مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب مؤذن اذان دیتا ہے ، تو آسمان کے دروازے کھول دیے جاتے ہیں “ ۔
یہ روایت امام ابویعلیٰ نے نقل کی ہے ، اس کی سند میں ایک راوی یزید رقاشی ہے ، جس سے استدلال کرنے کے بارے میں اختلاف کیا گیا ہے ۔

سیدنا انس بن مالک رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” خبردار ! اذان اور اقامت کے درمیان کی جانے والی دعا مسترد نہیں ہوتی ہے ، تو تم لوگ ( اس مخصوص وقت میں ) دعا کرو “ ۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد اور دیگر حضرات نے بھی نقل کی ہے ، تاہم اس میں یہ الفاظ نہیں ہیں : ” تم لوگ دعا کرو“ ۔
یہ روایت امام ابویعلی نے نقل کی ہے اس کے بعض طرق میں یہ الفاظ ہیں : ” مستجاب ہوتی ہے “ ۔ اس روایت کی سند میں بھی یزید رقاشی نامی راوی ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب نماز کے لئے اذان دی جاتی ہے ، تو شیطان پیٹھ پھیر کر روحاء تک چلا جاتا ہے جہاں اسے اذان کی آواز سنائی نہ دے ( جب اذان ہوتی ہے ) تو آسمان کے دروازے کھول دیے جاتے ہیں ، اور دعا مستجاب ہوتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی زمعہ بن صالح ہے ، جسے لوگوں نے ضعیف قرار دیا ہے ۔