مجمع الزوائد ومنبع الفوائد

ابوعمرو شیبانی بیان کرتے ہیں : سیدنا عبداللہ بن مسعود رضی اللہ عنہ مسجد میں تشریف لاتے تھے تو جس شخص کو پاتے تھے اسے باہر نکال دیتے تھے البتہ نماز پڑھنے والے شخص کا معاملہ مختلف ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” قیامت کی نشانیوں میں یہ بات شامل ہے کہ ایک شخص بڑی سی مسجد کے پاس سے گزرے گا ، اور اس میں دو رکعات نماز ادا نہیں کرے گا “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں البتہ سلمہ بن کہیل کا معاملہ مختلف ہے ، اس نے اگرچہ صحابہ کرام سے سماع کیا ہے ، لیکن میں نے اس کے حوالے سے منقول کوئی ایسی حدیث نہیں پائی جو اس نے سیدنا عبداللہ بن مسعود رضی اللہ عنہ سے نقل کی ہو ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” آخری زمانے میں ایسے لوگ آئیں گے جو مساجد میں حلقے بنا کر بیٹھیں گے ان کا مقصد دنیا ہو گی تم ان لوگوں کے ساتھ نہ بیٹھنا کیونکہ اللہ تعالیٰ کو ان لوگوں کی کوئی حاجت نہیں ہو گی “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی بزیع ابوخلیل ہے ، جس کی نسبت حدیث ایجاد کرنے کی طرف کی گئی ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ہر چیز کی ایک گندگی ( یا کوڑا کرکٹ ) ہوتی ہے ، اور مسجد کی گندگی یہ ہے کہ یہ کہا: جائے : جی نہیں اللہ کی قسم جی ہاں ! اللہ کی قسم “ ۔
یہ روایت امام طبرانی نے معجم اوسط میں نقل کی ہے ، اسے امام ابویعلیٰ نے بھی نقل کیا ہے ، اس کی سند میں ایک راوی رشدین بن سعد ہے ، جس کے بارے میں کلام کیا گیا ہے بعض حضرات نے اسے ” ثقہ “ قرار دیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مساجد کو راستے نہ بناؤ صرف ذکر ، یا نماز کے لئے ( مساجد میں آؤ ) “ ۔ میں یہ کہتا ہوں : یہ روایت امام ابن ماجہ نے نقل کی ہے ، تاہم اس میں یہ الفاظ نہیں ہیں : ” صرف ، ذکر ، یا نماز کے لئے ( مساجد میں آؤ ) “ ۔
یہ روایت امام طبرانی نے معجم کبیر میں اور معجم اوسط میں نقل کی ہے ، اور اس کے رجال کی توثیق کی گئی ہے ۔