مجمع الزوائد ومنبع الفوائد

سیدنا انس بن مالک رضی اللہ عنہ کے بارے میں یہ بات منقول ہے : وہ عمر بن عبدالعزیز کے پاس آیا کرتے تھے ۔ عمر بن عبدالعزیز نے ان سے کہا: آپ ایسا کیوں کرتے ہیں ؟ انہوں نے فرمایا : کہ میں نے نبی اکرم صلی اللہ علیہ وسلم کو دیکھا ہے کہ آپ کس طرح نماز ادا کرتے تھے ؟ تو جب تم نبی اکرم صلی اللہ علیہ وسلم کے مطابق نماز ادا کرتے ہو ، تو میں تمہاری اقتداء میں نماز ادا کر لیتا ہوں ، اور جب تم نبی اکرم صلی اللہ علیہ وسلم کے طریقے کے برخلاف نماز ادا کرتے ہو ، تو میں نماز ادا کر کے اپنے گھر واپس چلا جاتا ہوں ۔
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدنا ابوایوب رضی اللہ عنہ کے بارے میں یہ بات منقول ہے کہ وہ مروان بن حکم کی اقتداء میں نماز ادا کرنے کے لئے آیا کرتے تھے مروان نے ان سے دریافت کیا : آپ ایسا کیوں کرتے ہیں ؟ انہوں نے بتایا : میں نے نبی اکرم صلی اللہ علیہ وسلم کو نماز ادا کرتے ہوئے دیکھا ہے اگر تم نبی اکرم صلی اللہ علیہ وسلم کے طریقے کے مطابق نماز ادا کرو گے ، تو میں بھی تمہاری موافقت کروں گا ، اور اگر تم ان کے ( طریقے کے ) برخلاف نماز ادا کرو گے ، تو میں نماز ادا کر کے اپنے گھر واپس چلا جاؤں گا ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

ابوعلی مصری بیان کرتے ہیں : ہم لوگ سیدنا عقبہ بن عامر جہنی رضی اللہ عنہ کے ساتھ سفر کر رہے تھے نماز کا وقت ہو گیا ہم لوگوں نے یہ ارادہ کیا کہ وہ آگے بڑھ کر ( ہماری امامت کریں ) تو انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص لوگوں کی امامت کرتا ہے ، تو اسے مکمل ثواب ملے گا ، اور لوگوں کو بھی مکمل ثواب ملے گا ، اور اگر وہ ( امام ) مکمل ادا نہیں کرتا تو لوگوں کو مکمل ثواب ملے گا ( اور امام کو ) گناہ ہو گا“ ۔
یہ روایت امام أحمد نے نقل کی ہے امام طبرانی نے اس کا کچھ حصہ نقل کیا ہے امام طبرانی کے رجال ” ثقہ “ ہیں ۔