مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص لوگوں کی امامت کرتا ہے ، اسے اللہ تعالیٰ سے ڈرنا چاہیے اور اسے یہ بات جان لینی چاہیے کہ وہ ضامن ہے ، اور جس چیز کا وہ ضامن ہے ، اس چیز کے حوالے سے اس سے حساب لیا جائے گا اگر اس نے اچھا کام کیا ہو گا ، تو اسے اجر ملے گا ، اور جن لوگوں نے اس کے پیچھے نماز ادا کی تھی ان جتنا اجر ملے گا ، اور ان لوگوں کے اجر میں کوئی کمی نہیں ہو گی ، اور ( امام کی طرف سے ) جو کوتاہی ہو گی تو اس کا وبال اس ( امام ) پر ہی ہو گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی معارک بن عباد ہے ، جسے امام أحمد امام بخاری رحمہ اللہ امام ابوزرعہ اور امام دارقطنی رحمہ اللہ نے ضعیف قرار دیا ہے ۔ ابن حبان نے اس کا تذکرہ کتاب ” الثقات “ میں کیا ہے ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” امام ضامن ہوتا ہے ، جو وہ کرے تم بھی وہی کرو “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی موسیٰ بن شیبہ ہے ، جو سیدنا کعب بن مالک رضی اللہ عنہ کی اولاد میں سے ہے امام أحمد نے اسے ضعیف قرار دیا ہے امام ابوحاتم نے اسے ” ثقہ “ کہا: ہے ۔ ابن حبان نے بھی اس کا تذکرہ کتاب ” الثقات “ میں کیا ہے ۔ میں یہ کہتا ہوں : اس سے پہلے احادیث گزر چکی ہیں جو اذان سے متعلق باب میں گزری ہیں ، اور نبی اکرم صلی اللہ علیہ وسلم کے اس فرمان کے بارے میں ہیں : ” امام ضامن ہوتا ہے ، اور مؤذن امین ہوتا ہے “ ۔