مجمع الزوائد ومنبع الفوائد

سیدنا علی بن ابوطالب رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کی اقتداء میں صبح کی نماز پڑھتے تھے تو ہم میں سے کوئی ایک دوسرے کو ( اندھیرا زیادہ ہونے کی وجہ سے ) پہچان نہیں سکتا تھا ۔
یہ روایت امام بزار نے نقل کی ہے ، اور اس کے رجال ” ثقہ “ ہیں ۔

سیدنا عروہ بن مضرس رضی اللہ عنہ بیان کرتے ہیں : نبی اکرم صلی اللہ علیہ وسلم صبح کی نماز اس وقت ادا کر لیتے تھے جب صبح صادق ہو جاتی تھی ۔
یہ روایت امام بزار نے نقل کی ہے ، اس کی سند میں ایک راوی داؤد بن یزید اؤدی ہے ، جسے یحیی بن معین اور امام نسائی رحمہ اللہ نے ضعیف قرار دیا ہے شعبہ اور سفیان نے اس سے حدیث روایت کی ہے ۔ ابن عدی کہتے ہیں : میں نے اس کے حوالے سے کوئی منکر روایت نہیں دیکھی جب کسی ” ثقہ “ شخص نے اس سے روایت نقل کی ہو یہ شخص اگرچہ حدیث میں قوی نہیں ہے ، لیکن جب کوئی ” ثقہ “ شخص اس سے حدیث روایت کرے گا ، تو اس کی نقل کردہ حدیث کو قبول کیا جائے گا ۔

سیدنا حرملہ رضی اللہ عنہ بیان کرتے ہیں : میں قبیلے کے وفد کے ساتھ نبی اکرم صلی اللہ علیہ وسلم کی خدمت میں حاضر ہوا آپ نے ہمیں صبح کی نماز پڑھائی جب آپ نے سلام پھیرا تو میں نے اپنے پہلو میں موجود شخص کے چہرے کی طرف دیکھا تو اندھیرا زیادہ ہونے کی وجہ سے میں اسے پہچان نہیں سکا میں نے نبی اکرم صلی اللہ علیہ وسلم کی خدمت میں عرض کی : یا رسول اللہ ! آپ مجھے کوئی ہدایت کیجئے نبی اکرم صلی اللہ علیہ وسلم نے ارشاد فرمایا : تم اللہ تعالی سے ڈرتے رہنا اگرچہ تم کچھ لوگوں کے درمیان موجود ہو اور تم ان لوگوں کو یہ کہتے ہوئے ۔ سنو کہ وہ تمہیں یہ کہیں جو چیز تمہیں اچھی لگتی ہے وہ تم کر لو اور خواہ تم انہیں یہ کہتے ہوئے سنو کہ وہ تمہیں کہیں جو چیز تمہیں ناپسند ہوتی ہے تم اسے چھوڑ دو ۔
یہ روایت امام طبرانی نے معجم کبیر میں ضرغامہ بن علیہ بن حرملہ کی ان کے والد کے حوالے سے ان کے دادا سے نقل کردہ روایت کے طور پر نقل کی ہے ۔ ابن ابوحاتم نے اس کا ذکر اس میں کیا ہے ، جو ہم نے یہاں ذکر کیا ہے ، اور اس پر تردید نہیں کی ہے ، اس روایت کے بقیہ رجال کی توثیق کی گئی ہے ضرغامہ اور حرملہ ان دونوں راویوں کا ذکر ابن حبان نے کتاب ” الثقات “ میں کیا ہے ۔

سیدہ ام سلمہ رضی اللہ عنہا بیان کرتی ہیں : خواتین نبی اکرم صلی اللہ علیہ وسلم کی اقتداء میں صبح کی نماز میں شریک ہوتی تھیں پھر وہ اپنی چادریں لپیٹ کر واپس جاتی تھیں تو اندھیرے کی وجہ سے انہیں پہچانا نہیں جا سکتا تھا ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں صرف امام طبرانی کے استاد کا معاملہ مختلف ہے ۔

سیدنا بلال رضی اللہ عنہ بیان کرتے ہیں : میں نے ایک مرتبہ سردی میں صبح کی اذان دی تو لوگ نماز ادا کرنے کے لئے نہیں آئے نبی اکرم صلی اللہ علیہ وسلم نے فرمایا : اے بلال لوگوں کو کیا ہوا ہے ؟ میں نے عرض کی : سردی کی وجہ سے وہ نہیں آ سکے ہیں ۔ نبی اکرم صلی اللہ علیہ وسلم نے فرمایا : اے اللہ ان سے سردی کو دور کر دے سیدنا بلال رضی اللہ عنہ کہتے ہیں : تو میں نے لوگوں کو دیکھا کہ وہ صبح کی نماز کے لئے آ رہے تھے ۔
یہ روایت امام بزار نے نقل کی ہے ، اس کی سند میں ایک راوی ایوب بن سیار ہے اور وہ ” ضعیف“ ہے ۔

عمرو بن دینار بیان کرتے ہیں : انہوں نے سیدنا عبداللہ بن مسعود رضی اللہ عنہ کے صاحبزادے کو یہ بیان کرتے ہوئے سنا ہے : سیدنا عبداللہ بن مسعود رضی اللہ عنہ صبح کی نماز اسی طرح اندھیرے میں ادا کرتے تھے جیسے سیدنا عبداللہ بن زبیر رضی اللہ عنہما اسے اندھیرے میں ادا کرتے تھے ، اور مغرب کی نماز اس وقت ادا کر لیتے تھے جب سورج غروب ہو جاتا تھا وہ یہ کہتے تھے کہ جس طرح اللہ تعالیٰ نے ارشاد فرمایا ہے : ” رات کے پھیلنے تک اور فجر کی تلاوت بے شک فجر کی تلاوت میں ( فرشتوں کی ) حاضری ہوتی ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا عمارہ بن رویبہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص سورج نکلنے سے پہلے کی نماز اور اس کے غروب ہونے سے پہلے کی نماز ادا کرے اور اس بات کی گواہی دے کہ اللہ تعالیٰ کے علاوہ کوئی معبود نہیں ہے ، تو وہ جنت میں جائے گا “ ۔
( علامہ ہیثمی فرماتے ہیں : ) میں یہ کہتا ہوں : ان صحابی کے حوالے سے ” صحیح “ میں یہ حدیث منقول ہے : ” ایسا شخص جہنم میں داخل نہیں ہو گا ، جو سورج نکلنے سے پہلے والی اور اس کے غروب ہونے سے پہلے والی نماز ادا کرے “ ۔ یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ۔

ابوعبیدہ رضی اللہ عنہ بیان کرتے ہیں : سیدنا عبداللہ رضی اللہ عنہ فرماتے ہیں : اللہ تعالی کی طرف سے مقرر کردہ فرشتے یکے بعد دیگرے آتے ہیں رات کے محافظ آتے ہیں ، اور دن کے محافظ صبح صادق کے وقت آتے ہیں اگر تم لوگ چاہو ( تو اس کی تائید میں ) یہ آیت پڑھ لو ” اور فجر کی تلاوت اور بے شک فجر کی تلاوت میں حاضری ہوتی ہے “ ۔
یہ روایت امام طبرانی نے نقل کی ہے ، اور ابوعبیدہ نامی راوی نے اپنے والد ( سیدنا عبداللہ بن مسعود رضی اللہ عنہ ) سے سماع نہیں کیا ہے ۔