مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص صف تک پہنچے اور وہ مکمل ہو چکی ہو ، تو وہ ( اس صف میں سے ) ایک شخص کو اپنی طرف کھینچ لے اور اسے اپنے پہلو میں کھڑا کر لے “ ۔
یہ روایت امام طبرانی نے معجم اوسط میں نقل کی ہے وہ فرماتے ہیں : نبی اکرم صلی اللہ علیہ وسلم کے حوالے سے یہ روایت صرف اسی سند کے ساتھ منقول ہے ، اس کی سند میں ایک راوی بشر بن ابراہیم ہے ، اور وہ انتہائی ” ضعیف “ ہے ۔

سیدنا وابصه بن معبد رضی اللہ عنہ بیان کرتے ہیں : نبی اکرم صلی اللہ علیہ وسلم نے نماز ختم کی تو ایک شخص کو دیکھا جو لوگوں کے پیچھے ( صف میں اکیلا کھڑے ہو کر ) نماز ادا کر رہا تھا نبی اکرم صلی اللہ علیہ وسلم نے ارشاد فرمایا : اے اکیلے نماز ادا کرنے والے شخص ! تم صف تک پہنچ کر لوگوں کے ساتھ شامل کیوں نہیں ہوئے اور اگر تمہارے لئے جگہ تنگ تھی تو تم نے کسی شخص کو کھینچ کر اپنی طرف کر لینا تھا اب تم اپنی نماز کو دہراؤ کیونکہ تمہاری نماز نہیں ہوئی ہے ۔ ( علامہ ہیثمی فرماتے ہیں : ) میں یہ کہتا ہوں ، ان کے حوالے سے ایک حدیث منقول ہے ، جو اس شخص کے بارے میں ہے ، جو صف کے پیچھے ( اکیلا کھڑا ہو کر ) نماز ادا کرتا ہے وہ حدیث تینوں ” سنن “ میں نقل کی گئی ہے ، لیکن وہ اس روایت کے علاوہ ہے ۔
یہ روایت امام ابویعلیٰ نے نقل کی ہے ، اس کی سند میں ایک راوی سری بن اسماعیل ہے ، اور وہ ” ضعیف “ ہے ۔