مجمع الزوائد ومنبع الفوائد

سیدنا جبیر بن مطعم رضی اللہ عنہ بیان کرتے ہیں : نبی اکرم صلی اللہ علیہ وسلم سفر کے دوران نماز ادا کرتے ہوئے اذان نہیں دلواتے تھے صرف اقامت کہلوایا کرتے تھے البتہ صبح کی نماز کا معاملہ مختلف ہے کیونکہ اس کے لئے آپ اذان دلواتے تھے ، اور اقامت کہلواتے تھے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ضرار بن صرد ہے ، اور وہ ” ضعیف “ ہے ۔

سیدنا عبداللہ بن عدی رضی اللہ عنہ بیان کرتے ہیں : نبی اکرم صلی اللہ علیہ وسلم سفر کے دوران اذان نہیں دلواتے تھے صرف صبح کی نماز میں اذان دلواتے تھے آپ اقامت کہلوایا کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یعقوب بن حمید ہے ، جسے یحیی بن معین اور دیگر حضرات نے ضعیف قرار دیا ہے امام بخاری رحمہ اللہ فرماتے ہیں : ہمیں صرف بھلائی کا علم ہے ۔ ابن حبان نے اس کا تذکرہ کتاب ” الثقات “ میں کیا ہے ، اور یہ بات بیان کی ہے : یہ غلطی کرتا ہے ۔

سیدنا عبداللہ بن مسعود رضی اللہ عنہ بیان کرتے ہیں : ایک مرتبہ سفر کے دوران ہم نبی اکرم صلی اللہ علیہ وسلم کے ساتھ تھے آپ نے مؤذن کو اذان دیتے ہوئے سنا اس نے اللہ اکبر اللہ اکبر پڑھا تو نبی اکرم صلی اللہ علیہ وسلم نے ارشاد فرمایا : یہ فطرت پر ہے ، اس نے اشہد ان لا اله الا اللہ پڑھا تو نبی اکرم صلی اللہ علیہ وسلم نے ارشاد فرمایا : یہ جہنم سے نکل گیا ہم لپک کر اس شخص کی طرف گئے تو وہ جانوروں میں موجود ایک شخص تھا نماز کا وقت ہو گیا تو اس نے اس کے لئے اذان دی تھی ۔
یہ روایت امام أحمد نے امام ابویعلیٰ نے اور امام طبرانی نے معجم کبیر میں نقل کی ہے امام أحمد کے رجال ” صحیح “ کے رجال ہیں ۔

سیدنا معاذ بن جبل رضی اللہ عنہ بیان کرتے ہیں : ایک سفر کے دوران نبی اکرم صلی اللہ علیہ وسلم نے موذن کو اللَّهُ أَكْبَرُ اللَّهُ أَكْبَرُ کہتے ہوئے سنا تو ارشاد فرمایا : یہ فطرت پر ہے ، اس نے اَشهَدُ اَنْ لا اله الا اللہ پڑھا تو نبی اکرم صلی اللہ علیہ وسلم نے ارشاد فرمایا : اس نے حق کے ہمراہ گواہی دی ہے ، اس نے اَشْهَدُ أَنَّ مُحَمَّدًا رَسُول اللہ پڑھا تو نبی اکرم صلی اللہ علیہ وسلم نے ارشاد فرمایا : یہ جہنم سے نکل گیا تم لوگ اس کا جائزہ لو تم اسے پاؤ گے یا تو یہ چرواہا ہو گا ، جو گھر والوں سے دور ہو گا یا کتوں کے ساتھ شکار کرنے والا کوئی شخص ہو گا ، جب لوگوں نے اس کا جائزہ لیا تو انہوں نے اسے پایا کہ وہ ایک چرواہا تھا ، جسے نماز کا وقت ہو گیا تھا تو اس نے نماز کے لئے اذان دی تھی ۔
یہ روایت امام أحمد نے امام طبرانی نے معجم صغیر میں نقل کی ہے ، اس کی سند میں ایک راوی حکم بن عبدالملک قرشی ہے ، اور وہ ” ضعیف “ ہے ۔

