مجمع الزوائد ومنبع الفوائد

سیدنا جابر بن عبداللہ انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نماز ادا کر رہے تھے ایک بکری آئی اور آپ کے آگے سے گزرنی لگی نبی اکرم صلی اللہ علیہ وسلم نے اسے روکنے کی کوشش کی یہاں تک کہ نبی اکرم صلی اللہ علیہ وسلم نے اسے دیوار کے ساتھ لگا دیا پھر نبی اکرم صلی اللہ علیہ وسلم نے ارشاد فرمایا : نماز کو کوئی چیز منقطع نہیں کرتی ہے ، لیکن تم سے جہاں تک ہو سکے ( آگے سے گزرنے والے کو ) پرے کرو “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یحیی بن میمون تمار ہے ، اور وہ ” ضعیف“ ہے ۔ ابن حبان نے اس کا تذکرہ کتاب ” الثقات “ میں کیا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” نماز کو کوئی چیز منقطع نہیں کرتی ہے “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم رات کے وقت نوافل ادا کیا کرتے تھے ، اور سیدہ عائشہ رضی اللہ عنہا نبی اکرم صلی اللہ علیہ وسلم کے رات کے نوافل کے دوران نبی اکرم صلی اللہ علیہ وسلم اور قبلہ کے درمیان چوڑائی کی سمت میں لیٹی ہوئی ہوتی تھیں ۔
یہ روایت امام أحمد نے نقل کی ہے ، اور اس کے رجال کی توثیق کی گئی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نماز ادا کر رہے ہوتے تھے ، اور وہ آپ کے سامنے چوڑائی کی سمت میں لیٹی ہوئی ہوتی تھیں آپ نے ارشاد فرمایا : کیا یہ خواتین تمہاری مائیں تمہاری بہنیں اور تمہاری پھوپھیاں نہیں ہیں ؟ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں بھی مذکور ہے ، تاہم اس میں یہ الفاظ نہیں ہیں : ” کیا یہ خواتین تمہاری مائیں تمہاری بہنیں اور تمہاری پھوپھیاں نہیں ہیں ؟ “
یہ روایت امام أحمد نے نقل کی ہے ، اور اس کے رجال ” ثقہ “ ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم کی نماز کی مخصوص جگہ کے سامنے میرا بستر ہوتا تھا نبی اکرم صلی اللہ علیہ وسلم نماز ادا کر رہے ہوتے تھے ، اور میں آپ کے سامنے ہوتی تھی ۔ علامہ ہیثمی کہتے ہیں : میں یہ کہتا ہوں یہ روایت امام ابوداؤد اور امام ابن ماجہ نے نقل کی ہے ، تاہم انہوں نے یہ الفاظ نقل نہیں کیے ہیں : ” نبی اکرم صلی اللہ علیہ وسلم نماز ادا کر رہے ہوتے تھے ، اور میں آپ کے سامنے ہوتی تھی “ ۔
یہ روایت امام أحمد نے اور امام ابویعلیٰ نے نقل کی ہے ، اور اس کے رجال ” صحیح “ کے رجال ہیں ۔

ابراہیم بن عبدالرحمن بن عوف بیان کرتے ہیں : میں نماز ادا کر رہا تھا ایک شخص میرے آگے سے گزرنے لگا میں نے اسے منع کیا وہ بات نہیں مانا میں نے سیدنا عثمان غنی رضی اللہ عنہ سے اس بارے میں دریافت کیا : تو انہوں نے فرمایا : اے میرے بھیجے ! اس نے تمہیں کوئی نقصان نہیں پہنچانا تھا ۔
یہ روایت عبداللہ بن أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک بکری نبی اکرم صلی اللہ علیہ وسلم کے آگے سے گزری ۔ آپ اس وقت نماز ادا کر رہے تھے وہ نبی اکرم صلی اللہ علیہ وسلم اور قبلہ کے درمیان میں سے گزری ، لیکن اس نے آپ کی نماز کو منقطع نہیں کیا ۔
یہ روایت امام ابویعلیٰ نے نقل کی ہے ، اور اس کی سند میں ایک راوی اشعث بن سوار ہے ، جسے ایک جماعت نے ضعیف قرار دیا ہے یحیی بن معین نے اسے ” ثقہ “ قرار دیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بلی نماز کو منقطع نہیں کرتی ہے کیونکہ وہ گھر کے سامان کا حصہ ہے “ ۔
یہ روایت امام بزار نے نقل کی ہے ، اس کی سند میں ایک راوی عبدالرحمن بن ابوزناد ہے ، اور وہ ” ضعیف “ ہے ۔