دیتا ہوں جس پر آپ تشریف فرما ہوں گے ، تو یوں ہو گا جیسے آپ کھڑے ہوئے ہیں نبی اکرم صلی اللہ علیہ وسلم نے ارشاد فرمایا : ٹھیک ہے ، تو آپ کے لئے منبر بنایا گیا جب نبی اکرم صلی اللہ علیہ وسلم اس پر تشریف فرما ہوئے تو لکڑی کا وہ ٹکڑا یوں رونے لگا جیسے اونٹنی اپنے بچے کی خاطر روتی ہے یہاں تک کہ نبی اکرم صلی اللہ علیہ وسلم منبر سے نیچے اترے آپ نے اپنا دست مبارک اس پر رکھا جب اگلا دن آیا تو میں نے اس ٹکڑے کو دیکھا کہ اسے وہاں سے منتقل کر دیا گیا تھا ہم نے دریافت کیا : اس کا کیا معاملہ ہے ، تو لوگوں نے بتایا آج صبح نبی اکرم صلی اللہ علیہ وسلم سیدنا ابوبکر رضی اللہ عنہ اور سیدنا عمر رضی اللہ عنہ تشریف لائے تھے ، اور انہوں نے اسے منتقل کر دیا ہے
یہ روایت امام ابویعلیٰ نے نقل کی ہے ، اس کی سند میں ایک راوی مجالد بن سعید ہے ، جسے ایک جماعت نے ” ثقہ “ قرار دیا ہے ، اور دوسرے لوگوں نے اسے ضعیف قرار دیا ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم کی ایک لکڑی تھی جس کے ساتھ ٹیک لگا کر آپ کھڑے ہوتے تھے ایک شخص آیا آپ نے اسے حکم دیا کہ وہ آپ کے لئے کرسی بنا دے نبی اکرم صلی اللہ علیہ وسلم منبر پر خطبہ دینے کے لئے کھڑے ہوئے تو لکڑی کا وہ ٹکڑا رونے لگا جس کے پاس آپ پہلے کھڑے ہوا کرتے تھے یہاں تک کہ اہل مسجد نے اس کے رونے کی آواز سنی ۔ راوی بیان کرتے ہیں : میں نے عوفی سے دریافت کیا : کیا تم نے خود یہ روایت ان کی زبانی سنی ہے ؟ انہوں نے جواب دیا : مجھے اپنی زندگی کی قسم ہے میں نے ان کی زبانی یہ روایت سنی ہے : پھر نبی اکرم صلی اللہ علیہ وسلم تشریف لائے یہاں تک کہ آپ نے اسے اپنے ساتھ لپٹا لیا یہاں تک کہ وہ پرسکون ہو گیا ۔
یہ روایت امام بزار نے محمد بن ابولیلی کے حوالے سے عطیہ سے نقل کی ہے ، اور ان دونوں سے استدلال کرنے کے بارے میں اختلاف پایا جاتا ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم لکڑی کے پاس کھڑے ہو کر اس پر ٹیک لگا کر ہر جمعہ کے دن خطبہ ارشاد فرمایا کرتے تھے روم سے تعلق رکھنے والا ایک شخص آپ کی خدمت میں حاضر ہوا ، اس نے عرض کی : اگر آپ چاہیں تو میں آپ کے لئے ایک ایسی چیز تیار کر دیتا ہوں کہ آپ اس پر بیٹھ جایا کریں گے اور یوں ہو گا کہ جیسے آپ کھڑے ہوئے ہیں ۔ نبی اکرم صلی اللہ علیہ وسلم نے فرمایا : ٹھیک ہے ، تو نبی اکرم صلی اللہ علیہ وسلم کے لئے منبر بنایا گیا جب آپ اس پر تشریف فرما ہوئے تو لکڑی کا وہ ٹکڑا یوں رونے لگا جس طرح کوئی اونٹنی اپنے بچے کی خاطر روتی ہے یہاں تک کہ نبی اکرم صلی اللہ علیہ وسلم منبر سے نیچے اترے آپ نے اپنا دست مبارک اس پر رکھا راوی کہتے ہیں : جب اگلا دن آیا تو میں نے یہ دیکھا کہ اسے وہاں سے منتقل کر دیا گیا ہے ہم نے دریافت کیا : وہ کہاں گیا ؟ تو لوگوں نے بتایا نبی اکرم صلی اللہ علیہ وسلم سیدنا ابوبکر رضی اللہ عنہ اور سیدنا عمر رضی اللہ عنہ آئے تھے ، اور انہوں نے اسے منتقل کر دیا ۔ ( علامہ ہیثمی فرماتے ہیں : ) میں یہ کہتا ہوں : سیدنا جابر کے حوالے سے منقول حدیث ” صحیح “ میں بھی مذکور ہے ، لیکن اس سیاق کے بغیر ہے ۔
یہ روایت امام ابویعلیٰ نے نقل کی ہے ، اور اس کے رجال کی توثیق کی گئی ہے سیدنا جابر کے حوالے سے منقول کچھ اور احادیث جو منبر کے بارے میں ہیں ، وہ آگے آئیں گی ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اگر میں منبر استعمال کرتا ہوں تو میرے جد امجد سیدنا ابراہیم علیہ السلام نے بھی اسے استعمال کیا تھا اور اگر میں عصا استعمال کرتا ہوں تو میرے جد امجد سیدنا ابراہیم علیہ السلام نے بھی اسے استعمال کیا تھا “ ۔
یہ روایت امام بزار نے اور امام طبرانی نے معجم کبیر میں نقل کی ہے ، اس کی سند میں ایک راوی موسیٰ بن محمد بن ابراہیم بن حارث تیمی ہے ، اور وہ انتہائی ” ضعیف“ ہے ۔