سیدنا عبداللہ بن ربیعہ سلمی رضی اللہ عنہ بیان کرتے ہیں : نبی اکرم صلی اللہ علیہ وسلم ایک سفر میں تھے آپ نے مؤذن کو یہ کہتے ہوئے سنا اشهد ان لا اله الا الله نبی اکرم صلی اللہ علیہ وسلم نے فرمایا : میں بھی اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اس مؤذن نے کہا: أَشْهَدُ أَنَّ مُحَمَّدًا رَسُوْلُ اللہ نبی اکرم صلی اللہ علیہ وسلم نے فرمایا : میں اس بات کی گواہی دیتا ہوں کہ سیدنا محمد صلی اللہ علیہ وسلم اللہ کے رسول ہیں پھر نبی کرم صلی اللہ علیہ وسلم نے ارشاد فرمایا : تم لوگ اسے بکریوں کا چرواہا یا اپنے اہل خانہ سے دور شخص پاؤ گے ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور انہوں نے یہ الفاظ زائد نقل کیے ہیں : جب وہ وادی کے نشیبی حصے میں آئے تو وہاں ایک مردار بکری موجود تھی آپ نے ارشاد فرمایا : کیا تم لوگ یہ سمجھتے ہو کہ اپنے مالک کے نزدیک یہ بے حیثیت ہے ؟ لوگوں نے عرض کی : جی ہاں ! نبی اکرم صلی اللہ علیہ وسلم نے ارشاد فرمایا : دنیا ، اللہ تعالیٰ کے نزدیک اس سے زیادہ بے حیثیت ہے جتنی یہ ( مردہ بکری ) اپنے مالکان کے نزدیک بے حیثیت ہے “ ۔ اس روایت کے رجال ” صحیح “ کے رجال ہیں ۔

سیدنا ابوحجیفہ رضی اللہ عنہ بیان کرتے ہیں : نبی اکرم صلی اللہ علیہ وسلم سفر کر رہے تھے آپ نے مؤذن کو اشهد ان لا الہ الا اللہ کہتے ہوئے سنا تو نبی اکرم صلی اللہ علیہ وسلم نے ارشاد فرمایا : اس نے شرک کرنے سے لاتعلقی اختیار کی اس نے کہا: أَشْهَدُ أَنَّ مُحَمَّدًا رَسُول اللَّه تو نبی اکرم صلی اللہ علیہ وسلم نے ارشاد فرمایا : یہ جہنم سے نکل گیا پھر نبی اکرم صلی اللہ علیہ وسلم نے ارشاد فرمایا : تم اس شخص کو پاؤ گے جو گھر والوں سے الگ تھلگ ہو گا یا کتوں کے ساتھ ہو گا ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا ابوحجیفہ رضی اللہ عنہ بیان کرتے ہیں : نبی اکرم صلی اللہ علیہ وسلم سفر کر رہے تھے آپ نے کسی شخص کو اللہ اکبر اللہ اکبر کہتے ہوئے سنا ( یعنی اذان دیتے ہوئے سنا ) تو نبی اکرم صلی اللہ علیہ وسلم نے ارشاد فرمایا : یہ حق کی دعوت ہے ، اس نے کہا: أَشْهَدُ أَنْ لَا إِلَهَ إِلَّا اللَّهُ نبی اکرم صلی اللہ علیہ وسلم نے فرمایا : یہ اخلاص کا کلمہ ہے ، اس نے پڑھا اَشْهَدُ أَنَّ مُحَمَّدًا رَسُولُ اللہ تو نبی اکرم صلی اللہ علیہ وسلم نے ارشاد فرمایا : یہ کہنے والا شخص جہنم سے نکل گیا پھر نبی اکرم صلی اللہ علیہ وسلم نے ارشاد فرمایا : تم اس شخص کو پاؤ گے یہ الگ تھلگ رہ رہا ہو گا یا یہ کتوں والا شخص ہو گا ، جو شکار کر رہا ہو گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی موسیٰ بن محمد بن حبان ہے ، جسے امام ابوزرعہ نے ضعیف قرار دیا ہے ۔ ابن حبان نے اس کا تذکرہ کتاب ” الثقات “ میں کیا ہے ، اور یہ بات بیان کی ہے کہ یہ بعض اوقات دوسروں کے برخلاف روایت نقل کرتا ہے ، اس روایت کے بقیہ رجال ” ثقہ “ ہیں ۔

