مجمع الزوائد ومنبع الفوائد

سیدنا سعد بن عبادہ رضی اللہ عنہ بیان کرتے ہیں : انصار سے تعلق رکھنے والا ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : آپ ہمیں جمعہ کے دن کے بارے میں بتائیے کہ اس میں کون سی بھلائی موجود ہے ۔ نبی اکرم صلی اللہ علیہ وسلم نے ارشاد فرمایا : اس میں پانچ خصوصیات ہیں اس دن میں سیدنا آدم علیہ السلام ) کو پیدا کیا گیا اس دن میں ان کو نیچے اتارا گیا اس دن میں اللہ تعالٰی نے سیدنا آدم علیہ السلام کو وفات دی اس دن میں ایک گھڑی ایسی ہوتی ہے کہ اس گھڑی میں بندہ اللہ تعالیٰ سے جو بھی چیز مانگنے ، تو اللہ تعالی وہ چیز اسے عطا کر دیتا ہے ، جب کہ اس نے کسی گناہ والی چیز یا قطع رحمی سے متعلق نہ مانگا ہو اسی دن میں قیامت قائم ہو گی ہر مقرب فرشتہ آسمان زمین پہاڑ پتھر جمعہ کے دن سے خوف زدہ رہتے ہیں ( کہ کہیں آج قیامت قائم نہ ہو جائے ) ۔
یہ روایت امام أحمد اور امام بزار نے نقل کی ہے ، تاہم انہوں نے اس میں یہ الفاظ نقل کیے ہیں ” دنوں کا سردار جمعہ کا دن ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبداللہ بن محمد بن عقیل ہے ، جس کے بارے میں کلام کیا گیا ہے ، اس کی توثیق بھی کی گئی ہے ، اس روایت کے بقیہ رجال ” ثقہ “ ہیں ۔ ( علامہ ہیثمی فرماتے ہیں : ) میں یہ کہتا ہوں : سیدہ عائشہ رضی اللہ عنہا اور سیدنا معاذ بن جبل کے حوالے سے منقول حدیث پہلے گزر چکی ہے ( نبی اکرم صلی اللہ علیہ وسلم نے ارشاد فرمایا ہے : ) ” یہودی جمعہ کے حوالے سے ہم سے حسد کرتے ہیں “ ۔ یہ قبلہ اور آمین کہنے سے متعلق باب میں پہلے گزری ہے ۔

سیدنا انس بن مالک رضی اللہ عنہ بیان کرتے ہیں : جمعہ کا دن نبی اکرم صلی اللہ علیہ وسلم کے سامنے پیش کیا گیا سیدنا جبرائیل اپنی ہتھیلی میں ایک صاف آئینہ لے کر نبی اکرم صلی اللہ علیہ وسلم کے پاس آئے جس کے درمیان ایک سیاہ نقطہ موجود تھا نبی اکرم صلی اللہ علیہ وسلم نے دریافت کیا : اے جبرائیل یہ کیا ہے انہوں نے عرض کی : یہ جمعہ کا دن ہے ، جو آپ کے پروردگار نے آپ کے سامنے کیا ہے تاکہ یہ آپ کے لئے اور آپ کے بعد آپ کی امت کے لئے عید بن جائے آپ لوگوں کے لئے اس میں بھلائی ہے آپ پہلے فرد ہیں ( جن کو یہ دن دیا گیا ہے ) یہودیوں اور عیسائیوں کے دن اس کے بعد ہیں اس دن میں ایک گھڑی ایسی ہے کہ اس گھڑی میں جو بندہ اپنے پروردگار سے بھلائی کی جو بھی دعا مانگے گا اگر وہ اس کے نصیب میں ہو گی تو اللہ تعالیٰ اسے عطا کر دے گا یا وہ جس بھی شر سے پناہ مانگے گا ، تو اللہ تعالی وہ شر اس سے دور کر دے گا ہم ( فرشتے ) آخرت میں اسے ” یوم مزید“ کے نام سے پکارتے ہیں ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ( علامہ ہیثمی فرماتے ہیں : ) میں یہ کہتا ہوں : اگر اللہ نے چاہا تو

یہ روایت آگے چل کر جنت کی صفت سے متعلق باب میں آئے گی
یہ روایت امام طبرانی نے معجم اوسط میں نقل کی ہے ، اور اس کے رجال ” ثقہ“ ہیں امام ابویعلیٰ نے اس کا کچھ حصہ نقل کیا ہے ۔