سعد بن ابراہیم اپنے والد کا یہ بیان نقل کرتے ہیں : سب سے پہلے منبر پر خطبہ سیدنا ابراہیم علیہ السلام نے دیا تھا ۔
یہ روایت امام بزار نے نقل کی ہے ، اور اس کی سند منقطع ہے ۔

سیدنا جابر بن عبدالله رضی اللہ عنہما بیان کرتے ہیں : نبی اکرم صلی اللہ علیہ وسلم کھجور کے تنے کے ساتھ ٹیک لگا کر خطبہ ارشاد فرمایا کرتے تھے : آپ کی خدمت میں عرض کی گئی : یا رسول اللہ ! اسلام دور دراز تک پہنچ چکا ہے لوگوں کی تعداد زیادہ ہو گئی ہے دور دراز سے وفود آپ کی خدمت میں حاضر ہوتے ہیں اگر آپ کوئی ایسی چیز تیار کرنے کا حکم دیں جس پر آپ تشریف فرما ہوا کریں ( تو یہ مناسب ہو گا ) نبی اکرم صلی اللہ علیہ وسلم نے ایک شخص سے دریافت کیا : کیا تم منبر بنا لو گے اس نے عرض کی : جی ہاں ! نبی اکرم صلی اللہ علیہ وسلم نے دریافت کیا : تمہارا نام کیا ہے ، اس نے جواب دیا : فلاں نبی اکرم صلی اللہ علیہ وسلم نے فرمایا : تم اسے نہیں بناؤ گے پھر آپ نے ایک اور شخص کو بلایا اور دریافت کیا : کیا تم منبر بنا لو گے ؟ اس نے عرض کی : جی ہاں ! اس کے ساتھ بھی پہلے والے شخص کی مانند مکالمہ ہوا تو اس نے کہا: جی ہاں ! ان شاءاللہ ۔ نبی اکرم صلی اللہ علیہ وسلم نے دریافت کیا : تمہارا نام کیا ہے ، اس نے جواب دیا : نبی اکرم صلی اللہ علیہ وسلم نے فرمایا : تم یہ بناؤ جب اس نے اس کو بنایا تو نبی اکرم صلی اللہ علیہ وسلم اس پر تشریف فرما ہوئے تو لکڑی کا دو تنا یوں رونے لگا جس طرح اونٹنی روتی ہے یہاں تک کہ مسجد والوں نے اس کی آواز سنی ( راوی کو شک ہے شاید یہ الفاظ ہیں : ) اہل مدینہ نے اس کی آواز سنی نبی اکرم صلی اللہ علیہ وسلم منبر سے نیچے اترے آپ نے اسے لپٹا لیا تو وہ پرسکون ہوا ۔ نبی اکرم صلی اللہ علیہ وسلم نے ارشاد فرمایا : اس ذات کی قسم جس کے دست قدرت میں میری جان ہے اگر میں اسے ایسے ہی رہنے دیتا تو یہ قیامت کے دن تک روتا رہتا “ ( علامہ ہیثمی فرماتے ہیں : ) میں یہ کہتا ہوں : ” اطراف “ کے مصنف نے اس روایت کی نسبت امام ابن ماجہ کی طرف کی ہے ، اور میں نے اپنے سماع میں یہ روایت نہیں پائی ہے باقی اللہ بہتر جانتا ہے
یہ روایت امام طبرانی نے معجم اوسط میں نقل کی ہے وہ کہتے ہیں : جریری کے حوالے سے اس روایت کو صرف شیبہ نے نقل کیا ہے میں یہ کہتا ہوں : میں نے کسی کو اس کا اور اس سے روایت کرنے والے فرد کا ذکر کرتے ہوئے نہیں پایا ہے ۔