سیدنا ابوسعید خدری رضی اللہ عنہ بیان کرتے ہیں : ہم ایک سفر میں نبی اکرم صلی اللہ علیہ وسلم کے ساتھ تھے ہم نے ایک شخص کو اللہ أَكْبَرَ اللَّهُ أَكْبَرَ أَشْهَدُ أَنْ لَا إِلَهَ إِلَّا اللَّهُ أَشْهَدُ أَنَّ مُحَمَّدًا رَسُولُ اللہ کہتے ہوئے سنا ( یعنی اذان دیتے ہوئے سنا ) تو ارشاد فرمایا : یہ شرک سے نکل گیا ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا ابوامامہ رضی اللہ عنہ بیان کرتے ہیں : ایک دن نبی اکرم صلی اللہ علیہ وسلم باہر نکلے آپ کے ساتھ سیدنا ابوبکر سیدنا عمر سیدنا زید بن ثابت سیدنا عبداللہ بن مسعود رضی اللہ عنہ سیدنا ابی بن کعب اور سیدنا عبداللہ بن عباس رضی اللہ عنہم تھے نبی اکرم صلی اللہ علیہ وسلم اپنی اونٹنی جدعاء پر سوار تھے جب آپ آبادی سے باہر تشریف لائے تو آپ نے ایک شخص کو اللہ اکبر اللہ اکبر کہتے ہوئے سنا نبی اکرم صلی اللہ علیہ وسلم ٹھہر گئے اور غور سے سننے لگے جب اس نے اللہ اکبر اللہ اکبر پڑھا تو نبی اکرم صلی اللہ علیہ وسلم نے ارشاد فرمایا : اس ذات کی قسم جس کے دست قدرت میں میری جان ہے ، اس نے حق والی گواہی دی ہے ، جب اس نے اَشْهَدُ أَنْ لَا إِلَهَ إِلَّا اللَّهُ پڑھا تو نبی اکرم صلی اللہ علیہ وسلم نے فرمایا : اس شخص کے بارے میں میں یہ سمجھتا ہوں اس ذات کی قسم جس کے دست قدرت میں میری جان ہے یہ جہنم سے نکل گیا یہ بات آپ نے تین مرتبہ ارشاد فرمائی پھر آپ صلی اللہ علیہ وسلم نے ارشاد فرمایا : یہ کتوں والا شخص ہو گا ( جو شکار کے لئے نکلا ہو گا ) ۔ سیدنا عبداللہ بن مسعود رضی اللہ عنہ اور سیدنا عبداللہ بن عباس رضی اللہ عنہما گئے تو انہوں نے اس شخص کو ایسا ہی پایا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی علی بن یزید الہانی ہے ، اور وہ ” ضعیف“ ہے ۔

سیدنا صفوان بن عسال رضی اللہ عنہ بیان کرتے ہیں : ایک مرتبہ ہم لوگ نبی اکرم صلی اللہ علیہ وسلم کے پاس موجود تھے اسی دوران آپ نے ایک شخص کو اذان دیتے ہوئے سنا تو نبی اکرم صلی اللہ علیہ وسلم نے ارشاد فرمایا : یہ فطرت پر ہے ، اس نے کہا: أَشْهَدُ أَنْ لَا إِلَهَ إِلَّا اللَّهُ تو نبی اکرم صلی اللہ علیہ وسلم نے ارشاد فرمایا : اس نے حق گواہی دی ہے ، اس نے پڑھا : اشْهَدُ أَنَّ مُحَمَّدًا رَسُول اللَّہ تو نبی اکرم صلی اللہ علیہ وسلم نے ارشاد فرمایا : یہ جہنم سے نکل گیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عطاء بن عجلان ہے ، جس پر جھوٹ بولنے کا الزام عائد کیا گیا ہے ، اور وہ متروک الحدیث ہے ۔