مجمع الزوائد ومنبع الفوائد

قاضی شریح کے بارے میں بات منقول ہے : انہوں نے سیدہ عائشہ صدیقہ رضی اللہ عنہا سے سوال کیا : کیا نبی اکرم صلی اللہ علیہ وسلم چٹائی پر نماز ادا کر لیتے تھے ؟ کیونکہ میں نے اللہ تعالیٰ کی کتاب میں یہ بات سنی ہے ” اور ہم نے جہنم کو کافروں کے لئے حصیر بنایا ہے ( اور عربی میں چٹائی کے لئے لفظ حصیر استعمال ہوتا ہے ) تو سیدہ عائشہ صدیقہ رضی اللہ عنہا نے فرمایا : نبی اکرم صلی اللہ علیہ وسلم اس پر نماز ادا نہیں کرتے تھے ۔
یہ روایت امام ابویعلیٰ نے نقل کی ہے ، اور اس کے رجال کی توثیق کی گئی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم جب نماز ادا کرتے تھے تو آپ اپنے پاؤں کے نیچے کچھ نہیں رکھتے تھے البتہ ایک مرتبہ بارش ہو گئی ، تو آپ نے اپنے پاؤں کے نیچے چمڑے کا ٹکڑا رکھ لیا ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابراہیم بن اسحاق ضبی ہے ، اور وہ متروک ہے ۔

ابوعبیدہ بیان کرتے ہیں : سیدنا عبداللہ بن مسعود رضی اللہ عنہ صرف زمین پر نماز ادا کرتے تھے ( راوی کو شک ہے شاید یہ الفاظ ہیں : ) صرف زمین پر سجدہ کرتے تھے ۔
یہ روایت امام طبرانی نے معجم کبیر میں نقل کی ہے ابوعبیدہ نامی راوی نے اپنے والد سے سماع نہیں کیا ہے ۔

ابراہیم نخعی کے بارے میں یہ بات منقول ہے : وہ ” بردی “ پر کھڑے ہوئے تھے ، اور زمین پر سجدہ کرتے تھے ۔ راوی کہتے ہیں : ہم نے دریافت کیا : لفظ بردی سے کیا مراد ہے انہوں نے جواب دیا : چٹائی ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