سیدنا جابر بیان کرتے ہیں : نبی اکرم صلی اللہ علیہ وسلم مسجد میں ایک ستون کے ساتھ ٹیک لگا کر خطبہ ارشاد فرماتے تھے آپ اس کے ساتھ ٹیک لگا لیتے تھے سیدہ عائشہ رضی اللہ عنہما کی ہدایت کے تحت نبی اکرم صلی اللہ علیہ وسلم کے لئے یہ منبر بنایا گیا جب نبی اکرم صلی اللہ علیہ وسلم اس منبر کی طرف گئے اور آپ نے ستون کے پاس کھڑے ہونے کو ترک کیا تو وہ ستون آواز نکال کر رونے لگا ، وہ نبی اکرم صلی اللہ علیہ وسلم کے ساتھ محبت کی وجہ سے ایسا کر رہا تھا تو نبی اکرم صلی اللہ علیہ وسلم چلتے ہوئے اس کے پاس تشریف لے گئے آپ نے اسے اپنے ساتھ لگایا جب آپ نے اسے اپنے ساتھ لگایا تو وہ آواز ختم ہو گئی جو ہم سن رہے تھے راوی بیان کرتے ہیں : میں نے دریافت کیا : آپ نے خود وہ آواز سنی تھی ؟ انہوں نے جواب دیا : میں نے بھی سنی تھی اور اہل مسجد نے بھی سنی تھی اور یہ ان ستونوں میں سے ایک تھا جو حجرہ کے پاس تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن عطیہ عوفی ہے ، اور وہ ” ضعیف“ ہے ۔

سیدہ عائشہ صدیقہ رضی اللہ عنہما بیان کرتی ہیں : نبی اکرم صلی اللہ علیہ وسلم کھجور کے تنے کے ساتھ ٹیک لگا کر خطبہ ارشاد فرمایا کرتے تھے : ایک رومی شخص کا گزر ہوا تو اس نے کہا: اگر سیدنا محمد صلی اللہ علیہ وسلم نے مجھے بلایا تو میں ان کے لئے ایک ایسی چیز تیار کر دوں گا ، جوان کے لئے اس سے زیادہ موزوں ہو گی ۔ سیدہ عائشہ رضی اللہ عنہا بیان کرتی ہیں : اس شخص کو نبی اکرم صلی اللہ علیہ وسلم کے پاس بلا کر لایا گیا تو اس نے نبی اکرم صلی اللہ علیہ وسلم کے لئے چار سیڑھیوں کا منبر تیار کیا نبی اکرم صلی اللہ علیہ وسلم منبر پر چڑھے اور خطبہ دینے لگے ، تو لکڑی کا وہ تنا یوں رونے لگا جیسے اونٹنی روتی ہے ۔ نبی اکرم صلی اللہ علیہ وسلم اتر کر اس کے پاس گئے اور فرمایا : تمہارا کیا معاملہ ہے ؟ اگر تم چاہو تو میں اللہ تعالیٰ سے یہ دعا کروں گا وہ تمہیں تمہاری جگہ کی طرف لوٹا دے گا ، اور اگر تم چاہو تو میں اللہ تعالیٰ سے یہ دعا کرتا ہوں وہ تمہیں جنت میں داخل کر دے گا اس میں تم پر پھل لگیں گے اور تمہارے پھل میں سے اللہ کے نبی مرسلین اور پرہیزگار بندے کھائیں گے سیدہ عائشہ رضی اللہ عنہا بیان کرتی ہیں : تو میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ٹھیک ہے ، تو وہ لکڑی کا ٹکڑا گھن زدہ ہو کر ختم ہو گیا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صالح بن حیان ہے ، اور وہ ” ضعیف “ ہے ۔

سیدنا سہل بن سعد بیان کرتے ہیں : میں اپنے انصاری ننھیالی عزیزوں کے پاس بیٹھا ہوا تھا نبی اکرم صلی اللہ علیہ وسلم نے ان سے فرمایا تم جنگل کی طرف جاؤ اور میرے لئے وہاں سے لکڑی لے کے آؤ اور میرے لیے منبر تیار کرو تاکہ اس پر بیٹھ کر میں لوگوں کے ساتھ بات چیت کیا کروں تو ان صاحب نے ان کے لئے دو چوکھٹوں کا منبر بنایا آپ اس پر تشریف فرما ہوا کرتے تھے ( علامہ ہیثمی فرماتے ہیں : ) میں یہ کہتا ہوں : ان کے حوالے سے ” صحیح “ میں بھی ایک حدیث منقول ہے ، جو منبر بنانے کے بارے میں ہے ، لیکن وہ اس روایت کے علاوہ ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبید بن واقد ہے ، اور وہ ” ضعیف “ ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم مسجد میں کھجور کے تنے کے ساتھ ٹیک لگا کر خطبہ دیا کرتے تھے جب آپ نے منبر بنوا لیا تو کھجور کا وہ تنا رونے لگا ، نبی اکرم صلی اللہ علیہ وسلم نے اسے گلے لگایا تو وہ پرسکون ہوا ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