مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : مشرکین نے نبی اکرم صلی اللہ علیہ وسلم کو ( جنگ کے دوران ) ظہر ، عصر ، مغرب اور عشاء کی نمازیں ادا نہیں کرنے دیں یہاں تک کہ رات کا ایک حصہ گزر گیا پھر نبی اکرم صلی اللہ علیہ وسلم نے سیدنا بلال رضی اللہ عنہ کو حکم دیا انہوں نے اذان دی پھر اقامت کہی پھر نبی اکرم صلی اللہ علیہ وسلم نے ظہر کی نماز ادا کی پھر آپ نے انہیں حکم دیا انہوں نے اذان دی اور اقامت کہی تو نبی اکرم صلی اللہ علیہ وسلم نے عصر کی نماز ادا کی پھر آپ نے انہیں حکم دیا پھر انہوں نے اذان دی اور اقامت کہی تو نبی اکرم صلی اللہ علیہ وسلم نے مغرب کی نماز ادا کی پھر آپ نے انہیں حکم دیا انہوں نے اذان دی اور اقامت کہی تو آپ نے عشاء کی نماز ادا کی ۔
یہ روایت امام ابویعلیٰ نے نقل کی ہے ، اس کی سند میں ایک راوی یحیی بن ابوانیسہ ہے ، اور وہ محدثین کے نزدیک ” ضعیف “ ہے البتہ ابن عدی نے یہ کہا: ہے ، اس کے ضعیف ہونے کے باوجود اس کی نقل کردہ حدیث کو نوٹ کیا جائے گا ۔

سیدنا جابر رضی اللہ عنہ بیان کرتے ہیں : غزوہ خندق کے موقع پر ( جنگ میں ) مصروفیت کی وجہ سے نبی اکرم صلی اللہ علیہ وسلم ظہر ، عصر مغرب اور عشاء کی نمازیں ادا نہیں کر سکے ( جب آپ اس سے فارغ ہوئے ) تو آپ نے سیدنا بلال رضی اللہ عنہ کو حکم دیا انہوں نے اذان دی اور اقامت کہی تو نبی اکرم صلی اللہ علیہ وسلم نے ظہر کی نماز ادا کی پھر آپ نے انہیں حکم دیا تو انہوں نے اذان دی اور اقامت کہی تو آپ نے عصر کی نماز ادا کی پھر آپ نے انہیں حکم دیا انہوں نے اذان دی اور اقامت کہی تو آپ نے مغرب کی نماز ادا کی پھر آپ نے انہیں حکم دیا انہوں نے اذان دی اور اقامت کہی تو آپ نے عشاء کی نماز ادا کی پھر آپ نے ارشاد فرمایا : اس وقت روئے زمین پر تمہارے علاوہ اور کوئی قوم ایسی نہیں ہے ، جو اللہ کا ذکر کر رہی ہو ۔
یہ روایت امام بزار نے اور امام طبرانی نے معجم اوسط میں نقل کی ہے ، اس کی سند میں ایک راوی عبدالکریم بن ابومخارق ہے ، اور وہ ” ضعیف “ ہے ۔

جعد ابوعثمان بیان کرتے ہیں : سیدنا انس بن مالک رضی اللہ عنہ بنو ثعلبہ کی مسجد میں ہمارے پاس سے گزرے انہوں نے دریافت کیا : کیا تم لوگوں نے نماز ادا کر لی ہے ؟ ہم نے عرض کی : جی ہاں ! راوی بیان کرتے ہیں : یہ صبح کی نماز کا واقعہ ہے پھر انہوں نے ایک شخص کو حکم دیا ۔ اس نے اذان دی اور اقامت کہی تو انہوں نے اپنے ساتھیوں کو نماز پڑھائی ۔
یہ روایت امام ابویعلی نے نقل کی ہے اور اس کے رجال صحیح کے رجال ہیں ۔ ( علامہ ہیثمی فرماتے ہیں : ) میں یہ کہتا ہوں : اس سے پہلے حبیب بن سباع کی نقل کردہ حدیث ، اس باب میں گزر چکی ہے ، جس میں اس شخص کا بیان ہے ، جو نماز ادا کرتا ہے ، اور اس کے ذمہ کوئی دوسری نماز بھی لازم ہوتی ہے ۔