انہوں نے سیدنا انس رضی اللہ عنہ کے حوالے سے منقول ایک روایت میں یہ الفاظ نقل کیے ہیں : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میرے سامنے مختلف دن پیش کیے گئے ان میں میرے سامنے جمعہ کا دن پیش کیا گیا تو وہ سفید آئینے کی مانند تھا جس کے درمیان میں ایک سیاہ نقطہ موجود تھا میں نے دریافت کیا : یہ ( سیاہ نقطہ ) کیا ہے ، تو بتایا گیا : قیامت “ ۔ اس روایت کے رجال صحیح کے رجال ہیں صرف امام طبرانی کے استاد کا معاملہ مختلف ہے ، اور وہ ” ثقہ “ ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ جمعہ کے دن مسلمانوں میں سے کسی ایک کو بھی ترک نہیں کرتا مگر یہ کہ اس کی ( یعنی جمعہ کے دن ہر مسلمان کی ) مغفرت کر دیتا ہے “ ۔
یہ روایت امام طبرانی نے معجم اوسط میں نقل کی ہے امام طبرانی کے استاد کے علاوہ اس روایت کے تمام رجال ” صحیح “ کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جمعہ کے دن نیکیوں کو دگنا کر دیا جاتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی خالد بن آدم ہے ، اور وہ کذاب ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم سے دریافت کیا گیا : جمعہ کے دن کو یہ نام کس وجہ سے دیا گیا ہے ؟ آپ نے ارشاد فرمایا : اس کی وجہ یہ ہے کہ تمہارے جد امجد سیدنا آدم علیہ السلام کے خمیر کو اس دن تیار کیا گیا اسی دن قیامت آئے گی ، اور دوبارہ زندہ کیا جائے گا اسی دن گرفت ہو گی ، اور اس دن کی آخری تین گھڑیوں میں سے ایک گھڑی ایسی ہے کہ جو شخص اس گھڑی میں اللہ تعالیٰ سے دعا مانگے گا اس کی دعا قبول ہو گی “ ۔
یہ روایت امام أحمد نے نقل کی ہے ۔

انہوں نے سیدنا ابوہریرہ رضی اللہ عنہ کے حوالے سے ایک روایت میں یہ الفاظ نقل کیے ہیں ۔ نبی اکرم صلی اللہ علیہ وسلم نے ارشاد فرمایا : ” سورج ایسے کسی بھی دن پر طلوع اور غروب نہیں ہوتا جو جمعہ کے دن سے زیادہ فضیلت رکھتا ہو ( راوی کو شک ہے شاید یہ الفاظ ہیں : ) زیادہ عظمت رکھتا ہو “ ۔ اس کے بعد راوی نے حسب سابق روایت ذکر کی ہے ۔ ان دونوں روایات کے رجال ” صحیح “ کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالیٰ کے نزدیک دنوں کا سردار جمعہ کا دن ہے ، اس دن میں تمہارے جد امجد سیدنا آدم علیہ السلام کو پید کیا گیا اس دن میں وہ جنت میں داخل ہوئے اسی دن میں وہ ( جنت سے ) نکلے اسی دن میں قیامت قائم ہو گی “ ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی ابراہیم بن یزید بن جوزی ہے ، اور وہ ” ضعیف“ ہے ۔

سیدنا عبداللہ بن سلام کے حوالے سے اس کی مانند روایت ایک طویل حدیث میں نقل کی گئی ہے ۔

