مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ( استنجاء کرتے ہوئے ) جب کوئی شخص ڈھیلے استعمال کرے ، تو اسے طاق تعداد میں انہیں استعمال کرنا چاہیے ، بے شک اللہ تعالیٰ طاق ہے ، اور وہ طاق کو پسند کرتا ہے ، کیا تم نے یہ نہیں دیکھا کہ آسمان سات ہیں ، اور زمینیں سات ہیں ، اور طواف کے چکر سات ہوتے ہیں ( راوی بیان کرتے ہیں : ) انہوں نے اور بھی کچھ چیزوں کا ذکر کیا ۔
یہ روایت امام بزار نے اور امام طبرانی نے معجم اوسط میں نقل کی ہے ، انہوں نے یہ الفاظ زائد نقل کئے ہیں رحمہ اللہ ” والجمار “ اس کے رجال صحیح کے رجال ہیں ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص ڈھیلے استعمال کرے ، تو اسے تین ڈھیلے استعمال کرنے چاہیے “ ۔ ایک روایت میں یہ الفاظ ہیں : ” جب کوئی شخص پاخانہ کرے ، تو اسے تین مرتبہ پونچھنا چاہیے “ ۔ یہ دونوں روایات امام أحمد نے نقل کی ہیں اور ” جب کوئی شخص ڈھیلے استعمال کرے “ والی روایت کے راوی ثقہ ہیں ۔

سیدنا عقبہ بن عامر رضی اللہ عنہ بیان کرتے ہیں : نبی اکرم صلی اللہ علیہ وسلم جب سرمہ لگاتے تھے ، تو طاق تعداد میں لگاتے تھے اور جب ڈھیلے استعمال کرتے تھے ، تو طاق تعداد میں استعمال کرتے تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابن لہیعہ ہے اور وہ ضعیف ہے ۔

سیدنا ابوایوب انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص پاخانہ کرے ، تو اسے تین پتھروں کے ذریعے ( اپنی شرمگاہ کو ) صاف کرنا چاہیے ، یہ چیز اس کے لئے کفایت کر جائے گی “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال کی توثیق کی گئی ہے ، البتہ سیدنا ابوایوب انصاری رضی اللہ عنہ کے ساتھی ( یعنی شاگرد ) ابوشعیب کا معاملہ مختلف ہے ، میں نے اُن کے بارے میں کوئی تعدیل یا جرح نہیں دیکھی ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم تک ” مرفوع “ حدیث کے طور پر ، یہ بات نقل کرتے ہیں : آپ صلی اللہ علیہ وسلم نے ارشاد فرمایا ہے : ” جو شخص ڈھیلے استعمال کرے ، وہ تین استعمال کرے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی قیس بن ربیع ہے ، جسے سفیان ثوری اور شعبہ نے ثقہ قرار دیا ہے ، اور ایک جماعت نے اسے ضعیف کہا: ہے ۔

سیدنا طارق بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب تم ڈھیلے استعمال کرو ، تو طاق تعداد میں کرو ، اور جب تم وضو کرو ، تو ناک میں پانی ڈال لیا کرو “ ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

سیدنا سائب ابوخلاد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب کوئی شخص بیت الخلاء میں داخل ہو ، تو اُسے تین پتھروں کے ذریعے ( شرمگاہ کو ) پونچھ لینا چاہیے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی حماد بن جعد ہے ، جس کے ضعیف ہونے پر محدثین کا اتفاق ہے ۔

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم سے پاکیزگی حاصل کرنے کے بارے میں سوال کیا گیا ، تو آپ نے ارشاد فرمایا : کیا تم میں سے کسی ایک کو تین پتھر نہیں ملتے ، دو پتھر اطراف کے لئے ہوں اور ایک پتھر پاخانہ کے خروج کے مقام کے لیے ہو ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عقیق بن یعقوب زبیری ہے ، امام ابوزرعہ فرماتے ہیں : اس نے امام مالک کی زندگی میں ” موطا “ حفظ کر لی تھی ۔

علقمہ بیان کرتے ہیں : مشرکین سے تعلق رکھنے والے ایک شخص نے سیدنا عبداللہ رضی اللہ عنہ سے کہا: مجھے یوں لگتا ہے کہ آپ کے آقا نے آپ لوگوں کو ہر چیز کی تعلیم دی ہے ، یہاں تک کہ انہوں نے آپ لوگوں کو یہ بھی تعلیم دی ہے کہ آپ نے قضاء حاجت کے لیے کیسے جاتا ہے ؟ سیدنا عبداللہ بن مسعود رضی اللہ عنہ نے فرمایا : اگر تو تم مذاق اڑانا چاہ رہے ہو ( تو میں تمہیں یہ بتا دیتا ہوں ) کہ انہوں نے ہمیں اس بات کی تعلیم دی ہے ( کہ قضائے حاجت کرتے ہوئے ) ہماری شرمگاہ کا رخ قبلہ کی طرف نہیں ہونا چاہیے ( راوی بیان کرتے ہیں : میرا خیال ہے ، انہوں نے یہ بھی بیان کیا تھا : ) کہ ہم اپنے دائیں ہاتھ کے ذریعے استنجاء نہ کریں ، ہم مینگنی کے ذریعے استنجاء نہ کریں ، ہم ہڈی کے ذریعے استنجاء نہ کریں ، اور ہم تین پتھروں سے کم کے ذریعے استنجاء نہ کریں ۔
یہ روایت امام بزار نے نقل کی ہے ، اس کے رجال کی توثیق کی گئی ہے ۔

امام ابویعلیٰ نے ، اُن کے حوالے سے
یہ روایت نقل کی ہے : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ وتر ہے ، اور وہ وتر ( طاق ) کو پسند کرتا ہے ، جب تم ڈھیلے استعمال کرو ، تو طاق تعداد میں استعمال کرو “ ۔ اس روایت کی سند میں ایک راوی أحمد بن عمران اخلسی ہے اور وہ متروک ہے ۔

سیدنا عبداللہ بن زبیر رضی اللہ عنہما فرماتے ہیں : پہلے لوگ ( قضائے حاجت کے بعد ) اپنی شرمگاہ پانی کے ذریعے دھویا نہیں کرتے تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی لیث بن ابوسلیم ہے وہ ثقہ ہے لیکن اس کی نسبت اختلاط کا شکار ہونے اور غلطی کرنے کی طرف کی گئی ہے ۔

سیدنا عمر بن خطاب رضی اللہ عنہ کے بارے میں یہ بات منقول ہے : اُنہوں نے پیشاب کرنے کے بعد اپنی شرمگاہ کو مٹی کے ذریعے پونچھ لیا ، پھر وہ ہماری طرف متوجہ ہو کر بولے : ہمیں اسی طرح کرنے کی تعلیم دی گئی ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی روح بن جناح ہے اور وہ ضعیف ہے ۔