مجمع الزوائد ومنبع الفوائد

سیدنا انس بن مالک رضی اللہ عنہ فرماتے ہیں : ہمیں اس بات سے منع کیا گیا ہے کہ ہم اونچی مسجد میں نماز ادا کریں ۔
یہ روایت امام بزار نے نقل کی ہے ، اس کی سند میں ایک راوی لیث بن ابوسلیم ہے ، اور وہ ” ثقہ “ ہے ، تاہم وہ تدلیس کرنے والا ہے ۔

سیدنا عبداللہ بن عمر رضی اللہ عنہما فرماتے ہیں : انہوں نے ہمیں منع کیا ہے ( راوی کو شک ہے یا شاید یہ الفاظ ہیں : ) ہمیں اس بات سے منع کیا گیا ہے کہ ہم اونچی مسجد میں نماز ادا کریں “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں صرف لیث بن ابوسلیم کا معاملہ مختلف ہے وہ ” ثقہ “ اور تدلیس کرنے والا شخص ہے یہ روایت اس نے عنعنہ کے ساتھ نقل کی ہے ۔

سیدنا عبادہ بن صامت رضی اللہ عنہ بیان کرتے ہیں : انصار نے سوچا نبی اکرم صلی اللہ علیہ وسلم کب تک کھجور کی اس شاخ کی طرف رخ کر کے نماز ادا کرتے رہیں گے ان لوگوں نے اس کے لئے دینار جمع کیے اور وہ دینار لے کر نبی اکرم صلی اللہ علیہ وسلم کے پاس آئے انہوں نے عرض کی : اس رقم کے ذریعے ہم مسجد کو ٹھیک کر دیں گے اور اسے آراستہ کر دیں گے نبی اکرم صلی اللہ علیہ وسلم نے ارشاد فرمایا : مجھے اس بات میں دلچسپی نہیں ہے کہ میں اپنے بھائی سیدنا موسیٰ علیہ السلام کے طریقے سے منہ موڑوں سیدنا موسیٰ علیہ السلام کے چھپر کی طرح چھپر ( یعنی شاخوں سے بنی ہوئی چھت ) ہونا چاہیے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عیسیٰ بن سنان ہے ، جسے امام أحمد اور دیگر حضرات نے ضعیف قرار دیا ہے ، جب کہ عجلی ابن حبان اور ایک روایت کے مطابق ابن خراش نے اسے ” ثقہ “ قرار دیا ہے ۔