سیدنا ابوموسیٰ اشعری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” دنوں کو ان کی مخصوص شکل میں اٹھایا جائے گا ، جمعہ کے دن کو روشن اور چمک دار شکل میں اٹھایا جائے گا ، اور اس کے اہل افراد سے یوں ساتھ لے کر چلیں گے جس طرح دلہن کو اس کے خیمے کی طرف لے جایا جاتا ہے ، اس دن کی روشنی ہو گی ، اور لوگ اس کی روشنی میں چل رہے ہوں گے ان کی رنگت سفید برف کی مانند ہو گی ، اور ان کی خوشبو مشک کی مانند ہو گی وہ لوگ کافور کے پہاڑوں میں جائیں گے ، جن و انس ان کی طرف دیکھ رہے ہوں گے اور حیرانگی کی وجہ سے پلک نہیں چھپک رہے ہوں گے یہاں تک کہ وہ لوگ جنت میں داخل ہو جائیں گے ان لوگوں کے ساتھ اور کوئی ( دوسرا ) شخص شامل نہیں ہو گا صرف ثواب کے حصول کی نیت سے اذان دینے والے لوگ شامل ہوں گے “ ۔
یہ روایت امام طبرانی نے معجم کبیر میں ہیثم بن حمید کے حوالے سے حفص بن غیلان سے نقل کی ہے ایک قوم نے ان دونوں کو ثقہ قرار دیا ہے ، اور دوسرے لوگوں نے ان دونوں کو ضعیف قرار دیا ہے ، اور ان دونوں سے استدلال کیا جا سکتا ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کیا میں تمہیں سب سے زیادہ فضیلت والے فرشتے کے بارے میں نہ بتاؤں وہ جبرائیل ہے ، اور انبیاء میں سے زیادہ فضیلت والے سیدنا آدم علیہ السلام ہیں ، اور دنوں میں سب سے زیادہ فضیلت والا دن جمعہ کا دن ہے ، اور مہینوں میں سب سے زیادہ فضیلت والا مہینہ رمضان کا مہینہ ہے ، اور راتوں میں سب سے زیادہ فضیلت والی رات شب قدر ہے ، اور خواتین میں سب سے زیادہ فضیلت والی خاتون مریم بنت عمران ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی نافع بن ہرمز ہے ، اور وہ ” ضعیف “ ہے ۔

سیدنا انس رضی اللہ عنہ بیان کرتے ہیں : جب رجب کا مہینہ شروع ہو جاتا تھا تو نبی اکرم صلی اللہ علیہ وسلم یہ فرماتے تھے اے اللہ ! ہمارے لئے رجب اور شعبان میں برکت رکھ دے اور ہمیں رمضان تک پہنچا دے جب جمعہ کی رات آتی تھی تو آپ فرماتے تھے یہ ایک روشن رات ہے ، اور یہ چمک دار دن ہے ۔
یہ روایت امام بزار نے نقل کی ہے ، اس کی سند میں ایک راوی زائدہ بن ابورقاد ہے امام بخاری رحمہ اللہ فرماتے ہیں : یہ منکرالحدیث ہے ایک جماعت نے اسے مجہول قرار دیا ہے ۔

سیدنا ابوہریرہ رضی اللہ عنہ اور سیدنا حذیفہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اللہ تعالی نے ہم سے پہلے لوگوں کو جمعہ کے دن کے بارے میں گمراہ کر دیا یہودیوں کا دن ہفتے کا دن ہے ، اور عیسائیوں کا دن اتوار کا دن ہے ہم دنیا میں ( آنے کے اعتبار سے ) بعد والے ہیں ، اور قیامت کے دن پہلے ہوں گے جن کی مغفرت تمام مخلوق سے پہلے ہو جائے گی“ ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح“ میں منقول ہے ، تاہم اس میں یہ الفاظ نہیں ہیں : ” جن کی مغفرت تمام مخلوق سے پہلے ہو جائے گی“ ۔
یہ روایت امام بزار نے نقل کی ہے ، اور اس کے رجال ” صحیح“ کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک جمعہ کے دن اور جمعہ کی رات میں چوہیں گھڑیاں ہوتی ہیں ان میں سے ہر ایک گھڑی میں اللہ تعالی چھ سو افراد کو جہنم سے نجات دیتا ہے “ ۔ راوی بیان کرتے ہیں : ہم اپنے استاد کے پاس سے نکلے اور حسن بصری کے پاس آئے ہم نے ان کے سامنے ثابت کی نقل کردہ حدیث نقل کی تو انہوں نے بتایا میں نے انہیں یہ بات کرتے ہوئے سنا ہے ، اور انہوں نے اس میں یہ الفاظ زائد نقل کیے : ” وہ سب ایسے لوگ ہوں گئے ، جن کے لئے جہنم واجب ہو چکی ہو“ ۔
یہ روایت امام ابویعلیٰ نے عبدالصمد بن خراش کی ام عوام بصری سے نقل کردہ روایت کے طور پر نقل کی ہے ، اور میں نے کسی کو ان دونوں کے حالات بیان کرتے ہوئے نہیں پایا ہے ۔